1 Makabée 15
15
Axɔ́sú Antiyokúsi tɛ́nwegɔ́ ɔ́ wlán wěma sɛ́ dó Sinmɔ́ɔ
1Sín tɔtɛ́ntinto e ɖo xu tɛ́ntin lɛ́ɛ é ɖokpó mɛ wɛ Antiyokúsi tɛ́nwegɔ́ ɔ́, ɖěe nyí axɔ́sú Dɛmɛtliwúsi nukɔntɔn sín vǐ é nɔ, lobo wlán wěma sɛ́ dó Sinmɔ́ɔ, vɔ̌sánú-xwlémawutɔ́ ɖaxó ɔ́, éé lɛ́ nyí gǎn Jwifu lɛ́ɛ tɔn é, é kpódó togun yětɔn bǐ sésé kpó. 2Nǔ e ɖo wěma ɔ́ mɛ é ɖíe: “Axɔ́sú Antiyokúsi tɛ́nwegɔ́ ɔ́ ɖɔ nǔ dó Sinmɔ́ɔ e nyí vɔ̌sánú-xwlémawutɔ́ ɖaxó, Jwifu lɛ́ɛ sín gǎn é káká yi Jwifu lɛ́ɛ sín akɔta bǐ jí é. 3Mɛslɛ́tɔ́ lɛ́ɛ yí daágbó ce lɛ́ɛ sín axɔ́súɖuto. Nǔ e wú wɛ un ba ná lɛ́ yí to ɔ́, bónú é ná lɛ́ nyí nǔ e é nyí ɖ'ayǐ é nɛ́. Un cyán sɔ́ja ahwangɔnu gěgé kplé lobo dó ahwanlyánnú dó tɔjíhún gěgé mɛ. 4É jló mì nú má lɛ́ kɔ wá to ɔ́ mɛ bó ná li za xá mɛ e vívá to ce, lobo gídí toxo tɔn gěgé lɛ́ɛ é. 5Bɛ́ sín din ɔ́, acɛ e axɔ́sú e jɛ nukɔn nú mì lɛ́ɛ é ná we ɖó takwɛ́ e a nɔ ná é wú é ɔ́ bǐ kpo ɖo te. Nǔ e sín acɛ yě ná we lɛ́ɛ bǐ kpo ɖo te. 6Un ná gbe we ɖɔ a ni bló akwɛ́ e to towe bǐ ná ɖu é. 7Jeluzalɛ́mu kpódó Sinsɛnxɔ ɔ́ kpó ɖó ná jɛ jlokoko mɛ. Ahwanlyánnú e a blǒ e kpó agbǒ e a blǒ lobo kpo ɖo zǐnzán wɛ lɛ́ɛ é bǐ nyí towe. 8Dɔkun e nyí axɔ́sú ɔ́ tɔn, bɔ a ɖu é kpó ée a nǎ wá ɖu ɖo nukɔn mɛ e kpó ɔ́, è sɔ́ bǐ kɛ we din káká yi tɛgbɛ gbe. 9Hwenu e un ná lɛ́ yí axɔ́súɖuto ce é ɔ́, un ná ná susu ɖaxó hwi kpó akɔta towe kpó, kpódó Sinsɛnxɔ Jeluzalɛ́mu tɔn kpó. Hwenɛ́nu ɔ́, gbɛ ɔ́ bǐ ná mɔ agbadídó towe.”
Antiyokúsi tɛ́nwegɔ́ ɔ́ tɔ́n ahwan Tlifɔ́ɔn ɖo Dɔ̌la
10Antiyokúsi wá daágbó tɔn lɛ́ɛ sín to mɛ, ɖo xwe kɛnnɛ wɛ̌nɛgɔ́ (174) ɔ́ mɛ. Ahwangɔnu lɛ́ɛ bǐ lɛ́ kɔ wá jǐ tɔn, bɔ é wá kpo sɔ́ja kwín we ɖé nú Tlifɔ́ɔn. 11Antiyokúsi jɛ Tlifɔ́ɔn túnnu, bɔ é hɔn yi Dɔ̌la, ɖo xutó. 12É mɔ ganjí ɖɔ nyladó gěgé kɔn nyi émí jí, lobɔ ahwangɔnu émítɔn bǐ hɔn jó émí dó. 13Antiyokúsi jɛ agban dó Dɔ̌la, lobo ɖó gɔnu tɔn ɖó fínɛ́. Sɔ́ja afɔzɔntɔ́ lɛ́ɛ yi adɔ̌kpo ayizɛ́n (120.000), lobɔ děgba we (8.000) ɖo sɔ́ jí, bó xwedó e. 14É kó lɛ́ dó toxo ɔ́ hwɛ̌, cóbɔ tɔjíhún lɛ́ɛ wá tɔ́n ahwan toxo ɔ́ ɖo xuta. É ján toxo ɔ́ ɖo ayǐkúngban jí kpó xu jí kpó. É lɔn nú mɛɖé byɔ́ toxo ɔ́ mɛ ǎ. Mɔ̌ jɛ́n mɛɖé má sɔ́ tɔ́n sín toxo ɔ́ mɛ ǎ é nɛ́.
Sinmɔ́ɔ jló ná lɛ́ vɔ́ xɔ́ntɔn nyínyí sín alɛ nu
15 Hwenu e Numɛniwúsi kpódó mɛ e kplá ɛ lɛ́ɛ kpó lɛ́ kɔ wá sín Hlɔ̌ma é ɔ́, yě hɛn wěma ɖé wá nú axɔ́sú to ɖě lɛ́ɛ tɔn. Nǔ e ɖo wěma ɔ́ mɛ é ɖíe: 16“Lusiwúsi e sɔ́ Hlɔ̌manu lɛ́ɛ sín afɔ ɖó te ɔ́ ɖɔ nǔ dó axɔ́sú Putolemɛ́ɛ. 17Mɛsɛ́dó Jwifu lɛ́ɛ tɔn e vɔ̌sánú-xwlémawutɔ́ ɖaxó Sinmɔ́ɔ kpódó togun Jwifu lɛ́ɛ tɔn kpó sɛ́ dó lɛ́ɛ é wá mǐ gɔ́n, xɔ́ntɔn kpó hɛ̌nnu-kún-kplá-hɛ̌nnu kpó ɖɔhun. Yě jló ná lɛ́ vɔ́ xɔ́ntɔn nyínyí sín alɛ e mǐ nu xá yě xóxó ɖ'ayǐ é nu, bɔ mǐ ná húzú mɛ ɖokpó ɔ́. 18Yě hɛn gǎglónú siká tɔn ɖokpó dó yěɖée jí, bɔ é ná xɔ kpatágan kilóo afɔwe kanwe ko (500) mɔ̌. 19Nǔ e wú wɛ mǐ mɔ ɖɔ é nyɔ́ ɖɔ mǐ ni sɛ́ wěma dó axɔ́sú to nabíɖé lɛ́ɛ tɔn é nɛ́. Mǐ byɔ́ yě ɖɔ yě ni ma ba nǔ nyanya ɖé ná wa nú Jwifu lɛ́ɛ ó, yě ni má ká tɔ́n ahwan yě ó, yě ni má ká ɖó alɔ to yětɔn lɛ́ɛ kpó toxo yětɔn lɛ́ɛ kpó wú ó, yě ni má ká lɛ́ jɛ mɛ e ɖo ahwan fun xá yě wɛ lɛ́ɛ é jí ó. 20Mi lɛ́ ɖe gbeta tɔ́n ɖɔ mi ni yí sikánú e yě ná mǐ é. 21Ényí mɛslɛ́tɔ́ lɛ́ɛ hɔn sín to yětɔn lɛ́ɛ mɛ bó wá bɛ ta ɖo mi gɔ́n hǔn, mi ɖe yě gba, lobo jó yě nú vɔ̌sánú-xwlémawutɔ́ ɖaxó Sinmɔ́ɔ nú é ná xwedó sɛ́n yětɔn dó dɔn tó nú yě.”
22Afɔsɔ́ɖótetɔ́ Lusiwúsi wlán wěma ɖokpó ɔ́ sɛ́ dó axɔ́sú Dɛmɛtliwúsi, Atale, Aliyalati, Aasási, 23Káká yi Samupusamɛ́ɛ, Sipaati, Delɔ́si, Midɔ́si, Sikɔnu, Kalíi, Samɔ́si, Panfilíi, Lisíi, Halikamasi, Hlodɛ́si, Faselisi, Kɔsi, Sidée, Aladɔ́si, Gɔɔtini, Kinidi, Cíplu kpódó Silɛ́nu kpó. 24Wěma nɛ́ ɔ́, è sɛ́ ɖokpó dó vɔ̌sánú-xwlémawutɔ́ ɖaxó Sinmɔ́ɔ.
Antiyokúsi súnsún kpɔ́ nɔ bó wa nǔ sín alɔ e é dó wěma mɛ xá Sinmɔ́ɔ é.
25Axɔ́sú Antiyokúsi gbɛ́ kpo ɖo ahwan tɔ́n Dɔ̌la toxo ɔ́ wɛ. É nɔ́ ɖo sɔ́ja sɛ́ dó wɛ magbokɔ, nú yě ná li za xá ɛ, lobo zɔ́n bɔ è blǒ ahwan sín mɔ bɔ é sukpɔ́ ɖésú. É ján Tlifɔ́ɔn ɖo ayǐkúngban jí kpó xu jí kpó, bɔ mɛ ɖěbǔ sixú byɔ́ toxo ɔ́ mɛ ǎ. Mɔ̌ jɛ́n wɛ mɛ ɖěbǔ ma sigǎn tɔ́n sín mɛ ǎ é nɛ́. 26Sinmɔ́ɔ cyán sɔ́ja tɔn agbɔ̌n ɖo wǔnánɔ afɔwó (2.000), bó sɛ́ dó bɔ yě ná yi fun ahwan xá axɔ́sú ɔ́. É lɛ́ sɛ́ kpatágan, siká kpó azɔ̌wanú nukúnɖéjí kpó dó e. 27Lo ɔ́, Antiyokúsi gbɛ́ alɔdó nɛ́ ɔ́. Hú mɔ̌ ɔ́, é súnsún nǔwaɖókpɔ́ sín wěma e mɛ é dó alɔ xá Sinmɔ́ɔ é bǐ, bó húzú ninɔmɛ dó wǔ tɔn. 28É sɛ́ Atenɔbiwúsi e nyí mɛ ɖokpó ɖo axɔ́sú ɔ́ sín xɔ́ntɔn lɛ́ɛ mɛ é dó e nú é ná yi ɖɔ xó élɔ́ n'i: din ɔ́ mi klá jɛ Jopée, Gazaláa kpó Jeluzalɛ́mu kpó nu. Axɔ́súɖuto ce mɛ wɛ toxo énɛ́ lɛ́ɛ ká ɖe. 29Mi ɖyɔ́ fí e yě kpa acɛ dó lɛ́ɛ é bɔ bǐ húzú gbětótló. Mi sɔ́ bǎ syɛ́nsyɛ́n dó xo to ɔ́ lobo húzú gǎn gbɔn awa gěgé jí ɖo axɔ́súɖuto ce mɛ. 30Din ɔ́, toxo e mi yí lɛ́ɛ ɔ́, mi ná jó yě nú mì. Mi ɖó ná lɛ́ sú takwɛ́ awa e jí mi klá jɛ, bɔ yě ma nyí Judée to ǎ lɛ́ɛ tɔn. 31É má nyí mɔ̌ ǎ hǔn, mi bo sú kpatágan kilóo děgba atɔn afatɔ́n (13.000), ɖó toxo nɛ́ lɛ́ɛ ta mɛ. Mi ni lɛ́ sú takwɛ́ mɔ̌hunkɔtɔn ɖó nǔ e mi hɛn gblé lɛ́ɛ kpó axɔ́ toxo énɛ́ lɛ́ɛ ɖu lɛ́ɛ é kpó nu. Ényí mi ma sú ǎ ɔ́, mǐ ná wá tɔ́n ahwan mi.
32Atenɔbiwúsi, axɔ́sú ɔ́ xɔ́ntɔn ɔ́ wá Jeluzalɛ́mu nǔgbó. É mɔ dɔkun Sinmɔ́ɔ tɔn lɛ́ɛ, siká gannú kpó kpatágan gannú lɛ́ɛ kpó ɖo távo lɛ́ɛ jí, bó lɛ́ mɔ xɔmɛjláɖónú lɛ́ɛ. É kpácá ɛ ɖésú. Énɛ́ gúdo ɔ́, é wá dó axɔ́sú Antiyokúsi sín wɛn Sinmɔ́ɔ. 33Gbe e Sinmɔ́ɔ yí n'i ɔ́ ɖíe: “Mǐ yí mɛ ɖěvo sín ayǐkúngban ɖěbǔ ǎ. Mǐ ka lɛ́ yí mɛ ɖěvo ɖěbǔ sín dɔkun ǎ. Ayǐkúngban e nyí tɔ́gbó mǐtɔn lɛ́ɛ tɔn, bɔ mǐ ɖu gǔ tɔn lɛ́ɛ wɛ mǐ vɔ́ yí. Kɛntɔ́ mǐtɔn lɛ́ɛ fán asú mǐ, bó nɔ yě nu nú hwe ɖé nu. 34Mǐ kpɔ́n hwenu e é jɛ xá é, bó lɛ́ vɔ́ gǔ tɔ́gbó mǐtɔn lɛ́ɛ tɔn yí. 35A byɔ́ Jopée kpó Gazaláa kpó bó ná yí, lo ɔ́, toxo énɛ́ lɛ́ɛ mɛ nu lɛ́ɛ wa nǔ xá akɔta mǐtɔn kpó to mǐtɔn kpó ɖésú. Mǐ ná ná we kpatágan kilóo afɔwó nǔwɔntɔn kanwe ko (2.700) ɖó toxo énɛ́ lɛ́ɛ tɛn mɛ.” Atenɔbiwúsi ɖɔ xó ɖěbǔ ǎ. 36Xomɛsin jí wɛ é zɔn bó lɛ́ kɔ yi axɔ́sú ɔ́ gɔ́n. Xó e Sinmɔ́ɔ ɖɔ é ɔ́, é wlí bǐ ɖɔ n'i. Dɔkun e é mɔ ɖo gɔ̌n tɔn é ɔ́, é lɛ́ ɖó gbe tɔn n'i. Xomɛ sin Atenɔbiwúsi taala.
Ahwangán Kɛndebée tɔ́n ahwan Judée to ɔ́
37Tlifɔ́ɔn byɔ́ tɔjíhún mɛ lobo hɔn yi Ɔɔtosiya. 38Axɔ́sú Atenɔbiwúsi sɔ́ Kɛndebée ahwangán ɖaxó, ɖó tokpɔnla e ɖo xutó é nú. É sɔ́ ahwangɔnu afɔzɔntɔ́ kpó sɔ́xátɔ́ lɛ́ɛ kpó dó alɔ mɛ n'i. 39É zɔ́n ɛ ɖɔ é ní ɖó ahwanslǎ tɔn ɖó fí e Judée to ɔ́ fó ɖó é. É ɖó ná lɛ́ vɔ́ Kedlɔ́n toxo ɔ́ bló ɖó, bó ná dó hɔn jɔ hɔn ná, lobo ná tɔ́n ahwan Jwifu lɛ́ɛ sín fínɛ́. Axɔ́sú ɔ́, éyɛ́ jɛ Tlifɔ́ɔn túnnu.
40Kɛndebée ɖidó Jamuniya, bó jɛ nǔɖɔ ba Jwifu lɛ́ɛ jí. É byɔ́ Judée to ɔ́ mɛ, bo wlí mɛ dó gankpá mɛ, lobo nɔ hu. 41É vɔ́ Kedlɔ́n to ɔ́ bló ɖó, bo to sɔ́ja sɔ́xátɔ́ kpó sɔ́ja afɔzɔntɔ́ kpó ɖó toxo nɛ́ ɔ́ mɛ. Yědɛɛ lɛ́ɛ ɖó ná tɔ́n, bó ná gbo Judée sín ali lɛ́ɛ, lobo ná nɔ tɔ́n ahwan mɛ lɛ́ɛ, lě e axɔ́sú ɔ́ zɔ́n gbɔn é.
Currently Selected:
1 Makabée 15: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.