Ɛsitɛ́ɛ Glɛ̌sigbe 3
3
Hamáa kpó Maadocée kpó húzú kɛntɔ́
1 Ée nǔ nɛ́ lɛ́ɛ bǐ jɛ wá yi gúdo ɔ́, axɔ́sú Aatazɛɛzɛsi wá sɔ́ Hamáa Bugayɔ́si ée nyí vǐ Hamadatɔ́si tɔn é ɖó tɛn ɖaxó mɛ; é zé e yi hǎga jí, lobo sɔ́ ɛ jínjɔ́n tɛn nukɔntɔn ɔ́ mɛ ɖo xɔ́ntɔn tɔn lɛ́ɛ mɛ. 2 Azɔ̌watɔ́ hɔnmɛ tɔn lɛ́ɛ bǐ nɔ́ wá ɖe kɔ́ n'i lě e axɔ́sú ɔ́ zɔ́n gbɔn é, lo ɔ́, Maadocée nɔ ɖe kɔ́ ɖě nú Hamáa ǎ. 3 Azɔ̌watɔ́ ɖé lɛ́ɛ wá kanbyɔ́ ɛ ɖɔ: “Étɛ́wú wɛ a ma ka ké ya nú nǔ e axɔ́sú ɔ́ ɖɔ é ǎ?” 4 Ayǐ ɖokpó kó hɔ́n ɔ́, yě nɔ́ ɖo xó ɖokpó ɔ́ ɖɔ n'i wɛ, lo ɔ́, éyɛ́ ka nɔ́ wlí tó yě wǔ ǎ. Hwenɛ́nu ɔ́, yě wá yi ɖɔ nú Hamáa ɖɔ Maadocée kún jló ná se nǔ e ɖɔ wɛ axɔ́sú ɔ́ ɖe é ó. Maadocée ka wá ɖe xlɛ́ yě ɖɔ Jwifu wɛ nú émí. 5 Hamáa mɔ ganjí ɖɔ Maadocée gbɛ́ ɖɔ émí kún ná ɖe kɔ́ nú émí ó; xomɛ sin Hamáa taala, 6 bɔ é jló ná hu Jwifu lɛ́ɛ bǐ sín axɔ́súɖuto Aatazɛɛzɛsi tɔn ɔ́ mɛ. 7 Aatazɛɛzɛsi yi zinkpo jí ɔ́, xwe tɔn wěwe mɛ ɔ́, Hamáa wá ɖe gbeta ɖé tɔ́n; é zɔ́n bɔ è nyi akɔ; é jló ná tunwun azǎn ɔ́ kpódó sun e mɛ è sixú vívá togun Maadocée tɔn dó, ɖo wunkinkɛn ɖokpó mɛ é. Akɔ ɔ́ wá jɛ Adáa sín sun ɔ́ sín azǎn wɛ̌nɛgɔ́ ɔ́ jí.
Hamáa to kú Jwifu lɛ́ɛ tɔn
8 Hamáa wá ɖɔ nú axɔ́sú Aatazɛɛzɛsi ɖɔ: “Togun ma ɖó gbe kpɔ́ ɖé má yěɖée kpé axɔ́súɖuto towe bǐ mɛ. Sɛ́n yětɔn gbɔn vo nú akɔta ɖě lɛ́ɛ bǐ tɔn, lobɔ yě nɔ́ ké ya nú sɛ́n e ɖɔ nǔ dó hɔnmɛ ɔ́ nu lɛ́ɛ é ɖěbǔ ǎ. É ɖó le ɖěbǔ nú axɔ́sú ɔ́ nú é ná jó yě nyi vivo mɛ ɖo to ɔ́ mɛ ǎ. 9 É jló mɛ hǔn, è bo sú kún yětɔn dó; hwenɛ́nu ɔ́, nyɛ ná ɖe akwɛ́ talɛ́nti děgba we afɔwó (10.000), bɔ é ná nɔ te nú azɔ̌ énɛ́ ɔ́.” 10 Ée axɔ́sú ɔ́ se mɔ̌ ɔ́, alɔkɛ́ jɛ́n é ɖe sín alɔ tlóló, bó sɔ́ dó así nú Hamáa, lobo nú é ná sɔ́ wuntun tɔn dó wěma e è wlǎn dó Jwifu lɛ́ɛ wú lɛ́ɛ é jí. 11 Axɔ́sú ɔ́ ɖɔ nú Hamáa ɖɔ: “Hɛn akwɛ́ towe wú, lobo wa mɛ énɛ́ lɛ́ɛ nú lě e é jló we gbɔn é.”
12 È ylɔ̌ wěgbóhɛntɔ́ axɔ́sú ɔ́ tɔn lɛ́ɛ bǐ kplé ɖo azǎn wɛ̌nɛgɔ́ ɔ́ e ɖo sun nukɔntɔn ɔ́ mɛ é gbe, lobɔ yě wlán wěma lě e Hamáa zɔ́n gbɔn é, lobo sɛ́ dó gǎn ɖaxó ɖaxó to ɔ́ tɔn lɛ́ɛ, kpódó gǎn hɔn-yitɔ́ tokpɔn ɖokpó ɖokpó tɔn kpó, sín Ɛndu káká wá Etiopíi, bó sɛ́ dó tokpɔn kantɔn tɛ́nwe (127) lɛ́ɛ kpódó mɛ e ɖɔ nǔ dó togun ɖokpó ɖokpó nu lɛ́ɛ é kpán dó gbe yětɔn lɛ́ɛ mɛ, ɖo axɔ́sú Aatazɛɛzɛsi sín nyǐkɔ mɛ. 13 Énɛ́ gúdo ɔ́, yě sɛ́ axɔ́sú wɛnsagun ma gbɛ́ gbe ná lɛ́ɛ dó nú yě ní yi má wěma lɛ́ɛ gbɔn axɔ́súɖuto ɔ́ bǐ mɛ. Wěma ɔ́ lɛ́ ná gbe ɖɔ è nǐ hu Jwifu lɛ́ɛ bǐ sín to ɔ́ mɛ; kéze ɖokpó wɛ è nǎ sɔ́ ɖó te ɖo sun wěwegɔ́ ɔ́ e è nɔ ylɔ́ ɖɔ Adáa é mɛ bó dó wa azɔ̌ énɛ́ ɔ́ ná, lobo ná hɛn nǔɖókan yětɔn bǐ gblé.
Currently Selected:
Ɛsitɛ́ɛ Glɛ̌sigbe 3: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.