Judíti 1
1
Za e Nabukodonɔzɔ́ɔ kpódó Aapaxádi kpó li é
1Nabukodonɔzɔ́ɔ ɖu axɔ́sú ɖo Asilíi ɔ́ xwe tɔn wěwe gɔ́ ɔ́ mɛ wɛ é sɔ́ Ninívu dó ɖó tokpɔnla. Hwenɛ́nu ɖokpó ɔ́, Aapaxádi ɖu axɔ́sú nú Mɛdi lɛ́ɛ ɖo Ɛkibatáni tomɛ. 2Aapaxádi mɛ dǒ lɛ́ lɛ̌ dó toxo ɔ́ bɔ è sɔ́ awǐnnyakpe dó bló ná. Kpe ɖokpó ɖokpó gbló yi nǔjlɛ́kpo ɖokpó adaɖé, bó ɖi ga yi nǔjlɛ́kpo atɔn. Dǒ lɛ́ɛ yi jǐ nú nǔjlɛ́kpo gbantɔ́n (35), bó gbló ada nú nǔjlɛ́kpo koatɔ́n (25). 3É mɛ agbǒ ɖé lɛ́ɛ ɖó tohɔn lɛ́ɛ kpá, bɔ jǐ yiyi yětɔn yi nǔjlɛ́kpo kanɖé wǒ (50); dodó e jí è mɛ agbǒ lɛ́ɛ ɖó é sín gbló nyí nǔjlɛ́kpo gban (30). 4Hɔn lɛ́ɛ yi jǐ nú nǔjlɛ́kpo gbantɔ́n (35), bɔ gbló yětɔn nyí nǔjlɛ́kpo ko. É ɖo mɔ̌, bónú ahwangɔnu lɛ́ɛ kpódó sɔ́ja lɛ́ɛ kpó ná vo ɖo yiyi kpó wiwa kpó mɛ.
5Nabukodonɔzɔ́ɔ jínjɔ́n gǎnzinkpo jí ɔ́ xwe tɔn wěwegɔ́ ɔ́ mɛ wɛ é wá tɔ́n ahwan axɔ́sú Aapaxádi. Yě fun ahwan ɖo ayǐkúngban wɛnjɛ e ɖo Hlagáwu é jí. 6Yě mɛ e ɖo sókan mɛ lɛ́ɛ, mɛ e ɖo Efláti, Tíglitɔ kpó Idasipíitɔ sín dodomɛ kpó yě mɛ e ɖo ayǐkúngban wɛnjɛ e ɖo axɔ́sú Elimayísi tɔn Alyɔki sín acɛ mɛ é bǐ kpó tɔ́n, bó nɔ Nabukodonɔzɔ́ɔ gúdo bó zin i dó. Mɔ̌ wɛ to gěgé wá nɔ Babilɔ́nunu lɛ́ɛ jí bó fun ahwan.
7Asilíi xɔ́sú Nabukodonɔzɔ́ɔ ɖe mɛ sɛ́ dó fí bǐ; é sɛ́ mɛ dó Pɛ́sinu lɛ́ɛ gɔ́n ɖo zǎnzǎnhwe jí, Silisíinu lɛ́ɛ gɔ́n ɖo gbadahwe jí, é sɛ́ mɛ dó Damási, bó sɛ́ dó Libáan, bó sɛ́ dó Anti Libáan, bó sɛ́ mɛ dó káká Mɛditɛlanɛ́ɛ xu ɔ́ tó. 8É lɛ́ ɖe mɛ sɛ́ dó mɛ e ɖo Kaamɛ́li sókan mɛ lɛ́ɛ, yě mɛ e ɖo Galadi tomɛ lɛ́ɛ, mɛ e ɖo Galilée totaligbé lɛ́ɛ, kpódó mɛ e ɖo Izlayɛ́li sín ayǐkúngban wɛnjɛ jí lɛ́ɛ kpán gɔ́n. 9Wɛnsagun axɔ́sú Nabukodonɔzɔ́ɔ tɔn lɛ́ɛ yi mɔ Samalíi toxo mɛnu lɛ́ɛ kpódó yě mɛ e ɖo xá e ɖo Judɛ́ɛn tɔ gúdo lɛ́ɛ kpó káká yi jɛ Jeluzalɛ́mu, Batanɛ, Kelowusi, yě lɛ́ yi káká tɔsisa e nyí dogbó nú Ejípu to ɔ́ é mɛ, bó lɛ́ yi zɔga ɖo Tapanɛ́si kpó Hlamusɛ́si kpó sín toxo lɛ́ɛ, kpó Gocɛ́ni kpó sín xá lɛ́ɛ bǐ mɛ. 10Yě lɛ́ hun káká yi zɔga dó Sowani kpó Mɛfísi kpó sín toxo lɛ́ɛ gúdo, kpó fí e ɖo Ejípu é kpó káká yi jɛ Etiopíi sín denu. 11Lo ɔ́, to nɛ́ ɔ́ mɛ nu lɛ́ɛ ɖótó, Nabukodonɔzɔ́ɔ Asilíi xɔ́sú ɔ́ sín ylɔ̌ ǎ. Yě gbɛ́ ɖɔ émí kún ná nɔ jǐ tɔn ɖo ahwan ɔ́ mɛ ó. Yě sɔ́ axɔ́sú ɔ́ dó mɔ gbɛtɔ́ kpaa ná, bó ɖi xɛsi n'i ǎ. Yě nya mɛsɛ́dó tɔn lɛ́ɛ asígbá alɔgbá kpó winnyá kpó. 12Énɛ́ ɔ́ wú ɔ́, é wlí xomɛsin ɖaxó ɖé dó to énɛ́ mɛ nu lɛ́ɛ jí. É xwlé nǔ bǐ ɖɔ émí ná wa xá yě, ɖó ji e é ɖe dó dɔkun e ɖo axɔ́súɖuto tɔn mɛ ɔ́ wú. É lin ɖɔ émí ná vívá Silíi tomɛnu lɛ́ɛ, Damási, Silíi kpó yě mɛ e ɖo Mɔwabu, Amumɔ́ɔ, Judáa, Ejípunu lɛ́ɛ, sín yě mɛ e ɖo Mɛditɛlanɛ́ɛ tɔ tó é káká yi jɛ yě mɛ e ɖo Xu Vɔvɔ tó lɛ́ɛ mɛ.
13Xwe afɔtɔn-nukún-wegɔ́ ɔ́ e mɛ Nabukodonɔzɔ́ɔ ɖu axɔ́sú ɔ́, é tɔ́n ahwan axɔ́sú Aapaxádi kpó ahwangɔnu tɔn lɛ́ɛ kpó bó ɖu ɖo jǐ tɔn. Aapaxádi sín sɔ́ja lɛ́ɛ bǐ sɔ́xátɔ́ tɔn lɛ́ɛ kpó ahwankɛkɛ́ tɔn lɛ́ɛ bǐ kpó jó agɔ yi gǔdo. 14Axɔ́sú Mɛdi lɛ́ɛ tɔn sín toxo lɛ́ɛ bǐ jɛ axɔ́sú Nabukodonɔzɔ́ɔ lɔ mɛ, bɔ é wá káká Ɛkibatáni. Fínɛ́ ɔ́, é ɖ'alɔ xɔ e é gbá ɖě dó ɖě jí lɛ́ɛ jí, bó bɛ́ nǔ e ɖo tokplétɛn lɛ́ɛ, bɔ toxo e è nɔ kpa ɖɛkpɛ tɔn é ɖu winnyá. 15É nya Aapaxádi wlí ɖo Hlagáwu sín sókan mɛ, bó hu i ɖó hwǐ wú. Mɔ̌ wɛ é hu acɛ tɔn káká yi fífónu. 16É lɛ́ kɔ wá Ninívu kpó ahwangɔnu e mɛ ahwanfuntɔ́ gěgé ɖe é kpán. Yě bǐ gbɔjɛ́ bó ɖu xwe ɖo toxo ɔ́ mɛ xɔ azǎn kantɔn (120).
Currently Selected:
Judíti 1: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.