1 Makabée 8
8
Ɖagbe Hlɔ̌manu lɛ́ɛ tɔn kpikpa
1Judási se Hlɔ̌manu lɛ́ɛ xó, bɔ mɛ lɛ́ɛ nɔ ɖɔ: Yě kpé nǔ wú, bó ka nɔ nyɔ́ xomɛ dó mɛ e nɔ wá jɛ akɔ xá yě lɛ́ɛ wú. Yě nɔ́ dó xɔ́ntɔn mɛ e nɔ sɛkpɔ́ yě lɛ́ɛ, lobo ka kpé nǔ wú tawun. 2Ahwan e yě fun wá yi lɛ́ɛ, nǔ ɖaxó ɖaxó e yě jlɛ́ ɖo ahwan hwenu ɖo Goluwánu lɛ́ɛ gɔ́n ɔ́, è kpi bǐ sín tan nú Judási. Hlɔ̌manu lɛ́ɛ ɖu ɖo yě jí, lobo zín yě jí ɖɔ yě ɖó ná nɔ ná nǔjɔ, bɔ é ná tlí tawun. 3Yě lɛ́ fun ahwan mɔ̌ ɖo Ɛsipányi, bó bɛ́ siká kpó kpatágan kpó e ɖo do mɛ ɖo to ɔ́ mɛ é bǐ. 4Yě kpa acɛ gbɔn fí bǐ ɖo to ɔ́ mɛ, ɖó yě nyɔ́ yěɖée to, bó ká nɔ kú hǔn. Cóbɔ fí ɔ́ ká lín dó to yětɔn mɛ ɖésú. Yě ɖu ɖo axɔ́sú e gosín fí e gbɛ kponu ɖó bó wá tɔ́n ahwan yě lɛ́ɛ jí. Yě gba yě bó nyínyɛ́ yě bǐ sésé. Bɔ mɛ e kpo ɖo gbɛ lɛ́ɛ nɔ́ ná nǔjɔ yě xwewú xwewú. 5Hlɔ̌manu lɛ́ɛ lɔ ɖu ɖo Filípu kpó Pɛsée Masedwani xɔ́sú lɛ́ɛ kpán jí, bó lɛ́ ɖu ɖo yě mɛ e fɔ́n gǔ dó yě jí lɛ́ɛ é bǐ jí. Yě bǐ wɛ yě sɔ́ ɖó acɛ yětɔn glɔ́. 6Yě tlɛ ɖu ɖo Antiyokúsi ɖaxó Azíi xɔ́sú ɔ́ jí. É tɔ́n ahwan yě kpó ajinakú ahwanfuntɔ́ kantɔn (120), sɔ́ja sɔ́xátɔ́ kpó ahwangɔnu hlɔ̌nhlɔ́nɖowǔnánɔ ɖokpó kpán. 7Gbɛɖe tɔn wɛ yě wlí, lobo hɛn é kpó axɔ́sú e wá jɛ gǔdo tɔn lɛ́ɛ é bǐ kpó gǎnnu ɖɔ yě ní nɔ́ ná nǔjɔ tlitli bó ká jó mɛ e yě wlí lɛ́ɛ é dó. 8Yě yí Ɛndu to ɔ́, Mɛdi, Lidíi to ɔ́ kpódó tokpɔnla e nyɔ́ ɖɛkpɛ ganjí lɛ́ɛ kpán sín Antiyokúsi sí, lobo sɔ́ jó nú axɔ́sú Emɛ́nu. 9Glɛ̌sinu lɛ́ɛ wá sí te ɖɔ émí ná yi vɔ Hlɔ̌manu lɛ́ɛ. 10Bɔ yě se ɖo kpá lobo sɛ́ ahwangán ɖokpó géé dó, nú é ná yi fun ahwan xá yě. Glɛ̌sinu gěgé gbléwǔ vantankánnyá ɖo ahwan ɔ́ mɛ. Hlɔ̌manu lɛ́ɛ wlí asi yětɔn lɛ́ɛ kpódó vǐ yětɔn lɛ́ɛ kpán. Yě fɔ nǔ yětɔn lɛ́ɛ bó klá jɛ to ɔ́ nu. Yě mu ahohó yětɔn lɛ́ɛ, lobo sɔ́ yě ɖésú dó húzú kannumɔ káká wá jɛ éhɔ́nmɛ. 11Axɔ́súɖuto ɖě lɛ́ɛ kpódó to e ɖo tɔtɛ́ntin, bɔ Hlɔ̌manu lɛ́ɛ má kpé wú bó gba tlóló ǎ lɛ́ɛ kpó ɔ́, yě wá gba hǎbǔ ɖ'é mɛ, lobo sɔ́ to ɔ́ mɛ nu lɛ́ɛ dó húzú kannumɔ yětɔn. 12Lo ɔ́, Hlɔ̌manu lɛ́ɛ kpo ɖo xɔ́ntɔn jɔ xɔ́ntɔn nyí nú mɛ e jɛ akɔ xá yě lɛ́ɛ, kpó mɛ e ɖó jiɖiɖe dó yě wú lɛ́ɛ kpán wɛ. Yě sɔ́ axɔ́súɖuto axɔ́sú e sɛ yá yě lɛ́ɛ tɔn kpódó éé ɖo zɔ lɛ́ɛ tɔn kpán dó acɛ yětɔn mɛ. Mɛ e nɔ se Hlɔ̌manu lɛ́ɛ sín xó lɛ́ɛ bǐ wɛ nɔ ɖi xɛsi nú yě. 13Mɛ e Hlɔ̌manu lɛ́ɛ jló ná dó alɔ, bó sɔ́ dó ɖó axɔ́sú lɛ́ɛ lɔ mɛ wɛ yě nɔ́ sɔ́ acɛkpikpa ɔ́ dó. Axɔ́sú ɖé sín nǔ ma ka jɛ yětɔn jí ǎ ɔ́, yě nɔ́ yí azinkpo ɔ́ sín glɔ̌ nú yě. Yě ɖu gǎn bɔ gǎn vɔ. 14É ɖo mɔ̌ có, Hlɔ̌manu ɖěbǔ nɔ xwe gǎngbákún, bó nɔ́ dó gǎnwu dó ba susu éɖée tɔn ná ǎ. 15Hlɔ̌manu lɛ́ɛ sɔ́ tito ɖé jínjɔ́n ayǐ, bɔ nǔnywɛ́tɔ́, tonukún afɔɖé kantɔn (320) wɛ ɖ'é mɛ. Yě nɔ́ yi tagbesɔ ayǐhɔ́ngbe ayǐhɔ́ngbe, lobo nɔ ɖɔ xó dó xó wú ɖó nyɔ̌ná toví lɛ́ɛ bǐ tɔn tamɛ. 16Gbɛtɔ́ ɖokpó géé wɛ Hlɔ̌manu lɛ́ɛ nɔ ná acɛ xwewú xwewú, nú é ná ɖɔ nǔ dó to ɔ́ bǐ nu, lobo kpa acɛ nú toví lɛ́ɛ bǐ. Mɛ ɖokpó nɛ́ ɔ́ wɛ mɛ e kpo lɛ́ɛ bǐ nɔ se tónú ná. Mɛ ɖé nɔ hwan wǔ ǎ. Mɛ ɖé ka nɔ lin ná yí acɛkpikpa ɔ́ sín así tɔn ǎ.
Jwifu lɛ́ɛ nu xɔ́ntɔn xɔ́ntɔn sín alɛ xá Hlɔ̌manu lɛ́ɛ
17 Judási ɖe Epolɛ́mu e nyí Jǎan ví, bó nyí Akɔ́si vívú ɔ́, kpódó Jazɔ́ɔn Eleazáa ví ɔ́ kpán. É nyi yě sɛ́ dó xɔ́ntɔn xɔ́ntɔn nyínyí sín alɛ nunu kpó akɔjijɛ xá Hlɔ̌manu lɛ́ɛ kpán sín nǔwiwa gbé mɛ. 18Judási bló mɔ̌, bó ná dó ɖe Jwifu lɛ́ɛ sín acɛkpikpa axɔ́súɖuto Glɛ̌sinu e ɖo Silíi lɛ́ɛ tɔn mɛ. Ɖó nǔgbó ɔ́, è mɔ ɖɔ Izlayɛ́li ví lɛ́ɛ wá ɖo kannumɔ húzú wɛ ɖo axɔ́súɖuto nɛ́ ɔ́ mɛ. 19Bɔ Epolɛ́mu kpódó Jazɔ́ɔn kpán ɖidó Hlɔ̌ma. Ali gaga wɛ yě zɔn lobo wá yi sɔ́ yěɖée xlɛ́ tonukún lɛ́ɛ. Yě yí xó lobo ɖɔ nú kplékplé mɛ ɔ́ ɖɔ: 20“Judási Makabée, nɔví tɔn lɛ́ɛ, kpódó Izlayɛ́li togun ɔ́ bǐ kpán wɛ sɛ́ mǐ dó fí, nú mǐ ná jɛ akɔ, lobo ná nu fífá sín alɛ xá mi.”
21Xó ɔ́ jɛ jí nú tonukún lɛ́ɛ. 22 Yě wlán nǔ dó kpatágan jí, lobo sɔ́ sɛ́ dó Jeluzalɛ́mu. É ná nɔ́ flín Jwifu lɛ́ɛ ɖɔ yě nu fífá sín alɛ xá Hlɔ̌manu lɛ́ɛ, lobo jɛ akɔ xá yě. Nǔ e yě wlán ɔ́ ɖíe:
23“Mǐ jló ɖɔ Hlɔ̌manu lɛ́ɛ kpódó togun Jwifu lɛ́ɛ tɔn e ɖo agě kpó tɔ kpó lɛ́ɛ bǐ kpó ní nɔ́ hun xomɛ, bó nɔ fɛɛ mɛ, káká sɔ́yi. Ahwan kpódó kɛntɔ́ kpán ní nɔ zɔ nú yě.” 24Lo ɔ́, ényí ahwan wá ba Hlɔ̌ma ɖésúnɔ alǒ togun e jɛ akɔ xá ɛ lɛ́ɛ ɖě ɖo fí ɖěbǔ ɔ́, 25Jwifu lɛ́ɛ sín togun ɔ́ nɔ́ jɛ Hlɔ̌manu lɛ́ɛ jí, lobo nɔ fun ahwan titewungbe, lě e ahwan ɔ́ kó sixú byɔ́ gbɔn ɔ́ bǐ. 26Hlɔ̌ma byɔ́ Jwifu lɛ́ɛ ɖɔ yě ni ma ná jinukún, ahwanfunnú, akwɛ́ alǒ zohún ɖěbǔ kɛntɔ́ émítɔn lɛ́ɛ ó. Jwifu lɛ́ɛ ka ɖó ná nɔ gbejí nú akpá e yě dǒ lɛ́ɛ, ma ɖó nukún nǔɖé. 27Mɔ̌ ɖokpó ɔ́, ényí ahwan wá ba togun Jwifu lɛ́ɛ tɔn ɔ́, Hlɔ̌manu lɛ́ɛ lɔ ná fun ahwan titewungbe dó dó alɔ yě lě e ahwan ɔ́ ná byɔ́ gbɔn é. 28Hlɔ̌ma dó akpá nú Jwifu lɛ́ɛ ɖɔ émí kún ná ná jinukún, ahwanfunnú, akwɛ́ alǒ zohún ɖěbǔ kɛntɔ́ yětɔn lɛ́ɛ ó. Hlɔ̌manu lɛ́ɛ ɖó ná nɔ gbejí nú akpá e yě dó lɛ́ɛ, ma wa yɛ ɖo nǔ ɖěbǔ mɛ.
29Xógbe e Hlɔ̌manu lɛ́ɛ zán bó dó jɛ akɔ xá Jwifu lɛ́ɛ sín togun ɔ́ nɛ́. 30Ényí ayǐ wá ɖo hǐnhɔ́n wɛ, bónú to we e jɛ akɔ lɛ́ɛ jló ná dó nǔɖé jí, alǒ yě ná ɖe nǔɖé kpo ɔ́, yě sigǎn bló. Nǔ e yě ká d'é jí lɛ́ɛ alǒ nǔ e yě ɖe kpo lɛ́ɛ ɔ́, yě ɖó ná nɔ xwi jí ná. 31Mɔ̌ ɖokpó ɔ́, mǐ sɛ́ wěma dó axɔ́sú Dɛmɛtliwúsi ɖó afú e tá Jwifu lɛ́ɛ wɛ é ɖe ɔ́ wútu. Xó e ɖo wěma ɔ́ mɛ ɔ́ ɖíe: “Étɛ́wú a sɔ́ acɛ gannaganna bó dó ɖo ya dó nú xɔ́ntɔn mǐtɔn, mɛmɔgbɔ mǐtɔn Jwifu lɛ́ɛ wɛ sɔ́ mɔ̌?” 32“Ényí yě sɔ́ lɛ́ wá jɛ hwɛ towe ɖě nú mǐ ɔ́, mǐ ná jɛ ahwan yě jí, bó ná fun ahwan xá we ɖo agě, bó lɛ́ fun xá we ɖo tɔ.”
Currently Selected:
1 Makabée 8: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.