2 Makabée 7
7
Nɔví nɔví tɛ́nwe kú kpó nɔ yětɔn kpó
1 È wlǐ nɔví nɔví tɛ́nwe. Axɔ́sú Antiyokúsi jló na ná aglǔzalan e Mɔyízisɛ́n ɔ́ gbɛ́ é yě gǎnnugǎnnu, bó ɖó bǎ kpó lanbá kpó nú yě. 2Mɛ ɖokpó yí xó ɖo yě mɛ bó ɖɔ: “Ani ba ɖo mǐ sí wɛ a ɖe tawun? Ényí su jɛ́n mǐ ná ɖu nú tɔ́gbó mǐtɔn lɛ́ɛ sín sɛ́n ɔ́ hǔn, mǐ ɖo gbesisɔ mɛ bó ná kú.”
3Xomɛ sin axɔ́sú ɔ́ taala. É ná gbe ɖɔ è ni zé lanhigan kpódó basya kpán ɖó ado jí. 4Ée gan lɛ́ɛ hun myɔ bo myá ɔ́, é ɖe gbe ɖɔ è nǐ sɛ́n ɖɛ̌ mɛ e ɖɔ xó dó mɛ ɖě lɛ́ɛ nu é tɔn. Mɔ̌ ɖokpó ɔ́, é ná gbe ɖɔ è nǐ kɔ́n anyǔ sín ta wú n'i, bó sɛ́n afɔ tɔn kpó alɔ tɔn lɛ́ɛ kpán ɖo nɔví tɔn ɖě lɛ́ɛ kpódó nɔ yětɔn kpán nukún mɛ. 5Ée é má sɔ́ sixú dán wǔ ǎ ɔ́, axɔ́sú ɔ́ zɔ́n ɖɔ è nǐ sɔ́ ɛ gbɛɖe gbɛɖe nyi dó gan zozo ɔ́ jí. Lan fyɔ́fyɔ́ sín wǎn ka gba kpé tɛn nɛ́ ɔ́ mɛ. Hwenɛ́nu ɔ́, nɔví nɔví ayizɛ́n ɖě lɛ́ɛ kpó nɔ yětɔn kpán ɖo akɔ́nkpinkpan ná yěɖée wɛ. Yě ɖɔ: 6 “Mawu Aklúnɔ mǐtɔn ɖo mǐ mɔ wɛ, bɔ mǐ ɖeji ɖɔ é ná kú nǔbláwǔ mǐtɔn lě e Mɔyízi ko ɖɔ gbɔn ɖ'ayǐ dó han mɛ, hwenu e é ɖo hwɛ dó togun ɔ́ wɛ é, é ɖɔ: ‘Aklúnɔ ná kú nǔbláwǔ nú mɛsɛntɔ́ tɔn lɛ́ɛ.’ ”
7Ée è hu mɛ nukɔntɔn ɔ́ gbɔn mɔ̌ ɔ́, è sɔ́ mɛ wegɔ́ ɔ́, bó ná dó ya n'i. È kɔ́n anyǔ e ɖo ta tɔn wú é kpódó ɖa tɔn lɛ́ɛ kpán. Énɛ́ gúdo ɔ́, è kanbyɔ́ ɛ ɖɔ: “A nǎ ɖu aglǔza lan ɔ́ a abǐ è nǐ dó ya nú wǔjɔnú e ɖo agbaza towe wú lɛ́ɛ bǐ?” 8É yí gbe dó tɔ́gbó tɔn lɛ́ɛ sín gbe mɛ ɖɔ: “Éeǒ!” Énɛ́ wútu wɛ, è lɛ́ dó ya n'i mɛ nukɔntɔn ɔ́ ɖɔhun. 9Hwenu e mɛ wegɔ́ ɔ́ ɖo na kú wɛ ɔ́, é ɖɔ nú axɔ́sú ɔ́ ɖɔ: “Alǎnnúwatɔ́ wɛ nú we! A ɖo mǐ hu wɛ égbé. Amɔ̌, axɔ́sú gbɛ ɔ́ tɔn ná xɔ mǐ mɛ e se tónú nú sɛ́n tɔn lɛ́ɛ ɖo kú sí, bó ná kplá mǐ byɔ́ gbɛ tɔn e ma ná vɔ gbeɖé ǎ é mɛ.”
10Ée mɛ wegɔ́ ɔ́ wá yi ɔ́, è dó ya nú mɛ atɔngɔ́ ɔ́. È ɖɔ n'i ɖɔ é ní tún ɖɛ̌. É bló lě e è ɖɔ gbɔn é, bó lɛ́ gbó adɔ bó dlɛ́n alɔ tɔn lɛ́ɛ. 11É kpan akɔ́n bó ɖɔ: “Mawu e ɖo jǐxwé ɔ́ wɛ ná afɔ kpódó alɔ kpán mì. Lo ɔ́, ɖó sɛ́n tɔn lɛ́ɛ wútu ɔ́, un dó vɛ̌ nú yě bó ɖeji ɖɔ é ná lɛ́ ná yě mì.”
12Lě e nyaví nɛ́ ɔ́ gbó adɔ bo ma mɔ wǔvɛ́ dó mɔ nǔɖé ǎ gbɔn ɔ́ kpácá axɔ́sú ɔ́ kpódó mɛ e lɛ́ dó e lɛ́ɛ kpán.
13Ée é kú gúdo ɔ́, è dǒ ya nú mɛ ɛnɛgɔ́ ɔ́ lɔ gbɔn alɔkpa ɖokpó ɔ́. 14Ée é ɖo na kú wɛ ɔ́, é ɖɔ nú axɔ́sú ɔ́ ɖɔ: “Ényí è kú gbɔn gbɛtɔ́ lɛ́ɛ lɔ mɛ ɔ́, é nyɔ́ ɖɔ è nǐ ɖǒ nukún ɖɔ Mawu ná fɔ́n mɛ sín kú. Lo ɔ́, hwɛ ɔ́, kú towe gúdo ɔ́, a nǎ sixú fɔ́n bó wá nɔ gbɛ ǎ.”
15Énɛ́ gúdo tlóló ɔ́, è kplá mɛ atɔ́ɔ́ngɔ́ ɔ́ wá bó dó ya n'i. 16Lo ɔ́, é kpɔ́n axɔ́sú ɔ́ bó ɖɔ: “A hɛn ɔ́, a nǎ bló nǔ e jló we ɔ́ bǐ ɖo gbɛtɔ́ lɛ́ɛ mɛ, có gbɛtɔ́ jɛ́n hwi lɔ nyí yě ɖɔhun. É ɖo mɔ̌ có, ma vɛdó ɖɔ Mawu ɖe kɔ dó togun tɔn ó. 17Nɔ te kpɛɖé bó ná kpɔ́n lě e gǎn hú nǔ tɔn ná dó ya nú mi gbɔn é; é ná dó ya nú we, bó ná dó ya nú vǐ towe lɛ́ɛ kpódó vǐvú towe lɛ́ɛ kpán.”
18Ée mɛ énɛ́ lɛ́ɛ kú ɔ́, yě kplá mɛ ayizɛ́ngɔ́ ɔ́ wá. Cóbɔ é ná kú ɔ́, é ɖɔ nú axɔ́sú ɔ́ ɖɔ: “Ma blɛ́ hwiɖée ó! Mǐ ɖésú sín agɔ e mǐ jɛ dó Mawu ɔ́ wɛ zɔ́n bɔ mǐ ɖo wǔvɛ́ élɔ́ lɛ́ɛ mɔ wɛ. 19Amɔ̌, hwi mɛ e syɛ́n ta, bó ɖo ahwan fun xá Mawu wɛ ɔ́, ma lin ɖɔ émí ná gán ɖo tó dɔn nú mɛ tɔn sí ó!”
20Nɔ yětɔn kpan akɔ́n ɖésú bɔ é jɛ xá ɖɔ è ni flín i. Vǐ tɔn tɛ́nwe lɛ́ɛ bǐ wɛ kú ɖo nukún tɔn mɛ, ɖo kéze gbe ɖokpó ɔ́. Có, é ká gbó adɔ ɖo nǔ nɛ́ lɛ́ɛ bǐ nukɔn, ɖó é ɖeji dó Mawu wú. 21É ɖɔ xó nú vǐ tɔn lɛ́ɛ ɖokpó ɖokpó dó ná akɔ́nkpinkpan yě, dó gbe yětɔn mɛ. Linlin ɖagbe wɛ gɔ́ ayi mɛ n'i; nyɔ̌nu wɛ é nyí có é nɔ ɖɔ xó nú vǐ tɔn lɛ́ɛ súnnu ɖɔhun. É nɔ ɖɔ nú yě ɖɔ: 22“Un tunwun lě e è blǒ mi gbɔn ɖo xo ce mɛ é ǎ. Nyɛ wɛ ná gbɛ́ mi ǎ. Nyɛ wɛ bló wǔjɔnú mitɔn lɛ́ɛ ɖokpó ɖokpó ɖó tɛn yětɔn lɛ́ɛ mɛ ǎ. 23Gbɛɖótɔ́ ɔ́ wɛ ɖo do nú nǔ bǐ. É wɛ nɔ bló vǐ sín bǐbɛ́mɛ. É ɖokpó ɔ́ jɛ́n ná kpɔ́n dó xomɛfífá tɔn wú, bó ná lɛ́ ná funfún gbɛ tɔn mǐ, ɖó mǐ sɔ́ mǐɖée sɔ́ sá vɔ̌ ná dó sɛ́n tɔn lɛ́ɛ tamɛ.”
24Axɔ́sú Antiyokúsi vɛdó ɖɔ é ɖo émí gbɔ ko wɛ sín. É lin ɖɔ zunzun émí wɛ é ɖe gbɔn xó tɔn lɛ́ɛ mɛ, bó jɛ wlɛnwín ba jí, nú vǐ kpodé ɔ́, ée kpo ɖo gbɛ é ná dó wá xó tɔn jí. É lɛ́ dó akpá ɖé lɛ́ɛ n'i. É zin alɔ dó akɔ́n ɖɔ é ɖe kɔ dó hwɛndo tɔ́gbó tɔn lɛ́ɛ tɔn ɔ́, émí ná zé e dó húzú dɔkunnɔ, bɔ é ná vo. Émí ná zé e dó ɖó xɔ́ntɔn axɔ́sú ɔ́ tɔn ná, bó ná zé e ɖó tɛn nukúnɖéjí ɖé mɛ. 25Nyaví ɔ́ ka wlí tó ɖěbǔ xó nɛ́ lɛ́ɛ wú ǎ. Axɔ́sú ɔ́ ká ylɔ́ nɔ tɔn, bó ɖɔ nǔ bǐ nú é ná yí gbe, bó kplɔ́n nǔ vǐ tɔn dó hwlɛ́n gbɛ tɔn gán. 26É tɛ́nkpɔ́n káká bɔ nyɔ̌nu ɔ́ yí gbe ɖɔ émí ná ɖɔ xó nú vǐ ɔ́. 27É sɛkpɔ́ ɛ, bó blɛ́ axɔ́sú adǎkaxotɔ́ acɛgannaganna-kpanúmɛtɔ́ ɔ́, bó ɖɔ xó nú vǐ tɔn dó gbe yětɔn mɛ. É ɖɔ n'i ɖɔ: “Vǐ ce, kú nǔbláwǔ nú mì. Un hɛn we dó adɔgo ce mɛ xɔ sun tɛ́nnɛ, un ná anɔ̌ we nú xwe atɔn, un ná nǔɖuɖu we bó hɛn we káká jɛ égbé. 28Kɛnklɛ́n, vǐ ce, nyi kɔ kpɔ́n jǐnukúnsin kpódó ayǐkúngban kpán bó kpɔ́n nǔ e ɖo yě jǐ lɛ́ɛ bǐ. Tunwun ɖɔ é kún nyí nǔɖé wɛ Mawu sɔ́ dó ɖó yě ná ó; alɔkpa ɖokpó ɔ́ wɛ é ɖó gbɛtɔ́ lɛ́ɛ bǐ gbɔn. 29Ma ɖi xɛsi nú nya dídá nɛ́ ɔ́ ó, lo ɔ́, ɖe xlɛ́ ɖɔ émí jɛ xá nɔví émítɔn lɛ́ɛ bó yí kú gbe. Énɛ́ ɔ́, un ná wá mɔ hwi kpódó nɔví towe lɛ́ɛ kpán hwenu e Mawu ná ɖe xomɛnyínyɔ́ tɔn xlɛ́ mǐ é.”
30Xó ɖɔ wɛ nɔ ɔ́ ɖe, bɔ nyaví ɔ́ zé gbe yi jǐ, bó ɖɔ: “Ani nɔ te kpɔ́n wɛ mi ka ɖe? Mɔyízisɛ́n e é ná tɔ́gbó mǐtɔn lɛ́ɛ xwedó wɛ un ɖe, un ɖo tónú ná se nú axɔ́sú ɔ́ wɛ ǎ. 31Hwi axɔ́sú Antiyokúsi wɛ dɔn nyladó nɛ́ lɛ́ɛ bǐ wá nú togun Jwifu lɛ́ɛ tɔn. Amɔ̌, a nǎ gló tó dɔn nú mɛ Mawu tɔn ǎ. 32Mǐdɛɛ lɛ́ɛ ɔ́, hwɛ mǐtɔn lɛ́ɛ wɛ zɔ́n bɔ mǐ ɖo ya ji wɛ. 33Tó ná dɔn nú mǐ, bó kplɔ́n nǔ mǐ wú wɛ Aklúnɔ mǐtɔn, Mawu Gbɛɖe ɔ́, ɖo xomɛ sin dó mǐ wɛ nú hwenu ywɛywɛ ɖé. 34Amɔ̌, hwi mɛ e nyí kɛntɔ́ tɔn, bó nyí nǔ gbɛ́hɛn, nǔɖekɔdó ɖo gbɛtɔ́ lɛ́ɛ mɛ ɔ́, ma xaji bo hlɔ́n kpó ɖěbǔ ó. Hwi mɛ e nɔ hu mɛsɛntɔ́ Aklúnɔ tɔn lɛ́ɛ é, ma xa ji nɔ nukúnɖíɖó tófwe ɖé mɛ ó! 35Nǔgbó wɛ, Nǔbǐwúkpétɔ́ ɔ́ nɔ mɔ nǔ bǐ, a ko gló hwɛɖɔxámɛ tɔn ǎ. 36Hwenu ywɛywɛ ɖé wɛ nɔví ce lɛ́ɛ mɔ wǔvɛ́ ná bó dó nɔ gbejí nú akɔ e Mawu jɛ xá mǐ é. Bɔ yě ká ná wá mɔ gbɛ, nú tɛgbɛ gbe. Amɔ̌, hwɛ ɔ́, Mawu ná ɖɔ hwɛ xá we, bó ná dɔn tó nú we, ɖó goyíyí towe wútu. 37Nyɛ ɔ́, nɔví ce lɛ́ɛ ɖɔhun ɔ́, un sɔ́ gbɛ ce kpódó agbaza ce kpán jó bó ná dó se tónú nú tɔ́gbó ce lɛ́ɛ sín sɛ́n. Un ɖo byɔ̌byɔ́ Mawu wɛ ɖɔ é ní yá wǔ kú nǔbláwǔ nú togun mǐtɔn ɖo malín málín mɛ. Un ɖo kɔ jɛ n'i wɛ ɖɔ é ní dó ya nú we, bónú a na tunwun ɖɔ é wɛ nyí Mawu. 38Nǔbǐwúkpétɔ́ ɔ́ dɔn xomɛsin tɔn dó togun mǐtɔn jí kpódó hwɛjijɔ kpán. Un ka ɖo biba wɛ ɖɔ é ní kpɔ́n dó nyɛ kpódó nɔví ce lɛ́ɛ kpán wú, bó fá xomɛ.”
39Axɔ́sú ɔ́ mɔ ɖɔ vǐ kpodé ɔ́ kún ké ya nú émí ó. Bɔ xomɛ sin i taala, bɔ é lɛ́ zɔ́n ɖɔ è dǒ ya n'i hú mɛ ɖě lɛ́ɛ. 40Có nyaví kpɛví ɔ́ ɖeji dó Aklúnɔ wú bó nɔ gbejí káká yi kú. 41Vivɔnu ɔ́, ée vǐ lɛ́ɛ bǐ kú gúdo ɔ́ nɔ yětɔn wá kú gbɔn gǔdo.
42Lo ɔ́, xó e un ɖɔ dó nǔɖuɖu e è sɔ́ xwlé nǔmɛsɛn lɛ́ɛ kpódó yadónúmɛ nɛ́ lɛ́ɛ kpán wú ɔ́ sɔ́ hwe ǎ.
Currently Selected:
2 Makabée 7: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.