1 Makabée 16
16
Sinmɔ́ɔ sín vǐ lɛ́ɛ nya Kɛndebée
1Jǎan gosín Gazaláa bo yi ɖɔ nǔ e wá wɛ Kɛndebée ɖe é bǐ nú tɔ́ tɔn Sinmɔ́ɔ. 2Hwenɛ́nu ɔ́, é sɛ vǐ tɔn súnnu ɖaxó we lɛ́ɛ kplé, Judási kpódó Jǎan kpó. É ɖɔ nú yě ɖɔ: “Nɔví ce lɛ́ɛ kpó nyɛ kpó, kpódó tɔ́ ce sín hwɛndo kpó ɔ́, mǐ ɖo za li xá Izlayɛ́li sín kɛntɔ́ lɛ́ɛ wɛ sín dɔ̌nkpɛvú mɛ mǐtɔn káká wá tɔ́n égbé. Hwɛhwɛ ɔ́, é nɔ kpa mǐ, bɔ Izlayɛ́li nɔ ɖó ɖuɖéjí. 3Din ɔ́, nyɛ ko kpo, amɔ̌, midɛɛ lɛ́ɛ ɔ́, hlɔ̌nhlɔ́n kpo ɖo mi wú ɖo Mawu sín acɛ mɛ. Mi bo jɛ nyɛ kpó nɔví ce kpó sín tɛn mɛ. Mi yi fun ahwan ɖó akɔta mǐtɔn tamɛ. Mawu ka ná nɔ kpɔ́ xá mi.”
4Jǎan cyán sɔ́ja afɔzɔntɔ́ adɔ̌kpo ɖokpó (20.000) kpó sɔ́ja sɔ́xátɔ́ ɖé lɛ́ɛ kpó ɖo to ɔ́ mɛ. Yě tɔ́n ahwan Kɛndebée. Zǎn ká wá kú dó yě, bɔ yě gbɔ bó dɔ́ Mɔdinu. 5Ée ayǐ hɔn é ɔ́, yě fɔ́n zǎn, bó gbɔn tɔgbado ɔ́ mɛ. Ahwangɔnu sɔ́ja afɔzɔntɔ́ kpó sɔ́ja sɔ́xátɔ́ kpó gěgé wɔɖɔɖɔ ɖé lɛ́ɛ wá kpé yě. Tɔ ɖaxó ɖé ka gbo ahwangɔnu we lɛ́ɛ. 6Jǎan kpó mɛ tɔn lɛ́ɛ kpó ka ɖó gɔnu yětɔn ɖó nukɔn yětɔn zɛ̌ɛ́n. Jǎan wá mɔ ɖɔ sɔ́ja émítɔn lɛ́ɛ ɖo xɛsi ɖi dó tɔ ɔ́ xo zlɛ́ wú wɛ, bɔ Jǎan gbɔ bo jɛ nukɔn bo xo tɔ ɔ́ zlɛ́. Ée yě mɔ é ɔ́, yě xwedó Jǎan, bó gbɔn tɔ ɔ́ mɛ dín. 7Jǎan má ahwangɔnu tɔn ɔ́ ɖó we. É bɛ́ sɔ́ja sɔ́xátɔ́ lɛ́ɛ ján dó sɔ́ja afɔzɔntɔ́ lɛ́ɛ mɛ, ɖó sɔ́xátɔ́ lɛ́ɛ sín kɛntɔ́ lɛ́ɛ sukpɔ́ ɖésú. 8É zɔ́n bɔ è kún ahwankpɛn, bónú zalili ná dó bɛ́. É xo Kɛndebée kpó ahwangɔnu tɔn kpó bǐ. Mɛ gěgé gblé wǔ vantankánnyá ɖo kɛntɔ́ lɛ́ɛ mɛ, mɛ e kpo ɖo gbɛ lɛ́ɛ hɔn yi agbǒ Kedlɔ́n tɔn mɛ. 9Judási gblé wǔ ɖo ahwan ɔ́ hwenu, nǔ ɖo mɔ̌ có nɔví tɔn Jǎan ɔ́ jɛ yě túnnu káká yi Kedlɔ́n, toxo e Kɛndebée vɔ́ bló ɖó é mɛ. 10Mɛ ɖé lɛ́ɛ yí hɔn hwlá dó atɔxwɛ e sɛkpɔ́ Asidɔ́di é mɛ, ɖo nǔkan tɛ́ntin. Jǎan dó toxo nɛ́ ɔ́ zo, bɔ mɛ afɔwó (2.000) kú ɖo kɛntɔ́ lɛ́ɛ mɛ. Énɛ́ gúdo ɔ́, Jǎan wá lɛ́ kɔ yi Judée wǔyɛ́yɛ́ afɔyɛ́yɛ́.
È hu Sinmɔ́ɔ, bɔ vǐ tɔn Jǎan jɛ tɛn tɔn mɛ
11Putolemɛ́ɛ, Abubasi ví ɔ́ húzú axɔ́súgán sísɔ́ tɔgbado Jeliko tɔ́n tɔn. É ɖó siká kpó kpatágan kpó, bɔ é sukpɔ́, 12ɖó Sinmɔ́ɔ vɔ̌sánú-xwlémawutɔ́ ɖaxó ɔ́ sín vǐsú wɛ. 13É húzú goyítɔ́, bó ba ná nyí to ɔ́ sín gǎn. É lin ná sú Sinmɔ́ɔ kpó vǐ tɔn lɛ́ɛ kpó sín kún dó. Ayi wɛ é ká jló ná sɔ́ ɖó nukɔn nú yě.
14Hwenɛ́nu ɔ́, Sinmɔ́ɔ yi dán gbɔn toxo tɔn lɛ́ɛ mɛ, ɖó é ɖo nǔ e hu dó yě lɛ́ɛ ba ná tunwun wɛ. É jɛ te Jeliko, é kpódó vǐ tɔn Matatiyási kpódó Judási kpó, ɖo xwe kɛnnɛ afɔtɔn nukún wegɔ́ (177) ɔ́ sín sunzán wǒ-ɖokpógɔ́ ɔ́ alǒ Zofínkplɔ́sun ɔ́ mɛ. 15Abubasi ví ɔ́ yí yě dó agbǒ kpɛví e é zɔ́n bɔ è gbǎ, bɔ è nɔ ylɔ́ ɖɔ Dɔki e mɛ. É yí jǒnɔ yětɔn ɖésú, lo ɔ́, nǔ e wá gbé wɛ é ja é ɔ́, é sɔ́ hwlá dó yě. É ɖó tɛnmɛ nú sɔ́ja tɔn lɛ́ɛ ɖo nǔglɔ́. 16Ée Sinmɔ́ɔ kpó vǐ tɔn lɛ́ɛ kpó nu ahan bɔ é yi yě jí ganjí é ɔ́, Putolemɛ́ɛ kpó mɛ tɔn lɛ́ɛ kpó sí te bó sɔ́ alyánnú yětɔn lɛ́ɛ. Yě zɔn Sinmɔ́ɔ jí ɖo nǔɖuxɔ ɔ́ sá, lobo hu i. Mɔ̌ jɛ́n yě lɛ́ɛ hu vǐ tɔn we lɛ́ɛ kpódó kásɛntɔ́ tɔn ɖě lɛ́ɛ kpó é nɛ́. 17Nǔ e Putolemɛ́ɛ wa bó sa mɛ ɖu lobo sɔ́ nyanya dó sú ɖagbe xɔ́ ɛ énɛ́.
18Ée Putolemɛ́ɛ dó énɛ́ sin gǔdo é ɔ́, é wá ɖó lě e é wa nǔ gbɔn e sín gbe nú axɔ́sú Antiyokúsi dó wěma mɛ. É lɛ́ byɔ́ ɛ ɖɔ é ní lɛ́ sɛ́ ahwangbɛ́ ɖěvo lɛ́ɛ dó, nú yě ná nɔ tejɛmɛ fínɛ́ bó ná jó toxo ɔ́ kpó to ɔ́ bǐ kpó n'i. 19É sɛ́ mɛ ɖěvo lɛ́ɛ dó Gazaláa, nú yě ná yi hu Jǎan. É wlán wěma sɛ́ dó nukɔntɔ́ ahwangɔnu ɔ́ tɔn lɛ́ɛ. É ylɔ́ yě ɖɔ yě ni wá yí kpatágan, siká kpó agbankan kpó ɖo émí gɔ́n. 20Putolemɛ́ɛ sɛ́ sɔ́ja ɖěvo lɛ́ɛ dó Jeluzalɛ́mu, nú yě ná yí to ɔ́ kpódó Sinsɛnxɔ ɔ́ sín só ɔ́ kpó. 21Lo ɔ́, mɛ ɖokpó kán wezun yi Gazaláa, bó yi ɖɔ nú Jǎan ɖɔ mɔ̌ wɛ è hu tɔ́ tɔn kpó nɔví tɔn lɛ́ɛ kpó gbɔn é nɛ́. É lɛ́ ɖɔ n'i ɖɔ mɔ̌ jɛ́n Putolemɛ́ɛ lɛ́ ɖe mɛ sɛ́ dó hwi lɔmɔ̌ hu gbé é nɛ́.
22Wɛn nɛ́ ɔ́ gba ayi dó nú Jǎan. Ée é se ɖɔ è jlǒ ná hu élɔ́ é ɔ́, é zɔ́n bɔ è ɖǒ mɛ e wa lɛ́ɛ é te lobo hu yě.
23Nǔ ɖěvo e Jǎan wa lɛ́ɛ é, ahwan e é fun lɛ́ɛ é, nǔ tawun tawun e é wa lɛ́ɛ é, ahwanglódó e é mɛ lɛ́ɛ é kpó nǔ e kpo ɖo hwenuxó tɔn mɛ lɛ́ɛ kpó é, 24nǔ nɛ́ lɛ́ɛ bǐ ɔ́, è ɖɔ dó wěma ɖokpó mɛ. È wlǎn nǔ e é wa vɔ̌sánú-xwlémawutɔ́ ɖaxó nyínyí kanta, sín hwenu e é jɛ tɔ́ tɔn tɛnmɛ é bǐ dó fínɛ́.
Currently Selected:
1 Makabée 16: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.