1 Makabée 13
13
Sinmɔ́ɔ jɛ Jonatáan tɛnmɛ
1Sinmɔ́ɔ se ɖɔ Tlifɔ́ɔn xo ahwangɔnu gěgé kplé bó ná yi vɔ Judáa. 2É mɔ ɖɔ xɛsi jɛ togun ɔ́ jí. Hwenɛ́nu ɔ́, é yi Jeluzalɛ́mu, lobo kplé Jwifu lɛ́ɛ. 3É ba ná ná jiɖiɖe yě lobo ɖɔ: “Mi tunwun nǔ e nɔví ce lɛ́ɛ kpó nyɛ kpó, hɛ̌nnu mǐtɔn ɖésú, mǐ wa bó ná dó jɛ hun dó sɛ́n lɛ́ɛ kpó Sinsɛnxɔ ɔ́ kpó jí é ganjí. Za e mǐ li lɛ́ɛ é kpó wǔvɛ́ e mǐ mɔ lɛ́ɛ é kpó ɔ́, mi se bǐ. 4Izlayɛ́li jí ná jɛ ahwan wú wɛ nɔví ce lɛ́ɛ bǐ kú, bɔ é wá kpó nyɛ ɖokpónɔ. 5Din ɔ́, é byɔ́ nú má hwlɛ́n gbɛ ce gán, nyladó hwenu din ǎ. Nǔgbó wɛ, un nyí mɛɖé hú nɔví ce lɛ́ɛ ǎ. 6Lo ɔ́, un ka ná ba hlɔn togun ce kpó, Sinsɛnxɔ ɔ́ kpó, asi mitɔn lɛ́ɛ kpó, kpódó vǐ mitɔn lɛ́ɛ kpán tɔn. Ɛɛn togun ɖě lɛ́ɛ bǐ ɔ́, kpɔ́ wɛ yě nɔ bó dó sú kún mǐtɔn dó, ɖó yě gbɛ́ wǎn nú mǐ.”
7Xó Sinmɔ́ɔ tɔn nɛ́ lɛ́ɛ byɔ́ tó mɛ nú Jwifu lɛ́ɛ ganjí, bɔ yě lɛ́ mɔ akɔ́nkpinkpan. 8Yě yí gbe n'i kpó hlɔ̌nhlɔ́n kpó, lobo ɖɔ: “Din ɔ́, hwi wɛ nyí gǎn mǐtɔn, bó ɖo nɔví towe Judási kpódó Jonatáan kpó sín tɛnmɛ nú mǐ. 9Nɔ ahwan ɔ́ nukɔn nú mǐ, mǐ na wa nǔ e a na ɖɔ nú mǐ lɛ́ɛ bǐ.” 10Hwenɛ́nu ɔ́, Sinmɔ́ɔ xo mɛ e sixú fun ahwan lɛ́ɛ é bǐ kplé. É hwlɛndó bó yá wǔ fó Jeluzalɛ́mu sín dǒ lɛ́ɛ, bó dó glɔ́n toxo ɔ́ lɛ́ dó. 11É sɛ́ Jonatáan, Abusalɔ́mu ví ɔ́ dó Jopée kpódó ahwangbɛ́ titewungbe ɖé kpó. Jonatáan nya toxo nɛ́ ɔ́ mɛ nu lɛ́ɛ bǐ, lobo jínjɔ́n fínɛ́.
Tlifɔ́ɔn flú Sinmɔ́ɔ, lobo hu nɔví tɔn Jonatáan
12Tlifɔ́ɔn sí te sín Putolemayísi, é kpódó ahwangɔnu wɔ̌buwɔ́bú ɖé kpó, bó wá Judáa. É kplá Jonatáan, Sinmɔ́ɔ sín nɔví e é dó gan é wá. 13Sinmɔ́ɔ jɛ agban ɖó Adida, ɖo tɔgbado ɔ́ nukɔn tlɔlɔ. 14Tlifɔ́ɔn se ɖɔ Sinmɔ́ɔ wɛ ɖo nɔví tɔn Jonatáan sín tɛnmɛ lobo ka ɖo nǔ sɔ́ wɛ bó ná tɔ́n ahwan ɛ. É sɛ́ wɛndótɔ́ dó nú è ni yí ɖɔ xó élɔ́ nú Sinmɔ́ɔ ɖɔ: 15“Nɔví towe Jonatáan ɔ́, ɖó azɔ̌ e é nɔ wa é wú ɔ́, é ɖó ná nɔ kɔn akwɛ́ dó dɔkungbá axɔ́sú ɔ́ tɔn mɛ. É ká bló ǎ. Nǔ e wú un hɛn ɛ ɖó gankpá mɛ ɔ́ nɛ́. 16Ényí a yǐ gbe bó sɔ́ kpatágan kilóo afɔwó nǔwɔntɔn kanwe ko (2.700) kpódó vǐ tɔn we kpó ɖó gbanu ɖo gɔ̌n ce ɔ́, un na ɖe e nyi te. Ényí mɔ̌ ɔ́, é sɔ́ ná fɔ́n gǔ dó mǐ jí tejijɛ tɔn gúdo ǎ.”
17Sinmɔ́ɔ mɔ jɛ mɛ ganjí ɖɔ wɛndótɔ́ lɛ́ɛ kún nɔ ɖɔ nǔgbó ó. É ka ɖo mɔ̌ có, é sɛ́ mɛ dó ɖɔ è ni yi zé akwɛ́ ɔ́ lobo ka kplá vǐ lɛ́ɛ wá. Ɖó é ɖo xɛsi ɖi wɛ ɖɔ togun ɔ́ má fɔ́n gǔ dó émí jí ó, 18bó ɖɔ: “Sinmɔ́ɔ sɛ́ akwɛ́ ɔ́ kpó vǐ lɛ́ɛ kpó dó ǎ wú wɛ Tlifɔ́ɔn hu Jonatáan ó.” 19Énɛ́ wú ɔ́, é sɛ́ vǐ lɛ́ɛ kpatágan kilóo afɔwó nǔwɔntɔn kanwe ko (2.700) lɛ́ɛ dó. Lo ɔ́, adingban wɛ Tlifɔ́ɔn ɖó, lobo gɔn Jonatáan ɖe nyi te.
20Énɛ́ gúdo ɔ́, Tlifɔ́ɔn jɛ ali lobo ná klá jɛ Judée nu lobo ná gba. É kpódó sɔ́ja tɔn lɛ́ɛ kpó wlí bɛli e tɔ́n dó Adoláa toxo ɔ́ mɛ é. Lo ɔ́, fí ɖěbǔ e é gbɔn ɔ́, Sinmɔ́ɔ kpódó ahwangɔnu tɔn kpó nɔ gbo ali n'i. 21Hwenɛ́nu ɔ́, yě mɛ e ɖo Jeluzalɛ́mu sín toxo nukúnɖéjí ɔ́ mɛ lɛ́ɛ sɛ́ wɛn dó Tlifɔ́ɔn. Yě byɔ́ kpó zǐngídi kpó ɖɔ é ní gbɔn gbětótló mɛ bó yá wǔ wá kpé émí; lobo ka sɛ́ nǔɖuɖu dó émí. 22Tlifɔ́ɔn sɔ́ nǔ nú sɔ́xátɔ́ lɛ́ɛ bǐ nú yě ná yi; lo ɔ́, ɖo zǎn nɛ́ ɔ́ mɛ ɔ́, laglási ja kɔn nyi ayǐ sukpɔ́, bɔ yě sɔ́ sigǎn yi ǎ, bɔ yě gbɔ bó ɖidó Galadi to mɛ. 23Ée é ɖo Basikama wa wɛ é ɔ́, é zɔ́n bɔ è hu Jonatáan bó ɖi i ɖó fínɛ́. 24Énɛ́ gúdo ɔ́, Tlifɔ́ɔn ɖidó to tɔn mɛ.
25Sinmɔ́ɔ sɛ́ mɛ dó bɔ è yi sɔ́ nɔví tɔn Jonatáan sín cyɔ, bɔ é yi ɖi i ɖó Mɔdinu, ɖo daágbó tɔn lɛ́ɛ sín toxo mɛ. 26Izlayɛ́li ví lɛ́ɛ bǐ wa cyɔ tɔn sín nǔ, lobo ví i ɖésú. 27Sinmɔ́ɔ mɛ nǔ ɖaxó ɖé dó tɔ́ tɔn kpódó nɔví tɔn lɛ́ɛ kpó sín yɔta. É yi jǐ ɖésú bɔ mɛ lɛ́ɛ nɔ mɔ sín zɔ. Awǐnnya kpikpa wɛ ɖo nukɔn kpó gǔdo kpó nú nǔ e è mɛ ɖó yɔ ɔ́ ta ɔ́. 28Sinmɔ́ɔ lɛ́ xo kpe tɛ́nwe ɖo hǎ we jí, nú tɔ́ tɔn, nɔ tɔn kpódó nɔví tɔn ɛnɛ lɛ́ɛ kpó. 29É zɔ́n bɔ è mɛ nǔ gaga ɖé lɛ́ɛ lɛ́ lɛ̌ dó kpe lɛ́ɛ. É ɖó acɔ́ nú kpe lɛ́ɛ kpódó ahwanlyánnú sɔ́ja lɛ́ɛ tɔn kpó, bónú mɛ lɛ́ɛ ná nɔ́ flín Makabée lɛ́ɛ tɛgbɛ. É bló tɔjíhún ɖé lɛ́ɛ ɖó ahwanlyánnú lɛ́ɛ kpá. Mɛ e ɖo tɔ jí bó ɖo yiyi wɛ é bǐ hɛn ɔ́ yě ná mɔ tɔjíhún lɛ́ɛ. 30Kpe nɛ́ lɛ́ɛ e Sinmɔ́ɔ zɔ́n bɔ è mɛ ɖó Mɔdinu e kpo ɖo te káká tɔ́n égbé din.
Dɛmɛtliwúsi wegɔ́ ɔ́ ɖó nǔwaɖókpɔ́ e ɖo é kpódó Jwifu lɛ́ɛ kpó tɛ́ntin é te
31Hwenɛ́nu ɔ́ Tlifɔ́ɔn wa nǔ mɛslɛ́tɔ́ ɖɔhun xá axɔ́sú wínnyáwínnyá Antiyokúsi, lobo hu i. 32É yí acɛkpikpa ɔ́ sín así tɔn, bó húzú Silíi ɖaxó ɔ́ sín axɔ́sú. É jlɛ́ nǔ xá to ɔ́ ɖésú.
33Sinmɔ́ɔ cyɔ́n alɔ ahohó Judée tɔn lɛ́ɛ jí ɖésú. É mɛ atɔxwɛ gaga ɖé lɛ́ɛ kpódó dǒ syɛ́nsyɛ́n ɖé lɛ́ɛ kpó lɛ́ lɛ̌ dó; agǎságo syɛ́nsyɛ́n wɛ é sɔ́ dó sú hɔn yětɔn lɛ́ɛ ná. É sɔ́ nǔɖuɖu hwlá dó ahohó énɛ́ lɛ́ɛ mɛ. 34Énɛ́ gúdo ɔ́, Sinmɔ́ɔ cyán gbɛtɔ́ ɖé lɛ́ɛ bó sɛ́ dó Dɛmɛtliwúsi wegɔ́ ɔ́. Ée Tlifɔ́ɔn ma sɔ́ tunwun nǔɖé zɛ dɔkun to ɔ́ tɔn lɛ́ɛ bíbɛ́ wú ǎ é ɔ́, mɛsɛ́dó lɛ́ɛ byɔ́ ɛ ɖɔ é ní ná gbe nú Jwifu lɛ́ɛ má sɔ́ ná takwɛ́ ɖě ó. 35Axɔ́sú Dɛmɛtliwúsi yí gbe nú nǔ nɛ́ e Sinmɔ́ɔ byɔ́ é, lobo sɛ́ wěma élɔ́ dó é: 36“Axɔ́sú Dɛmɛtliwúsi ɖɔ nǔ dó Sinmɔ́ɔ, vɔ̌sánú-xwlémawutɔ́ ɖaxó e lɛ́ nyí axɔ́sú lɛ́ɛ sín xɔ́ntɔn é, tomɛxó togun ɔ́ tɔn lɛ́ɛ kpódó akɔta Jwifu lɛ́ɛ tɔn bǐ kpó. 37Mǐ mɔ gǎngbákún siká tɔn kpó děma kpó e mi sɛ́ dó mǐ, lobo dó kan agban nú mǐ é. Mǐ ɖo gbesisɔ mɛ bó ná ɖɔ xó gbekplí gbekplí xá mi, lobo nú fífá ná tíin bǐ dégbédégbé, bó ká ná sɛ́ wěma dó axɔ́súzɔ́watɔ́ lɛ́ɛ, bɔ yě ná gɔn takwɛ́ yí ɖo mi sí. 38Nǔ e mǐ kpó mi kpó kó nɔ kpɔ́ bó ɖɔ lɛ́ɛ é ɔ́, mi kpo ɖo bǐ jí. Ahohó e mi bló lɛ́ɛ é ɔ́ bǐ wɛ nyí mitɔn. 39Nǔ e mi bló gbɔ lɛ́ɛ kpódó hwɛ e mi hu káká wa jɛ égbé din lɛ́ɛ é kpó bǐ wɛ mǐ sɔ́ kɛ mi. Mi sɔ́ ná sú takwɛ́ e mi ɖu dó axɔ́sú lɛ́ɛ é ɖě ǎ, ényí akwɛ́ ɖěvo ɖe vlafo bɔ è byɔ́ Jeluzalɛ́mu ɔ́, bɛ́ sín din ɔ́ mi sɔ́ ná sú ǎ. 40Ényí mɛ ɖé ɖo mǐ mɛ bó ná cɔ́ axɔ́sú ɔ́ hǔn, mǐ yí gbe ná. Mi nú mǐ ná xo fífá sín kan nú mǐɖée.”
41Bɛ́ sín xwe kɛnnɛ wǒ (170) mɛ ɖokpóó wɛ; mɛ e ma nyí Jwifu ǎ lɛ́ɛ é ɖě ma sɔ́ kpa acɛ nú Izlayɛ́li ǎ. 42Sinmɔ́ɔ, vɔ̌sánú-xwlémawutɔ́ ɖaxó, éé nyí ahwangán lobo ka lɛ́ nyí gǎn nú Jwifu lɛ́ɛ bǐ é ɔ́ jínjɔ́n zinkpo jí ɔ́ xwe tɔn nukɔntɔn ɔ́ mɛ wɛ è jɛ nǔ wlán dó wěma jɔ wěma mɛ jí.
Sinmɔ́ɔ yí Gazaláa kpó Jeluzalɛ́mu kpó
43 Hwenɛ́nu ɔ́ Sinmɔ́ɔ tɔ́n ahwan Gazaláa. É fɔ ahwangɔnu tɔn lɛ́ɛ lɛ́ lɛ̌ dó, é zɔ́n bɔ è blǒ atɔxwɛ ɖé ɖó afɔ jí, lobɔ é zé wá gán dó toxo ɔ́ sín dǒ lɛ́ɛ wú. É tɔ́n ahwan atɔxwɛ toxo ɔ́ tɔn lɛ́ɛ ɖokpó, lobo klá jɛ nu. 44Sɔ́ja e ɖo atɔxwɛ ɔ́ mɛ lɛ́ɛ lɔ́n jɛ toxo ɔ́ mɛ, bɔ mɛ bǐ nɔ sísɔ́ ɖó xɛsi wú. 45Mɛ lɛ́ɛ hɔn yi cí dǒ lɛ́ɛ ta. Yě kpó asi yětɔn lɛ́ɛ kpódó vǐ yětɔn lɛ́ɛ kpán. Yě vún avɔ yětɔn lɛ́ɛ, yě sú xó gǎngán ɖé dó byɔ́ Sinmɔ́ɔ ɖɔ é ní nyɔ́ xomɛ dó émí wú, nú fífá ná dó tíin. 46Yě ɖɔ: “Ma sɔ́ nǔ nyanya e mǐ wa é sín bǎ dó xo mǐ ó, lo ɔ́, kú nǔbláwǔ mǐtɔn.” 47Sinmɔ́ɔ kpó yě kpó ɖó gbe kpɔ́, lobo ɖó ahwan ɔ́ te. Lo ɔ́, é nya yě sín toxo ɔ́ mɛ lobo slá wǔ nú xwé é gbe nǔmɛsɛn ɖe lɛ́ɛ é. Énɛ́ gúdo ɔ́, é kpódó sɔ́ja tɔn lɛ́ɛ kpó zɔn han mɛ, Mawu kpikpa mɛ dó byɔ́ Gazaláa. 48Nǔ e dɔn to ɔ́ kwíji lɛ́ɛ é ɔ́, é sú bǐ sín kún dó lobo fɔ mɛ e ɖo gbejí nú Mawusɛ́n lɛ́ɛ é d'é mɛ. É cyɔ́n alɔ Gazaláa jí titewungbe, lobo sá xwé ɖokpó ɖó fínɛ́.
49Mɛ e ɖo toxo nukúnɖéjí Jeluzalɛ́mu tɔn mɛ lɛ́ɛ é ɔ́, káká jɛ fínɛ́ ɔ́, yě sixú tɔ́n wá toxo mɛ, bó ná xɔ nǔ alǒ bó ná sa nǔ ɖěbǔ ɖo gbě ɔ́ jí ǎ. Yě nɔ xovɛ́ káká bɔ mɛ gěgé kú ɖo yě mɛ. 50Yě sa vo nú Sinmɔ́ɔ ɖɔ é ní nyɔ́ xomɛ dó émí wú. Bɔ Sinmɔ́ɔ ka yí gbe. É ɖe yě sín toxo nukúnɖéjí ɔ́ mɛ, lobo slá wǔ ná. 51Jwifu lɛ́ɛ byɔ́ toxo ɖaxó ɔ́ mɛ ɖo azǎn ko nukún atɔn sun wegɔ́ ɔ́ e ɖo xwe kɛnnɛ wǒ-ɖokpógɔ́ (171) ɔ́ mɛ é gbe. Děma wɛ ɖo alɔ yětɔn mɛ, bɔ yě ɖo Mawu mlá wɛ. Yě ɖo mɛ mlá dó han mɛ wɛ, bɔ han ɖěvo lɛ́ɛ ɖo nǔ ɖɔ dó han jí nú mɛ wɛ hwɛncɛnhwɛncɛn. Nǔgbó wɛ, è ɖu ɖo kɛntɔ́ ɖaxó ɖokpó jí, lobo nya ɛ sín Izlayɛ́li to ɔ́ mɛ. 52Sinmɔ́ɔ wá ɖe gbetakɛ́n tɔ́n ɖɔ émí ná nɔ flín azǎn énɛ́ ɔ́ xwewú xwewú, bó ná nɔ wa nǔ tɔn kpódó awǎjijɛ kpó. É cyɔ́n alɔ Sinsɛnxɔ só e ɖo toxo nukúnɖéjí ɔ́ kpá é jí titewungbe, lobɔ é kpódó sɔ́ja tɔn lɛ́ɛ kpó jɛ agban ɖó fínɛ́. 53Sinmɔ́ɔ mɔ ɖɔ vǐ émítɔn Jǎan ko su lo. É sɔ́ ɛ ɖó ahwangɔnu tɔn nu. Jǎan cí Gazaláa fínɛ́.
Currently Selected:
1 Makabée 13: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.