Judíti 2
2
Holofɛ́ni ɖó ná yi ɖó hwɛ nú togun e ma se tónú ǎ lɛ́ɛ é
1Xwe afɔtɔn-nukún-atɔngɔ́ ɔ́ e mɛ Nabukodonɔzɔ́ɔ ɖu axɔ́sú ɖo Asilíi é ɔ́ azǎn ko-nukún-wegɔ́ ɔ́ e ɖo sun nukɔn tɔn mɛ ɔ́, mɛ gěgé ɖo xó ɖɔ wɛ ɖo hɔn ɔ́ mɛ dó gbetakɛ́n e axɔ́sú ɔ́ zé, bó ɖɔ émí ná wa nǔ xá wɛ̌kɛ́ ɔ́ bǐ é wú. 2Nabukodonɔzɔ́ɔ ɖó gbesɔ nú gǎn hɔn-yitɔ́ tɔn lɛ́ɛ kpó tomɛxó e ɖo axɔ́súɖuto tɔn mɛ lɛ́ɛ kpó. É yí xó bó ɖe linlin tɔn xlɛ́ yě ɖɔ émí ná gblé nǔ gbɔn xá bǐ mɛ. 3Nabukodonɔzɔ́ɔ sín nǔkplɔ́nmɛtɔ́ lɛ́ɛ ɖo xó e é ɖɔ lɛ́ɛ jí; é ɖó ná sú to e gbɛ́ ylɔ̌ tɔn lɛ́ɛ é sín kún dó.
4Ée é ɖótó yě vɔ ɔ́, Nabukodonɔzɔ́ɔ ɔ́ dó wɛn sɛ́ dó ahwangán kannɔ tɔn Holofɛ́ni. Holofɛ́ni nɛ́ ɔ́ wɛ nyí mɛ nukɔntɔn e bɔ dó axɔ́sú ɔ́ wú é. Nabukodonɔzɔ́ɔ ɖɔ n'i ɖɔ: 5“Nyɛ axɔ́sú ɖaxó wɛ̌kɛ́nɔ ɔ́, un ná gbe we. Yi cyán gbɛtɔ́ jiɖedéwú. Cyán sɔ́ja afɔzɔntɔ́ adɔ̌kpo ayizɛ́n (120.000) kpódó sɔ́xátɔ́ děgba atɔn (12.000) kpó. 6Yi tɔ́n ahwan to e ɖo gbadahwe jí lɛ́ɛ bǐ, ɖó yě se tónú nú mì ǎ. 7Ɖɔ nú yě ɖɔ yě ní ná mì ayǐkúngban kpó sin kpán bó ná dó ɖe xlɛ́ ɖɔ yě se tónú nú mì. Ée xomɛ sin mì ɔ́, un ná tɔ́n ahwan yě; ahwan ce lɛ́ɛ ná vun blá to yětɔn lɛ́ɛ, bó ná jó yě nú sɔ́ja ce lɛ́ɛ bɔ yě ná vɔ dɔkun yětɔn lɛ́ɛ bǐ. 8Mɛ e xo akpa lɛ́ɛ ná gɔ́ ayǐsundo lɛ́ɛ mɛ; mɛkúkú ná gɔ́ tɔsisa kpó tɔ lɛ́ɛ kpán túnflá. 9Un ná kplá ahwankannumɔ lɛ́ɛ yi to ma yá to ɖé mɛ. 10Hwi Holofɛ́ni, a nǎ yi klá jɛ to yětɔn lɛ́ɛ nú dó ta ce mɛ. Yě ɖó ná jó yěɖée nú we, lo ɔ́, hɛn yě kɛ́ɖɛ́ kɛ́ɖɛ́ káká yi jɛ hwenu e nǎ dɔn tó nú yě dó é. 11Hu mɛ e ma jló ná se tónú ǎ lɛ́ɛ, hu yě, ma se gbɔ, bó vívá nǔ e yě ɖó ɖo ayǐkúngban jí é bǐ sín kún dó. 12Nú un ɖo gbɛ jɛ́n wɛ ɔ́, un xwlé ɖó axɔ́sú hlɔ́nhlɔ́n ce wú ɖɔ: nǔ e un ɖɔ ɔ́, un ná bló. 13Hwi Holofɛ́ni ɔ́, ma dó vɛ̌ nú ɖokpó géé ɖo ée un zɔ́n we lɛ́ɛ mɛ ó, yǎ wǔ bló ɖ'é jí pɛ́pɛ́pɛ́ dó hwenu, ɖó axɔ́sú towe wɛ un nyí.”
14Holofɛ́ni tɔ́n sín hɔn ɔ́ mɛ; é ylɔ́ axɔ́ví lɛ́ɛ, gǎn hɔn-yitɔ́ lɛ́ɛ kpódó ahwangán kannɔ e ɖo Siliya sín ahwangɔnu mɛ é kpó. 15Lě e axɔ́sú ɔ́ ɖɔ gbɔn ɔ́, è cyán gbɛtɔ́ téwúngbéjú ahwanfuntɔ́: sɔ́ja yǎyá adɔ̌kpo ayizɛ́n (120.000), kpódó sɔ́ja sɔ́xátɔ́ e nɔ́ zán gǎ é kpó děgba atɔn (12.000). 16È to sɔ́ja lɛ́ɛ sonu sonu lě e è nɔ xwe ahwan fun gbé é ɖɔhun. 17É ba lǎkúnmí gěgé, tócí, kpódó tócíví lɛ́ɛ kpán nú yě ná hɛn agban lɛ́ɛ. É ba lɛ̌ngbɔ́, nyibú, kpó gbɔ̌ asi kpó nú sɔ́ja lɛ́ɛ ná hɛn dó agban mɛ. É sukpɔ́ káká bɔ è sixú xa ǎ. 18É bló agbanmɛnú nú sɔ́ja ɖokpó ɖokpó bɔ é túnflá. É sɔ́ kpatágan kpó siká kpó ɖo axɔ́sú ɔ́ sín dɔkun mɛ dó sú axɔ́ yě ná. 19Holofɛ́ni jɛ ali, é kpó ahwangɔnu tɔn kpán; é jɛ nukɔn bó ná bló ayǐ ɖó nú Nabukodonɔzɔ́ɔ, lobo ná gba to e ɖo gbadahwe jí lɛ́ɛ kpó ahwankɛkɛ́ tɔn lɛ́ɛ, sɔ́xátɔ́ tɔn lɛ́ɛ kpó sɔ́ja tɔn téwúngbéjú lɛ́ɛ kpó. 20 Mɛ gěgé sɔgbe dó yě wú; yě sukpɔ́ káká bɔ è sixú xa ǎ, bó cí bɔkle abǐ nyɛ̌kɛ́n e ɖo gbětótló mɛ é ɖɔhun.
21Yě gosín Ninívu, bó zun zɔnlin xɔ azǎn atɔn yi ayǐkúngban wɛnjɛ e ɖo Bɛkitilɛti ɔ́ jí, fínɛ́ wɛ yě sɔ́ ahwanslǎ ɖó, ɖo só e ɖo totaligbé nú Silíi Aga tɔn é. 22Holofɛ́ni gba to e ɖo sókan mɛ ɔ́ bǐ, ée kpó ahwan tɔn lɛ́ɛ kpó: sɔ́ja e ɖo afɔ zɔn wɛ lɛ́ɛ kpó ahwankɛkɛ́ lɛ́ɛ kpó sɔ́xátɔ́ lɛ́ɛ kpó. 23É ɖu ɖo Pudinu lɛ́ɛ kpó Ludinu lɛ́ɛ kpó jí. É gba Hlasisi kpó Isimayɛ́li sín akɔ lɛ́ɛ e nɔ gbětótló e ɖo tofɔligbé Keleɔni tɔn sín xá mɛ lɛ́ɛ. 24É dó asá Efláti tɔ kpó Mɛzopotamíi tɔ ɔ́ kpó. É gba toxo e è mɛ ahohó lɛ́ lɛ̌ dó bɔ é xwedó Habɔ́ɔ tɔsisa ɔ́ bó sɛ yá káká xutó é. 25É ɖu ɖo Silisíi to ɔ́ jí, bó hu mɛ e ɖo ta syɛ́n wɛ lɛ́ɛ é. É yi káká Jafɛ́ti to e kpan nukɔn Alabíi ɖo totaligbé é. 26É kpó ahwan tɔn lɛ́ɛ kpó ɔ́, yě xá Madiáannu lɛ́ɛ; é dó nɔtɛn yětɔn lɛ́ɛ zo, bó bɛ́ kanlin yětɔn lɛ́ɛ. 27Ée jinukún yiya hwenu su ɔ́, é jɛ te ayǐkúngban wɛnjɛ e ɖo Damási é. É dó gle yětɔn lɛ́ɛ bǐ zo, bó hu nyibú yětɔn lɛ́ɛ kpó gbɔ̌ yětɔn lɛ́ɛ bǐ kpó. É gba toxo yětɔn lɛ́ɛ, bó vívá gletoxo lɛ́ɛ; é hu asúká yětɔn lɛ́ɛ ɖó hwǐ wú. 28Mɛ e ɖo Mɛditɛlanɛ́ɛ tɔ ɔ́ tó lɛ́ɛ bǐ wɛ ɖi xɛsi: yě wɛ nyí Sidɔ́ɔn toxo mɛnu lɛ́ɛ, Tíi, Sulu, Okina, Taminiya, Asidɔ́di kpó Asikalɔ́ɔn kpán nu lɛ́ɛ, ɖi xɛsi tawun.
Currently Selected:
Judíti 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.