2 Makabée 9
9
Antiyokúsi Epifani bɛ́ azɔn
1Hwenɛ́nu ɖo gblǒlǒ mɛ ɔ́, axɔ́sú Antiyokúsi lɛ́ kɔ sín Pɛ́si wǔbláwúblá. 2Nǔgbó ɔ́, é byɔ́ Pɛsepulisi toxo ɔ́ mɛ, bó ba ná bɛ́ nǔ e ɖo Sinsɛnxɔ fínɛ́ tɔn mɛ é bǐ, bɔ toxo ɔ́ ná jɛ kan tɔn nu. Lo ɔ́, togun ɔ́ fɔ́n gǔ bó fɔ ahwanlyánnú. Yě zun dó jǐ tɔn bó nya ɛ tɔ́n, bɔ é gbɔ bó lɛ́ kɔ kpódó winnyá kpán. 3Hwenu e é wá Ɛkibatáni ɔ́, é se nǔ e xá Nikanɔ́ɔ kpódó Timɔtée sín sɔ́ja lɛ́ɛ kpán é. 4Énɛ́ ɔ́, xomɛ sin i ɖésú, bɔ é ba ná sún akpɔ dó Jwifu lɛ́ɛ wú, ɖó nya e Pɛ́sinu lɛ́ɛ nya ɛ é wú. Énɛ́ wú wɛ é ɖe gbe dó ahwankɛkɛ́kuntɔ́ tɔn ɖɔ é ní má nɔ te cóbó yi fí e yě xwe ɔ́ ó. Ɖo goyíyí tɔn mɛ ɔ́, é ɖɔ: “Nú un ko wá Jeluzalɛ́mu ɔ́, un ná sɔ́ toxo ɔ́ dó ɖó cyɔɖitɛn Jwifu lɛ́ɛ tɔn ná.”
Lo ɔ́, é tunwun ɖɔ Mawu kó ɖo hwɛ na ɖɔ xá émí wɛ ǎ. 5Ée é ɖɔ xó bó sɔ́ nu nyi ayǐ lě tlóló ɔ́, Aklúnɔ e nɔ mɔ nǔ bǐ ɔ́, Mawu Izlayɛ́li tɔn ɔ́ ɖó wimɛzɔn baɖabaɖa e ma sixú gbɔ ǎ é n'i. Xomɛwlí ɖaxó ɖé jɛ axɔ́sú ɔ́ jí, bó ɖo adɔví tɔn lɛ́ɛ sló wɛ magbokɔ. 6Wǔvɛ́ mɔ̌hun wɛ ka jɛ xá ɛ, ɖó é lɔmɔ̌ xo dǎka tɛnmɛ tɛnmɛ dó sló adɔví nú mɛ lɛ́ɛ, bɔ è tunwun bǐ káká jɛ din ǎ. 7Nǔ ɖo mɔ̌ có, goyíyí tɔn ɖe kpo ǎ. É kpo ɖo ji ɖe dó éɖée wú wɛ; é kpo ɖo xomɛ sin dó Jwifu lɛ́ɛ wɛ, bó nɔ́ ɖe gbe ɖɔ è nǐ hwlɛndó. Yiyi wɛ yě ɖe, bɔ é jɛ ayǐ sín ahwankɛkɛ́ e ɖo wezun ɖaxó jí é mɛ. Ayǐ jijɛ tɔn syɛ́n káká bɔ awa tɔn kpó afɔ tɔn kpó sín xú lɛ́ɛ bǐ wɛ́n.
8Nukún xwixwe yɔywɛ ɖé mɛ din zaanɖé ɔ́, é kpo ɖo ji ɖe dó éɖée wú wɛ, bó nɔ́ sɔ́ éɖée dó mɔ nǔsúɖaxó. É nɔ́ mɔ ɖɔ émí hɛn ɔ́, émí ná ɖe gbe nú xu, bó hɛn ɔ́, émí ná da só ɖaxó lɛ́ɛ ɖo nǔdagan jí. Bɔ din ɔ́, éɖíe ká ɖo kɔ́ mɛ, bɔ mɛ jɛ́n ná bɛ́ ɛ dó azunzɔnnɔ kpɔn mɛ e. Énɛ́ ɖe hlɔ̌nhlɔ́n Mawu tɔn xlɛ́ mɛ bǐ. 9Nya dídá nɛ́ ɔ́ kpo ɖo gbɛ, lo ɔ́, é ɖo wǔvɛ́ mɔ wɛ ɖésú. Agbaza tɔn nɔ wɔ, bɔ nǔvíɖogbɛ nɔ tɔ́n sín mɛ. Wǎn nǔ kúkú tɔn ɖé nɔ́ gosín wǔ n'i, bó nɔ́ zé sɔ́ja lɛ́ɛ bǐ sín ayi ɖó aga. 10Din zaanɖé ɔ́, axɔ́sú ɔ́ nɔ lin ɖɔ émí ná sɔga sunví jǐxwé tɔn lɛ́ɛ, bɔ din ɔ́, mɛɖé sixú lɛ́ sɛ yá ɛ ǎ, ɖó mɛɖé sixú nɔ wǎn baɖabaɖa nɛ́ ɔ́ nu ǎ.
11Nǔ gbɛ́ dó Antiyokúsi bǐ. Mawu sín alɔ wɛ jɛ wǔ tɔn. Hwebǐnu ɔ́, é nɔ́ ɖo wǔvɛ́ gěgé mɛ. Lo wɛ é jɛ goyíyí tɔn ɖe kpo jí, bó jɛ gǎnmaɖowǔ éɖée tɔn mɔ jí nɛ́. 12É ɖésúnɔ sɔ́ sixú nɔ wǎn éɖée tɔn nu ǎ. Énɛ́ ɔ́, é gbɔ bó ɖɔ: “É jɛ xá ɖɔ è se gbe nú Mawu. Nú è nyí nǔɖíɖó ɔ́, è ma lin ɖɔ émí ɖo hǎ tɔn jí ó.” 13Nya adǎkaxotɔ́ nɛ́ ɔ́ dó akpá nú Aklúnɔ, lo ɔ́, é sɔ́ sixú kú nǔbláwǔ tɔn ǎ. 14Akpá e Antiyokúsi dó lɛ́ɛ ɖíe: “Jeluzalɛ́mu hwlɛ́n dó wɛ un ɖe bó ná gba toxo mímɛ́ nɛ́ ɔ́, bó sɔ́ ɛ dó bló kúxwé ná. Din ɔ́, é ní húzú toxo e ɖo éɖée sí é. 15Un ɖe gbe ɖɔ è bɛ̌ Jwifu lɛ́ɛ sín cyɔ, yě kpódó vǐ yětɔn lɛ́ɛ tɔn kpán nú gběkanlin lɛ́ɛ, ɖó yě jɛ xá ná yi yɔ mɛ ǎ. Din ɔ́, un ba ɖɔ yě ni ɖó acɛ ɖokpó ɔ́ xá Atɛ́ninu lɛ́ɛ. 16Ɖ'ayǐ ɔ́, un yi fɔ akwɛ́nú lɛ́ɛ ɖo Sinsɛnxɔ Aklúnɔ tɔn mɛ. Din ɔ́, vɔ̌sánú e nyɔ́ ɖɛkpɛ hú bǐ é wɛ è nǎ bɛ̌ dó ɖó acɔ́ n'i. Un na ná nǔzínzán mímɛ́ gěgé ɖěvo ɖó ɖěɖě e è bɛ̌ hɛn yi lɛ́ɛ sín tɛnmɛ. Un na sɔ́ dɔkun nyi ɖésúnɔ tɔn lɛ́ɛ dó sú vɔ̌sísáxɔ́ lɛ́ɛ ná. 17Hú mɔ̌ ɔ́, un ná húzú Jwifu, bó ná jlá gǎnhúnǔ Aklúnɔ tɔn gbɔn fí e gbɛtɔ́ ɖe lɛ́ɛ é bǐ.”
Antiyokúsi Epifani wlán wěma sɛ́ dó Jwifu lɛ́ɛ
18Wǔvɛ́ Antiyokúsi tɔn lɛ́ɛ ɖe kpo ǎ, ɖó Aklúnɔ ɖó hwɛ e jɛ xá ɛ é n'i. Axɔ́sú ɔ́ mɔ ɖɔ lě e ninɔmɛ émí tɔn cí é ɔ́, nǔɖónukún ɖé kún sɔ́ kpo nú émí ó, bó gbɔ bó wlán wěma ɖokpó sɛ́ dó Jwifu lɛ́ɛ bɔ é cí vosisa ɖɔhun. Nǔ e é wlán é ɖíe:
19“Antiyokúsi e nyí axɔ́sú, bó nyí ahwangán ɔ́ dó gbe toví tɔn nukúnɖéjí Jwifu lɛ́ɛ bó ɖo lanmɛsyɛ́n kpódó nyɔ̌ná kpán byɔ́ nú yě wɛ ɖo nǔ bǐ mɛ.
20“Ényí mi ɖo ganjí, mi kpó vǐ mitɔn lɛ́ɛ kpán, nǔɖíɖó mitɔn lɛ́ɛ kpán hǔn, é ní nyí susu nú Mawu. Un sɔ́ nǔɖónukún ce bǐ dó alɔ tɔn mɛ. 21Nyɛ ɔ́, un ɖo ayǐmlɔ́mlɔ́ ma ɖó hlɔ̌nhlɔ́n ɖé. Amɔ̌, un ɖo mi flín wɛ kpó wǎn yíyí kpán bó nɔ lin sísí kpó xomɛnyínyɔ́ kpó e mi ɖó dó wǔ ce é kpɔ́n.
“Kɔ lɛ́ wá sín Pɛ́si ce ɔ́, azɔn ɖé blá mì. Un ka ɖó ná kpé nukún mɛ e ɖo acɛ ce mɛ lɛ́ɛ bǐ wǔ. 22Wǔ kú mì ǎ, é nyɔ́ wa ɔ́, un ɖó nukún ɖɔ azɔn ce ná gbɔ. 23Có, un flín ɖɔ tɔ́ ce sɔ́ mɛ e ná nɔ tɛn tɔn mɛ é, hwenu e é yi tɔ́n ahwan mɛ e ɖo totaligbé lɛ́ɛ é. 24Mɔ̌ wɛ é jló gbɔn, nú ado ni ma wá hu mɛ tɔn lɛ́ɛ hwenu e nǔ ma ɖó nukún ɖé alǒ nǔ nyanya ɖé ná wá jɛ dó jǐ tɔn é nɛ́. Nǔgbó wɛ, mɛ ɖokpó ɖokpó tunwun mɛ e axɔ́sú ɔ́ sɔ́ nǔ lɛ́ɛ bǐ dó alɔ mɛ ná é. 25Hú mɔ̌ ɔ́, un wá mɔ ɖɔ: To e lɛ́ lɛ̌ dó mǐ lɛ́ɛ sín axɔ́sú lɛ́ɛ ɖo mǐ cɔ́ wɛ bó se nǔ e nǎ jɛ é. Énɛ́ wú wɛ un sɔ́ axɔ́sú vǐ ce Antiyokúsi. Un ko ɖɔ xó tɔn nú mɛ ɖé lɛ́ɛ bó lɛ́ sɔ́ ɛ dó alɔ mɛ nú yě hwenu e un xwe totaligbé ɔ́, bó ká wlán wěma élɔ́ dó así nú é lɔmɔ̌.
26“Nǔ e byɔ́ mi wɛ un ɖe syɛ́nsyɛ́n ɔ́ ɖíe: mi flín ɖagbe e un wa nú togun mitɔn kpódó ɖokpó ɖokpó mitɔn lɛ́ɛ kpán é. Mi tɛ́nkpɔ́n bó ɖe xomɛnyínyɔ́ mitɔn xlɛ́ nyi kpódó vǐ ce kpán. 27Un tunwun ɖɔ é ná nɔ gbejí nú linlin ce lɛ́ɛ. É ná ɖó gbe kpɔ́ xá mi, bó ná hɛn mi kpó xomɛ fífá kpán.”
28Lě e alǎnnúwatɔ́, mɛdídá nɛ́ e nylá nu dó Mawu wú ɔ́, fó gbɛ tɔn gbɔn ɔ́ nɛ́, ɖo wǔvɛ́ maɖójlɛ̌ mɛ, lě e é kó nɔ wa adǎka gbɔn é ɖɔhun. É kú jɛ gbě dó hɛ̌n mɛ, ɖo sókan mɛ. 29Filípu e nyí xɔ́ntɔn kpɛ xɔ́ntɔn tɔn ɔ́ sɔ́ cyɔ tɔn wá Antiyɔ́ci. Ée é má ɖeji dó Antiyokúsi sín vǐ wǔ ǎ ɔ́, é sɔ́ nǔ bó yi cí Ejípu, ɖo axɔ́sú Putolemɛ́ɛ Filomɛtɔ́ɔ kpá.
Currently Selected:
2 Makabée 9: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.