1 Makabée 4
4
Judási ɖó ɖuɖéjí ɖo Emawúsi
1Jɔ̌jiyasi kplá gbɛtɔ́ afɔzɔntɔ́ děgba ɖě afatɔ́n (5.000) kpó sɔ́xátɔ́ xéɖéxéɖé afatɔ́n (1.000) kpán dó éɖée jí. Zǎn mɛ wɛ sɔ́ja nɛ́ lɛ́ɛ ɖidó. 2Bó ná yi zɔn ahwangɔnu Jwifu lɛ́ɛ tɔn jí, bó ná tɔ́n ahwan yě. Yě ná ɖó nukún tɔn ǎ. Yě mɛ e ɖo agbǒ Jeluzalɛ́mu tɔn mɛ lɛ́ɛ wɛ nyí nukɔntɔ́ yětɔn. 3Ée Judási se xó nɛ́ ɔ́, é jɛ ali kpódó ahwanfuntɔ́ tɔn lɛ́ɛ kpán. É jló ná fun ahwan, bó ná ɖu ɖo ahwangɔnu axɔ́sú ɔ́ tɔn e ɖo Emawúsi é jí. 4Hwenu e Jɔ̌jiyasi kpódó sɔ́ja tɔn lɛ́ɛ kpán kpo ɖo zɔga jǎwe é ɔ́, 5Jɔ̌jiyasi, éyɛ́ ɔ́ kpódó ahwangɔnu tɔn kpán wá ahwangɔnu Judáa tɔn sín nɔtɛn zǎn mɛ, yě ká mɔ mɛ ɖěbǔ ɖo fínɛ́ ǎ. Bɔ yě ɖɔ nú yěɖée ɖɔ: “Jwifu lɛ́ɛ hɔn ɖo nukɔn mǐtɔn.” Yě jɛ yě ba jí ɖo sókan mɛ.
6Ée ayǐ hɔn ɔ́, Judási wá xwetɔ́n ɖo ayǐkúngban wɛnjɛ ɔ́ jí kpódó gbɛtɔ́ afɔwó-afatɔ́n (3.000) kpó. Lo ɔ́, yě ká ɖó ahwanlyánnú e ba wɛ yě ɖe ɔ́ ɖěbǔ ǎ. 7Izlayɛ́li ví lɛ́ɛ mɔ ahwangɔnu syɛ́nsyɛ́n mɛ e ma nyí Jwifu ǎ lɛ́ɛ tɔn sɛ́ dó, yě ká hɛn gǎglónú. Sɔ́ja sɔ́xátɔ́ e kó nyɔ́ ahwan fun lɛ́ɛ é wɛ cyɔ́n alɔ yě jí. 8Judási ka ɖɔ nú mɛ tɔn lɛ́ɛ ɖɔ: “Mi ma ɖi xɛsi nú ahwangɔnu sukpɔ́ énɛ́ lɛ́ɛ ó, mi ma sísɔ́ hwenu e yě ná tɔ́n ahwan mi é ó.” 9Hwenu e axɔ́sú Ejípu tɔn jɛ tɔ́gbó mǐtɔn lɛ́ɛ gǔdo kpódó ahwangɔnu tɔn lɛ́ɛ kpán é ɔ́, yě mɔ hwlɛngán gbɔn Xu Vɔvɔ ɔ́ mɛ, mi bo flín nǔ nɛ́ ɔ́. 10Din ɔ́, mǐ na sú xó sɛ́ dó Mawu. Ényí é ɖe xomɛnyínyɔ́ tɔn xlɛ́ mǐ ɔ́, é ná flín akɔ e é jɛ xá tɔ́gbó mǐtɔn lɛ́ɛ é, bɔ égbé ɔ́ é ná vívá ahwangɔnu e ɖo nukɔn mǐtɔn nɛ́ é. 11Énɛ́ ɔ́, akɔta lɛ́ɛ bǐ ná mɔ ɖɔ mɛ ɖé tíin bó nɔ́ j'ahwan Izlayɛ́li jí bó nɔ́ hwlɛ́n ɛ gán.
12Togúdonu lɛ́ɛ mɔ ɖɔ Jwifu lɛ́ɛ ɖo adǎnzɔnlin jí jɛ émí gúdo. 13Azɔn ɖokpó ɔ́ yě tɔ́n sín fí e yě ɖe é, bó ná fun ahwan xá yě. Sɔ́ja Judási tɔn lɛ́ɛ dó kpɛn gbe. 14Yě tɔ́n ahwan yě, bó ɖu ɖo kɛntɔ́ lɛ́ɛ jí, bɔ yě tunta ayǐkúngban wɛnjɛ jí. 15Yě mɛ e cí gǔdo lɛ́ɛ ɔ́, è hu yě bǐ, Jwifu lɛ́ɛ jɛ kɛntɔ́ lɛ́ɛ gǔdo káká yi Gezɛ́ɛ ɖo Idumɛ́ɛ, Asidɔ́di kpódó Jamini kpán gbé jí. Yě mɛ gbɛtɔ́ afɔwó-afatɔ́n (3.000) mɔ̌ kú ɖo gbě nɛ́ ɔ́ jí.
16Hwenu e Judási kpódó ahwangɔnu tɔn kpán gosín mɛ nya dó gbě gbé é ɔ́, 17é ɖɔ nú mɛ tɔn lɛ́ɛ ɖɔ: “Mi ma to lɛ́n ahwangbénu dɔkun hwɛ̌ ó. Ɖó è ko ɖo ahwan ɖěvo sín nǔ sɔ́ wɛ. 18Jɔ̌jiyasi kpódó ahwangɔnu tɔn kpán ɖo sókan mɛ malín málín mɛ dó mǐ. Mi dɛ sún ɖo kɛntɔ́ mǐtɔn lɛ́ɛ nukɔn, bó fun ahwan xá yě. Énɛ́ gúdo lo ɔ́, mi hɛn ɔ́, mi ná wá bɛ́ ahwangbénu dɔkun lɛ́ɛ kpódó jiɖiɖe kpán.” 19Judási ná ɖɔ xó fó lě kpowun ɔ́, yě mɔ ahwangɔnu kɛntɔ́ tɔn lɛ́ɛ tɔn tɔ́n sín sókan ɔ́ mɛ. Yě jló ná mɔ do nú nǔ e ɖo jijɛ wɛ é. 20Yě mɔ ɖɔ ahwangɔnu émítɔn hɔn yi, bɔ ahwanslǎ yětɔn ɖo zo ji wɛ. Azizɔ e ɖo tíntɔ́n wɛ ɔ́ ɖe xlɛ́ sɔ́ nyi wɛn. 21Ée yě mɔ nǔ nɛ́ ɔ́, ado hu yě. Bɔ hwenu e yě mɔ ahwangɔnu Judási tɔn ɖo gbě ɔ́ jí, bó ɖo ahwannú sɔ́ wɛ é ɔ́, 22yě bǐ hɔn yi Filisitɛ́ɛn lɛ́ɛ sín tomɛ. 23Bɔ Judási lɛ́ kɔ yi ahwanslǎ kɛntɔ́ lɛ́ɛ tɔn mɛ bó bɛ́ nǔ e ɖ'é mɛ lɛ́ɛ. Jwifu lɛ́ɛ bɛ́ siká gěgé, kpatágan, avɔ ɖagbe vɔvɔ kpó fɛ́sinnɔ kpó, kpódó dɔkun gěgé ɖěvo e kpán. 24Yě lɛ́ kɔ, bó ɖo han ji dó kpa Aklúnɔ ná wɛ. Yě ɖo kú dó n'i wɛ, bó nɔ́ ɖɔ: “Aklúnɔ nyɔ́ lóóo, wǎn yíyí tɔn ɔ́ tɛgbɛ nú wɛ.” 25Hwlɛngán sín azǎn ɖaxó wɛ é nyí nú Izlayɛ́li.
26Sɔ́ja jǒnɔ e hɔn lɛ́ɛ wá yi ɖɔ nǔ e jɛ lɛ́ɛ bǐ nú Liziyási. 27Ée é se xó nɛ́ é ɔ́, é gba hǔn dó n'i, bɔ awakanmɛ kú i. Nǔgbó ɔ́, ahwan e é fun xá Izlayɛ́li ɔ́, é nyí lě e yě ba gbɔn é ǎ, bɔ fífó tɔn sɔ́ wá nyí lě e axɔ́sú ɔ́ ba bó zɔ́n gbɔn é ǎ.
28Xwe e wá jɛ fínɛ́ é ɔ́, Liziyási wá kplé ahwanfuntɔ́ xéɖéxéɖé adɔ̌kpo atɔn (60.000) kpódó sɔ́xátɔ́ děgba ɖě afatɔ́n (5.000) kpán, bó ná sixú fun ahwan xá Jwifu lɛ́ɛ. 29Yě yi Idumɛ́ɛ bo yi sɔ́ ahwanslǎ yětɔn sɔ́ jínjɔ́n ayǐ ɖo Bɛti-Súu. Judási sɔ́ nǔ, bó yí kpé yě kpódó gbɛtɔ́ děgba we afɔwó (10.000) kpán. 30 Ée é mɔ ahwangɔnu syɛ́nsyɛ́n kɛntɔ́ tɔn lɛ́ɛ tɔn é ɔ́, é xo ɖɛ, bó ɖɔ: Hwi wɛ kpikpa jɛ xá mɛhwlɛ́ngántɔ́ Izlayɛ́li tɔn, hwi wɛ fun ahwan xá súnnuxɔ́sú Goliyati gbɔn mɛsɛntɔ́ towe Davídi sín alɔ mɛ, hwi wɛ jó ahwangɔnu Filisitɛ́ɛn tɔn nú Jonatáan, vǐ súnnu Sawúlu tɔn kpódó dɔ̌nkpɛvú mɛsɛntɔ́ e hɛn ahwanlyánnú é kpán. 31Bo lɛ́ bló gbɔn mɔ̌ bó zin ahwangɔnu kɛntɔ́ lɛ́ɛ tɔn élɔ́ dɛ́ dó acɛkpikpa togun towe Izlayɛ́li tɔn glɔ́. Sɔ́xátɔ́ yětɔn lɛ́ɛ kpódó sɔ́ yětɔn lɛ́ɛ kpán ní mɔ winnyá. 32Yě ni nɔ ɖi xɛsi nú ahwanfunfun, bo gba jiɖiɖe e yě ɖǒ dó hlɔ̌nhlɔ́n yětɔn wú é dó, bónú yě ni sísɔ́ ɖó maɖuɖéjí yětɔn wú. 33Flí yě zindɛ́ gbɔn mɛ e yí wǎn nú we lɛ́ɛ sín hwǐ nu. Énɛ́ ɔ́, mɛ e tunwun nyǐkɔ towe lɛ́ɛ ná sixú ji susu towe sín han bó ná mlá we.
34Ahwangɔnu we lɛ́ɛ jɛ ahwan fun jí, bɔ sɔ́ja děgba ɖě afatɔ́n (5.000) kú ɖo ahwangɔnu Liziyási tɔn ɔ́ mɛ. 35Liziyási mɔ lě e ahwangɔnu tɔn cí ahwan gbɔn é kpódó ta syɛ́nsyɛ́n sɔ́ja Judási tɔn lɛ́ɛ tɔn e ɖo gbesisɔ mɛ bó ná gán alǒ bó ná kú kpódó akɔ́nkpinkpan kpó é. Bɔ é lɛ́ kɔ yi Antiyɔ́ci. Fínɛ́ ɔ́, é wá yí sɔ́ja jǒnɔ lɛ́ɛ bó ná lɛ́ kɔ yi Judée kpódó sɔ́ja gěgé kpán hú ɖ'ayǐ tɔn.
36Judási kpódó nɔví tɔn lɛ́ɛ kpán ɖɔ: “Din ɔ́, è ɖu ɖo kɛntɔ́ mǐtɔn lɛ́ɛ jí. Mi nú mǐ ná yi slá wǔ nú Sinsɛnxɔ ɔ́, bó ná lɛ́ sá ami ná, bó sɔ́ xwlé Mawu.” 37Ahwangɔnu ɔ́ bǐ kplé, bɔ sɔ́ja lɛ́ɛ xá Sinyɔ́ɔ só ɔ́ jí. 38Fínɛ́ ɔ́, yě mɔ Sinsɛnxɔ ɔ́, bɔ é cí gbětótló mɛ ɖɔhun. Yě ɖu su nú vɔ̌sákpe ɔ́, bó dó hɔn lɛ́ɛ zo. Atínvú ɖé lɛ́ɛ jɛ wǔwú jí, ɖo kɔ́xo lɛ́ɛ jí ɖi zungbó mɛ abǐ só jí ɖɔhun. È gba xɔ lɛ́ɛ. 39Yě tlɛ́n awu yětɔn lɛ́ɛ bó ya avǐ hoho, lobo lɛ afín dó ta. 40Yě jɛ kpoli, bó kpé ta kɔ mɛ. Ahwankpɛn jɛ gbe, yě nɔ́ sú xó sɛ́ dó Mawu.
41Énɛ́ gúdo ɔ́, Judási zɔ́n sɔ́ja tɔn ɖě lɛ́ɛ ɖɔ yě ni tɔ́n ahwan mɛ e ɖo toxo nukúnɖéjí ɔ́ mɛ lɛ́ɛ hwenu e é zɔ́n ɖɔ è nǐ ɖo wǔ slá nú Sinsɛnxɔ ɔ́ wɛ é. 42É cyán vɔ̌sánú-xwlémawutɔ́ e nɔ nyi Mɔyízisɛ́n ganjí, bɔ è ma sixú mɔ nǔɖé ɖɔ dó yě wǔ ǎ lɛ́ɛ é. 43Vɔ̌sánú-xwlémawutɔ́ lɛ́ɛ slá wǔ nú Sinsɛnxɔ ɔ́, bó bɛ́ awǐnnya e è ɖu su ná lɛ́ɛ é sɔ́ ɖó suɖutɛn. 44Yě kanbyɔ́ yěɖée ɖɔ étɛ́ è ka sixú wa nú vɔ̌sákpe e è ɖu su ná é a jí. 45Vɔ̌sánú-xwlémawutɔ́ lɛ́ɛ mɔ ayixa ɖagbe, bó gba vɔ̌sákpe ɔ́ síin, bónú é má wá dó winnyá yě ó. Yě gba vɔ̌sákpe énɛ́ ɔ́ síin ɖó mɛ e ma nyí Jwifu ǎ lɛ́ɛ ɖu su ná. 46Yě bɛ́ awǐnnya tɔn lɛ́ɛ sɔ́ yi ɖó tɛn e mɛ wɛ é jɛ xá ɖo Sinsɛnxɔ ɔ́ sín só jí é. Awǐnnya énɛ́ lɛ́ɛ ɖó ná nɔ fínɛ́ káká jɛ hwenu e Gbeyíɖɔ ɖokpó ná wá, bó ná ɖɔ nǔ e è nǎ sɔ́ yě dó wa ná é. 47 Izlayɛ́li ví lɛ́ɛ bɛ́ awǐnnya e è ma kpa ǎ lɛ́ɛ lě e sɛ́n ɔ́ zɔ́n gbɔn é, bó zé dó mɛ vɔ̌sákpe yaɖéyaɖé ɖěvo ná, bɔ é cí xóxó ɔ́ ɖɔhun. 48Yě jlá Sinsɛnxɔ ɔ́ kpódó xo tɔn mɛ kpó ɖó, bó slá wǔ nú kɔ́xota tɔn lɛ́ɛ. 49Yě bló vɔ̌sísáxwlénú yaɖéyaɖé ɖěvo lɛ́ɛ, bó bɛ́ zogbɛ́nhɛnnú, vɔ̌sákpe célu tɔn kpódó wɔ̌xúxú e è nǎ xwlé Mawu sín távo ɔ́ é kpán dó Sinsɛnxɔ ɔ́ mɛ. 50Yě zɔ́n bɔ è dǒ zǎlínkpɔ́n zo ɖo célu vɔ̌sákpe ɔ́ jí. Yě tá myɔ e ɖo zogbɛ́nhɛnnú lɛ́ɛ jí é, bɔ é za wě dó Sinsɛnxɔ ɔ́ mɛ. 51Yě bɛ́ wɔ̌xúxú ɖó távo ɔ́ jí, yě dlɛ́n xɔmɛgbovɔ lɛ́ɛ, bó fó azɔ̌ e yě ko bɛ́ lɛ́ɛ é bǐ.
52-54 Xwe kantɔn koatɔ́n nukún-atɔn (148) ɖo sun tɛ́nnɛgɔ́ ɔ́ abǐ Kisiléwusun mɛ, azǎn koatɔ́ngɔ́ (25) e ɖo sun ɔ́ mɛ é, é bló xwekpéxwenu sín azǎn e gbe mɛ e ma nyí Jwifu ǎ lɛ́ɛ ɖu su nú vɔ̌sákpe ɔ́ é. Zǎnzǎn tɛɛn gbe nɛ́ gbe ɔ́, Jwifu lɛ́ɛ fɔ́n zǎn, bɔ lě e Mɔyízisɛ́n ɔ́ zɔ́n gbɔn ɔ́, yě sá vɔ̌ ɖokpó ɖo vɔ̌sákpe yaɖéyaɖé e yě mɛ ɔ́ jí. Han kpó nǔxonú tɛnmɛ tɛnmɛ lɛ́ɛ kpó mɛ wɛ è sá ami ná ɖe. 55Togun ɔ́ bǐ sésé jɛ kpo bó ɖe kɔ́, bó jɛ Mawu e ná yě ɖuɖéjí ɔ́ xomlá jí. 56Jwifu lɛ́ɛ ɖu ami sa dó vɔ̌sákpe ɔ́ sín xwe nú azǎn tántɔn. Awǎjijɛ ɖaxó mɛ wɛ yě sá vɔ̌ e è nɔ dó zo ɔ́, kɔnɖókpɔ́vɔ́ kpódó susu kpa nú Mawu kpán sín vɔ̌ ɖe. 57Yě zé sikágbákún kpódó yɛ̌yiwlínú ɖěvo lɛ́ɛ kpán dó ba acɔ́ nú Sinsɛnxɔ ɔ́ sín nukɔn. Yě lɛ́ vɔ́ xɔ lɛ́ɛ lihɛ́nnu kpódó xɔ lɛ́ɛ kpán jlá ɖó, bó lɛ́ vɔ́ hɔn lɛ́ɛ dó ɖó tɛn yětɔn lɛ́ɛ mɛ. 58Awǎjijɛ ɖaxó ɖé gɔ́ ayi mɛ nú togun ɔ́, ɖó winnyá ɖaxó e mɛ e ma nyí Jwifu ǎ lɛ́ɛ dó yě ɔ́, è súnsún síin. 59Judási kpó nɔví tɔn lɛ́ɛ kpódó Izlayɛ́li togun ɔ́ bǐ kpán ɖó gbe kpɔ́, bó sí te dó gbeta ɖokpó jí ɖɔ: Xwewú xwewú tɛgbɛ, ɖo hwe ɖokpó ɔ́ nu, ɖo Kisiléwusun mɛ, bɛ̌ sín azǎn koatɔ́ngɔ́ (25) ɔ́ gbe ɔ́, è na nɔ ɖu ami sa nú vɔ̌sákpe ɔ́ sín xwe kpódó awǎjijɛ ɖaxó kpán káká nú azǎn tántɔn.
60Hwenɛ́nu ɔ́, yě mɛ dǒ ɖaxó ɖé kpódó atɔxwɛ syɛ́nsyɛ́n ɖé lɛ́ɛ kpán lɛ́ lɛ̌ dó Sinyɔ́ɔ só ɔ́. Yě jló ɖɔ mɛ e ma nyí Jwifu ǎ lɛ́ɛ má sɔ́ lɛ́ lɛ́ kɔ wá fínɛ́ azɔn wegɔ́ ɔ́ ó. 61Judási bɛ́ sɔ́ja gbɛ̌ta ɖé wá fínɛ́, bónú yě ná nɔ cɔ́ Sinsɛnxɔ ɔ́. É nɔ́ lɛ́ cyɔ́n alɔ Bɛti-Súu toxo ɔ́ jí gɔ́ ná. Mɔ̌ wɛ Izlayɛ́li togun ɔ́ ɖó ahohó ɖokpó, bɔ é kpan nukɔn Idumɛ́ɛ to ɔ́ gbɔn.
Currently Selected:
1 Makabée 4: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.