Ɛsitɛ́ɛ Glɛ̌sigbe 2
2
Ɛsitɛ́ɛ húzú axɔ́si
1 Ée nǔ nɛ́ lɛ́ɛ jɛ wá yi, bɔ axɔ́sú ɔ́ wá fá xomɛ gúdo é ɔ́, é sɔ́ ké ya ɖé nú Asitɛ́ɛn ǎ, é hɛn xó e é ɖɔ lɛ́ɛ bǐ ayi mɛ, lobo ka nɔ lɛ́ flín lě e é ɖó hwɛ n'i gbɔn é bǐ. 2 Gǎn hɔn-yitɔ́ e ɖo kan tɔn nu lɛ́ɛ é wá ɖɔ n'i ɖɔ: “È nǎ ba ɖyɔ̌vǐ wínnyáwínnyá e ɖo alɔ jí, bó nyɔ́ ɖɛkpɛ ganjí lɛ́ɛ é nú axɔ́sú ɔ́. 3 Axɔ́sú ɔ́ ní bó fɔ totɛ́ntinzɔ́watɔ́ ɖó tokpɔn tɔn lɛ́ɛ nu, lobo nú yě ná mɔ tɛn dó xo ɖyɔ̌vǐ wínnyáwínnyá e ɖo alɔ jí, bó nyɔ́ kpɔ́n ganjí lɛ́ɛ é kplé dó Suzi tomɛ ɖo nyɔ̌nu lɛ́ɛ xwé gbe. È nǎ bɛ́ yě dó alɔ mɛ nú agooɖojǐe e nɔ́ kpé nukún nyɔ̌nu lɛ́ɛ wú lɛ́ɛ é. Nǔ e yě ná sá bó ná nyɔ́ ɖɛkpɛ lɛ́ɛ é ɔ́, è nǎ ná bǐ yě, bónú yě ná bló agbaza yětɔn ɖó ná. 4 Nyɔ̌nu e sín nǔ ná nyɔ́ axɔ́sú ɔ́ nukún mɛ ɔ́ ná húzú axɔ́si dó Asitɛ́ɛn tɛn mɛ.” Xó ɔ́ nyɔ́ axɔ́sú ɔ́ nukún mɛ, lobɔ é bló gbɔn jí.
5 Jwifu ɖokpó ɖo Suzi fínɛ́, bɔ è nɔ ylɔ́ ɛ ɖɔ Maadocée. Jayilɔ́si, Semɛyiyási, Kisayiyási sín hɛ̌nnu mɛ wɛ é jɔ ɖe, lobo ka gosín Bɛnjamɛ́ɛ kúnkan mɛ. 6 [6] Ahwan wɛ wlí i, bɔ é ɖo mɛ e Nabukodonɔzɔ́ɔ Babilɔ́nu xɔ́sú ɔ́ wlí sín Jeluzalɛ́mu lɛ́ɛ é mɛ. 7 É ká ɖo tɔ́ tɛnmɛ nú nyɔ̌nuví ɖé, tɔ́ tɔn nɔví Aminadábu sín vǐ nyɔ̌nu wɛ; nyɔ̌nuví ɔ́ nɔ́ nyí Ɛsitɛ́ɛ. Tɔ́cyɔvǐ wɛ, bɔ Maadocée kpé nukún wǔ tɔn, bónú é ná nyí asi tɔn. Nyɔ̌nuví ɔ́ nyɔ́ ɖɛkpɛ ɖésú.
8 Ée è xa gbetakɛ́n axɔ́sú ɔ́ tɔn nú to ɔ́ gúdo ɔ́, è wǎ xo nyɔ̌nuví wínnyáwínnyá gěgé ɖé lɛ́ɛ kplé dó Suzi tomɛ. È bɛ̌ yě dó alɔ mɛ nú Gayi nyɔ̌nu lɛ́ɛ jí kpɔ́n tɔ́. Ɛsitɛ́ɛ ɖo nyɔ̌nuví énɛ́ lɛ́ɛ mɛ. 9 Nyɔ̌nuví ɔ́ sín nǔ jɛ Gayi tɔn jí, bɔ é jɛ nǔ e é ná wa n'i ɔ́ ba jí tlóló. É fyá, bó yi sɔ́ nǔsísá e ná bló agbaza tɔn ɖó ɔ́ kpó nǔ e é ná ɖu é kpó wá n'i. É lɛ́ fɔ nyɔ̌nuví nukúnɖéjí tɛ́nwe wá n'i sín hɔnmɛ. É nɔ́ tɔ́jú i ganjí, é kpódó ɖyɔ̌vǐ tɔn tɛ́nwe, gungun dó n'i tɔ́ lɛ́ɛ kpán ɖo Halɛ́mu. 10 Ɛsitɛ́ɛ ka ɖɔ to e mɛ nu é nyí é kpódó kúnkan e mɛ é jɔ ɖe é kpán nú mɛɖé gbeɖé ǎ, ɖó Maadocée wɛ dó sɛ́n tɔn n'i. 11 Ɖésú lɔ ɔ́, ayǐhɔ́ngbe ayǐhɔ́ngbe wɛ Maadocée nɔ ɖo sa ɖi gbɔn nyɔ̌nu lɛ́ɛ sín kɔ́xo jí wɛ, lobo nɔ ɖo nǔ e ná jɛ dó Ɛsitɛ́ɛ wú é cɔ́ wɛ.
12 Ée sun wěwe wá yi gúdo ɔ́, nyɔ̌nuví ɖokpó ná sɛkpɔ́ axɔ́sú ɔ́ sín hwenu su. Nǔsísɔ́ hwenu ɔ́, lě e é cí gbɔn é ɖíe: è nǎ sá nǔsáwǔ wǎn flíflí xɔ sun ayizɛ́n; è nǎ lɛ́ sɔ́ sun ayizɛ́n ɖěvo ɖó te, bó ná zán nǔ e ná bló agbaza tɔn ɖó bɔ é ná nyɔ́ kpɔ́n é. 13 Énɛ́ gúdo ɔ́, ɖyɔ̌vǐ ɖokpó ɖokpó ná sɛkpɔ́ axɔ́sú ɔ́; súnnu ɖokpó wɛ ɖó acɛ ná kplá ɛ sín nyɔ̌nu lɛ́ɛ sín nɔtɛn yi axɔ́sú ɔ́ xɔ mɛ. 14 É ná yi gbadanu bɔ ayǐtéhɔ̌nnu tɔn zǎnzǎn ɔ́, é ná lɛ́ kɔ yi nyɔ̌nu lɛ́ɛ sín nɔtɛn wegɔ́ ɔ́ ɖěe ɖo Gayi agooɖojǐe axɔ́sú ɔ́ tɔn sín acɛ mɛ é. Ényí è ma lɛ́ wá ylɔ́ ɛ alɔkpa vo ǎ ɔ́, é sɔ́ ɖó acɛ bó ná yi axɔ́sú ɔ́ gɔ́n ǎ.
15 Ée Ɛsitɛ́ɛ vǐ nyɔ̌nu Aminadábu ɖěe nyí tɔ́ nɔví Maadocée tɔn é fó nǔsísɔ́ hwenu tɔn, bó ná sɛkpɔ́ axɔ́sú ɔ́ é ɔ́, é gbɛ́ nǔ e agooɖojǐe ɔ́ kplɔ́n ɛ lɛ́ɛ é ɖěbǔ ǎ. Ɛsitɛ́ɛ sín nǔ jɛ mɛ e ko mɔ ɛ lɛ́ɛ bǐ tɔn jí. 16 È kplá Ɛsitɛ́ɛ yi jó nú axɔ́sú Aatazɛɛzɛsi ɖo hɔnmɛ, ɖo sun wěwegɔ́ ɔ́ e nɔ́ nyí Adáa é mɛ, gǎnɖuɖu axɔ́sú ɔ́ tɔn sín xwe tɛ́nwegɔ́ ɔ́ mɛ. 17 Ɛsitɛ́ɛ sín nǔ jɛ axɔ́sú ɔ́ tɔn jí hú nyɔ̌nuví ɖě lɛ́ɛ bǐ tɔn lobɔ é yí wǎn n'i hú mɛ ɖě lɛ́ɛ bǐ. Axɔ́sú ɔ́ sɔ́ jɛ̌gbákún asi tɔn tɔn sɔ́ xwe nú Ɛsitɛ́ɛ. 18 Énɛ́ ɔ́ gúdo ɔ́, axɔ́sú ɔ́ wá ɖu agɔ̌ gɛnnyigɛnnyi ɖokpó, lobo flɔ́n to xɔ azǎn tɛ́nwe. Fínɛ́ ɔ́, é ylɔ́ xɔ́ntɔn tɔn lɛ́ɛ bǐ kpó azɔ̌watɔ́ nukúnɖéjí lɛ́ɛ bǐ kpó, lobo wlí alɔ xá Ɛsitɛ́ɛ. É ɖe akwɛ́ kpo nú nǔ bǐ ɖo to ɔ́ mɛ.
19 Maadocée ka ɖo azɔ̌ wa wɛ ɖo hɔn ɔ́ mɛ. 20 Ɛsitɛ́ɛ ka ɖɔ to e mɛ nu é nyí é nú mɛɖé kpɔ́n gbeɖé ǎ, ɖó Maadocée dó sɛ́n n'i bó ɖɔ é ní sí Mawu lobo ka wa nǔzɔ́nmɛ tɔn lɛ́ɛ lě e é bló gbɔn hwenu e é ɖo émí gɔ́n é ɖɔhun. Ɛsitɛ́ɛ húzú alɔ nú nǔtí ɖo walɔ tɔn mɛ ǎ.
Maadocée se asé e è blǎ dó axɔ́sú ɔ́ wú é
21 Ɖ'ayǐ ɔ́, é sɔ́ Maadocée ɖó tɛn ɖaxó ɖé mɛ, bɔ agooɖojǐe we e lɔ mɛ hɔnmɛ ɔ́ ɖe lɛ́ɛ é jɛ wǔ hwan dó e jí, lobo sí te bó ná hu axɔ́sú Aatazɛɛzɛsi ɔ́. 22 Maadocée wá tɔ́n byɔ́ xó ɔ́ mɛ; é wá sɔ́ xó ɔ́ ɖó tó mɛ nú Ɛsitɛ́ɛ, lobɔ éyɛ́ wá yi wlí bǐ sésé ɖɔ nú axɔ́sú ɔ́ ɖó Maadocée sín nyǐkɔ mɛ. 23 Axɔ́sú ɔ́ kan nǔ byɔ́ nya we lɛ́ɛ; énɛ́ gúdo ɔ́, è hu yě. Axɔ́sú ɔ́ zɔ́n ɖɔ è nǐ wlán dó tan wéma to ɔ́ tɔn mɛ; gbɔn mɔ̌ ɔ́, é sɔ́ Maadocée su, lobo nú nǔ ɖagbe e Maadocée wa lɛ́ɛ ní má bú ó.
Currently Selected:
Ɛsitɛ́ɛ Glɛ̌sigbe 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.