1 Makabée 14
14
Mɛdi xɔ́sú ɔ́ wlí Dɛmɛtliwúsi wegɔ́ ɔ́ dó gan
1Ɖo xwe kɛnnɛ wěwegɔ́ (172) ɔ́ mɛ wɛ axɔ́sú Dɛmɛtliwúsi wegɔ́ ɔ́ xo ahwangɔnu tɔn kplé, lobo ɖidó Mɛdi. É yí ba mɛ dó éɖée jí bó ná dó fun ahwan xá Tlifɔ́ɔn. 2Aasási e ɖu axɔ́sú dó Pɛ́si kpó Mɛdi kpó nu ɔ́ se ɖɔ Dɛmɛtliwúsi wá ayǐkúngban émítɔn jí. 3Hwenɛ́nu ɔ́, é sɛ́ ahwangán tɔn lɛ́ɛ ɖokpó dó, bɔ é yi wlí i gbɛɖe gbɛɖe wá. Ahwangán ɔ́ yi, bó gba ahwangɔnu Dɛmɛtliwúsi tɔn dó. É kplá ɛ yi jó nú axɔ́sú Aasási, bɔ é dó e gan.
Susu kpa nú mɛ sín han e è ji nú Sinmɔ́ɔ Makabée é
4Vivo tíin nú Judée ɖo Sinmɔ́ɔ sín gbɛ hwenu bǐ. É ba nyɔ̌ná nú akɔta tɔn, lobɔ ɖo gbɛ hwenu tɔn bǐ ɔ́, acɛkpikpa tɔn kpó susu e è nɔ ná ɛ é bǐ kpó nyɔ́ Jwifu lɛ́ɛ nukún mɛ. 5Nyǐkɔ tɔn lɛ́ yi nukɔn hú hwenu e é yí zohúnglíntɛn Jopée tɔn é. Nǔ énɛ́ e é wá é ɔ́ zɔ́n bɔ Jwifu lɛ́ɛ hɛn ɔ́ yě ná yi tɔtɛ́ntinto e ɖo xu jí lɛ́ɛ é mɛ. 6É gbló ada nú to tɔn, bɔ acɛkpikpa tɔn kpé to ɔ́ bǐ jí. 7Mɛ e ahwan wlí dó gan lɛ́ɛ é ɔ́, é kplá gěgé wá. É yí Gazaláa, Bɛti-Súu kpódó toxo nukúnɖéjí Jeluzalɛ́mu tɔn kpó. É sú nǔ e zɔ́n bɔ toxo nukúnɖéjí ɔ́ kwíji é bǐ sín kún dó. Mɛ ɖé glá bó syɛ́n dɔn ɖo nukɔn tɔn ǎ. 8Mɛ lɛ́ɛ nɔ́ vo, bó lɛ gle yětɔn lɛ́ɛ: Ayǐkúngban ɔ́ nɔ ná nukún tɔn, atín e ɖo tɔgbado mɛ lɛ́ɛ é bǐ nɔ ná sínsɛ́n yětɔn yětɔn. 9Mɛxó lɛ́ɛ nɔ jínjɔ́n ayǐ, bó nɔ́ ɖo xó ɖɔ dó nǔ ɖagbe ɖagbe e jɛ lɛ́ɛ é wú wɛ. Mɛwínnyáwínnyá lɛ́ɛ nɔ́ dó ahwanwu yětɔn lɛ́ɛ, bó nɔ́ gó, bó nɔ́ hɛn ahwanlyánnú yětɔn ɖagbe ɖagbe lɛ́ɛ. 10Sinmɔ́ɔ nɔ́ ná nǔɖuɖu e hu dó toxo lɛ́ɛ é yě, lobo ka mɛ dǒ e è ma sixú fán ǎ é lɛ́ dó yě. Hwenɛ́nu ɔ́, nyǐkɔ tɔn hun káká yi fí e gbɛ ɔ́ fó nu ɖó é. 11É dɔn fífá wá to ɔ́ mɛ, bɔ é hun xomɛ nú togun Izlayɛ́li tɔn ɔ́ ɖésú. 12Mɛ ɖokpó ɖokpó vo ɖo vǐwungbo tɔn mɛ alǒ fígitín tɔn sá. Mɛ ɖé sɔ́ nɔ wá dó xɛsi nú yě ǎ. 13Kɛntɔ́ e nɔ́ tɔ́n ahwan yě lɛ́ɛ blí bú sín Judée to ɔ́ mɛ, axɔ́sú e má nyí toví ǎ lɛ́ɛ é ɔ́ yě xo bǐ. 14Sinmɔ́ɔ dó alɔ mɛ e ɖo wɛn, bó má ɖó xó ɖé xá mɛ ɖé ǎ ɖo togun ɔ́ mɛ lɛ́ɛ é. É lɔn nǔ dó Mawusɛ́n ɔ́ jí ǎ. Jwifu nyanya e ma nɔ nɔ gbejí nú sɛ́n ɔ́ ǎ lɛ́ɛ é ɔ́, é nya bǐ sín to ɔ́ mɛ. 15Susu e Sinsɛnxɔ ɔ́ ko ɖó xóxó ɖ'ayǐ é ɔ́, é lɛ́ vɔ́ ná ɛ, lobo ka lɛ́ dó nǔ mímɛ́ nǔ mímɛ́ jí, bɔ é sukpɔ́.
Sipaatinu lɛ́ sɛ́ wěma ɖokpó dó Sinmɔ́ɔ
16Mɛ lɛ́ɛ se kú Jonatáan tɔn xó ɖo Hlɔ̌ma kpó Sipaati kpó bɔ é kú wǔ nú yě. 17Lo ɔ́, Sipaatinu lɛ́ɛ lɔmɔ̌ se ɖɔ Sinmɔ́ɔ wɛ ɖyɔ́ nɔví tɔn vɔ̌sánú-xwlémawutɔ́ ɖaxó ɖɔhun, é ka lɛ́ nyí mɛ̌si nú gletoxo kpó toxo Judée tɔn lɛ́ɛ kpó. 18 Hwenɛ́nu ɔ́, yě sɛ́ wɛn ɖé dó é, bɔ è wlǎn dó ganvɔtɛ ɖé lɛ́ɛ jí. Xɔ́ntɔn nyínyí sín alɛ e yě ko nu xá nɔví tɔn Judási kpó Jonatáan kpó xóxó ɖ'ayǐ é ɔ́ , yě lɛ́ vɔ́ dó zǒgbé jí, lobɔ yě lɛ́ húzú mɛ ɖokpó ɔ́. 19Agun kplékplé Jeluzalɛ́mu tɔn ɔ́ bǐ sésé mɛ wɛ è xa wɛn nɛ́ ɔ́ ɖe. 20Wɛn e Sipaatinu lɛ́ɛ sɛ́ dó é ɔ́, nǔ e ɖ'é mɛ é ɖíe: Pati sín gǎn lɛ́ɛ kpó toví lɛ́ɛ bǐ kpó ɖɔ nǔ dó Sinmɔ́ɔ vɔ̌sánú-xwlémawutɔ́ ɖaxó ɔ́, tomɛxó lɛ́ɛ, vɔ̌sánú-xwlémawutɔ́ lɛ́ɛ kpódó nɔví yětɔn Jwifu lɛ́ɛ bǐ kpó.
21Mɛ e mi ɖe, bó sɛ́ dó togun mǐtɔn lɛ́ɛ é ɖé xlɛ́ mǐ ɖɔ mɛ bǐ wɛ tunwun mi, bɔ mi ká ɖó sí taala. Kpɔ́n e yě wá kpɔ́n mǐ é víví nú mǐ ɖésú. 22Xó e yě wá ɖɔ nú mǐ lɛ́ɛ ɔ́, mǐ wlán bǐ dó wěgbó togun ɔ́ tɔn mɛ, lě e mǐ ká wlán gbɔn é ɖíe: “Numɛniwúsi, Antiyokúsi ví ɔ́, kpó Antipatɛ́ɛ, Jazɔ́ɔn ví ɔ́ kpó wá mǐ gɔ́n, mɛsɛ́dó Jwifu lɛ́ɛ tɔn lɛ́ɛ wɛ, bó ná dó vɔ́ xɔ́ntɔn sín sin e mǐ kpó mi kpó nu é nu. 23Togun ɔ́ bǐ kplékplé mɔ ɖɔ é nyɔ́ ɖɔ è nǐ yí mɛ énɛ́ lɛ́ɛ kpódó susu kpó, lobo ka sɔ́ xó e yě wá ɖɔ lɛ́ɛ é sɛ xwe dó fí e mǐ nɔ hɛn wěma nukúnɖéjí mǐtɔn lɛ́ɛ ɖó é. É ná ɖo ayi Sipaati lɛ́ɛ tɔn mɛ, bɔ yě ná nɔ́ flín. Hú mɔ̌ ɔ́, mǐ lɛ́ sɛ́ wěma mǐtɔn ɖokpó ɔ́ dó vɔ̌sánú-xwlémawutɔ́ ɖaxó Sinmɔ́ɔ.”
24É lín xóó bɔ Sinmɔ́ɔ sɛ́ Numɛniwúsi dó Hlɔ̌manu e ná vɔ́ nǔ e dɔn yě cá xá Hlɔ̌manu lɛ́ɛ é bló ɖó. Ɖo linlin énɛ́ ɔ́ mɛ ɔ́, é hɛn gǎglónú siká tɔn ɖokpó, bɔ é ná xɔ akwɛ́ lǐvi ko (20.000.000) mɔ̌.
Sinmɔ́ɔ, vɔ̌sánú-xwlémawutɔ́ ɖaxó, Jwifu lɛ́ɛ xɔ́sú
25Ée Jwifu lɛ́ɛ se mɔ̌ é ɔ́, yě kanbyɔ́ yěɖée ɖɔ: “Nǔ e Sinmɔ́ɔ kpódó vǐ tɔn lɛ́ɛ kpó wá nú mǐ é ɔ́, nɛ̌ mɔ̌ wɛ mǐ sigǎn tunwun nú yě gbɔn tawun? 26Nǔgbó wɛ, éyɛ́, nɔví tɔn lɛ́ɛ kpódó tɔ́ tɔn sín hɛ̌nnu ɔ́ kpó nɔ́ syɛ́n dɔn tɛgbɛ. Yě nya Izlayɛ́li kɛntɔ́ lɛ́ɛ dó zɔ gbɔn ahwan e yě fun xá yě ɔ́ gbla mɛ, lobɔ yě ɖe togun mǐtɔn nyi kɔ vɔ́.”
Hwenɛ́nu ɔ́, yě wlán xógbe ɖé lɛ́ɛ dó ganvɔtɛ ɖé lɛ́ɛ jí, lobo fɔ yě kplá Sinayíi só ɔ́ wú. 27Nǔ e è wlǎn é ɖíe: “Vɔ̌sánú-xwlémawutɔ́ ɖaxó Sinmɔ́ɔ ɖu gǎn ɔ́ xwe tɔn atɔngɔ́ ɔ́ mɛ, ɖo azǎn afɔtɔn nukún atɔngɔ́ ɔ́ e ɖo Elúli sín sun ɔ́ mɛ é, ɖo xwe kɛnnɛ wěwegɔ́ (172) ɔ́ mɛ wɛ 28è blǒ kplé ɖaxó vɔ̌sánú-xwlémawutɔ́ lɛ́ɛ, togun ɔ́, togán lɛ́ɛ kpó tomɛxó lɛ́ɛ kpó tɔn. Fínɛ́ ɔ́, è flín nǔ élɔ́ lɛ́ɛ mǐ: 29To mǐtɔn fun ahwan ɖésú. Nú é yá hweɖěbǔnu ɔ́, Sinmɔ́ɔ kpó nɔví tɔn lɛ́ɛ kpó, Matatiyási e nyí vɔ̌sánú-xwlémawutɔ́ bó tɔ́n sín Yoyalívu hɛ́nnu mɛ é, sín ví lɛ́ɛ wɛ nú yě. Yě sa ta ɖésú. Yě húzú kpan nukɔn akɔta mǐtɔn sín kɛntɔ́ lɛ́ɛ, bó dó jɛ hun dó Sinsɛnxɔ mǐtɔn kpó sɛ́n mǐtɔn kpó jí. Mɔ̌ wɛ yě wa bó dó sɔ́ togun mǐtɔn d'aga. 30Jonatáan bló bɔ to ɔ́ ɖó gbe kpɔ́, bɔ é húzú vɔ̌sánú-xwlémawutɔ́ tɔn ɖaxó aditi ɔ́. Ée é wa énɛ́ lɛ́ɛ bǐ fó é ɔ́, é wá yi su daágbó tɔn lɛ́ɛ. 31Kɛntɔ́ Izlayɛ́li tɔn lɛ́ɛ jló ná byɔ́ Judée, ɖó to ɔ́ ná gba lobo sú Sinsɛnxɔ tɔn wú. 32Sinmɔ́ɔ wá sí te dó yě jí, lobo jɛ hun dó to tɔn jí. É zán akwɛ́ tɔn akpá bǔ dó xɔ ahwanlyánnú nú sɔ́ja to tɔn mɛ tɔn lɛ́ɛ. É nɔ́ lɛ́ sú akwɛ́ yě. 33É mɛ gǎnjɛwú sín dǒ lɛ́ dó Judée toxo lɛ́ɛ kpó Bɛti-Súu e nyí dogbó to ɔ́ tɔn bɔ kɛntɔ́ lɛ́ɛ sɔ́ dó ɖó ahwanlyánnú-sɛxwetɛn yětɔn ná ɖ'ayǐ é kpán. Sinmɔ́ɔ wá ɖe sɔ́ja Judée tɔn ɖé lɛ́ɛ, bó zé dó toxo nɛ́ ɔ́ nu. 34É mɛ gǎnjɛwú sín dǒ lɛ́ dó Jopée, to e ɖo xutó é, bó lɛ́ mɛ lɛ́ dó Gazaláa ɖo Azɔtɔ́si toxo ɔ́ kpá. Ɖ'ayǐ ɔ́, kɛntɔ́ lɛ́ɛ wɛ ɖo xá nɛ́ ɔ́ mɛ. Lo ɔ́, Sinmɔ́ɔ fɔ Jwifu ɖé lɛ́ɛ ɖo toxo we nɛ́ lɛ́ɛ mɛ. É lɛ́ ná nǔ e hu dó toví nɛ́ lɛ́ɛ é bǐ yě. 35Togun ɔ́ mɔ gbejíninɔ Sinmɔ́ɔ tɔn; Yě mɔ jɛ mɛ ɖɔ é jló ná zé to tɔn yi hǎga jí wɛ. Énɛ́ wú ɔ́, Jwifu lɛ́ɛ sɔ́ ɛ gǎn, bó lɛ́ sɔ́ ɛ vɔ̌sánú-xwlémawutɔ́ ɖaxó, bó ná dó kpa gbe n'i ɖó nǔ e é wa lɛ́ɛ é bǐ wú. Sinmɔ́ɔ zán hwɛjijɔ, bó ka nɔ gbejí nú akɔta tɔn, lobo ka bló gbɔn lě e é kpé wú gbɔn é bǐ, bɔ Jwifu lɛ́ɛ húzú togun ɖaxó ɖokpó. 36Gbɛ hwenu tɔn ɔ́ é kpé wú bó nya mɛ e ma nyí Jwifu ǎ lɛ́ɛ é sín Judée. É lɛ́ nya mɛ e ɖo Davídi Toxo ɔ́ mɛ, ɖo Jeluzalɛ́mu lɛ́ɛ bǐ sésé. Mɛ énɛ́ lɛ́ɛ wɛ gbá toxo nukúnɖéjí ɖokpó ɖó fínɛ́. Fínɛ́ wɛ yě nɔ́ gosín bó nɔ́ wá hɛn fí é bɔdó Sinsɛnxɔ ɔ́ wú lɛ́ɛ kwíji. Nukún nyanya wɛ yě nɔ́ dó kpɔ́n tɛn mímɛ́ ɔ́ ná. 37Sinmɔ́ɔ fɔ sɔ́ja Judée tɔn lɛ́ɛ ɖó toxo nukúnɖéjí nɛ́ ɔ́ mɛ. É wa azɔ̌ bó ná dó cyɔ́n alɔ jǐ tɔn d'é jí, lobo nú to ɔ́ kpó Jeluzalɛ́mu kpó ná nɔ ganjí. É lɛ́ mɛ toxo ɔ́ sín dǒ lɛ́ɛ d'é nú.
38“Nǔ énɛ́ lɛ́ɛ bǐ wútu ɔ́, axɔ́sú Dɛmɛtliwúsi wegɔ́ ɔ́ hɛn Sinmɔ́ɔ ɖó vɔ̌sánú-xwlémawutɔ́ ɖaxó sín azɔ̌ tɔn mɛ. 39É lɛ́ hɛn ɛ dó mɛ tɔn lɛ́ɛ mɛ, lobo zé é dó hǎga jí.” 40Nǔgbó wɛ, axɔ́sú ɔ́ se xó élɔ́: Hlɔ̌manu lɛ́ɛ nɔ ylɔ́ Jwifu lɛ́ɛ ɖɔ xɔ́ntɔn, hɛ̌nnu-kún-kplá-hɛ̌nnu, lobo nɔ lɛ́ ylɔ́ yě ɖɔ nɔví, mɛ e Sinmɔ́ɔ ɖe sɛ́ dó yě lɛ́ɛ ɔ́, yě yí yě kpó susu ɖaxó kpó. 41Nǔ e wú wɛ Jwifu lɛ́ɛ kpó vɔ̌sánú-xwlémawutɔ́ yětɔn lɛ́ɛ kpó wá yí gbe nú nǔ élɔ́ lɛ́ɛ bǐ e ɖíe: Sinmɔ́ɔ kpó vǐ tɔn lɛ́ɛ kpó, kpódó vǐvú tɔn lɛ́ɛ kpán ná nyí gǎn, lobo ná lɛ́ nyí vɔ̌sánú-xwlémawutɔ́ ɖaxó, káká jɛ hwenu e Mawu ná sɛ́ gbeyíɖɔ titewungbe ɖokpó dó é. 42Hǔn Sinmɔ́ɔ wɛ nyí ahwangán mǐtɔn, é ɖó ná lɛ́ kpé nukún dó Sinsɛnxɔ ɔ́ wú; é wɛ ɖó acɛ bó ná nɔ́ sɔ́ azɔ̌gán lɛ́ɛ, axɔ́súzɔ́watɔ́ lɛ́ɛ kpó gǎn e sín alɔ mɛ ahwanlyánnú lɛ́ɛ kpódó agbǒ lɛ́ɛ kpó ná nɔ lɛ́ɛ é kpán. 43Sinmɔ́ɔ nɔ kpé nukún Sinsɛnxɔ ɔ́ wú. Mɛ bǐ ɖó ná se tónú n'i. To ɔ́ sín wěma téwúngbéjú lɛ́ɛ bǐ ɔ́ nyǐkɔ tɔn mɛ wɛ è ɖǒ ná nɔ́ wlán bǐ dó. É ɖó acɛ bó ná nɔ avɔ vɔvɔ e è nɔ dó fɔ yɛsu ná lɛ́ɛ é kpódó siká wuntun lɛ́ɛ kpó mɛ. 44Mɛ ɖěbǔ ɖo togun ɔ́ kpó vɔ̌sánú-xwlémawutɔ́ lɛ́ɛ kpó mɛ bó ná hɔn gbetakɛ́n tɔn ɖokpó lě nyi gbě ǎ; Sinmɔ́ɔ ɖe gbe ɔ́, mɛɖé sigǎn dó asá ǎ, è sixú kplé agun ɖo to ɔ́ mɛ dó agbě e ǎ; yɛsuvɔ vɔvɔ ɔ́, è ka ɖó ná dó dó gǔdo tɔn ǎ, è sixú zán gbeɖiɖe tɔn mɛ vo ǎ. 45Mɛ e ma xwedó gbetakɛ́n nɛ́ lɛ́ɛ ǎ, alǒ mɛ e dó asá ɖokpó géé é ɔ́, è nǎ dɔn tó n'i.
46Togun ɔ́ bǐ ná gbe Sinmɔ́ɔ ɖɔ é ní wa nǔ gbɔn mɔ̌. 47Sinmɔ́ɔ ɖɔ nǔ e é lin é, bó ká ɖo gbesisɔ mɛ bó ná nyí vɔ̌sánú-xwlémawutɔ́ ɖaxó, ahwangán, bó nyí togán nú Jwifu lɛ́ɛ, bó nyí vɔ̌sánú-xwlémawutɔ́ yětɔn, bó ná nyí ta lobo ná nɔ togun ɔ́ bǐ nu.
48Jwifu lɛ́ɛ ɖe gbeta tɔ́n ɖɔ wěma nɛ́ ɔ́, è nǐ wlán dó ganvɔtɛ ɖé lɛ́ɛ jí, bó sɔ́ ɖó fí e jɛ nukún jí, bɔ mɛ bǐ ná mɔ céɖécéɖé ɖo Sinsɛnxɔ ɔ́ sín kɔ́xota é. 49Wěma nɛ́ ɔ́, è ni lɛ́ wlán dó Sinsɛnxɔ ɔ́ mɛ, dó xɔ e sá dɔkun ɔ́ ɖe é. Énɛ́ ɔ́, é ná ɖo Sinmɔ́ɔ kpó vǐ tɔn lɛ́ɛ kpó kan nu.
Currently Selected:
1 Makabée 14: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.