1 Makabée 7
7
Dɛmɛtliwúsi húzú axɔ́sú
1Ɖo xwe kantɔn gban nukún ɖokpó mɛ ɔ́ (151), Dɛmɛtliwúsi, Selekúsi sín vǐ ɔ́ hɔn sín Hlɔ̌ma. É kpó mɛ nabíɖé kpó wlí zɔnlin xwe toxo ɖé mɛ ɖo Mɛditɛlanɛ́ɛ xu ɔ́ tó, lobo sɔ́ éɖée axɔ́sú ɖo fínɛ́. 2Hwenu e é wá xwe tɔ́gbó tɔn lɛ́ɛ sín hɔnmɛ, ɖo Antiyɔ́ci ɔ́, ahwan wlí Antiyokúsi Epatɔ́ɔ kpódó Liziyási kpán bó kplá yě jǎwe gɔ̌n tɔn. 3Ée Dɛmɛtliwúsi se mɔ̌ ɔ́, é ɖɔ émí kún jló ná mɔ yě ó. 4Bɔ ahwangɔnu ɔ́ hu yě, lobɔ Dɛmɛtliwúsi sɔ́ tɛnmɛ ɖo axɔ́súzinkpo ɔ́ jí.
5Izlayɛ́li ví nyanya alɛdatɔ́ lɛ́ɛ bǐ wá mɔ ɛ. Alukímu e jló ná húzú vɔ̌sánú-xwlémawutɔ́ ɖaxó ɔ́ wɛ zɔn yě nu. 6Yě dó hwɛ Jwifu ɖě lɛ́ɛ ɖo axɔ́sú ɔ́ nukɔn bó ɖɔ: “Judási kpódó nɔví tɔn lɛ́ɛ kpán hu xɔ́ntɔn towe lɛ́ɛ bǐ lobo nya mǐ sín to mǐtɔn mɛ.” 7“Hǔn, sɛ́ mɛ e wú a ɖeji dó ɔ́ ɖokpó dó din. É ná yi kpɔ́n nǔ e Judási hɛn gblé ɖo mǐ gɔ́n, bó hɛn gblé ɖo axɔ́sú mǐtɔn lɛ́ɛ sín ayǐkúngban jí é, lobo ka ná dɔn tó nú Judási, nɔví tɔn lɛ́ɛ kpó mɛ e nɔ dó alɔ yě lɛ́ɛ bǐ kpán.”
Bakidɛ́si kpódó Alukímu kpán ɖo Judée
8Axɔ́sú Dɛmɛtliwúsi sɔ́ Bakidɛ́si. Bakidɛ́si ɔ́, axɔ́sú ɔ́ xɔ́ntɔn lɛ́ɛ ɖokpó wɛ, bó nyí afɔsɔ́ɖótetɔ́ tɔn ɖo Silíi ɖaxó ɔ́. Gbɛtɔ́ nukúnɖéjí ɖokpó wɛ é nyí ɖo to ɔ́ bǐ mɛ, lobo nɔ se axɔ́sú ɔ́ sín gbe 9Dɛmɛtliwúsi sɛ́ é kpó Alukímu gbɛtɔ́ dídá nɛ́ ɔ́ kpán dó. Axɔ́sú ɔ́ sɔ́ Alukímu dó sɔ́ vɔ̌sánú-xwlémawutɔ́ ɖaxó ná, lobo zɔ́n ɛ ɖɔ é ní dɔn tó nú Izlayɛ́li ví lɛ́ɛ ɖó nǔ nyanya e yě wa lɛ́ɛ wú. 10Bakidɛ́si kpódó Alukímu kpán zɔn ahwan wɔ̌buwɔ́bú ɖé nu wá yi Judée. Ée yě wá ɔ́, yě sɛ́ mɛ dó Judási kpódó nɔví tɔn lɛ́ɛ kpó, lobo blɛ́ yě ɖɔ fífá sín alɛ nu xá yě gbé wɛ émí tɔ́n. 11Ée Jwifu lɛ́ɛ ka mɔ lě e ahwanfuntɔ́ yětɔn lɛ́ɛ sukpɔ́ sɔ ɔ́, yě ɖi nǔ nú xó yětɔn ǎ.
12É ɖo mɔ̌ có sɛ́nkplɔ́nmɛtɔ́gán ɖé lɛ́ɛ wá yi Alukímu kpó Bakidɛ́si kpó gɔ́n, lobo ná ba lě e è nǎ blǒ gbɔn bɔ é ná nyɔ́ é. 13Ɖó Jwifu lɛ́ɛ mɛ ɔ́, Hasidéenu lɛ́ɛ wɛ nyí mɛ nukɔntɔn e byɔ́ fífá yě é. 14Ɖo ayi yětɔn ɖɔ nú yě ɖɔ: Alukímu e zɔn axɔ́sú ɔ́ sín ahwan nu bó wá ɔ́, vɔ̌sánú-xwlémawutɔ́ wɛ, bó nyí Aalɔ́ɔn sín hɛ̌nnumɔ. É sixú wa nǔ nyanya ɖé nú mǐ ǎ.
15Alukímu dó gbe fífá dó ɖɔ xó nú yě, lobo dó akpá nú yě ɖɔ: “Mǐ ná lin nyanya mitɔn alǒ xɔ́ntɔn mitɔn lɛ́ɛ sín nyanya gbeɖé ǎ.”
16Hasidéenu lɛ́ɛ ɖi nǔ n'i. É ɖo mɔ̌ có Alukímu wlí mɛ kanɖé ko (60) ɖo yě mɛ lobo zɔ́n ɖɔ è nǐ hu yě gbe ɖokpó ɔ́. Mawuxówéma ɔ́ ko ɖɔ: 17 “Yě fúnfún xɔ́ntɔn e nɔ gbejí n'i lɛ́ɛ cyɔ gbɔn fí bǐ. Yě kɔn hun yětɔn nyi ayǐ sin ɖɔhun, lɛ́ lɛ̌ dó Jeluzalɛ́mu. Mɛ ɖěbǔ ka ɖo fínɛ́ bó ná ɖi cyɔ lɛ́ɛ ǎ.” 18Xɛsi jɛ togun ɔ́ bǐ jí, bɔ mɛ lɛ́ɛ nɔ ɖɔ: “Mɛ élɔ́ lɛ́ɛ ɔ́, adingbannɔ wɛ yě nyí bó nɔ́ wa nǔ agɔ. Nǔgbó ɔ́, yě sɔ́ wá nɔ xwi jí nú nǔ e jí mǐ sí te dó lɛ́ɛ é kpó akpá e yě dǒ lɛ́ɛ kpán ɖě ǎ.”
19Bakidɛ́si gosín Jeluzalɛ́mu, é kpódó ahwangɔnu tɔn kpán, bó yi jɛ agban nyi Bɛti-Zayíti. É zɔ́n bɔ è wlí mɛ e wá byɔ́ ahwan tɔn mɛ lɛ́ɛ gěgé, kpódó Jwifu ɖěvo lɛ́ɛ kpán. É zɔ́n ɖɔ è hu yě bó bɛ́ yě kɔn nyi dotɔ ɖaxó ɖé mɛ. 20É sɔ́ acɛkpikpa tokpɔnla ɔ́ tɔn dó así nú Alukímu kpódó sɔ́ja ɖé lɛ́ɛ kpán, nú yě ná dó alɔ ɛ, lobo lɛ́ kɔ yi axɔ́sú ɔ́ gɔ́n.
21Alukímu wa nǔ e wú é kpé ɔ́ bǐ nú è nǎ tunwun i dó tunwun vɔ̌sánú-xwlémawutɔ́ ɖaxó. 22Yě mɛ todántɔ́ lɛ́ɛ bǐ wɛ nɔ́ wá kplé lɛ́ lɛ̌ dó e. Yě klá jɛ Judée gbé ɔ́ bǐ nu, lobo hu to ɔ́ ɖó akpo. 23Judási wá mɔ ɖɔ Alukímu kpódó xɔ́ntɔn tɔn lɛ́ɛ kpán ɖo nǔ hɛn gblé dó wǔ nú Izlayɛ́li ví lɛ́ɛ wɛ hú mɛ e má nyí Jwifu ǎ lɛ́ɛ. 24Bɔ é gbɔn Judée gbé ɔ́ bǐ jí. É dɔn tó nú alɛdatɔ́ e yi byɔ́ Alukímu sín ahwan mɛ lɛ́ɛ lobo sú ali dó yě nú yě ma sɔ́ dán gbɔn to ɔ́ mɛ ɖě ó. 25Alukímu mɔ ɖɔ Judási kpódó ahwan tɔn lɛ́ɛ kpó sín hlɔ̌nhlɔ́n wá ɖo émítɔn hú wɛ, bɔ émí kún sɔ́ sixú nɔ te ɖo nukɔn yětɔn ó. Bɔ é lɛ́ kɔ yi mɔ axɔ́sú ɔ́ lobo ɖó nǔvú dó yě nu ɖɔ yě wa alǎnnú gěgé.
Axɔ́sú ɔ́ ɖe Nikanɔ́ɔ kpé nú Judási
26Nikanɔ́ɔ ɔ́, axɔ́sú ɔ́ sín ahwangán lɛ́ɛ ɖokpó wɛ. Gbɛtɔ́ nukúnɖéjí to ɔ́ tɔn lɛ́ɛ ɖokpó wɛ. É gbɛ́ wǎn nú Izlayɛ́li ɖésú. É wɛ axɔ́sú ɔ́ sɛ́ dó nú é ná yi vɔ togun énɛ́. 27Nikanɔ́ɔ wá yi Jeluzalɛ́mu kpódó ahwanfuntɔ́ wɔ̌buwɔ́bú ɖé lɛ́ɛ kpán. É dó fífá gbe Judási kpó nɔví tɔn lɛ́ɛ kpán lobo blɛ́ yě. É ɖɔ nú yě ɖɔ: 28“Nyɛ kpódó mi kpán ɖó ná fun ahwan xá mǐɖée ǎ. Sɔ́ja kwín we ɖé kpó nyi kpán wɛ ná wá mɔ mi ɖo fífá mɛ.” 29Hwenu e Nikanɔ́ɔ wá Judási gɔ́n ɔ́, yě dó gbe yěɖée. É dó doo n'i. Amɔ̌, kɛntɔ́ lɛ́ɛ ɖo gbesisɔ mɛ bo ná xo Judási sɔ́. 30Judási wá mɔ ɖɔ linlin nyanya jí wɛ Nikanɔ́ɔ zɔn wá émí gɔ́n. Xɛsi ɖi i, bɔ é gbo xó ɔ́ ɖó kléwún mɛ. 31Ée Nikanɔ́ɔ mɔ ɖɔ é wɔ́ yɛ nǔ e émí lin ná wa é tɔn ɔ́, é gosín Jeluzalɛ́mu, bó yi tɔ́n ahwan Judási ɖo Kafaasalama kpá. 32Gbɛtɔ́ afɔwe kanwe ko (500) mɔ̌ wɛ è hu ɖo Nikanɔ́ɔ sín mɛ lɛ́ɛ mɛ, bɔ mɛ ɖě lɛ́ɛ hɔn yi Davídi Toxo mɛ.
33Ée nǔ nɛ́ lɛ́ɛ jɛ wá yi ɔ́, Nikanɔ́ɔ wá yi Sinyɔ́ɔ só ɔ́ jí. Vɔ̌sánú-xwlémawutɔ́ lɛ́ɛ kpódó tomɛxó lɛ́ɛ kpán tɔ́n sín ɖɛxotɛn ɔ́ bó wá kpé e, bó dó gbe fífá n'i. Yě xlɛ́ ɛ vɔ̌ e è nɔ dó zo, bɔ yě ɖo sísá dó axɔ́sú ɔ́ tamɛ é. 34Nikanɔ́ɔ ka gbɔ́ yě ko, é zun yě, é tún atán dó yě wú, bó ɖó blɔ̌ yě wú. É dó goyítɔ́ gbe bó dó ɖɔ xó nú yě. 35É gblɔ́n adǎn nú yě kpódó xomɛsin kpán ɖɔ: “Din ɔ́, mi ɖó ná jó Judási kpó ahwangɔnu tɔn lɛ́ɛ kpán nú mì, é má nyí mɔ̌ ǎ ɔ́, un xwlé nǔ bǐ nú mi: mi fun ahwan ɔ́ vɔ ɔ́, un ná wá dó Sinsɛnxɔ élɔ́ zo.” É zɔn xomɛsin jí bó ɖidó. 36Vɔ̌sánú-xwlémawutɔ́ lɛ́ɛ wá yi kɔ́xo jí. Yě nɔ́ te ɖo vɔ̌sákpe ɖɛxotɛn ɔ́ tɔn nukɔn, lobo nɔ ɖɔ kpó avǐ kpó ɖɔ: 37“Aklúnɔ, hwi ɖésú wɛ ɖe nɔtɛn élɔ́ ɖó vo nú é ná nyí towe. A jló ɖɔ é ná nyí xwé e gbe togun towe ná nɔ wá xo ɖɛ, bó ná nɔ sa vo nú we ɖe é. 38Dɔn tó nú Nikanɔ́ɔ kpó ahwangɔnu tɔn kpán. Yě bǐ ni cí ahwan. Flín zun e yě zun mǐ é, lobo nú yě ɖě ma nɔ gbɛ ó.”
Nikanɔ́ɔ cí ahwan
39Nikanɔ́ɔ gosín Jeluzalɛ́mu, bo zɔ́n bɔ ahwangɔnu tɔn wá jɛ agban nyi Bɛtolɔ́ɔn. Ahwangɔnu Silíi tɔn ɖokpó wá gɔ́ n'i. 40Judási jɛ agban nyi Hadaca kpódó ahwanfuntɔ́ afɔwó-afatɔ́n (3.000) kpán. Lobo xo ɖɛ ɖo fínɛ́ ɖɔ: 41 “Aklúnɔ, gbe ɖokpó wɛ axɔ́sú ɖé sín mɛsɛ́dó lɛ́ɛ zun we. Bɔ wɛnsagun towe wá hu sɔ́ja tɔn lɛ́ɛ adɔ̌kpo tɛ́nnɛ děgba ɖě afatɔ́n (185.000). 42Lɛ̌ bló nǔ ɖokpó ɔ́, bó vívá ahwangɔnu élɔ́ e ɖo nukɔn mǐtɔn égbé é. Énɛ́ ɔ́, mɛ e ná kpo ɖo gbɛ lɛ́ɛ bǐ ná mɔ nǔ jɛ wú ɖɔ Nikanɔ́ɔ nyi nu do nú Sinsɛnxɔ towe mímɛ́ ɔ́. Ɖǒ hwɛ n'i, sɔ́ nǔ nyanya e é wa ɔ́ sín bǎ dó xo e.”
43Ahwangɔnu lɛ́ɛ bɛ́ ahwanfunfun ɖo azǎn wǎtɔngɔ́ ɔ́ e ɖo Adáa sín sunzán mɛ e gbe. É vívá ahwangɔnu Nikanɔ́ɔ tɔn ɔ́; bɔ é ɖésú wɛ ká nyí mɛ nukɔntɔn e kú ɖo ahwan ɔ́ mɛ é. 44Ée sɔ́ja tɔn lɛ́ɛ mɔ ɖɔ é kú ɔ́, yě bɛ́ alyánnú yětɔn lɛ́ɛ kɔn nyi gbě lobo hɔn. 45Jwifu lɛ́ɛ nya yě dó wezun nu mɔ̌ nú kéze gbe ɖokpó sín Hadaca káká yi Gazaláa lobo ɖo ahwankpɛn kwín wɛ ɖo yě gǔdo bó ná dó ná xlɛ́. 46Mɛ lɛ́ɛ nɔ tɔ́n sín gletoxo e ɖo Judée gbé jí lɛ́ɛ mɛ. Yě nɔ́ kpé hun xá kɛntɔ́hwan lɛ́ɛ gǔdo nukɔn, bɔ fí hɔn gbɔn ɖě sɔ́ tíin nú yě ǎ. Sɔ́ja Nikanɔ́ɔ tɔn lɛ́ɛ bǐ wɛ cí ahwan. Ɖokpó lě gán ɖo yě mɛ ǎ. 47Jwifu lɛ́ɛ bɛ́ alyánnú kpódó nǔzínzán e kɛntɔ́ lɛ́ɛ jó dó lɛ́ɛ kpán. Yě gbo ta Nikanɔ́ɔ, bó gbo ɖisílɔ tɔn e é dlɛ́n gbe nɛ́ gbe kpódó goyíyí kpán é. Yě bɛ́ bǐ, bó ná yi tɛ́ ɖo Jeluzalɛ́mu, nú mɛ lɛ́ɛ ná kpɔ́n. 48Xomɛ hun togun ɔ́ taala, bɔ yě ɖu xwe gbe nɛ́ gbe awǎjijɛ ɖaxó ɖé zán gbe wɛ ɖɔhun. 49Jwifu lɛ́ɛ ɖe gbeta tɔ́n ɖɔ émí ná nɔ ɖu xwe nɛ́ ɔ́ xwewú xwewú tɛgbɛ ɖo azǎn wǎtɔngɔ́ ɔ́ e nɔ jɛ ɖo Adáa sun mɛ ɔ́ gbe. 50Bɔ Judée nɔ fífá mɛ nú hwenu ywɛywɛ ɖé.
Currently Selected:
1 Makabée 7: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.