1 Makabée 9
9
Judási Makabée kú
1Dɛmɛtliwúsi wá se ɖɔ ahwan gblé dó Nikanɔ́ɔ, bɔ é ɖésú kú. Bɔ é sɛ́ Bakidɛ́si kpódó Alukímu kpó dó Judáa azɔn wegɔ́ ɔ́ bɔ yě ná nɔ ahwanfuntɔ́ tɔn téwúngbéjú lɛ́ɛ nukɔn. 2Yě sɔ́ Galilée sín ali, lobo jɛ agban nyi Mɛsalɔti to ɔ́ nukɔn, ɖo Aabɛlɛ́si to ɔ́ kpá. Yě gba toxo ɔ́, lobo hu toví gěgé. 3Ɖo xwe kantɔn gban nukún we (152), ɖo xwe énɛ́ ɔ́ sín sun nukɔntɔn ɔ́ mɛ ɔ́, yě wá jɛ agban nyi Jeluzalɛ́mu nukɔn. 4Yě wá dó ahwan gbě sín to énɛ́ mɛ, bó ɖidó Belɛ́ti kpódó sɔ́ja adɔ̌kpo ɖokpó (20.000) kpó, kpódó sɔ́ja sɔ́xátɔ́ afɔwó (2.000) kpán. 5Judási ɔ́, éyɛ́ jɛ agban nyi Elasa, kpódó ahwanfuntɔ́ téwúngbéjú afɔwó-afatɔ́n (3.000) kpán. 6Ée sɔ́ja Jwifu lɛ́ɛ mɔ lě e kɛntɔ́ lɛ́ɛ sín ahwanfuntɔ́ lɛ́ɛ sukpɔ́ sɔ ɔ́, xɛsi ɖi yě taala, bɔ gěgé yětɔn hɔn sín ahwankpá ɔ́ mɛ. Sɔ́ja afɛnɛ (800) jɛ́n wá kpo. 7Judási mɔ ɖɔ hwenu e ahwan ɔ́ wá bɛ́ ɔ́ wɛ ahwanfuntɔ́ émítɔn lɛ́ɛ wá ɖo hinhɔn bú wɛ. Hǔn tɔn zɛ, ɖó é sɔ́ sixú ɖo na kpé wú bó ná kplé ahwan tɔn lɛ́ɛ wɛ ǎ. 8Lanmɛ tɔn gbɔ́jɔ́. É ɖo mɔ̌ có é ɖɔ nú mɛ e kpo lɛ́ɛ ɖɔ: “Mi sí te, mi nú mǐ na gbo ali nú kɛntɔ́ lɛ́ɛ, bónú mǐ kpé wú ɔ́, mǐ na tɔ́n ahwan yě!” 9Sɔ́ja lɛ́ɛ ka yí dó étɔn jí ǎ. Yě ɖɔ: “Mǐ sɔ́ sixú wa nǔ ɖěbǔ din ǎ. Gbɛ mǐtɔn kɛ́ɖɛ́ jɛ́n mǐ na hwlɛ́n. Mǐ ná lɛ́ kɔ wá kpódó nɔví mǐtɔn lɛ́ɛ kpó, bó ná wá fun ahwan hwe ɖěvo nu. Mǐ sukpɔ́ ɖěbǔ din ǎ.” 10Judási yí gbe nú yě ɖɔ: “Mǐ na hɔn ɖo kɛntɔ́ nukɔn wɛ a? Un sixú bló mɔ̌ gbeɖé ǎ! Ényí kú mǐtɔn sín gan xo hǔn, mi nú mǐ na kú kpódó akɔ́nkpinkpan kpán dó nɔví mǐtɔn lɛ́ɛ tamɛ, lobo nú blɔ̌ ɖěbǔ ma nɔ mɛjɔmɛ nyínyí mǐtɔn wú ó.”
11Ahwangɔnu kɛntɔ́ lɛ́ɛ tɔn tɔ́n sín ahwankpá yětɔn mɛ, bó wá to yěɖée ɖó Jwifu lɛ́ɛ sín nukɔn, bɔ sɔ́xátɔ́ lɛ́ɛ má yěɖée ɖó we. Sɔ́ja e hɛn klohwán, bó hɛn gǎdanú lɛ́ɛ wlí zɔnlin, bó jɛ nukɔn nú ahwan ɔ́. Ahwanfuntɔ́ gláglá lɛ́ɛ wɛ to ɖó nukɔn tɔ́ntlɔ́ngbɔ́n. 12Bakidɛ́si ɖo sɔ́jahwan e ɖo ɖisíxwé lɛ́ɛ nu. Sɔ́ja afɔzɔntɔ́ lɛ́ɛ zɔn hǎ we jí, bó ɖo yiyi wɛ, bɔ ahwankpɛn ɖo nǔ ɖɔ wɛ. Judási sín sɔ́ja lɛ́ɛ lɔ dó ahwankpɛn gbe. 13Zǐngídi e jí ahwangɔnu we lɛ́ɛ ɖe ɔ́ zɔ́n bɔ kɔ́ mɛ bǐ nɔ húnhún. Ahwan ɔ́ bɛ́ zǎnzǎn, bó nɔ ayǐ káká jɛ gbadanu. 14Judási mɔ ɖɔ Bakidɛ́si kpódó kɛntɔ́hwan téwúngbéjú lɛ́ɛ kpán wɛ ɖo ɖisíxwé, bɔ sɔ́ja Jwifu e kpan akɔ́n ganjí lɛ́ɛ xwedó e. 15Yě bɔ ɖó nú ahwangɔnu Silíi tɔn e ɖo ɖisí mɛ é, lobo nya sɔ́ja lɛ́ɛ káká yi Azala sín só lɛ́ɛ kɔn. 16Ée sɔ́ja e ɖo yiyi wɛ ɖo amyɔxwé lɛ́ɛ mɔ ɖɔ ahwan ɔ́ kún kpa mɛ e ɖo ɖisíxwé lɛ́ɛ ó é ɔ́, yědɛɛ lɛ́ɛ tɔ́n ahwan Judási kpó mɛ tɔn lɛ́ɛ kpán gbɔn gǔdo. 17Ahwan ɔ́ wá syɛ́n káká bɔ mɛ gěgé kú ɖo ahwangɔnu we lɛ́ɛ mɛ.
18Yě hu Judási ɖésúnɔ ɖo ahwan ɔ́ mɛ, bɔ mɛ ɖě lɛ́ɛ hɔn. 19Jonatáan kpó Sinmɔ́ɔ kpán wá zé nɔví yětɔn Judási sín cyɔ bó yi ɖi dó tɔ́gbó yětɔn lɛ́ɛ sín yɔdo mɛ ɖo Mɔdinu. 20Izlayɛ́li ví lɛ́ɛ bǐ wɛ wá ví i, lobo wa cyɔnú tɔn bɔ é fɛ́ wǔ taala. Azǎn mɔ̌kpán wɛ è sɔ́ ɖó te bó nɔ́ dó ji han élɔ́ wǔbláwúblá: 21“É kú, ahwanjíɖuɖetɔ́ e nɔ hwlɛ́n Izlayɛ́li gán é. Nɛ̌ wɛ nǔ sixú nyí mɔ̌ gbɔn?”
22Nǔ ɖěvo e Judási wa lɛ́ɛ, ahwan e é fun lɛ́ɛ, nǔjíwǔ e é jlɛ́ lɛ́ɛ, nǔ e nyí susu n'i lɛ́ɛ ɔ́, è wlán yě ǎ, ɖó yě ɖó xixa ǎ.
Jonatáan wá nɔ nɔví tɔn Judási sín tɛnmɛ
23Ée Judási kú gúdo ɔ́, mɛ e ma nɔ sɔ́ Mawu sín sɛ́n ɔ́ dó mɔ nǔɖé ǎ lɛ́ɛ wá jɛ kpɔ́ su jí ɖo Izlayɛ́li, bɔ mɛ nyanya lɛ́ɛ wá jɛ afɔ tɛ ayǐ jí. 24Hwenɛ́nu ɔ́, adɔ ɖaxó ɖé wá tɔ́n. Bɔ togun ɔ́ bǐ wá húzú bó jɛ yětɔn jí. 25Bɔ Bakidɛ́si cyán gbɛtɔ́ e má nɔ sí Mawu ǎ lɛ́ɛ bó sɔ́ to ɔ́ dó alɔ yětɔn mɛ. 26Gǎn énɛ́ lɛ́ɛ jɛ Judáa sín xɔ́ntɔn lɛ́ɛ sín gbě nya jí, lobo nɔ dɔn xó ɖo nu yětɔn. Énɛ́ gúdo ɔ́, yě nɔ́ kplá yě hɛn yi Bakidɛ́si gɔ́n bɔ é nɔ dɔn tó nú yě lobo nɔ gbɔ́ yě ko. 27Sín hwenu e gbeyíɖɔ Mawu tɔn lɛ́ɛ má sɔ́ ɖo azɔ̌ wa wɛ ǎ ɔ́, awě ɖaxó mɔ̌hunkɔ ɖé ko xo Izlayɛ́li ví lɛ́ɛ kpɔ́n ǎ.
28Bɔ Judási sín xɔ́ntɔn lɛ́ɛ bǐ wá kplé, lobo ɖɔ nú Jonatáan ɖɔ: 29Sín hwenu e nɔví towe Judási kú din ɔ́, mǐ ko sɔ́ mɔ mɛɖé nú é ná fun ahwan xá kɛntɔ́ mǐtɔn Bakidɛ́si kpódó mɛ e gbɛ́ wǎn nú togun mǐtɔn lɛ́ɛ kpán ǎ. 30Énɛ́ ɔ́ wɛ zɔ́n bɔ mǐ sɔ́ we din bónú a nǎ nɔ tɛn tɔn mɛ. A nǎ nyí gǎn mǐtɔn bó ná húzú nukɔntɔ́ mǐtɔn ɖo ahwan e fun wɛ mǐ ɖe é mɛ.
31Bɔ Jonatáan yí gbe bó ná ɖɔ nǔ dó Izlayɛ́li ví lɛ́ɛ nu, lobo jɛ nɔví tɔn Judási ɔ́ sín tɛnmɛ.
Jonatáan wá yi Tekowa sín axéko jí
32Bakidɛ́si se xó énɛ́ ɔ́, lobo jɛ wě ɖe jí bó ná hu Jonatáan. 33Lo ɔ́, éyɛ́ kpó mɛ tɔn lɛ́ɛ kpó, kpódó nɔví tɔn Sinmɔ́ɔ kpán ka se mɔ̌, lobo hɔn yi Tekowa sín axéko jí. Yě yi jɛ agban nyi sindo Asifáa tɔn kpá. 34Gbɔjɛzán gbe ɖé wá su bɔ Bakidɛ́si se fí e yě hɔn yi hwlá ɖó é, bɔ é kpódó ahwangɔnu tɔn ɔ́ bǐ kpán d'asá Judɛ́ɛn tɔ ɔ́ bó jɛ agě ɖě ɔ́ jí. 35Jonatáan wá sɛ́ nɔví tɔn Jǎan e nɔ ɖɔ nǔ dó togun ɔ́ nu ɔ́ dó xɔ́ntɔn tɔn Nabatinu lɛ́ɛ gɔ́n; é ɖó ná byɔ́ gbe yě bó ná dó bɛ́ agban tobutóbú e yě hɛn lɛ́ɛ ɖó yě gɔ́n. 36Lo ɔ́, ée yě ɖo ali jí xweyǐgbe ɔ́, Jamubli ví, Madaba tɔn lɛ́ɛ gbo ali nú Jǎan bó dó e gan, lobo bɛ́ agban tɔn lɛ́ɛ bǐ yi. 37Ée nǔ nɛ́ lɛ́ɛ jɛ é gúdo ɔ́, Jonatáan kpódó nɔví tɔn Sinmɔ́ɔ kpán se ɖɔ Jamubli ví lɛ́ɛ ja alɔ gɛnnyigɛnnyi ɖé wlí gbé. Asi xɔ́ntɔn e nyí gǎn Kanáa tɔn téwúngbéjú ɖokpó é sín vǐ ɔ́ ná zɔn ali sín Nabata kpódó mɛ gěgé kpán. 38Yě wɔn lě e Jamubli ví lɛ́ɛ wlí nɔví yětɔn Jǎan ɔ́ bó hu i gbɔn é ǎ; lobɔ yě yi hwlá dó sóxo mɛ ɖo aga fí ɖé. 39Hwenu e yě ɖo fínɛ́ ɔ́, yě mɔ mɛ tobutóbú ɖé lɛ́ɛ bɔ yě hɛn agban gěgé, lobo ɖo hlǔnhlún wɛ. Asisúnɔ ɔ́, xɔ́ntɔn tɔn lɛ́ɛ kpódó nɔví tɔn lɛ́ɛ kpán lɔ wlí ali; yě hɛn hǔn kpódó nǔxotɔ́ lɛ́ɛ kpán bó ná yi kpé asi xɔ́ntɔn ɔ́ kpódó ahwan tɔn lɛ́ɛ kpán. Yě lɛ́ hɛn ahwanlyánnú tɛnmɛ tɛnmɛ gěgé. 40Jonatáan kpódó mɛ tɔn lɛ́ɛ kpán wá tɔ́n sín fí e yě yi wu ɖó ɔ́. Yě zɔn mɛ lɛ́ɛ jí lobo jɛ yě hu jí. Mɛ gěgé gblé wǔ vantankánnyá, bɔ mɛ ɖé lɛ́ɛ hɔn byɔ́ sókan mɛ, lobɔ Jwifu lɛ́ɛ bɛ́ agban e yě hɛn lɛ́ɛ bǐ. 41Énɛ́ ɔ́, alɔ e wlí gbé wɛ yě ja ɔ́ wá húzú aluwɛ, lobɔ nǔxotɔ́ lɛ́ɛ sín han wá húzú nǔwamɛ han. 42Ée Jonatáan kpódó Sinmɔ́ɔ kpó ba hlɔn nɔví yětɔn e è hu ɔ́ tɔn ɔ́, yě wá yi hɔn hwlá dó Judɛ́ɛn sín gba lɛ́ɛ tó.
È fun ahwan ɖo Judɛ́ɛn tɔ tó
43Bakidɛ́si se fí e Jwifu lɛ́ɛ hwlá cí ɔ́, bɔ gbɔjɛzán gbe ɖé wá su, bɔ é zɔn ahwan wɔ̌buwɔ́bú ɖé nu wá Judɛ́ɛn tɔ ɔ́ tó. 44Bɔ Jonatáan ɖɔ nú mɛtɔn lɛ́ɛ ɖɔ: “Mi sí te bónú mǐ ná fun ahwan bó ná dó hwlɛ́n gbɛ mǐtɔn. Éhɔ́nmɛ tɔn ɔ́ dó adohu hú ée ko wá yi lɛ́ɛ bǐ. 45Kɛntɔ́ ɖo nukɔn mǐtɔn, bɔ Judɛ́ɛn tɔ ɔ́ ka sú ali ɖo gǔdo mǐtɔn. Fí e kpo bó lɛ́ lɛ̌ dó mǐ lɛ́ɛ bǐ wɛ nyí gba, lobo nyí wunkan. Fí hɔn yi bɛ dó ɖe nú mǐ ǎ. 46Mi bo sú xó ylɔ́ Mawu nú é ná hwlɛ́n mǐ gán ɖo kɛntɔ́ mǐtɔn lɛ́ɛ sí.”
47Ée yě jɛ ahwan ɔ́ fun jí ɔ́, Jonatáan zé awa yi jǐ, bó ná hu Bakidɛ́si, bɔ é hɔn bó ɖidó ahwangɔnu tɔn sín gǔdo. 48Bɔ Jonatáan kpódó mɛ tɔn lɛ́ɛ kpán lɔ́n jɛ Judɛ́ɛn tɔ ɔ́ mɛ, bó lin tɔ káká yi jɛ agě ɖě ɔ́ jí. Lo ɔ́, kɛntɔ́ lɛ́ɛ ka sɔ́ d'asá tɔ ɔ́ bó dó jɛ túnnu yětɔn ǎ. 49Gbe nɛ́ gbé ɔ́, sɔ́ja Bakidɛ́si tɔn afatɔ́n (1.000) mɔ̌ wɛ cí ahwan.
Bakidɛ́si wá yi Judée. Alukímu kú
50Bakidɛ́si lɛ́ kɔ wá yi Jeluzalɛ́mu. É jɛ xɛ nya ɖo Judée toxo lɛ́ɛ jí jí. É mɛ ahohó lɛ́ lɛ̌ dó toxo lɛ́ɛ, bó dó hɔn kpó cávi kpán nu. È nɔ mɔ ahohó e é mɛ nɛ́ ɔ́ lɛ́ɛ sín Jeliko, Emawúsi, Bɛtolɔ́ɔn, Betɛ́li, Tamumata, Falatɔni kpó Tefɔ́ni kpó. 51É sɔ́ sɔ́ja sín ahwankpá ɖokpó ɖokpó dó ahohó lɛ́ɛ bǐ mɛ nú yě ná nɔ ɖo ahwan tɔ́n Jwifu lɛ́ɛ wɛ hwebǐnu. 52É lɛ́ jɛ xɛ nya ɖo Bɛti-Súu kpódó Gezɛ́ɛ kpán jí hú ɖ'ayǐ tɔn, lobo lɛ́ vɔ́ só syɛ́n ná toxo nukúnɖéjí Jeluzalɛ́mu tɔn. É bɛ́ ahwankpá ɖé lɛ́ɛ ɖó fínɛ́ kpódó nǔɖuɖu ɖé lɛ́ɛ kpán, bɔ è nǎ sɛxwe ɖ'ayǐ. 53É wlí gǎn to ɔ́ tɔn lɛ́ɛ sín vǐ lɛ́ɛ, lobo dó yě gan ɖo toxo nukúnɖéjí ɔ́ mɛ.
54Ɖo xwe kantɔn gban nukún atɔn (153) sín sun wegɔ́ ɔ́ mɛ ɔ́, Alukímu zɔ́n ɖɔ è ni mu dǒ e è mɛ lɛ́ lɛ̌ dó kɔ́xota Sinsɛnxɔ ɔ́ tɔn é. É wa mɔ̌, bó dó hɛn azɔ̌ énɛ́ e gbeyíɖɔ lɛ́ɛ ko wa ɔ́ gblé. Bɔ mɛ lɛ́ɛ jɛ dǒ ɔ́ mu jí. 55Lo ɔ́, azɔn wá zin Alukímu dɛ́, bɔ yě gbɔ bó ɖó azɔ̌ lɛ́ɛ te. Alɔ tɔn kú bɔ afɔ tɔn lɔ kú, bɔ é sɔ́ nɔ sixú kɛ nu ǎ. É sɔ́ sixú kɛ nu lobo ɖɔ jlǒ tɔn gǔdo tɔn lɛ́ɛ ǎ. 56É mɔ wǔvɛ́ ɖésú ɖo azɔn nɛ́ ɔ́ mɛ hwenɛ́nu cóbó wá nyí kúkútɔ́. 57Ée Bakidɛ́si se ɖɔ Alukímu kú ɔ́, é lɛ́ kɔ yi axɔ́sú Dɛmɛtliwúsi gɔ́n, bɔ Judée to ɔ́ mɔ fífá nú xwe we.
Ahwangblé dó Bakidɛ́si ɖo Bɛtibasi nukɔn, lobɔ é tún xwé sín Judée
58Bɔ Jwifu e ma nɔ xwedó Mawusɛ́n ɔ́ ǎ lɛ́ɛ bǐ wá kplé, lobo ɖɔ nú yěɖée ɖɔ: “Fí e mǐ ɖe din ɔ́, Jonatáan kpódó mɛ tɔn lɛ́ɛ kpán mɔ fífá bó vo fɛɛ. Mi nú mǐ ná lɛ́ kɔ nú Bakidɛ́si wá, nú é ná wlí yě bǐ ɖo zǎn ɖokpó ɔ́ mɛ.” 59Yě yi mɔ ɛ bó ɖe wě tɔn xá ɛ. 60Bakidɛ́si jɛ ali kpódó ahwangɔnu syɛ́nsyɛ́n ɖokpó kpán. É sɛ́ wěma dó mɛ e é jɛ akɔ xá ɖo Judée gbé jí lɛ́ɛ bǐ dó nǔglɔ́ ɖɔ yě ni wlí Jonatáan kpódó mɛ tɔn lɛ́ɛ kpán. Lo ɔ́, tito yětɔn jɛ wěxo, bɔ yě sɔ́ kpé nǔ e yě lin ɔ́ wú bó wa ǎ. 61To ɔ́ mɛ nu e nɔ awo ɔ́ mɛ lɛ́ɛ ɔ́, Jonatáan kpódó xɔ́ntɔn tɔn lɛ́ɛ kpán wlí kanɖé wǒ (50) mɔ̌ lobo zɔ́n yě hu. 62Énɛ́ ɔ́ gúdo ɔ́, Jonatáan kpó Sinmɔ́ɔ kpó, kpódó mɛ yětɔn lɛ́ɛ kpán sɛ yi jɛ Bɛtibasi, ɖo gbě e jí mɛɖé má ɖe ǎ é; tɛn énɛ́ e è ko gba kíjá é ɔ́, yě lɛ́ vɔ́ gbá, bó nɔ́ lɛ́ cɔ́ hú ɖ'ayǐ. 63Ée Bakidɛ́si se mɔ̌ ɔ́, é kplé sɔ́ja tɔn lɛ́ɛ bǐ, lobo ɖɔ nú mɛ tɔn e ɖo Judée lɛ́ɛ ɖɔ yě ni wá gɔ́ nú émí. 64É yi Bɛtibasi, bó ná yi tɔ́n ahwan ɛ, lobo sɔ́ ahwanlyánnú ɖaxó lɛ́ɛ dó fun ahwan ná nú hwenu gěgé. 65Jonatáan jó nɔví tɔn Sinmɔ́ɔ kpódó mɛ nabíɖé kpán dó nyi toxo ɔ́ mɛ, lobo ɖidó gbě ɔ́ jí. 66É ɖu ɖo Odomɛla kpó kúnkan tɔn kpó, kpódó Fasilɔni sín akɔta ɔ́ kpán jí, ɖo fí e yě jɛ agban nyi é. Bɔ yě yí gbe bó ná jɛ Jonatáan sín mɛ lɛ́ɛ jí, bó ná fun ahwan. Bɔ yě ná gɔ́ nú é kpó ahwan tɔn lɛ́ɛ kpán, bó tɔ́n ahwan Bakidɛ́si. 67Bɔ Sinmɔ́ɔ kpó ahwan tɔn lɛ́ɛ kpán tɔ́n sín Bɛtibasi, bó dó ahwanlyánnú ɖaxó lɛ́ɛ zo. 68Yě tɔ́n ahwan Bakidɛ́si, lobo ɖu ɖo jǐ tɔn bǐ dégbédégbé. Wǔ kú i taala, ɖó ahwan tɔ́n mɛ sín wlɛnwín e é ɖe ɔ́ sɔ́ wá kpa ɛ ǎ. 69Xomɛ sin i ɖaxó dó Jwifu e ma ɖo Mawusɛ́n ɔ́ jí ǎ, lobo kplɔ́n ɛ ɖɔ é ní wá Judée lɛ́ɛ wú, lobɔ é hu mɛ gěgé ɖo yě mɛ. Énɛ́ gúdo ɔ́, é wá ɖɔ émí ná yi to émítɔn mɛ.
70Ée Jonatáan se mɔ̌ ɔ́, é sɛ́ mɛ dó Bakidɛ́si gɔ́n, nú yě ná nu fífá sín alɛ xá ɛ bónú é ná jó gantɔ́ e è wlí lɛ́ɛ. 71Bakidɛ́si yí gbe nú xó e Jonatáan ɖɔ é, bó xwlé nǔ d'é jí ɖɔ ényí gbɛ jɛ́n émí ɖe ɔ́, é kpódó mɛ tɔn lɛ́ɛ kpó bǐ ná nɔ fífá mɛ. 72É jó gantɔ́ e é wlí ɖ'ayǐ ɖo Judée lɛ́ɛ nú Jonatáan, lobo lɛ́ kɔ yi to tɔn mɛ, bó sɔ́ lɛ́ kɔ wá Jwifu lɛ́ɛ sín to mɛ gbeɖé ǎ. 73Ahwan yi xɔ ɖo Izlayɛ́li. Jonatáan wá yi cí Makimasi. É húzú togun tɔn sín gǎn, lobo vɔ kún nú mɛ e ma nɔ sí Mawu ǎ lɛ́ɛ bǐ sín Izlayɛ́li.
Currently Selected:
1 Makabée 9: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.