2 Makabée 8
8
Judáa Makabée fɔ́n gǔ
1Judáa Makabée kpó mɛ tɔn lɛ́ɛ kpán nɔ gbɔn nǔglɔ́ nǔglɔ́ bó nɔ́ gbɔn gletoxo mɛ gletoxo mɛ. Yě nɔ́ ylɔ́ nɔví yětɔn Jwifu lɛ́ɛ ɖɔ yě ni jɛ túnnu émítɔn. Yě mɛ e ɖo gbejí nú nǔɖiɖi Jwifu lɛ́ɛ tɔn bó jɛ gǔdo yětɔn lɛ́ɛ yi gbɛtɔ́ děgba ɖě afɔwó (6.000) mɔ̌. 2Lě e yě nɔ́ sa vo nú Aklúnɔ gbɔn é ɖíe: “Wǎ hwlɛ́n togun towe e mɛ bǐ ɖo ya dó ná wɛ é. Kú nǔbláwǔ nú Sinsɛnxɔ e yě mɛ e gbɛ́ wǎn nú we lɛ́ɛ hɛn blí é. 3Ɖe xomɛnyínyɔ́ towe xlɛ́ to e yě hɛn gba bɔ nyǐkɔ tɔn ɖo nǎ bǔ wɛ bǐ gbídígbídí é. Ɖǒ tó gbe kanjɔ e kɔn nyi ayǐ bó ɖo axwá dó sɛ́ dó we wɛ ɖɔ a nǐ wá ba hlɔn é tɔn. 4Flín alǎnnú e mɛ ɖé lɛ́ɛ wa bó hu yɔkpɔ́vú xomɛvɔ́nɔ lɛ́ɛ é. Ma wɔn zun e mɛ nɛ́ lɛ́ɛ zun we é ó. Lě e a nǎ ɖe xlɛ́ ɖɔ émí gbɛ́ wǎn nú nǔ nyanya gbɔn é nɛ́.”
5Nú é to ahwangbɛ́ ɖé bɔ Judáa nɔ nukɔn ná ɔ́, mɛ e ma nyí Jwifu ǎ lɛ́ɛ sɔ́ nɔ kpé jǐ tɔn ǎ. Nǔgbó ɔ́, Aklúnɔ nɔ jó xomɛsin dó, bó ná dó ɖe xomɛnyínyɔ́ tɔn xlɛ́ togun tɔn. 6Judáa nɔ tɔ́n ahwan toxo lɛ́ɛ kpódó gletoxo lɛ́ɛ kpán, ma ɖɔ nǔɖé nú yě. É nɔ́ dó yě bǐ zo. É nɔ́ klá jɛ fí nukúnɖéjí lɛ́ɛ nu, bɔ kɛntɔ́ gěgé nɔ hɔn ɖo nukɔn tɔn. 7Zǎn wɛ nɔ kú bɔ é nɔ́ tɔ́n ahwan mɛ. Mɛ bǐ wɛ nɔ kpa glǎglá n'i.
Judáa ɖu ɖo Nikanɔ́ɔ jí
8Nǔ e Filípu mɔ ɔ́ ɖíe: Judáa ɖo nukɔn yi wɛ nǔjɔnǔ tɔn bó fun ahwan xá mɛ ɖé ɔ́, é nɔ ɖu ɖ'é jí. É gbɔ bo wlán wěma sɛ́ dó Putolemɛ́ɛ, nukɔntɔ́ Silíi ɖaxó ɔ́ kpódó Fenisíi kpán tɔn, bó byɔ́ ɛ ɖɔ é ní wá jɛ ahwan axɔ́sú ɔ́ sín nǔ lɛ́ɛ jí. 9Putolemɛ́ɛ sɔ́ Nikanɔ́ɔ, Patlɔkle ví ɔ́ tɛn tɔn mɛ tlóló; “axɔ́sú ɔ́ sín xɔ́ntɔn sa” nukúnɖéjí lɛ́ɛ ɖokpó wɛ. É sɛ́ ɛ dó, bɔ é nɔ ahwanfuntɔ́ adɔ̌kpo ɖokpó (20.000) nu, bó ná dó sú Jwifu lɛ́ɛ sín kún dó. É zɔ́n ahwangán sunvínɔ Gɔjiyasi ɖɔ é ní xwedó émí. Nya nɛ́ ɔ́ ɖó nǔnywɛ́ ɖo ahwanfunfun li nu ɖésú.
10Axɔ́sú Antiyokúsi ka ɖu axɔ́ kpatágan tɔ́nu kanɖé wɛ̌nɛ (54) dó Hlɔ̌manu lɛ́ɛ. Nikanɔ́ɔ ka lin ɖɔ émí ná sa Jwifu lɛ́ɛ kannumɔ yětɔn, bó ná dó sú axɔ́ énɛ́ ɔ́. 11É yá wǔ sɛ́ wɛn dó toxo e sɛ ya Mɛditɛlanɛ́ɛ xu ɔ́ é, ɖɔ è ni wá xɔ Jwifu lɛ́ɛ sín kannumɔ. É dó akpá ɖɔ émí ná sa mɛ kanwe wǒ (90) yí kpatágan kilóo koatɔ́n nukún-we (27). É lin ɖɔ Nǔbǐwúkpétɔ́ ɔ́ ná dɔn tó nú émí ǎ.
12Judáa se ɖɔ Nikanɔ́ɔ jɛ ali. É yá wǔ ɖɔ nú mɛ tɔn lɛ́ɛ ɖɔ ahwangɔnu kɛntɔ́ tɔn ɔ́ ko sɛ yá. 13Xɛsinɔ e ma ɖi nǔ nú hwɛjijɔ Mawu tɔn ɔ́ lɛ́ɛ hɔn yi fí ɖěvo. 14Mɛ e kpo lɛ́ɛ sa nǔ e yě ɖǒ lɛ́ɛ bǐ, bó sa vo nú Aklúnɔ ɖɔ é ní hwlɛ́n mɛ e Nikanɔ́ɔ, nya nǔ gbɛ́hɛn nɛ́ ɔ́ ko sa cóbó ná tɔ́n ahwan Jwifu lɛ́ɛ é. Yě ɖɔ nú Aklúnɔ ɖɔ: 15“Nú a na bo ma jló ná hwlɛ́n mǐ gán ɖó mǐ ɖésúnɔ wú ǎ hǔn, bo flín akɔ e a jɛ xá tɔ́gbó mǐtɔn lɛ́ɛ é. Flín ɖɔ nyǐkɔ towe ɖaxó susunɔ ɔ́ wɛ è ylɔ̌ dó mǐ jí.”
16Judáa Makabée ka kplé mɛ tɔn lɛ́ɛ. Yě mɛ gbɛtɔ́ děgba ɖě afɔwó (6.000) wɛ. É ɖɔ nú yě ɖɔ: “Kɛntɔ́ ní ma dó xɛsi nú mi ó. Mi ma ɖi xɛsi ɖo yě mɛ e ma nyí Jwifu ǎ bó ɖo mǐ táfú wɛ lɛ́ɛ sín ahwan nukɔn ó. Mi fun ahwan kpódó akɔ́nkpinkpan kpán. 17Mi nɔ flín alǎnnú e mɛ nɛ́ lɛ́ɛ wá dó Sinsɛnxɔ ɔ́ wú é tɛgbɛ. Yě dó winnyá Jeluzalɛ́mu, bɔ é víví hwedó yě bɔ yě lɛ́ sú tɔ́gbó mǐtɔn lɛ́ɛ sín hwɛndo sín kún dó.” 18Judáa lɛ́ vɔ́ ɖɔ d'é ji ɖɔ: “Kɛntɔ́ mǐtɔn lɛ́ɛ ɖeji dó ahwanfunnú yětɔn lɛ́ɛ kpódó ta syɛ́nsyɛ́n nǔwiwa yětɔn lɛ́ɛ kpán wú, nǔ e yě nyɔ̌wa ɖo ahwanfunfun li nu bɔ to nɔ ké é. Amɔ̌, mǐdɛɛ lɛ́ɛ ɔ́, Mawu Nǔbǐwúkpétɔ́ ɔ́ wú wɛ mǐ ɖeji dó. É mi ta ɖokpó lě kpowun ɔ́ é kó kpé, bɔ é ná flí yě mɛ e ɖo ahwan ná tɔ́n mǐ wɛ é, yě kpódó gbɛ ɔ́ bǐ kpán. 19Mi flín hwenu e Mawu cyɔ́n alɔ tɔ́gbó mǐtɔn lɛ́ɛ jí lɛ́ɛ é bǐ, lě e é bló ɖo Senakelíbu hwenu bɔ gbɛtɔ́ adɔ̌kpo tɛ́nnɛ děgba ɖě afatɔ́n (185.000) kú é. 20Mi lɛ́ flín za e é li xa Galatinu lɛ́ɛ ɖo Babilɔ́nu é. Gbe nɛ́ gbe ɔ́, Masedwaninu děgba ɖokpó (4.000) wɛ dó alɔ Jwifu děgba we (8.000) bɔ yě tɔ́n ahwan gbɛtɔ́ adɔ̌kpo ayizɛ́n (120.000). É vɛ́ wǔ nú Masedwaninu lɛ́ɛ taala. Amɔ̌, Mawu sín alɔdómɛ wa nǔ, bɔ Jwifu děgba we (8.000) lɛ́ɛ ɖu ɖo kɛntɔ́ yětɔn lɛ́ɛ jí bǐ dégbédégbé, bó yí dɔkun yětɔn lɛ́ɛ gěgé.”
21Gbɔn xó ɖiɖɔ nɛ́ lɛ́ɛ gbla mɛ ɔ́, Judáa dó wǔsyɛ́n lanmɛ nú sɔ́ja tɔn lɛ́ɛ, bónú yě ná nɔ gbesisɔ mɛ bó na kú dó Mawusɛ́n ɔ́ kpódó tɔ́gbó yětɔn lɛ́ɛ sín ayǐkúngban kpán ta mɛ. É má ahwangɔnu tɔn ɖó donu ɛnɛ. 22Bɔ ahwanfuntɔ́ afɔtɛ́nwe kanwe ko (1.500) mɔ̌ ɖo ɖokpó ɖokpó mɛ. É zé nɔví tɔn Sinmɔ́ɔ, Jozɛ́fu kpódó Jonatáan kpán ɖó gbɛ̌ta ɖokpó ɖokpó nu. É ɖésúnɔ ɖo ahwangɔnu ɔ́ ɖokpó nú. 23 É ɖɔ nú Ɛsidliyási ɖɔ é ní xa Mawuxówéma ɔ́ sín akpáxwé ɖokpó. Énɛ́ gúdo ɔ́, é ɖe xógbe ɖé tɔ́n: “Kpɛ́ Mawu tɔn,” lobo nɔ nukɔn nú gbɛ̌ta nukɔntɔn ɔ́ bó tɔ́n ahwan Nikanɔ́ɔ.
24Nǔbǐwúkpétɔ́ ɔ́ ɖo kpɔ́ xá Jwifu lɛ́ɛ. Yě kpé wú bó gblé gbɛ dó nú kɛntɔ́ děgba we afatɔ́n (9.000). Yě gblé wǔ Nikanɔ́ɔ sín sɔ́ja gěgé, bó nya yě bǐ dó wezun nu. 25Yě yǐ mɛ e wá kannumɔ yětɔn xɔ gbé lɛ́ɛ sín akwɛ́ sín yě sí. Yě dó wezun jɛ mɛ e hɔn lɛ́ɛ gúdo nú hwenu gěgé. Amɔ̌, ée ganmɛ ko sɛ yi e ɔ́, yě gbɔ bó lɛ́ kɔ. 26Ɖó gbɔjɛzán ɔ́ kpo sɔ wɛ zɔ́n, bɔ yě gbɔ bó jó yě dó. 27Yě fɔ kɛntɔ́ lɛ́ɛ sín ahwanfunnú lɛ́ɛ, bó bɛ́ dɔkun yětɔn lɛ́ɛ. Énɛ́ gúdo ɔ́, yě nyi gbɔjɛzán ɔ́. Yě ji susu kpa nú Aklúnɔ sín han lɛ́ɛ bó xo ɖɛ gěgé dó dó kú n'i. Nǔgbó wɛ, azǎn nɛ́ gbe ɔ́, é hwlɛ́n yě gán. É lɛ́ jɛ xomɛnyínyɔ́ tɔn ɖe xlɛ́ yě jǐ. 28Ée gbɔjɛzán wá yi ɔ́, yě mǎ dɔkun e è yě hɛn sín ahwangbénu lɛ́ɛ ɖě nú mɛ e è dó ya ná lɛ́ɛ, asúkúsi lɛ́ɛ kpódó tɔ́cyɔvǐ lɛ́ɛ kpán. Nǔ e kpo lɛ́ɛ ɔ́, yě mǎ ɖo yěɖée lɛ́ɛ kpódó vǐ yětɔn lɛ́ɛ kpán tɛ́ntin. 29Ée yě bló nǔ nɛ́ ɔ́ vɔ́ ɔ́, yě to ɖɛxixo kpɔ́mɛ tɔn ɖokpó. Yě byɔ́ Aklúnɔ xomɛnyɔ́tɔ́ taala ɔ́ ɖɔ é ní ná ayij'ayǐ mɛsɛntɔ́ tɔn lɛ́ɛ káká sɔ́yi.
Judáa ɖu ɖo Timɔtée jí
30Énɛ́ gúdo, Judáa kpódó mɛ tɔn lɛ́ɛ kpán wá li za xá Timɔtée kpódó Bakidɛ́si sín ahwan lɛ́ɛ kpán. Kɛntɔ́ e yě hu lɛ́ɛ hú sɔ́ja adɔ̌kpo ɖokpó (20.000), bó yí ahohó gěgé. Yě mǎ dɔkun wɔ̌buwɔ́bú e yě hɛn sín ahwangbénu lɛ́ɛ ɖó donu we zɛ̌nzɛ̌n: ɖokpó nyí yě ɖésúnɔ tɔn, wegɔ́ ɔ́ nyí mɛ e è dǒ ya ná ɖ'ayǐ lɛ́ɛ tɔn: tɔ́cyɔvǐ lɛ́ɛ, asúkúsi lɛ́ɛ, ma wɔn degénɔ lɛ́ɛ. 31Yě xo ahwanfunnú kɛntɔ́ lɛ́ɛ tɔn lɛ́ɛ kplé, ɖó lyɛ̌n jí, bó sɛ yě xwe ɖó fí e jɛ xá é. Bó bɛ́ dɔkun e kpo lɛ́ɛ wá Jeluzalɛ́mu. 32Yě hu ahwangbɛ́ ɖěɖě jɛ akɔ xá Timɔtée é sín nukɔntɔ́ e nyí gbɛtɔ́ dídá ɖésú bó wa nyanya gěgé nú Jwifu lɛ́ɛ é. 33Ɖo ahwan jí ɖu ɖe sín xwe e yě ɖu ɖo Jeluzalɛ́mu lɛ́ɛ é hwenu ɔ́, yě dó yě mɛ e fyɔ́ Sinsɛnxɔ ɔ́ sín hɔn lɛ́ɛ é zo. Yě dó Kalisitɛ́nu e yi hɔn hwlá cí xwé kpɛví ɖé gbe é zo. Lě e é mɔ tódɔnnúmɛ e jɛ xá nǔ e é wa dó Mawu wú lɛ́ɛ gbɔn é nɛ́.
Nikanɔ́ɔ hɔn yi Antiyɔ́ci
34Nikanɔ́ɔ kplá ajɔ̌tɔ́ afatɔ́n (1.000) wá, bónú yě ná xɔ Jwifu lɛ́ɛ. Amɔ̌, nya alǎnnúwatɔ́ nɛ́ ɔ́, 35Aklúnɔ dó winnyá ɛ ɖo mɛ e é má sɔ́ ylɔ́ ɖɔ nǔɖé ǎ lɛ́ɛ é nukɔn. É ɖe ahwanwu tɔn ɖagbe ɖagbe ɔ́ nyi gbě, bó hɔn é ɖokpónɔ gbɔn gle mɛ gle mɛ kannumɔ e jɛ gbě é ɖɔhun. Ta wɛ nyɔ́ n'i ɖésú bɔ é wá Antiyɔ́ci. Lo ɔ́, cóbónú é ná jɛ fínɛ́ ɔ́, ahwan tɔn bǐ wɛ è ko gba kíjá. 36É kó dó akpá nú Hlɔ̌manu lɛ́ɛ ɖɔ émí ná sa Jeluzalɛ́munu lɛ́ɛ dó sú axɔ́sú ɔ́ sín axɔ́. Din ɔ́, é mɔ nǔ jɛ wú ɖɔ mɛɖé kún sixú ɖu ɖo Jwifu lɛ́ɛ jí ó. Ɖó yě ɖó mɛ ɖé, bɔ é nɔ́ jɛ ahwan yě jí, bɔ yě nɔ́ se gbe nú sɛ́n e mɛjíkpɔ́ntɔ́ nɛ́ ɔ́ dó nú yě é.
Currently Selected:
2 Makabée 8: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.