1 Makabée 10
10
Alɛsándlu Epifani sɔ́ Jonatáan dó sɔ́ vɔ̌sánú-xwlémawutɔ́ ɖaxó
1Ɖo xwe kɛnnɛ (160) mɛ ɔ́, Alɛsándlu Epifani, Antiyokúsi Epifani sín vǐ ɔ́ wá Putolemayísi toxo ɔ́ kpá, lobo yí toxo ɔ́. Toxo ɔ́ mɛ nu lɛ́ɛ kɛ alɔ bo yí i, lobɔ é húzú axɔ́sú. 2Ée axɔ́sú Dɛmɛtliwúsi se mɔ̌ ɔ́, é kplé sɔ́jahwan wɔ̌buwɔ́bú ɖé lɛ́ɛ, bó ná yi fun ahwan xá Alɛsándlu. 3Mɔ̌ ɖokpó ɔ́, Dɛmɛtliwúsi wá sɛ́ mɛ dó Jonatáan, bó dó byɔ́ fífá, lobo dó akpá n'i ɖɔ émí ná sɔ́ ɛ ɖó tɛn ɖaxó mɛ. 4Ɖó é ɖɔ nú éɖée ɖɔ: “Mi nú mǐ ná hwlɛ́n dó bó nu fífá sín alɛ xá Jonatáan, cóbónú é ná nu xá Alɛsándlu bó ná húzú kpan nukɔn mǐ. 5Ɖó é ná wá flín nyanya e mǐ wa dó é ɖésúnɔ wú é, ée mǐ wa dó nɔví tɔn kpódó togun tɔn kpán wú lɛ́ɛ bǐ.” 6Dɛmɛtliwúsi ná gbe Jonatáan ɖɔ é ní kplé ahwangɔnu ɖokpó lobo ka bló ahwanlyánnú kɔn nyi ayǐ. É byɔ́ ɛ ɖɔ émí ná húzú mɛmɔgbɔ tɔn. É ɖe gbe ɖɔ é ní ɖe Izlayɛ́li ví e ahwan wlí bɔ yě ɖo agbǒ Jeluzalɛ́mu tɔn mɛ lɛ́ɛ nyi te. 7Bɔ Jonatáan ɖidó Jeluzalɛ́mu lobo xa wěma e axɔ́sú ɔ́ sɛ́ dó ɔ́ ɖo togun ɔ́ kpódó mɛ e ɖo agbǒ ɔ́ mɛ lɛ́ɛ bǐ kpán nukɔn. 8Ée yě se ɖɔ axɔ́sú ɔ́ ná gbe ɖɔ Jonatáan ni kplé ahwangɔnu ɖokpó ɔ́, ado hu yě taala. 9Sɔ́ja e ɖo agbǒ ɔ́ cɔ́ wɛ lɛ́ɛ jó Izlayɛ́li ví e ɖo ganxó lɛ́ɛ nú Jonatáan, bɔ éyɛ́ kplá yě jó nú hɛ̌nnumɔ yětɔn lɛ́ɛ.
10Jonatáan wá jínjɔ́n Jeluzalɛ́mu, lobo jɛ toxo ɔ́ vɔ́ gbá jí, bó jɛ blǒbló ɖó jí. 11É zɔ́n azɔ̌watɔ́ lɛ́ɛ ɖɔ yě ni vɔ́ toxo ɔ́ sín dǒ lɛ́ɛ mɛ, lobo sɔ́ awǐnnya kpikpa dó mɛ dǒ lɛ́ lɛ̌ dó Sinyɔ́ɔ só ɔ́, bó ná dó cyɔ́n alɔ jǐ tɔn. Bɔ yě bló nǔgbó. 12Sɔ́ja akɔ ɖěvo nu e ɖo agbǒ e Bakidɛ́si tun ɔ́ mɛ lɛ́ɛ bǐ hɔn. 13Yě bǐ hɔn sín azɔ̌ e è zɔ̌n yě lɛ́ɛ kɔn, lobo lɛ́ kɔ yi to yětɔn mɛ. 14Lo ɔ́, Izlayɛ́li ví e dó vɛ̌ nú sɛ́n ɔ́ kpódó nǔzɔ́nmɛ tɔn lɛ́ɛ kpán, ɖo Bɛti-Súu lɛ́ɛ sɛ tɛn ǎ. Toxo énɛ́ ɔ́ wɛ nyí bibɛtɛn yětɔn.
15Axɔ́sú Alɛsándlu se nǔ e sín akpá Dɛmɛtliwúsi dó nú Jonatáan dó wěma tɔn mɛ lɛ́ɛ bǐ. Mɔ̌ jɛ́n mɛ ɖé lɛ́ɛ lɛ́ ɖɔ xó n'i dó ahwan ɖagbe e Jonatáan kpó nɔví tɔn lɛ́ɛ kpó fun ɔ́ kpódó wǔvɛ́ e yě mɔ lɛ́ɛ kpán wú. 16Bɔ axɔ́sú ɔ́ ɖe nu bó ɖɔ: “Mǐ sixú mɔ mɛ étɔn ɖɔhun ɖo fí ɖé ǎ! Mǐ ɖó ná dó xɔ́ntɔn ɛ, bɔ é ná húzú mɛ jɛ akɔ xá mǐtɔn.” 17É wlán wěma ɖokpó sɛ́ dó Jonatáan bɔ é ɖo ɖiɖɔ wɛ ɖɔ: 18“Axɔ́sú Alɛsándlu dó gbe sɛ́ dó nɔví tɔn Jonatáan. 19Un se ɖɔ gbɛtɔ́ ɖé wɛ a nyǐ bó kpan akɔ́n ɖésú, bó jɛ xá ná nyí xɔ́ntɔn mǐtɔn. 20Énɛ́ wútu wɛ, bɛ́ sín égbé ɔ́, un sɔ́ we dó sɔ́ vɔ̌sánú-xwlémawutɔ́ ɖaxó ná ɖo togun towe nu, lobo ná we acɛ nú è nǎ nɔ ylɔ́ we ɖɔ: ‘Axɔ́sú xɔ́ntɔn!’ Bɛ́ sín din ɔ́, a ɖǒ ná byɔ́ ahwan mǐtɔn mɛ, lobo ná húzú xɔ́ntɔn mǐtɔn!” Axɔ́sú Alɛsándlu sɔ́ awu vɔvɔ ɖokpó kpódó gǎngbákún siká tɔn ɖokpó kpán dó wěma ɔ́ jí, lobo sɔ́ sɛ́ dó é. 21Jonatáan fɔ vɔ̌sánú-xwlémawutɔ́ ɖaxó sín awu nɛ́ lɛ́ɛ dó ɖo sun tɛ́nnɛgɔ́ e ɖo xwe kɛnnɛgɔ́ ɔ́ (160) mɛ é, gbe e gbe è ɖo goxɔ lɛ́ɛ sín xwe ɖu wɛ é. É kplé sɔ́ja ɖé lɛ́ɛ, bó tun ahwanlyánnú gěgé.
Dɛmɛtliwúsi nukɔntɔn ɔ́ jɔwǔ Jwifu lɛ́ɛ
22Hwenu e Dɛmɛtliwúsi se nǔ nɛ́ ɔ́, é vɛ́ n'i ɖésú, bɔ é ɖɔ: 23“Étɛ́ wɛ mǐ ka wa nɛ́? Alɛsándlu tɛ́nkpɔ́n bó dó xɔ́ntɔn Jwifu lɛ́ɛ jɛ nukɔn nú mǐ, lobo zɔn d'é wú bó lɛ́ xɔ ayǐ hú mǐ ɖo yě gɔ́n. 24Nyɛ lɔ ná sɛ́ wěma dó yě bo ná byɔ́ yě syɛ́nsyɛ́n ɖɔ yě ni dó alɔ mì. Un na fɔ yě ɖó tɛn ɖaxó ɖaxó ɖé lɛ́ɛ mɛ, bo ná dó ajɔ yě.”
25Nǔ e é wlán ɔ́ ɖíe: “Axɔ́sú Dɛmɛtliwúsi dó gbe Jwifu lɛ́ɛ sín togun ɔ́. 26Mǐ se ɖɔ mi kpo ɖo xwi jí nú alɛ e mi nu xá mǐ é, bɔ xomɛ hun mǐ. Mi kpo ɖo xɔ́ntɔn mǐtɔn nyí wɛ tɛgbɛ, mi yi dó mɛmɛ kɛntɔ́ mǐtɔn lɛ́ɛ ǎ. 27Mi ɖó kan dó gbejí nɔ nú mǐ wú mɔ̌, énɛ́ ɔ́, mǐ ná dó ajɔ mi ɖó alɔ e mi ná dó mǐ lɛ́ɛ tamɛ. 28Mǐ ná ɖe takwɛ́ e mi nɔ sú lɛ́ɛ kpo, lobo ná ná ajɔ tɛnmɛ tɛnmɛ mi. 29Bɛ́ sín din ɔ́, un ɖe mi nyi kɔ vɔ́, ɖo takwɛ́ tɛgbɛ tɔn sí, ɖo jɛ sín takwɛ́ e mi nɔ sú é kpó takwɛ́ e mi nɔ sú axɔ́sú é kpán sí. Jwifu lɛ́ɛ bǐ sésé wɛ un ɖe sín takwɛ́ énɛ́ lɛ́ɛ mɛ. 30 Bɛ́ sín égbé ɔ́, jinukún mitɔn lɛ́ɛ sín vlɔ̌ ɖó atɔn, kpó atínsínsɛ́n mitɔn lɛ́ɛ sín vlɔ̌ ɖó we e mi nɔ sɔ́ dó ná kuzú ná ɔ́ kpó ɔ́, mi sɔ́ ɖo ɖě ná ná wɛ ǎ. Un ɖe wǔjɔmɛ fɔ énɛ́ ɔ́ bɛ́ sín égbé sɔ́ yi tɛgbɛ, sɛ́ dó Judée to ɔ́, bó ɖe sɛ́ dó Samalíi-tokánɖó-atɔn e è sɔ́ gɔ́ n'i lɛ́ɛ kpódó Galilée gbé jí ɔ́ bǐ kpán. 31È nǎ sɔ́ Jeluzalɛ́mu dó mɔ toxo mímɛ́ ná. È na ɖe é ɖésú ɔ́ kpódó gbě e jí é kpa acɛ gbɔn lɛ́ɛ bǐ kpó sín takwɛ́ mɛ. Nǔ mǎɖówǒ sín kuzú e è nɔ yí ɔ́ kpódó axɔ́ sú dó nǔ jí e nyí étɔn lɛ́ɛ kpán ɔ́, mɛɖé sɔ́ ɖo nǎ yǐ ɖo así tɔn wɛ ǎ. 32Un jó acɛ e un ɖó dó toxo nukúnɖéjí Jeluzalɛ́mu tɔn jí lɛ́ɛ dó. Un jó e dó nú vɔ̌sánú-xwlémawutɔ́ ɖaxó ɔ́. É ɖésú wɛ ná cyán mɛ e sixú cɔ́ n'i, bɔ é ná nyɔ́ lɛ́ɛ é. 33Jwifu e ahwan wlí ɖo Judée, bɔ è fúnfún yě gbɔn axɔ́súɖuto ce mɛ lɛ́ɛ ɔ́, un ná jó yě bǐ, ma yí nǔ ɖěbǔ. Yě ná sú takwɛ́ ɖěbǔ ǎ, yě ká ɖo na sú wɛ ɖo kanlin yětɔn lɛ́ɛ lɔ jí ǎ. 34Jwifu e ɖo axɔ́súɖuto ce mɛ lɛ́ɛ ɖěbǔ na sú axɔ́ dó nǔɖé jí, alǒ axɔ́ e yě ɖu lɛ́ɛ jí ɖo xwezán ɖaxó lɛ́ɛ hwenu ǎ. Yě ká na sú ɖo gbɔjɛzán gbe lɛ́ɛ, sunwájǐxwe lɛ́ɛ kpódó xwezán ɖě lɛ́ɛ ɖěbǔ kpán gbe ǎ. Xwe ɖaxó ɔ́ kpo azǎn atɔn ɔ́, yě ná sú ǎ. È ɖu xwe ɔ́ bónú azǎn ma ko kpé atɔn ǎ ɔ́, yě ná sú ǎ. 35Mɛ ɖěbǔ ɖó acɛ bó ná zín yě jí ɖɔ yě ni sú axɔ́, alǒ bó ná ɖó ayimaj'ayǐ nú yě ɖó nǔɖé wútu ǎ.
36“È hɛn ɔ́, è na yǐ Jwifu káká yi afɔwó-afatɔ́n (3.000) mɔ̌ dó ahwangɔnu axɔ́sú ɔ́ tɔn mɛ, bó ná nɔ sú axɔ́ ɖokpó ɔ́ yě kpó ahwangɔnu axɔ́súɖuto ɔ́ tɔn ɖě lɛ́ɛ kpán. 37É ná kpɔ́n yě mɛ, bó sɔ́ mɛ ɖó agbǒ axɔ́sú ɔ́ tɔn nukúnɖéjí lɛ́ɛ mɛ, kpó tɛn e mɛ mɛ ɖeji d'é wú jɛ́n sixú nɔ nú mɛ lɛ́ɛ kpán mɛ. Ahwangán yětɔn ɖaxó lɛ́ɛ kpódó ɖě lɛ́ɛ bǐ kpán ɔ́, yě mɛ wɛ è na cyán ɖe, bɔ yě ná zán gbɛ xwedó sɛ́n yětɔn lɛ́ɛ ɖi lě e axɔ́sú ɔ́ ko to gbɔn nú Judéenu lɛ́ɛ é.
38“Samalíi tokánɖó atɔn e è sɔ́ xú Judée jí lɛ́ɛ kpó é kpó ná húzú tokpɔnla ɖokpó ɔ́, bɔ yě ná nɔ́ vɔ̌sánú-xwlémawutɔ́ ɖaxó ɔ́ ɖokpónɔ sín acɛ mɛ. 39Un jó Putolemayísi toxo ɔ́ kpódó tokpɔnla tɔn kpán bǐ dó nú Sinsɛnxɔ Jeluzalɛ́mu tɔn. Énɛ́ ɔ́, akwɛ́ e è nǎ cyán ɖo fínɛ́ lɛ́ɛ ná dó alɔ mi, bɔ mi ná kpé azɔ̌ e ɖo tɛn mímɛ́ ɔ́ wú lɛ́ɛ é wú, bó wa. 40Mɔ̌ ɖokpó ɔ́, xwewú xwewú ɔ́, un ná nɔ́ ná gankwɛ́ děgba atɔn afɔwó-afatɔ́n (15.000) ɖo akwɛ́ e è sɔ́ ɖó énɛ́ kanta ɖo axɔ́súɖuto ce mɛ é mɛ. 41Xwe e wá yi lɛ́ɛ mɛ ɔ́, akwɛ́ e lán ɖo nǔ lɛ́ɛ jí ɔ́ wɛ axɔ́súzɔ́watɔ́ lɛ́ɛ nɔ sɛ́ dó tɛn mímɛ́ ɔ́. Yě ká sɔ́ wá ɖo blǒbló wɛ ǎ. Din ɔ́, akwɛ́ e è nǎ dó wa azɔ̌ ná ɖo Sinsɛnxɔ ɔ́ wú ɔ́, yě wɛ ná ná bǐ. 42Mɔ̌ ɖokpó ɔ́, xwewú xwewú ɔ́, è nɔ yí gankwɛ́ děgba ɖě afatɔ́n (5.000) ɖo Sinsɛnxɔ ɔ́ sín akwɛ́ mɛ. Mɛ ɖé sɔ́ ja ɖě yí gbé ǎ, ɖó vɔ̌sánú-xwlémawutɔ́ é nɔ́ wa azɔ̌ ɖo Sinsɛnxɔ ɔ́ mɛ lɛ́ɛ tɔn wɛ.
43“Mɛ ɖé lɛ́ɛ nɔ yi hɔn hwlá ɖó Sinsɛnxɔ ɔ́ mɛ ɖo Jeluzalɛ́mu alǒ fí e sɛ yá fínɛ́ lɛ́ɛ, ɖó yě sú axɔ́sú takwɛ́, alǒ axɔ́ ɖěvo e yě ɖu lɛ́ɛ é ǎ wú. È sɔ́ ɖo yě ɖě ná wlí wɛ ǎ; è ka sɔ́ ɖo nǔ yětɔn lɛ́ɛ ná yí ɖó axɔ́ ɔ́ nú wɛ ɖo axɔ́súɖuto ce mɛ ǎ. 44Akwɛ́ e ɖo axɔ́súgbá mɛ é wɛ è nǎ zán dó wa azɔ̌ ɖo Sinsɛnxɔ ɔ́ wú, lobo bló ɖó. 45Akwɛ́gbá énɛ́ ɔ́ wɛ ná ná akwɛ́, bɔ è na lɛ́ mɛ Jeluzalɛ́mu sín dǒ e mu lɛ́ɛ, lobo lɛ́ ná sósyɛ́n xɔ e è gbǎ lɛ́ lɛ̌ dó yě lɛ́ɛ é. É ɖokpó ɔ́ mɛ jɛ́n è nǎ lɛ́ kpɔ́n, bó ná dó mɛ dǒ lɛ́ lɛ̌ dó Judée to ɔ́.”
Dɛmɛtliwúsi nukɔntɔn ɔ́ wá kú
46Ée Jonatáan kpó togun ɔ́ kpán se akpádídó Dɛmɛtliwúsi tɔn nɛ́ lɛ́ɛ ɔ́, yě ɖi nǔ ná ǎ, lobo gbɛ́ yě. Yě flín ɖɔ Dɛmɛtliwúsi hɛn nǔ gěgé gblé ɖo Izlayɛ́li lobo ka nɔ kpa acɛ gannaganna nú mɛ e ɖo glɔ̌ tɔn lɛ́ɛ é tɛgbɛ. 47Yě mɔ ɖɔ émí gbɔ bó nɔ xɔ́ntɔn yí xá Alɛsándlu ɔ́, é nyɔ́ hú, ɖó é wɛ ɖɔ fífá sín alɛnunu xó xá yě jɛ nukɔn, bɔ yě nyi akɔ jɛ xá tɔ́ tɔn lɛ́ɛ káká yi kú tɔn hwenu.
48Axɔ́sú Alɛsándlu kplé ahwangɔnu ɖaxó ɖokpó, lobo yi jɛ agban nyi Dɛmɛtliwúsi sín nukɔn. 49Axɔ́sú we lɛ́ɛ jɛ ahwan fun jí, lo ɔ́, Alɛsándlu sín sɔ́ja lɛ́ɛ hɔn. Dɛmɛtliwúsi jɛ túnnu yětɔn, bó ɖu ɖo yě jǐ. 50É fun ahwan kpó hlɔ̌nhlɔ́n kpán gbe nɛ́ gbe káká bɔ hwe yi xɔ, amɔ̌, è hu é lɔmɔ̌ gbe nɛ́ gbe.
Alɛsándlu Balasi ví ɔ́ da vǐ nyɔ̌nu Putolemɛ́ɛ ayizɛ́ngɔ́ ɔ́ tɔn
51Bɔ Alɛsándlu sɛ́ wɛnsagun dó Putolemɛ́ɛ ayizɛ́ngɔ́ e nyí axɔ́sú Ejípu tɔn é gɔ́n, bó ɖɔ è ni ɖɔ n'i ɖɔ: 52“Un lɛ́ kɔ wá axɔ́súɖuto ce mɛ lobo ko jínjɔ́n tɔ́gbó ce lɛ́ɛ sín axɔ́súzinkpo jí. Un xɔ to. Un ɖu ɖo Dɛmɛtliwúsi jí, lobo yí to mǐtɔn sín asi tɔn. 53Nǔgbó ɔ́, un tɔ́n ahwan Dɛmɛtliwúsi. Nyɛ kpó sɔ́ja ce lɛ́ɛ kpó ɔ́, mǐ ɖu ɖo é kpódó ahwangɔnu tɔn kpán jǐ, lobo yi axɔ́súzinkpo tɔn. 54Din ɔ́, gbɔ nú mǐ ni zun xɔ́ntɔn, lobo nú a na ná vǐ nyɔ̌nu towe mì nú má da. Un na húzú vǐsú nú we, lobɔ ajɔ e jɛ xá ɔ́, un na ná hwi kpódó é lɔmɔ̌ kpán.”
55Axɔ́sú Putolemɛ́ɛ yí gbe n'i, bó ɖɔ: “Nǔ ɖaxó wɛ jɛ gbe e gbe a lɛ́ kɔ wá tɔ́gbó towe lɛ́ɛ sín to mɛ, lobo jínjɔ́n axɔ́súzinkpo yětɔn jí é. 56Un yí gbe nú nǔ a wlán dó wěma towe mɛ ɔ́ éhɔ́nmɛ. Amɔ̌, wǎ kpé mì ɖo Putolemayísi. Fínɛ́ wɛ mǐ ná mɔ mǐɖée ɖe. Un na ná vǐ ce we, bɔ é ná nyí asi nú we, lě e a ko byɔ́ gbɔn é.”
57Putolemɛ́ɛ jɛ ali sín Ejípu kpódó vǐ nyɔ̌nu tɔn Kleopatlu kpán. É wá jɛ Putolemayísi ɖo xwe kɛnnɛ nukún we mɛ (162). 58Axɔ́sú Alɛsándlu wá kpé e, bɔ Putolemɛ́ɛ da vǐ nyɔ̌nu tɔn Kleopatlu n'i. Putolemayísi wɛ yě wlí alɔ ɔ́ ɖe, lobɔ é nyí xwe ɖaxó bɔ é ɖu lě e è ko nɔ bló gbɔn ɖo axɔ́sú lɛ́ɛ sín hwɛndo mɛ é.
Axɔ́sú Alɛsándlu ɖó ɖǒkpé nú Jonatáan
59Énɛ́ ɔ́ gúdo ɔ́, axɔ́sú Alɛsándlu sɛ́ wěma dó Jonatáan ɖɔ é ní wá kpé émí. 60Bɔ Jonatáan zɔn awǒbóbó kpódó susu ɖaxó kpán mɛ yi Putolemayísi bó yi kpé axɔ́sú we lɛ́ɛ. É hɛn kpatágan, siká kpó agbankan gěgé kpán wá nú axɔ́sú we lɛ́ɛ, kpódó xɔ́ntɔn yětɔn lɛ́ɛ kpán, lobɔ nǔ tɔn nyɔ́ nukún yětɔn mɛ. 61Hwenɛ́nu wɛ Izlayɛ́li ví lǐkpánɔ e ma nɔ nyi sɛ́n ɔ́ ǎ lɛ́ɛ wá kplé yěɖée bó ná wa nǔ xá Jonatáan. Yě jló ná dó gan tɔn tɔ ɖo axɔ́sú ɔ́ gɔ́n, lo ɔ́, axɔ́sú ɔ́ ka se yětɔn ǎ. 62É nyɔ́ wa ɔ́, é lɛ́ ɖe gbe ɖɔ è ni ɖe awu e ɖo Jonatáan kɔ lɛ́ɛ é, lobo sɔ́ vɔ̌sánú-xwlémawutɔ́ sín awu vɔvɔ ɔ́ dó n'i, bɔ è ka bló ɖ'é jí. 63Axɔ́sú ɔ́ wá sɔ́ ɛ jínjɔ́n é ɖésúnɔ kpá, lobo ɖɔ nú ahwangán tɔn lɛ́ɛ ɖɔ: “Mi kplá Jonatáan káká yi toxo ɔ́ tɛ́ntin, lobo nú mi jlá mɛ bǐ ɖɔ mɛ ɖěbǔ kún ɖó acɛ bó ná dó nǔ ɖěbǔ sín hwɛ ɛ, alǒ bó ná ba nyanya tɔn, ɖó nǔ ɖěbǔ wǔtu ó.”
64Mɛ e ɖo ji dó Jonatáan wɛ lɛ́ɛ mɔ yɛ̌yi e wlí n'i wɛ è ɖe gbɔn wɛn e dó wɛ é ɖe ɔ́ gbla mɛ é. Yě lɛ́ mɔ vɔ̌sánú-xwlémawutɔ́ sín awu vɔvɔ e è nɔ dó nǔwiwa hwenu e é ɖo kɔ n'i, lobɔ yě gbɔ bó hɔn. 65Axɔ́sú ɔ́ lɛ́ ná ɛ susu, lobo lɛ́n ɛ dó nukɔntɔ́ xɔ́ntɔn axɔ́sú ɔ́ tɔn lɛ́ɛ mɛ. È ka lɛ́ sɔ́ ɛ dó ɖó ahwangán sunvínɔ, é ná lɛ́ kpa acɛ dó tokpɔnla e mɛ é ɖe ɔ́ bǐ nu. 66Énɛ́ ɔ́ gúdo ɔ́, Jonatáan lɛ́ kɔ yi Jeluzalɛ́mu ɖo fífá kpódó awǎjijɛ kpán mɛ.
Jonatáan ɖu ɖo Apoloniwúsi jí
67Ɖo xwe kɛnnɛ atɔ́ɔ́n (165) mɛ ɔ́, Dɛmɛtliwúsi e nyí Dɛmɛtliwúsi nukɔntɔn ɔ́ sín vǐ ɔ́ lɛ́ kɔ wá Klɛ́ti, tɔ́gbó tɔn lɛ́ɛ sín tomɛ. 68Ée axɔ́sú Alɛsándlu se mɔ̌ ɔ́, ayi tɔn gbadó, bɔ é lɛ́ kɔ wá Antiyɔ́ci. 69Dɛmɛtliwúsi sɔ́ Apoloniwúsi dó sɔ́ tokpɔnlagán ɖo Silíi ɖaxó ɔ́ nu. Mɛ énɛ́ kplé ahwangɔnu ɖaxó ɖokpó bó yi jɛ agban nyi Jamuniya kpá, bó sɛ́ wɛn élɔ́ dó vɔ̌sánú-xwlémawutɔ́ ɖaxó Jonatáan: 70“Hwi ɖokpónɔ jɛ́n ɖo ahwan fun xá mǐ wɛ. Mɛ lɛ́ɛ nɔ ko mì, bo nɔ zun mì, ɖó hwi wú. Aniwú a ka nɔ ɖe acɛkpikpa towe xlɛ́ dó mǐ mɛ e ɖo sókan mɛ lɛ́ɛ é wú?” 71Ényí a gǎn jɛ ahwangɔnu towe wú dóó hǔn bo jɛ te wá mǐ gɔ́n fí din ɖo ayǐkúngban wɛnjɛ élɔ́ jí. Énɛ́ lo ɔ́, mǐ ná tunwun mɛ e hú hlɔ̌nhlɔ́n mɛɖé ɖo nyi kpó hwi kpán tɛ́ntin é. Ɖó ahwankpá e nu un ɖe lɛ́ɛ ɔ́, toxo ɖaxó mɛ wɛ yě gosín. 72Ba do ná, kan nyi kpó mɛ e ɖo gǔdo ce lɛ́ɛ é kpán sín xó byɔ́. Mɛ lɛ́ɛ ná ɖɔ nú we ɖɔ mi kún ɖó agbɔ̌n bó ná nɔ te ɖo nukɔn mǐtɔn ó, ɖó azɔn we wɛ mǐ ko ɖu ɖo tɔ́gbó mitɔn lɛ́ɛ jí ɖo to yě ɖésúnɔ tɔn mɛ. 73Gbeɖé jí wɛ é ɖe, din ɔ́, a ɖǒ agbɔ̌n e ná kpé sɔ́xátɔ́ kpódó ahwangɔnu ce élɔ́ ɔ́ kpán jí ǎ. Ɖó ayǐkúngban wɛnjɛ élɔ́ e jí wɛ mǐ ɖe ɔ́, fí ɖěbǔ ɖe, só ɖěbǔ ɖe, awǐnnya ɖěbǔ ɖe, bónú è nǎ yi hwlá ɖe ǎ.
74Ée Jonatáan se wɛn énɛ́ é ɔ́, ayi tɔn gbadó ɖésú, bɔ é bɛ́ gbɛtɔ́ děgba we afɔwó (10.000) gɔ́ nú éɖée bó gosín Jeluzalɛ́mu, bɔ nɔví tɔn Sinmɔ́ɔ wá yi kpé e, é kpódó sɔ́jahwan ɖěvo kpán, nú yě ná dó alɔ ɛ. 75Yě wá jɛ agban nyi Jopée sín nukɔn. Toxo ɔ́ mɛ nu lɛ́ɛ gbɔ bó dɔn toxo ɔ́ sín hɔn sú, ɖó Apoloniwúsi ko bɛ́ ahwan tɔn lɛ́ɛ wá ɖó Jopée sín toxo ɔ́ mɛ, lobɔ Izlayɛ́li ví lɛ́ɛ jɛ ahwan fun xá toxo ɔ́ jí. 76Toxo ɔ́ mɛ nu lɛ́ɛ bɛ́ xɛsi, yě hun hɔn lɛ́ɛ kɛ́ bɔ Jonatáan yí Jopée. 77Ée Apoloniwúsi se xó ɔ́, é jɛ ali, é kpódó sɔ́xátɔ́ afɔwó-afatɔ́n (3.000) kpán, kpódó sɔ́ja afɔzɔntɔ́ wɔ̌buwɔ́bú ɖé lɛ́ɛ kpán, bɔ yě ɖidó Asidɔ́di, bó bló mɛ ɖo toxo ɔ́ ná xo zlɛ́ wɛ é ɖɔhun. Lo ɔ́, hwenɛ́nu ɖokpó ɔ́, yě lɛ́ mlɛ́ ali ɖidó ayǐkúngban wɛnjɛ ɔ́ jí, ɖó sɔ́xátɔ́ tɔn lɛ́ɛ sukpɔ́, bɔ é ka lɛ́ ɖeji dó yě wú. 78Jonatáan jɛ túnnu tɔn ɖidó Asidɔ́di wají, lobɔ ahwangɔnu we lɛ́ɛ jɛ ahwan fun jí 79Apoloniwúsi ka ko bɛ́ sɔ́xátɔ́ afatɔ́n (1.000) hwlá dó ahwangɔnu Izlayɛ́li ví lɛ́ɛ tɔn gǔdo. 80Ajijimɛ ɔ́, Jonatáan mɔ ɖɔ kɛntɔ́ lɛ́ɛ tɔ́n ahwan émí gbɔn gǔdo. Sɔ́xátɔ́ lɛ́ɛ wá lɛ́ lɛ̌ dó ahwangɔnu tɔn. Bɔ yě ɖo gǎ da dó Izlayɛ́li ví lɛ́ɛ wɛ sín zǎnzǎn káká bɔ zǎn kú. 81Jonatáan sín sɔ́ja lɛ́ɛ dɛ́ ɖ'é nu syɛ́nsyɛ́n lě e é zɔ́n yě gbɔn é, bɔ nǔ jɛ kɔ cí nú kɛntɔ́ lɛ́ɛ sín sɔ́ lɛ́ɛ jí. 82Sinmɔ́ɔ zɔn ahwangɔnu tɔn lɛ́ɛ nu bɔ yě byɔ́ ahwan ɔ́ mɛ, bó tɔ́n ahwan sɔ́ja afɔzɔntɔ́ lɛ́ɛ gbɔn gǔdo, hwenu e nǔ ko ɖo gbǐgbɛ́ dó sɔ́xátɔ́ lɛ́ɛ wɛ é. Sinmɔ́ɔ vívá kɛntɔ́ lɛ́ɛ, bɔ yě hɔn. 83Sɔ́xátɔ́ lɛ́ɛ gba kpé gbɔn gbě ɔ́ bǐ jí yětɔn yětɔn. Yě hɔn ɖidó Asidɔ́di, bo yi hwlá dó nǔmɛsɛn yětɔn Dagɔ́ni sín Sinsɛnxɔ mɛ. 84Jonatáan bɛ́ dɔkun kɛntɔ́ lɛ́ɛ tɔn. É sí zo Asidɔ́di kpódó toxo e lɛ́ lɛ̌ dó e lɛ́ɛ kpán. É dó ɖɛxɔ Dagɔ́ni tɔn ɔ́ zo, bɔ é ji kpódó mɛ e yi hɔn hwlá d'é mɛ lɛ́ɛ kpán. 85Mɛ e è hu alǒ è fyɔ́ ɖo ahwan ɔ́ mɛ lɛ́ɛ ɔ́ yi gbɛtɔ́ děgba we (8.000) mɔ̌.
86Jonatáan wá gosín fí énɛ́, bó wá yi jɛ agban nyi Asikalɔ́ɔn toxo ɔ́ nukɔn. Toxo ɔ́ mɛ nu lɛ́ɛ tɔ́n sín toxo ɔ́ mɛ bó wá yí yě kpódó susu ɖaxó kpán. 87Bɔ é kpódó sɔ́ja tɔn lɛ́ɛ kpán wá Jeluzalɛ́mu, bó hɛn dɔkun e é bɛ́ ɖo ahwangbénu lɛ́ɛ gěgé wá yi.
88Ée axɔ́sú Alɛsándlu se xó nɛ́ lɛ́ɛ ɔ́, é jló ná lɛ́ sɔ́ Jonatáan sú d'é jí. 89É wá sɔ́ nyɛ̌ví siká tɔn ɖokpó sɛ́ dó e. Hwɛhwɛ ɔ́, ajɔ énɛ́ ɔ́ wɛ é nɔ́ ná mɛ e è ɖe nyǐ, bɔ yě nɔ́ nyí axɔ́sú hɛ̌nnumɔ lɛ́ɛ é. Mɔ̌ ɖokpó ɔ́, é lɛ́ sɔ́ Akalɔ́ni toxo ɔ́ kpódó fí e yá fínɛ́ lɛ́ɛ kpán sín acɛkpikpa dó alɔ mɛ nú Jonatáan.
Currently Selected:
1 Makabée 10: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.