1 Makabée 5
5
Judási fun ahwan xá Idumɛ́ɛnu lɛ́ɛ kpó Amumɔ́ɔnu lɛ́ɛ kpó
1Togun e lɛ́ lɛ̌ dó yě lɛ́ɛ wá se xó élɔ́: “Jwifu lɛ́ɛ vɔ́ vɔ̌sákpe ɔ́ mɛ, bó lɛ́ vɔ́ Sinsɛnxɔ ɔ́ gbá, bɔ é cí lě e é ko ɖe gbɔn ɖ'ayǐ xóxó é. Bɔ togun énɛ́ lɛ́ɛ bɛ́ xomɛsin ɖaxó ɖé.” 2Yě sí te d'é jí ɖɔ émí ná vívá kún nú Izlayɛ́li ví e ɖo yě tɛ́ntin lɛ́ɛ bǐ. Bɔ yě jɛ mɛ e ɖo togun mǐtɔn mɛ lɛ́ɛ hu jí.
3Idumɛ́ɛ ví lɛ́ɛ xá Izlayɛ́li, bó ná tɔ́n ahwan ɛ. Judási yi fun ahwan xá yě ɖo Aklabatɛ́ni, bó wa nǔ xá yě titewungbe. É nya yě dó zɔ, bó bɛ́ nǔ e ɖo yě sí lɛ́ɛ bǐ. 4Énɛ́ gúdo ɔ́, Judási jló ná dɔn tó nú mɛ e ɖo kúnkan Bayiya tɔn mɛ lɛ́ɛ, ɖó nǔ nyanya e yě nɔ́ wa lɛ́ɛ é wú. Yě nɔ́ cɔ́ Izlayɛ́li ví lɛ́ɛ gbɔn ali lɛ́ɛ jí, bó nɔ́ ɖó mɔ nú yě, lobo nɔ tɔ́n ahwan yě. 5Judási kpíkpé yě, bó nya yě dó ahohó yětɔn mɛ. É bɔ ɖó nú yě, bó dó akpá ɖɔ émí ná hu yě bǐ. É dó ahohó nɛ́ lɛ́ɛ kpódó mɛ e ɖo yě mɛ lɛ́ɛ kpán zo. 6É ká sɔ́ nǔ bó yi Amumɔ́ɔnu lɛ́ɛ sín to mɛ. Fínɛ́ ɔ́, é kpé ahwangɔnu syɛ́nsyɛ́n ɖokpó, yě sukpɔ́ ɖésú, bɔ Timɔtée ɖo yě mɛ. 7Judási tɔ́n ahwan yě azɔn mɔ̌kpán. É ká wá ɖu ɖo ahwan ɔ́ jí, bó nyínyɛ́ yě. 8É yí Yazɛ́ɛ sín toxo ɔ́ kpódó gletoxo e lɛ́ lɛ̌ dó é lɛ́ɛ kpán, bó lɛ́ kɔ wá yi Judée.
Izlayɛ́li ví ɖé lɛ́ɛ byɔ́ alɔdó Judási
9Togun e ma nyí Jwifu ǎ bó ɖo Galadi lɛ́ɛ sɛ yěɖée kplé, bó bɔ ɖó nú Izlayɛ́li ví e ɖo to yětɔn mɛ lɛ́ɛ. Yě jló ná sú kún yětɔn dó. Bɔ mɛ énɛ́ lɛ́ɛ hɔn, bó yi bɛ ta, ɖo Datema sín ahohó mɛ. 10Fínɛ́ ɔ́, yě wlán wěma ɖokpó sɛ́ dó Judási kpódó nɔví tɔn lɛ́ɛ kpán ɖɔ: “Yě mɛ e ma nyí Jwifu ǎ, bó lɛ́ dó mǐ lɛ́ɛ sɛ yěɖée kplé dó mǐ wú, bó ná vɔ mǐ. 11Ahwangɔnu yětɔn e nukɔn Timɔtée ɖe ɔ́ ɖo nǔ sɔ́ wɛ, bó ná wá yi ahohó e mɛ mǐ hɔn hwlá dó é. 12Mi wá hwlɛ́n mǐ, ɖó mɛ gěgé ɖo mǐ mɛ, bɔ è ko hu. 13Nɔví mǐtɔn e ɖo Tobíi tomɛ ɖ'ayǐ lɛ́ɛ ɔ́, è ko hu yě bǐ. Yě wlí asi yětɔn lɛ́ɛ kpódó vǐ yětɔn lɛ́ɛ kpán dó gǎn bó bɛ́ dɔkun yětɔn lɛ́ɛ bǐ. Gbɛtɔ́ afatɔ́n (1.000) mɔ̌ wɛ kú ɖo gbe nɛ́ ɔ́ jí.”
14Hwenu e Judási kpódó nɔví tɔn lɛ́ɛ kpán ɖo wěma énɛ́ ɔ́ xa wɛ ɔ́, wɛnsagun ɖěvo lɛ́ɛ gosín Galilée bó wá. Yě tlɛ́n awu yětɔn lɛ́ɛ, bó lɛ́ dó wɛn ɖokpó ɔ́. 15Yě ɖɔ: “Yě mɛ e nɔ nɔ Putolemayísi, Tíi, Sidɔ́ɔn kpódó jǒnɔ Galilée tɔn lɛ́ɛ kpán é sɛ yěɖée kplé bó ná vívá mǐ.” 16Ée Judási kpódó togun ɔ́ kpan se xó nɛ́ lɛ́ɛ ɔ́, yě ɖó togbesɔ ɖaxó ɖokpó. Yě kɛ nu dó nǔ e yě ná wa nú Izlayɛ́li ví e awě xo, bɔ mɛ e ma nyí Jwifu ǎ lɛ́ɛ bɔ ɖó ná é wú. 17Judási ka ɖɔ nú nɔví tɔn Sinmɔ́ɔ ɖɔ: “Cyán mɛ nabí e sín nǔ hu dó we é, bó yi hwlɛ́n nɔví mǐtɔn e ɖo Galilée lɛ́ɛ é. Énɛ́ ɔ́, nɔví ce Jonatáan kpó nyi kpán ná ɖidó Galadi.” 18Judási jó Jozɛ́fu, Zakalíi ví ɔ́ kpódó Azaliya, togán ɔ́ kpán dó nyi Judée. Yě ɖǒ ná jɛ ahwan to ɔ́ jí kpódó ahwangɔnu e kpo é kpán. 19É ɖɔ nú yě ɖɔ: “Mi hɛn to ɔ́; mi ma ka tɔ́n ahwan mɛ e ma nyí Jwifu ǎ lɛ́ɛ cóbónú mi ná lɛ́ kɔ wá ó.” 20É ná sɔ́ja afɔwó-afatɔ́n (3.000) Sinmɔ́ɔ, nú yě ná yi Galilée, lobo ná děgba we (8.000) Judási nú yě ná yi Galadi.
Sinmɔ́ɔ kpódó Judási kpán ɖu ɖo ahwan gěgé jí
21Azɔn gěgé wɛ Sinmɔ́ɔ tɔ́n ahwan mɛ e ma nyí Jwifu ǎ lɛ́ɛ ɖo Galilée. É ɖu ɖo yě jí, lobo nya yě dó gbě. 22É nya yě káká yi jɛ Putolemayísi hɔn lɛ́ɛ jí. Ahwanfuntɔ́ afɔwó-afatɔ́n (3.000) wɛ yi kú ɖo yě mɛ, bɔ Izlayɛ́li ví lɛ́ɛ fɔ ahwanlyánnú yětɔn lɛ́ɛ. 23Énɛ́ gúdo ɔ́, Sinmɔ́ɔ kplé Jwifu e ɖo Galilée lɛ́ɛ kpódó ée ɖo Alubata lɛ́ɛ kpó. É kplé asi yětɔn lɛ́ɛ, vǐ yětɔn lɛ́ɛ kpódó nǔ e yě ko ɖó lɛ́ɛ bǐ kpán, lobo kplá yě hɛn yi Judée kpódó awǎjijɛ ɖaxó ɖé kpán.
24Hwe énɛ́ nu ɔ́, Judási, Makabée kpódó nɔví tɔn Jonatáan kpán d'asá Judɛ́ɛn tɔ ɔ́, lobo zun zɔnlin nú azǎn atɔn ɖo axéko jí. 25Yě wá yi xo go Nabatinu lɛ́ɛ, bɔ yě kɛ alɔ bó yi yě kpó fífá kpán. Yě kpi nǔ e jɛ dó Izlayɛ́li ví lɛ́ɛ jí ɖo Galadi lɛ́ɛ é bǐ sín tan nú yě. 26Yě ɖɔ nú yě ɖɔ: “Ahwan wlí Izlayɛ́li vǐ gěgé ɖo Bosola, Bosɔ́ɔ, Alema, Kasifóo, Makɛ́di kpó Kaanayímu kpán. Toxo ɖaxó nɛ́ lɛ́ɛ e cɔ́ wɛ è ɖe ganjí lɛ́ɛ é.” 27Ahwan wlí Izlayɛ́li ví ɖěvo lɛ́ɛ ɖo toxo ɖěvo lɛ́ɛ mɛ ɖo Galadi. Kɛntɔ́ yětɔn lɛ́ɛ ɖɔ émí ná tɔ́n ahwan ahohó nɛ́ lɛ́ɛ sɔ. Yě jló ná yí yě, bó ná hu mɛ e ɖ'é mɛ lɛ́ɛ bǐ gbe ɖokpó ɔ́. 28Azɔn ɖokpó ɔ́, Judási kpódó ahwangɔnu tɔn lɛ́ɛ kpán lɛ́ kɔ wá gǔdo, bó gbɔn axéko jí dó yi Bosola. Yě gba toxo ɔ́; yě bɛ́ nǔ e ɖ'é mɛ lɛ́ɛ, bó hu mɛ e ɖ'é mɛ lɛ́ɛ bǐ: dɔ̌nkpɛvú kpó mɛxó kpán bǐ, bó dó toxo ɔ́ zo.
29Yě wá wlí ali zǎn mɛ, sín Bosola bó yi káká ahohó Jwifu lɛ́ɛ tɔn e ɖo Datema é kɔn. 30Ée ayǐ hɔn é ɔ́, yě mɔ sɔ́ja wɔ̌buwɔ́bú ɖé lɛ́ɛ. Yě fɔ alyá kpódó ahwanlyánnú tɛnmɛ tɛnmɛ kpán, bó ná dó mu ahohó ɔ́, yě kó tɔ́ d'é wú lɔ. 31Judási mɔ ɖɔ ahwan ɔ́ ko bɛ́. É se zǐngídi ɖaxó ɖé, bó se ahwankpɛn lɛ́ɛ ɖo gbe ɖi wɛ, bɔ ahwanxósúsú ɖo nǔ ɖɔ wɛ sín toxo ɔ́ mɛ káká yi jǐxwé. 32Bɔ é ɖɔ nú ahwanfuntɔ́ tɔn lɛ́ɛ ɖɔ: “Mi fun ahwan éhɔ́nmɛ bó ná dó hwlɛ́n nɔví mǐtɔn lɛ́ɛ ná!”
33É má yě ɖó donu atɔn, bó ná dó tɔ́n ahwan kɛntɔ́ lɛ́ɛ gbɔn gúdo. Mɛ tɔn lɛ́ɛ jɛ ahwankpɛn kún jí, bó xo ɖɛ kpó xósúsú kpán. 34Sɔ́ja Timɔtée tɔn lɛ́ɛ wá tunwun ɖɔ Judási Makabée wɛ ɖo ahwan ɔ́ nu; bɔ yě hɔn ɖo nukɔn tɔn. Có Judási hu yě gěgé kɔn nyi ayǐ. Gbe nɛ́ gbé ɔ́, kɛntɔ́ děgba we (8.000) mɔ̌ wɛ jɛ ayǐ ɖo ahwan ɔ́ mɛ.
35Énɛ́ gúdo ɔ́, Judási wá kplá ahwangɔnu tɔn ɖidó Alema. Yě tɔ́n ahwan toxo énɛ́ ɔ́, bó ɖu ɖ'é jí. Yě hu mɛ e ɖo toxo ɔ́ mɛ lɛ́ɛ bǐ, yě fɔ nǔ yětɔn lɛ́ɛ, bó dó toxo ɔ́ zo. 36Ée yě gosín fínɛ́ ɔ́, yě wá yi gba Kasifóo, Makɛ́di, Bosɔ́ɔ kpódó Galadi toxo ɖě lɛ́ɛ kpán.
Judási lɛ́ ɖu ɖo ahwan jí ɖo Galadi tomɛ
37Ée nǔ nɛ́ lɛ́ɛ jɛ wá yi ɔ́, Timɔtée lɛ́ kplé ahwangɔnu ɖěvo, bó wá yi jɛ agban nyi Hlafɔ́ɔ́n nukɔn ɖo tɔsisa ɔ́ sín akpá ɖě ɔ́ xwé. 38Judási sɛ́ mɛ dó nú è yi ba do nú kɛntɔ́hwan ɔ́. Gbe e yě wá ɖó n'i é ɖíe: “Mɛ e ma nyí Jwifu ǎ bó lɛ́ lɛ̌ dó mǐ lɛ́ɛ sín ahwangɔnu hwe ɖěbǔ ǎ. Timɔtée wɛ ka ɖo yě nu. 39Yě yi da sɔ́ja Alabu lɛ́ɛ nú yě ná dó alɔ yě. Tɔsisa ɔ́ sín akpá ɖě ɔ́ xwé wɛ yě jɛ agban nyi, lobo ka ko ɖo gbesisɔ mɛ bó ná tɔ́n ahwan we.” Énɛ́ ɔ́, Judási kpódó ahwangɔnu tɔn lɛ́ɛ kpán wlí zɔnlin tlóló, bó ná yi kpé yě, 40bó sɛ yá tɔsisa ɔ́. Bɔ Timɔtée ɖɔ nú ahwangán tɔn lɛ́ɛ ɖɔ: “Ényí Judási d'asá tɔ ɔ́ jɛ nukɔn nú mi ɔ́, é ná mɔ ali dó mǐ wú, bɔ mǐ sɔ́ ná sixú dɛ sún ɖo nukɔn tɔn ǎ. 41Ényí é ɖi xɛsi bó cí tɔ ɔ́ gǔdo dɔ̌n ɔ́, mǐdɛɛ lɛ́ɛ ná d'asá tɔ ɔ́ bó ná tɔ́n ahwan ɛ, bó ná ɖu ɖo jǐ tɔn.”
42Ée Judási wá jɛ tɔ ɔ́ kpá ɔ́, é sɔ́ nukɔntɔ́ ɖé lɛ́ɛ ɖó tɔ ɔ́ tó, lobo ɖɔ nú yě ɖɔ: “Mi ma lɔn nú mɛ ɖěbǔ dó goxɔ tɔn nyi fí ó. Yě bǐ wɛ ɖó ná yi fun ahwan.” 43Judási d'asá tɔ ɔ́ jɛ nukɔn, bɔ ahwangɔnu ɔ́ bǐ jɛ túnnu tɔn, bɔ yě tɔ́n ahwan kɛntɔ́ lɛ́ɛ. Mɛ e ma nyí Jwifu ǎ lɛ́ɛ bǐ gbɔ bó jó agɔ. Yě bɛ́ alyánnú yětɔn lɛ́ɛ kɔn nyi gbě, bó hɔn yi hwlá dó Sinsɛnxɔ e ɖo Kaanayímu toxo ɔ́ mɛ é mɛ. 44Judási kpódó mɛ tɔn lɛ́ɛ kpán yí toxo ɔ́, lobo dó Sinsɛnxɔ ɔ́ zo kpódó mɛ e ɖ'é mɛ lɛ́ɛ bǐ kpán. Yě vɔ Kaanayímu to ɔ́. Bɔ bɛ́ sín hwenɛ́nu ɔ́, mɛ e ma nyí Jwifu ǎ é ɖě sɔ́ sixú dɛ sún ɖo Judási nukɔn ǎ.
45Énɛ́ gúdo ɔ́, Judási wá kplé Izlayɛ́linu e ko ɖo Galadi yíkúngban jí lɛ́ɛ bǐ, bɛ́ sín yɔkpɔ́vú bǐ ɔ́ jí káká wá yi mɛxó bǐ ɔ́ jí. É kplá yě kpódó asi yětɔn, vǐ yětɔn kpódó nǔzínzán yětɔn lɛ́ɛ bǐ kpán yi Judée; bɔ yě sukpɔ́ taala. 46Ée yě wá Eflɔ́n e nyí toxo nukúnɖéjí ɖokpó, bó dó hlɔ̌nhlɔ́n, bó ká ɖo ali yětɔn jí é ɔ́, xo jɛ́n yě ná xo e zlɛ́, ɖó yě sigǎn gbɔn ɖisí alǒ amyɔ ǎ. 47Lo ɔ́, Eflɔ́nnu lɛ́ɛ ká fɔ awǐnnya dó sú toxo ɔ́ sín hɔnli lɛ́ɛ, bó dó sú ali dó yě. 48Fínɛ́ wɛ Judási wá dó fífá sín wɛn élɔ́ sɛ́ dó yě ɖe bó ɖɔ: “Toxo mitɔn ɔ́ jɛ́n mǐ sixú xo zlɛ́, bó ná dó yi to mǐtɔn mɛ. Mɛ ɖěbǔ ja nǔ nyanya ɖé wa nú mi gbé ǎ. Ali mitɔn jí jɛ́n mǐ jló ná gbɔn kpowun, bó ná dín.” É ɖɔ mɔ̌ có to ɔ́ mɛ nu lɛ́ɛ gbɛ́ ɖɔ émí kún ná hun ali lɛ́ɛ nú yě ó.
49Judási wá ɖe gbe ɖɔ mɛ ɖokpó ɖokpó ní nɔ tɛn tɔn mɛ, bɔ é sɛ́ wɛn énɛ́ ɔ́ dó ahwangɔnu ɔ́ sín tito lɛ́ɛ. 50Énɛ́ gúdo ɔ́, sɔ́ja lɛ́ɛ sɔ́ nǔ bó tɔ́n ahwan toxo ɔ́. Yě fun ahwan nú kéze ɔ́ bǐ kpó zǎn ɔ́ bǐ kpán, bɔ toxo ɔ́ jɛ yě sí. 51Yě hu mɛ e ko ɖo to ɔ́ mɛ lɛ́ɛ bǐ, dɔ̌nkpɛvú kpó mɛxó kpó; yě bɛ́ nǔ yětɔn lɛ́ɛ, lobo gba toxo ɔ́ bǐ hánnyá, bɔ Izlayɛ́li ví lɛ́ɛ wá zun zɔnlin gbɔn cyɔ lɛ́ɛ jí, bó dó xo Eflɔ́n toxo ɔ́ zlɛ́. 52Yě d'asá Judɛ́ɛn tɔ ɔ́, bó jɛ ayǐkúngban wɛnjɛ e kpan nukɔn Bɛti-Ceani é jí. 53Judási xo mɛ e ɖo afɔ dɔn d'ayǐ wɛ ɖo gǔdo lɛ́ɛ kplé. É dó wǔsyɛ́n lanmɛ nú mɛ lɛ́ɛ, ɖo ali ɔ́ bǐ xo káká jɛ hwenu e yě wá Judée é. 54Yě xá Sinyɔ́ɔ só ɔ́ jí kpódó awǎjijɛ ɖaxó kpán. Yě sá vɔ̌ e è nɔ dó zo é nú Mawu. Ɖó mɛɖé kú ɖo yě mɛ ǎ, bɔ yě lɛ́ kɔ wá ɖo fífá mɛ.
Ahwan gblé dó Jozɛ́fu kpódó Azaliya kpán ɖo Jamuniya
55Judási kpó Jonatáan kpán kpo ɖo Galadi to ɔ́ mɛ, bɔ nɔví yětɔn Sinmɔ́ɔ ɖo Galilée, ɖo Putolemayísi toxo ɔ́ nukɔn. 56Hwenɛ́nu ɔ́, Jozɛ́fu, Zakalíi ví ɔ́ kpódó Azaliya kpán e nyí ahwangán ɖo Judée lɛ́ɛ se lě e yě fun ahwan lɛ́ɛ bó ɖu ɖ'é jí gbɔn é. 57Bɔ yě ɖɔ nú yěɖée ɖɔ: “Mi nú mǐ lɔ ná jɛ nyǐ. Mi nú mǐ ná tɔ́n ahwan togun jǒnɔ e lɛ́ lɛ̌ dó mǐ lɛ́ɛ é.” 58Yě ɖe gbe nú ahwankpá e nu yě kpa acɛ dó lɛ́ɛ é bó yi tɔ́n ahwan Jamuniya. 59Jɔ̌jiyasi kpódó sɔ́ja tɔn lɛ́ɛ kpán tɔ́n sín toxo nɛ́ ɔ́ mɛ, bó gbɛ́ nǔ nú yě. 60Ahwan gblé dó Jozɛ́fu kpódó Azaliya kpán sín ahwankpá lɛ́ɛ, lobɔ kɛntɔ́ lɛ́ɛ nya yě káká yi jɛ Judée sín dogbó lɛ́ɛ jí. Gbe nɛ́ gbe ɔ́, Izlayɛ́li ví afɔwó (2.000) mɔ̌ wɛ è hu. 61Ayǐ énɛ́ e togun ɔ́ jɛ ɖo kɛntɔ́ lɛ́ɛ nukɔn ɔ́ syɛ́n taala. Jozɛ́fu kpódó Azaliya kpán wɛ ma ka se gbe nú Judási kpódó nɔví tɔn lɛ́ɛ kpán ǎ. Yě vɛ́ dó ɖɔ émí lɔ hɛn ɔ́, émí ná ɖu ɖo ahwan jí, bó dó jɛ nyǐ wɛ sín. 62Lo ɔ́, yě ká ɖo mɛ alɔkpa énɛ́ lɛ́ɛ e è na acɛ bɔ yě ná hwlɛ́n Izlayɛ́li gán lɛ́ɛ é mɛ ǎ.
Judási ɖu ɖo ahwan jí ɖo Idumɛ́ɛ, bó lɛ́ ɖu ɖo Filisitɛ́ɛn lɛ́ɛ jí
63È nɔ mɔ Judási, súnnu glegbenu ɔ́, kpódó nɔví tɔn lɛ́ɛ kpán dó mɔ gbɛtɔ́ gbɔn vo ɖo Izlayɛ́li kpó fí e è nɔ se xó yětɔn ɖe lɛ́ɛ é bǐ kpán. 64Mɛ lɛ́ɛ nɔ lɛ́ dó yě, bó nɔ́ kpa gbe nú yě.
65Judási kpódó nɔví tɔn lɛ́ɛ kpán lɛ́ wá ɖidó tofɔligbé bó ná yi fun ahwan xá Edɔ́munu lɛ́ɛ. Yě gba Eblɔ́n toxo ɔ́ kpódó gletoxo e lɛ́ lɛ̌ dó e lɛ́ɛ kpán. Yě mu ahohó to ɔ́ tɔn lɛ́ɛ lobo dó agbǒ e è mɛ lɛ́ lɛ̌ dó e lɛ́ɛ zo. 66Énɛ́ gúdo ɔ́, yě ɖidó Filisitɛ́ɛn lɛ́ɛ sín tomɛ lobo xo Maleca toxo ɔ́ zlɛ́. 67Gbe nɛ́ gbé ɔ́, vɔ̌sánú-xwlémawutɔ́ ɖé lɛ́ɛ lɔ jló ná ɖe lě e yě kpan akɔ́n gbɔn é xlɛ́, lobo byɔ́ ahwanfuntɔ́ lɛ́ɛ mɛ mɔ̌ kpowun ma sɔ́ nǔ tɔn, bɔ è hu yě. 68Énɛ́ gúdo ɔ́, Judási wá yi Asidɔ́di ɖo Filisitɛ́ɛn lɛ́ɛ sín to mɛ. É gba vɔ̌sákpe yětɔn lɛ́ɛ; é dó bǒcyɔ nǔmɛsɛn yětɔn lɛ́ɛ tɔn zo, bo bɛ́ nǔ e ɖo toxo yětɔn lɛ́ɛ mɛ lɛ́ɛ lobo lɛ́ kɔ wá yi Judée.
Currently Selected:
1 Makabée 5: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.