1 Makabée 2
2
Vɔ̌sánú-xwlémawutɔ́ Matatiyási kpódó vǐ tɔn lɛ́ɛ kpán
1Hwenɛ́nu ɔ́, vɔ̌sánú-xwlémawutɔ́ ɖé tíin bó ɖo hɛ̌nnu Yoyalibu tɔn mɛ Matatiyási e nyí Jǎan sín vǐ, bó nyí vǐvú Sinmɛnyɔ́ɔ tɔn é wɛ; é gosín Jeluzalɛ́mu, bó wá jɛ agban ɖó Mɔdinu: 2Vǐ atɔ́ɔ́n wɛ é ɖó: Jǎan e è nɔ lɛ́ ylɔ́ ɖɔ Gadi é. 3Sinmɔ́ɔ e è nɔ lɛ́ ylɔ́ ɖɔ Tasi é. 4Judási e è nɔ lɛ́ ylɔ́ ɖɔ Makabée é. 5Eleazáa e è nɔ lɛ́ ylɔ́ ɖɔ Avalán é kpódó Jonatáan e è nɔ lɛ́ ylɔ́ ɖɔ Afúsi é kpán. 6Ée é mɔ nǔ baɖabaɖa e dó sin wɛ è ɖe ɖo Judáa toxo lɛ́ɛ mɛ kpódó Jeluzalɛ́mu toxo ɔ́ kpán mɛ é ɔ́, 7é ɖɔ:
“Awě tɛ́ ɖíe ka xo mì lě e!
È ji mì bɔ un ná ɖo nukún te lě,
bɔ togun ce ná ɖo gbigba wɛ kpódó toxo mímɛ́ ɔ́ kpán wɛ a?
Bɔ un ná ɖo ayǐjínjɔ́n bɔ è na sɔ́ dó kɛntɔ́ tɔn lɛ́ɛ lɔ mɛ wɛ a?
Sinsɛnxɔ ɔ́ ɖo togúdonu lɛ́ɛ lɔ mɛ!
8É wá cí gbɛtɔ́ e è ma sɔ́ nɔ wlí yɛ̌yi ɖěbǔ ná ǎ é ɖɔhun.
9Nǔ tɛnmɛ tɛnmɛ e nyí nǔ bɔ é nɔ́ gó d'é jí lɛ́ɛ é ɔ́,
è bɛ̌ bǐ yi dɔkun e è mɔ ɖo ahwangbénu é ɖɔhun.
È hu vǐ mǐtɔn lɛ́ɛ ɖo tɛn gblogblo lɛ́ɛ mɛ,
bɔ dɛnkpe nu wɛ dɔ̌nkpɛvú mǐtɔn lɛ́ɛ gbɔn,
bó kú ɖo kɛntɔ́ lɔ mɛ.
10Akɔta ɖě lɛ́ɛ ɔ́,
ɖokpó ɖokpó yětɔn ɖu dɔkun e nyí to ɔ́ tɔn ɔ́ sín gǔ, bó bɛ́ hɛn yi.
11Nǔ e nyí acɔ́ɖónú n'i ɔ́, yě bɛ́ bǐ yi.
Ɖ'ayǐ ɔ́, Jeluzalɛ́mu toxo ɔ́ ɖo é ɖóɖó;
din ɔ́, é húzú kannumɔ.
12Ɖɛkpɛnyínyɔ́ Tɛn mímɛ́ mǐtɔn tɔn ɔ́ wɛ nyí afɔ tɛ ayǐ bó go mǐtɔn ɖ'ayǐ din ɔ́,
é húzú fí e mɛɖé má ɖe ǎ é.
Yě mɛ e ma nyí Jwifu ǎ lɛ́ɛ ɖu su ná.
13Étɛ́ un na nɔ gbɛ dó wa?”
14Ɖo aluwɛ yětɔn mɛ ɔ́, Matatiyási kpódó vǐ tɔn lɛ́ɛ kpán hɛn avɔ yětɔn lɛ́ɛ tlɛ́n. Yě zé nǔwamɛvɔ dó, bó ya avǐ hoho.
Vɔ̌sánú-xwlémawutɔ́ Matatiyási fɔ́n gǔ
15Ahwangán axɔ́sú Antiyokúsi tɔn lɛ́ɛ, ée nɔ hɛn mɛ lɛ́ɛ gǎnnugǎnnu ɖɔ yě ni hɔn Mɔyízisɛ́n ɔ́ nyi gbě lɛ́ɛ wá Mɔdinu toxo mɛ. Yě jlǒ ná hɛn Izlayɛ́li ví lɛ́ɛ gǎnnu ɖɔ yě ni nɔ xwlé vɔ̌sánú nǔmɛsɛn Glɛ̌sinu lɛ́ɛ tɔn. 16Izlayɛ́li ví gěgé wá mɔ yě, lo ɔ́, Matatiyási kpódó vǐ tɔn lɛ́ɛ kpó kplé ɖó kpɔ́, bó nɔ vo. 17Énɛ́ ɔ́, mɛsɛ́dó axɔ́sú ɔ́ tɔn lɛ́ɛ ɖɔ nú Matatiyási ɖɔ: “Ɖo toxo élɔ́ mɛ ɔ́, gǎn nukúnɖéjí, nǔwúkpétɔ́ ɖokpó wɛ nú we. Bɔ vǐ towe lɛ́ɛ kpó hɛ̌nnumɔ towe lɛ́ɛ kpán ka ɖo jǐ towe. 18Bo sɛ yi nukɔn, bó bló nǔ e axɔ́sú ɔ́ ɖɔ é. Yě mɛ e ɖo akɔta ɖě lɛ́ɛ mɛ é, gbɛtɔ́ e ɖo Judáa to ɔ́ mɛ lɛ́ɛ kpódó yě mɛ ɖěɖě cí Jeluzalɛ́mu tomɛ lɛ́ɛ kpán ɔ́, yě bló ɖ'é jí. Din ɔ́, hwɛ kpódó vǐ towe lɛ́ɛ kpán ɔ́, mi ná húzú axɔ́sú ɔ́ sín xɔ́ntɔn . Énɛ́ ɔ́, mi ná mɔ kpatágan gěgé, siká gěgé kpódó ajɔ gěgé kpán yí.”
19Lo ɔ́, Matatiyási zé gbe yi jǐ, bó ɖɔ: “Togun ɖě lɛ́ɛ sixú se tónú ganjí nú axɔ́sú, bɔ mɛ ɖokpó ɖokpó sixú gbɛ́ sinsɛn tɔ́gbó tɔn lɛ́ɛ tɔn. Yě sixú bló nǔ e axɔ́sú ɔ́ zɔ́n ɖɔ è blǒ lɛ́ɛ é.” 20Amɔ̌, nyɛ kpó vǐ ce lɛ́ɛ kpó, kpódó hɛ̌nnumɔ ce lɛ́ɛ kpán ɔ́, mǐ ná ɖó sísí nú akɔ e Mawu ko jɛ xá tɔ́gbó mǐtɔn lɛ́ɛ é. 21Mawu ní wa nǔ bónú ɖo xomɛnyínyɔ́ tɔn mɛ ɔ́, mǐ ni má jó sɛ́n tɔn lɛ́ɛ kpódó nǔ e é zɔ́n lɛ́ɛ kpán dó ó! 22Mǐ ná se tónú nú nǔ e axɔ́sú ɔ́ ɖɔ lɛ́ɛ ǎ, mǐ ná klán jɛ zɔ nú sinsɛn mǐtɔn gbɔn alɔkpa ɖěbǔ mɛ ǎ.
23Ée Matatiyási ɖɔ xó vɔ tlóló ɔ́, Jwifu ɖokpó jɛ́n wá mɛ bǐ nukɔn. É jló ná sá vɔ̌ ɖokpó ɖo vɔ̌sákpe Mɔdinu tɔn énɛ́ ɔ́ jí, lě e axɔ́sú ɔ́ zɔ́n gbɔn é. 24Ée Matatiyási mɔ ɛ lě tlóló ɔ́, xo tɔn mɛ jɛ zo ji jí, bɔ wǔtu tɔn bǐ nɔ xo zin, bó nɔ́ sísɔ́. Xomɛsin ɖé wá jǐ tɔn, bɔ é bɛ́ wezun yi gbo gbe nya ɔ́ ɖo vɔ̌sákpe ɔ́ kɔn. 25Tɛndo ɖokpó ɔ́ mɛ ɔ́, Matatiyási hu mɛsɛ́dó axɔ́sú ɔ́ tɔn e nɔ zɔ́n mɛ lɛ́ɛ ɖɔ è ni xwlé vɔ̌sísá é, lobo flí vɔ̌sákpe ɔ́ xwe. 26 Kan e Pinxási ɖó dó sɛ́n ɔ́ wú ɔ́, ɖokpó ɔ́ wɛ élɔ́ ɖó dó Mɔyízisɛ́n ɔ́ wú, hwenu e é hu Zimuli, Salu ví ɔ́ é.
Jwifu e ɖo gbejí lɛ́ɛ é ɖidó gbětótló mɛ
27Énɛ́ gúdo ɔ́, Matatiyási gbɔn toxo ɔ́ mɛ bó sú xó bó nɔ́ ɖɔ: “Mɛ e jɛ kú dó Mɔyízisɛ́n ɔ́ jí, bó ka hɛn akɔjijɛ ɔ́ syɛ́nsyɛ́n lɛ́ɛ ɔ́, yě ni xwedó mì.” 28Éyɛ́ ɖésú kpódó vǐ tɔn lɛ́ɛ kpán hɔn yi sókan lɛ́ɛ mɛ, bó jó nǔ e yě ɖó ɖo toxo ɔ́ mɛ lɛ́ɛ bǐ dó. 29Énɛ́ ɔ́, mɛ e jló ná se tónú nú Mawu, bó ná xwedó Mɔyízisɛ́n lɛ́ɛ ɔ́ gěgé yi nɔ gbětótló mɛ. 30Yě gosín to ɔ́ mɛ, yě kpó vǐ yětɔn lɛ́ɛ, asi yětɔn lɛ́ɛ, kpódó kanlin yětɔn lɛ́ɛ kpán, ɖó awě e xo yě ɔ́ wútu.
31Ahwangán axɔ́sú ɔ́ tɔn lɛ́ɛ kpódó sɔ́ja e nɔ́ nɔ Jeluzalɛ́mu, ɖo Davídi Toxo mɛ lɛ́ɛ kpán se xó ɔ́ ɖɔ jí gbɛtɔ́ gěgé hɔn nǔ e axɔ́sú ɔ́ zɔ́n ɔ́ nyi gbě, bó hɔn yi hwlá ɖó gbětótló mɛ. 32 Sɔ́ja gěgé jɛ gbě yětɔn mɛ, bó yi wlí yě. Yě ɖó gɔnu ɖó mɛ énɛ́ lɛ́ɛ nukɔn, lobo ná zɔn yě jí gbɔjɛzán gbe. 33Sɔ́ja lɛ́ɛ ɖɔ nú Jwifu lɛ́ɛ ɖɔ jí: “É kpé lo! Mi tɔ́n, bó se tónú nú nǔ e axɔ́sú ɔ́ ɖɔ é, énɛ́ ɔ́, mi ná hwlɛ́n gbɛ mitɔn gán!” 34Jwifu lɛ́ɛ ka yí gbe ɖɔ jí: “Mǐ na tɔ́n ǎ! Mǐ ka ná bló dó axɔ́sú ɔ́ tɔn jí ǎ! Mǐ jló ná dó vɛ̌ nú gbɔjɛzán ɔ́ ǎ!”
35Sɔ́ja lɛ́ɛ dó ahwan gbě azɔn ɖokpó, bó jɛ yě gǔdo. 36Lo ɔ́, Jwifu lɛ́ɛ gbɛ́ ɖɔ émí kún ná hwlɛ́n émíɖée gán ó. Yě nyi awǐnnya ɖokpó lě dó kɛntɔ́ yětɔn lɛ́ɛ ǎ. Yě ká lɛ́ sú fí e yě hɔn hwlá dó ɔ́ dó yě ǎ. 37Yě nɔ́ ɖɔ ɖo yěɖée tɛ́ntin ɖɔ jí: “Mi nú mǐ bǐ na kú nú ayi ma xo hun xá mǐ ó. Jǐxwé kpódó ayǐkúngban kpán wɛ ná ɖe kúnnu ná ɖɔ jí mi ɖo mǐ hu wɛ dó acɛ jí.” 38Sɔ́ja lɛ́ɛ tɔ́n ahwan yě ɖo gbɔjɛzán gbe. Yě kú kpó asi yětɔn lɛ́ɛ, vǐ yětɔn lɛ́ɛ kpó kanlin yětɔn lɛ́ɛ kpán. Yě bǐ kplékplé ná yi gbɛtɔ́ afatɔ́n (1.000) mɔ̌.
39Hwenu e Matatiyási kpódó xɔ́ntɔn tɔn lɛ́ɛ kpán se xo nɛ́ é ɔ́, avǐ hoho wɛ yě ya. 40Bɔ yě ɖɔ nú yěɖée ɖɔ: “Ényí mǐ bǐ kplé, bó wa nǔ nɔví mǐtɔn lɛ́ɛ ɖɔhun ɔ́, ényí mǐ ma fun ahwan xá togun ɖě lɛ́ɛ, bó hwlɛ́n gbɛ mǐtɔn kpódó hwɛndo mǐtɔn lɛ́ɛ kpán ǎ ɔ́, yě ná yá wǔ wá sú kún mǐtɔn dó sín ayǐkúngban jí fí.” 41Azǎn nɛ́ ɔ́ gbe ɔ́, Matatiyási kpódó xɔ́ntɔn tɔn lɛ́ɛ kpán sí te dó gbetakɛ́n élɔ́ jí: “Mǐ na li za xá gbɛtɔ́ ɖěbǔ e ná wá tɔ́n ahwan mǐ ɖo gbɔjɛzán gbe é. Énɛ́ ɔ́, mǐ ná kú lě e nɔví mǐtɔn lɛ́ɛ bǐ kú ɖo bibɛtɛn yětɔn gbɔn é ɖɔhun ǎ.”
42Gbɛ̌ kplékplé Hasidéenu lɛ́ɛ tɔn ɖokpó wá gɔ́ nú yě. Gbɛtɔ́ ɖé lɛ́ɛ wɛ yě nyǐ, bɔ è tunwun lě e yě kpan akɔ́n gbɔn é ɖo Izlayɛ́li, bɔ yě ká ɖo gbesisɔ mɛ lobo ná jɛ kú dó Mɔyízisɛ́n ɔ́ jí. 43Mɔ̌ ɖokpó ɔ́, yě mɛ e jló ná gló nǔ nyanya énɛ́ lɛ́ɛ é wá gɔ́ so nú yě kpódó hlɔ̌nhlɔ́n yětɔn kpán, bɔ yě sukpɔ́ d'é jí. 44Yě kplé yěɖée, bó bló ahwangɔnu ɖokpó. Ɖo xomɛsin yětɔn mɛ ɔ́, yě xo Jwifu e ma nɔ gbejí nú sɛ́n ɔ́ ǎ lɛ́ɛ é. Yě mɛ e gló yě lɛ́ɛ é hɔn yi togun ɖě lɛ́ɛ mɛ, bó ná dó hwlɛ́n gbɛ yěɖée tɔn gán. 45Matatiyási kpódó xɔ́ntɔn tɔn lɛ́ɛ kpán nɔ gbɔn fí lɛ́ɛ bǐ ɖo to ɔ́ mɛ, bó nɔ́ gba vɔ̌sákpe nǔmɛsɛn togúdonu lɛ́ɛ tɔn. 46Ényí yě mɔ súnnuví ɖěbǔ ɖo Izlayɛ́li ví lɛ́ɛ mɛ, bónú é má kó gbo ada ǎ ɔ́, yě nɔ́ gbo nú yě gǎnnugǎnnu. 47Yě jɛ goyítɔ́ lɛ́ɛ nya jí, bó ká kpé wú ma mɔ wǔvɛ́ ɖ'é mɛ. 48Yě xo Mɔyízisɛ́n ɔ́ yí sín acɛkpikpa akɔta ɖé lɛ́ɛ tɔn kpódó axɔ́sú yětɔn lɛ́ɛ kpán sí. Yě nɔ́ zín hwɛhutɔ́ jí, bɔ é sɔ́ nɔ dó nǔɖé sin ǎ.
Matatiyási sin jlǒ gǔdo gúdo tɔn lɛ́ɛ kpódó kú tɔn kpán
49Hwenu e Matatiyási ná kú ɔ́ sɛkpɔ́, bɔ é ɖɔ nú vǐ tɔn lɛ́ɛ ɖɔ:
“Hwe élɔ́ nu din ɔ́, goyíyí kpó zungbe kpó wɛ hú gǎn mǐ.
Hweɖénu wɛ nyí, bó nyí nǔhɛngblé kpódó adǎnúwiwa kpán hwenu.”
50Din ɔ́, mi wɛ ná jɛ kú dó Mɔyízisɛ́n ɔ́ jí.
Mi sɔ́ gbɛ mitɔn jó, ɖó akɔ e Mawu jɛ xá tɔ́gbó mǐtɔn lɛ́ɛ é tamɛ.
51Mi flín nǔ e yě ko wa ɖ'ayǐ xóxó lɛ́ɛ bǐ.
Mi ná xɔ susu gěgé, bó ná nyí gbɛtɔ́ nukúnɖéjí tɛgbɛ sɔ́ yi.
52 Ablaxámu ma nɔ gbejí nú Mawu ɖo tɛ́nkpɔ́n hwenu ǎ cé?
Énɛ́ wú wɛ Mawu mɔ ɛ dó mɔ ayijlɔ́jlɔ́nɔ.
53 Mɔ̌ ɖokpó ɔ́, hwenu e adǎn gbo Jozɛ́fu é ɔ́,
é xwedó Mawusɛ́n ɔ́, bó húzú gǎn nú Ejípu to ɔ́.
54Tɔ́gbó mǐtɔn Pinxási jɛ tagba ɖésú.
È dǒ akpá n'i ɖɔ gbɛtɔ́ gěgé ná ɖo hɛ̌nnu tɔn mɛ,
bó ná nyí vɔ̌sánú-xwlémawutɔ́.
55 È ɖe kɛ́n Jozuwée ɖɔ é wɛ nyí hwɛɖɔtɔ́,
bó ná sixú kpé nukún dó Izlayɛ́li ví lɛ́ɛ wú, ɖó é wa azɔ̌ tɔn.
56Kalɛ́bu yí ayǐkúngban e è mǎ ɔ́ ɖokpó,
ɖó é ɖó akɔ́nkpinkpan dó ɖe kúnnu ɖo Izlayɛ́li togun ɔ́ nukɔn.
57 Davídi nɔ gbejí nú Mawu. Énɛ́ ɔ́ wú wɛ,
è sɔ́ gǎnzinkpo ɔ́ dó alɔ tɔn mɛ nú tɛgbɛgbe, nú éyɛ́, nú vǐ tɔn lɛ́ɛ kpó vǐvú tɔn lɛ́ɛ kpán.
58 Elíi jɛ kú dó Mawusɛ́n ɔ́ jí, énɛ́ wú wɛ è sɔ́ ɛ yi jǐxwé.
59 Hananiya kpó Azaliya kpó,
kpódó Mikayɛ́li kpán ɖeji dó Mawu wú.
È hwlɛ̌n yě gán ɖo zo ɖaxó ɔ́ sí.
60 Daniyɛ́li ɔ́, gbɛtɔ́ ayijlɔ́jlɔ́nɔ wɛ.
È hwlɛ̌n ɛ gán sín kinnikínní lɛ́ɛ nu mɛ.
61“Hǔn, mi ni bó mɔ nukúnnú jɛ mɛ ganjí
ɖɔ yě mɛ e ɖó jiɖiɖe dó Mawu wú lɛ́ɛ nɔ́ mɔ hlɔ̌nhlɔ́n, bó nɔ́ dɛ ɖ'é nu.
62Mi ma ɖi xɛsi nú gbɛtɔ́ hwɛhutɔ́ nɛ́ ɔ́ ó.
Nǔgbó ɔ́, susu tɔn ná húzú zunkɔ́, bɔ tlǎn ná nɔ ɖu.
63È sɔ́ ɛ su égbé, lo ɔ́, sɔ e ja ɔ́, é ná bú nyǐ.
É ná húzú afúntúntún, bɔ tito tɔn lɛ́ɛ ɔ́, è nǎ vǐvá kún nú yě bǐ.
64Vǐ ce lɛ́ɛ mi, mi dó gǎn, bó tɛ́ dó Mɔyízisɛ́n ɔ́ wú syɛ́nsyɛ́n,
ɖó sɛ́n nɛ́ ɔ́ wɛ ná ɖó wi ta nú mi.
65Din ɔ́, un mɔ nǔ jɛ wú ɖɔ nɔví mitɔn Sinmɔ́ɔ ɔ́, gbɛtɔ́ nǔɖagbekplɔ́nmɛtɔ́ wɛ. Mi ni nɔ ɖótó e tɛgbɛ, énɛ́ ɔ́, é ná nyí Tɔ́ nú mi tɛgbɛ. 66Sín yɔkpɔ́vú mɛ tɔn ɖokpóó wɛ è ko mɔ nǔ jɛ akɔ́nkpinkpan Judási Makabée tɔn wú. É wɛ ná nyí ahwangɔnu mitɔn sín gǎn, bɔ é ná nɔ nukɔn bó fun ahwan xá togun e nyí kɛntɔ́ tɔn lɛ́ɛ é. 67Mi xo mɛ e nɔ nyi sɛ́n ɔ́ lɛ́ɛ kplé, lɛ́ lɛ̌ dó miɖée, bó jɛ ahwan togun mitɔn jí. 68Mi sú nǔ nyanya e akɔta ɖě lɛ́ɛ wá dó mi é sín axɔ́ yě, bó ká nɔ se tónú nú sɛ́n ɔ́ tɛgbɛ.”
69Énɛ́ gúdo ɔ́, Matatiyási xo ɖɛ nú vǐ tɔn lɛ́ɛ, bó yi su tɔ́gbó tɔn lɛ́ɛ. 70É kú ɖo xwe kantɔn koatɔ́n nukún ɖokpó (146) mɛ, bɔ vǐ tɔn lɛ́ɛ sɔ́ cyɔ tɔn dó yɔdo tɔ́gbó tɔn lɛ́ɛ tɔn mɛ, ɖo Mɔdinu. Togun Izlayɛ́li tɔn lɛ́ɛ bǐ bló cyɔnúwiwa gɛnnyigɛnnyi n'i.
Currently Selected:
1 Makabée 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.