1 Makabée 12
12
Jonatáan lɛ vɔ́ alɛ e é nu xá Hlɔ̌manu lɛ́ɛ kpódó Sipaatinu lɛ́ɛ kpó e nu
1Jonatáan mɔ ɖɔ ninɔmɛ ɔ́ nyɔ́ nú émí. É wá cyán wɛnsagun ɖé lɛ́ɛ, bó sɛ́ dó Hlɔ̌ma. Yě ɖó ná dó zǒgbé alɛ e é nu xá Hlɔ̌manu lɛ́ɛ e jí, lobo ná lɛ́ vɔ́ nu.
2É sɛ́ wěma dó Sipaati kpódó fí ɖé fí ɖé lɛ́ɛ kpó ɖó linlin ɖokpó ɔ́ tamɛ.
3Mɛsɛ́dó lɛ́ɛ yi Hlɔ̌ma. Dɔ̌n jijɛ yětɔn ɔ́, yě byɔ́ Senati. Yě yí xó bó ɖɔ: “Vɔ̌sánú-xwlémawutɔ́ ɖaxó Jonatáan kpó akɔta Jwifu lɛ́ɛ tɔn kpó wɛ sɛ́ mǐ dó nú mǐ ná lɛ́ vɔ́ xɔ́ntɔn nyínyí sín akɔ e mi ko jɛ xá yě é jɛ, lobo ná jɛ mi jí.”
4Senati mɛ lɛ́ɛ ná wěma yě nú acɛkpikpa to e yě ná xo zlɛ́ lɛ́ɛ é tɔ́n. Yě byɔ́ yě ɖɔ yě ní cyɔ́n alɔ yě jí káká nú yě ní lɛ́ kɔ yi Judáa.
5Wěma e Jonatáan wlán sɛ́ dó Sipaatinu lɛ́ɛ é ɖíe: 6“Vɔ̌sánú-xwlémawutɔ́ ɖaxó Jonatáan, kplékplé mɛxó akɔta ɔ́ tɔn lɛ́ɛ, vɔ̌sánú-xwlémawutɔ́ lɛ́ɛ kpódó mɛ kpikpotɔ́ Jwifu lɛ́ɛ tɔn kpó ɖɔ nǔ dó nɔví Sipaatinu lɛ́ɛ. 7É kó lín din, bɔ vɔ̌sánú-xwlémawutɔ́ mitɔn ɖaxó Oniyási mɔ wěma Aleyiɔsu, axɔ́sú mitɔn tɔn. É ɖɔ d'é mɛ ɖɔ nɔví mǐtɔn wɛ mi nyí, wěma nɛ́ ɔ́ ɖé xlɛ́. 8Alɔ gblogblo wɛ Oniyási kɛ bo dó yí mɛsɛ́dó mitɔn. É yí gbe nú wěma e ɖɔ xɔ́ntɔn nyínyí kpó gbekplí gbekplí ɖó xá mi kpó wú é. 9Wěma mímɛ́ e ɖo mǐ sí lɛ́ɛ é nɔ́ dó alɔ mǐ ɖo gbɛzínzánlinu, bɔ é sɔ́ ɖo dandan mɛ nú mǐ ná wá yí ɖo alɔ dó wěma mɔ̌hunkɔtɔn lɛ́ɛ mɛ wɛ ǎ. 10É ɖo mɔ̌ có, mǐ jló, bónú gbɔn wɛn élɔ́ jí ɔ́, nɔví kan e blá mi kpó mǐ kpó é ɔ́ ní lɛ́ syɛ́n d'é jí, ɖó mǐ jló ná húzú jǒnɔ nú mi ǎ. Nǔgbó wɛ, mɛsɛ́dó mitɔn wá mǐ gɔ́n din ɔ́ xwe tɔn ko sɛ yi. 11Mǐ nɔ flín mi tɛgbɛ ɖo xwe ɖaxó lɛ́ɛ, vɔ̌sísá hwenu tawun tawun ɖé lɛ́ɛ kpódó vo sa nú Mawu hwenu lɛ́ɛ kpó. Ɛɛn, é nyɔ́, bó sɔgbe ɖɔ è ni nɔ flín nɔví mɛ tɔn lɛ́ɛ. 12Ninɔmɛ mitɔn lɔ nɔ dó xomɛhunhun nú mǐ. 13Mǐdɛɛ lɛ́ɛ mǐ mɔ nyladó kpódó ahwan kpó, bɔ é sukpɔ́ ɖo gbɛ mǐtɔn mɛ, ɖó axɔ́sú é lɛ́ dó mǐ lɛ́ɛ húzú kpan ta mǐ, lobo li za xá mǐ ɖésú. 14Mǐ ba nú agban mǐtɔn ní kpɛn mi ǎ; mǐ ka ba nú é kpɛn mɛmɔgbɔ mǐtɔn lɛ́ɛ kpódó xɔ́ntɔn mǐtɔn lɛ́ɛ lɔ kpó ɖo ahwanfunfun nɛ́ lɛ́ɛ mɛ ǎ. 15Nǔgbó wɛ, Mawu wú wɛ mǐ gǎn jɛ, bɔ é wá dó alɔ mǐ. É wɛ hwlɛ́n mǐ ɖo kɛntɔ́ mǐtɔn lɛ́ɛ sí, lobo dó winnyá yě.
16“Nǔ e wú mǐ ɖe nyǐ Numɛniwúsi, Antiyokúsi ví ɔ́, kpódó Antipatɛ́ɛ, Jazɔ́ɔn ví ɔ́ kpó é nɛ́. Mǐ sɛ́ yě dó Hlɔ̌manu lɛ́ɛ gɔ́n nú yě ná yi vɔ́ xɔ́ntɔn sín alɛ e mǐ kó nu xá yě xóxó ɖ'ayǐ é nu, lobo nú mǐ ná húzú mɛ ɖokpó. 17Mǐ lɛ́ zɔ́n wɛndótɔ́ mǐtɔn lɛ́ɛ ɖɔ yě ní wá mi gɔ́n. Yě ɖó ná dó gbe mi, lobo ka ná sɔ́ wěma e mɛ mǐ ɖɔ dó ɖɔ nɔví kan e ɖo mǐ kpó mi kpó tɛ́ntin é ɖó ná lɛ́ syɛ́n d'é jí é nú mi. 18Hǔn, mǐ ɖo byɔ̌byɔ́ mi wɛ ɖɔ mi ni ɖɔ xó ɖé dó ali nɛ́ ɔ́ nu nú mǐ.”
19Wěma e Aliyɔ́su sɛ́ dó Oniyási xóxó ɖ'ayǐ ɔ́ ɖíe: 20“Aliyɔ́su, Sipaatinu lɛ́ɛ sín axɔ́sú ɔ́ ɖɔ nǔ dó vɔ̌sánú-xwlémawutɔ́ ɖaxó Oniyási.” 21Mǐ mɔ nǔwlánwlán ɖé bɔ é kan Sipaatinu lɛ́ɛ kpó Jwifu lɛ́ɛ kpó. É ɖe xlɛ́ ɖɔ nɔví wɛ yě nyí, lobɔ yě mɛ we lɛ́ɛ bǐ ka tɔ́n sín Ablaxámu hɛ̌nnu mɛ. 22Din e mǐ se xó nɛ́ é ɔ́, mǐ ɖo vo sa nú mi wɛ ɖɔ mi ní wlán wěma, bó ɖɔ lě e mi ɖe gbɔn é sɛ́ dó mǐ. 23Mǐdɛɛ lɛ́ɛ ɔ́, mǐ hɛn ɔ́ mǐ ná ɖɔ xó élɔ́ sɛ́ dó mi: “Mi ní mɔ gbɔ̌hwan mǐtɔn kpó nyɔ̌ná mǐtɔn bǐ kpó ɖi mitɔn wɛ yě nyí ɖɔhun, bɔ mǐ lɔ ná mɔ mitɔn lɛ́ɛ dó mɔ mǐtɔn. Nǔ e wú wɛ mǐ zɔ́n wɛnsagun mǐtɔn lɛ́ɛ ɖɔ yě ní wá mi gɔ́n lobo ɖe linlin mǐtɔn lɛ́ɛ xlɛ́ mi é nɛ́.”
Ahwangɔnu Dɛmɛtliwúsi wegɔ́ ɔ́ tɔn hɔn ɖo Jonatáan nukɔn
24Jonatáan se wɛn élɔ́: Ahwangán Dɛmɛtliwúsi tɔn lɛ́ɛ lɛ́ kɔ jǎwe bó ná fun ahwan xá ɛ kpó ahwangɔnu wɔ̌buwɔ́bú ɖé kpó, yě sukpɔ́ hú nukɔntɔn ɔ́. 25Tlóló ɔ́ Jonatáan tɔ́n sín Jeluzalɛ́mu bo yi kpé yě ɖo Hamati gbejí. Nǔgbó ɔ́, é ba nú yě ni mɔ ali dó byɔ́ to tɔn mɛ ǎ. 26É nyi nǔdobatɔ́ lɛ́ɛ sɛ́ dó agbanjɛtɛn yětɔn. Yě lɛ́ kɔ wa ɖɔ n'i ɖɔ kɛntɔ́ lɛ́ɛ ɖo nǔ sɔ́ wɛ, bó ná wá fyán ɛ zǎn mɛ. 27Ée hwe wá yi xɔ e ɔ́, Jonatáan ɖɔ nú mɛ tɔn lɛ́ɛ ɖɔ yě ni nɔ wunzɛn. Yě ɖó ná ɖo gbesisɔ mɛ, bó ná li za ɖo zǎn ɔ́ bǐ mɛ. É bɛ́ mɛcɔ́tɔ́ lɛ́ɛ lɛ́ lɛ̌ dó agbanjɛtɛn ɔ́ bǐ. 28Ée kɛntɔ́ lɛ́ɛ se ɖɔ Jonatáan kpó mɛ tɔn lɛ́ɛ kpó ɖo gbesisɔ mɛ, bó ná fun ahwan e ɔ́, xɛsi jɛ yě jí. Ée xɛsi jɛ yě jí mɔ̌ e ɔ́, yě bɔ zo dó agbanjɛtɛn yětɔn ɔ́ lobo hɔn yi. 29Ayǐhɔ́ngbe tɔn zǎnzǎn wɛ Jonatáan kpó ahwangɔnu tɔn kpó wá mɔ ɖɔ yě kó yi. Nǔgbó wɛ zo ɔ́ kpo ɖo títá ɖo agbanjɛtɛn ɔ́, bɔ yě ɖo mi mɔ wɛ. 30Jonatáan jɛ túnnu yětɔn, lo ɔ́ é ká kpé wú bó wlí yě ǎ, ɖó yě d'asá Eletɛ́ɛ tɔ ɔ́.
31Jonatáan húzú kpan ta Alabu sín kúnkan ɖé, bɔ è nɔ ylɔ́ ɖɔ Zabadéenu lɛ́ɛ. É xo yě lobo bɛ́ dɔkun yětɔn lɛ́ɛ bǐ. 32Énɛ́ gúdo ɔ́, é bɛ́ mɛ tɔn lɛ́ɛ, bɔ yě ɖidó Damási, gbě ɔ́ jí bǐ wɛ yě gbɔn bó dín.
33Sinmɔ́ɔ éyɛ́ ɔ́, é sɔ́ ali, bo zun zɔnlin káká wá Asikalɔ́ɔn kpódó ahohó é bɔ d'é wú lɛ́ɛ kpó. Fínɛ́ gosín tɔn ɔ́, é tunta Jopée, lobo jínjɔ́n toxo ɔ́ mɛ. 34É wá se ɖɔ to ɔ́ mɛ nu lɛ́ɛ jló ná zé ahohó nɛ́ ɔ́ nú sɔ́ja Dɛmɛtliwúsi tɔn lɛ́ɛ. Éyɛ́ ka wá bɛ́ sɔ́ja éyɛ́ tɔn lɛ́ɛ ɖó fínɛ́, nú yě ná cɔ́ ahohó ɔ́.
Jonatáan jló ná cyɔ́n alɔ Jeluzalɛ́mu to ɔ́ jí
35Hwenu e Jonatáan lɛ́ kɔ wá Jeluzalɛ́mu é ɔ́, é ɖó kplé ɖaxó ɖé nú tomɛxó lɛ́ɛ. É kpódó yě kpó nɔ kpɔ́, bó sí te d'é jí ɖɔ yě ná mɛ ahohó lɛ́ lɛ̌ dó Judée to ɔ́. 36É lɛ́ sí te d'é jí ɖɔ è nǎ mɛ Jeluzalɛ́mu sín dǒ lɛ́ɛ d'é nu, lobo ná mɛ dǒ ɖaxó ɖé dó gbo toxo nukúnɖéjí ɔ́ kpó toxo ɔ́ kpó. É jló ɖɔ ahwangɔnu Dɛmɛtliwúsi tɔn ní nɔ toxo nukúnɖéjí ɔ́ mɛ dɔ̌n kɛ́ɖɛ́. É sɔ́ ba nú yě xɔ nǔ abǐ yě sa nǔ ɖěbǔ ǎ. 37Toví lɛ́ɛ kplé bó vɔ́ Jeluzalɛ́mu toxo ɔ́ bló. Nǔgbó wɛ, dǒ e ɖo zǎnzǎnhwe jí nú toxo ɔ́, bó ká ɖo tɔgbado ɔ́ sín alɔxwé é ɔ́ mu ɖo akpá ɖokpó xwé. Yě lɛ́ vɔ́ slá e è nɔ ylɔ́ ɖɔ Kafenata é lɔ bló ɖó. 38Sinmɔ́ɔ vɔ́ Adida toxo ɔ́ bló. Adida toxo ɔ́ ɖo do nú to ɔ́. É mɛ dǒ lɛ́ lɛ̌ dó, lobo dó hɔn kpó cávi kpó ná.
Jonatáan jɛ kɛntɔ́ tɔn lɛ́ɛ sín alɔ mɛ
39Tlifɔ́ɔn ba na nɔ Azíi to ɔ́ nu, lobo ná ɖu gǎn ɖ'é nu. É jló ná wlí Antiyokúsi ayizɛ́ngɔ́ ɔ́. 40Lo ɔ́, xɛsi ɖi i, ɖó Jonatáan sixú wá jɛ nǔ mɛ n'i, lobo tɔ́n ahwan ɛ. Tlifɔ́ɔn jɛ wě ɖe jí bó ná wlí Jonatáan, lobo ná hu i. É sɔ́ nǔ bó ɖidó Bɛtisani. 41Jonatáan sɔ́ nǔ bó ɖidó kpíkpé e gbé, é kpódó sɔ́ja téwúngbéjú adɔ̌kpo we (40.000) kpó. É lɔmɔ̌ wá Bɛtisani. 42Ée Tlifɔ́ɔn mɔ ɖɔ ahwangɔnu wɔ̌buwɔ́bú ɖé wɛ kplá Jonatáan é ɔ́, é sɔ́ ba ná wlí i gǎnnugǎnnu ǎ. 43É nyɔ́ wa ɔ́, é lɛ́ yí i kpódó susu ɖaxó ɖé kpó lobo ná ɛ nǔ. É sɔ́ ɛ xlɛ́ xɔ́ntɔn tɔn lɛ́ɛ bǐ, lobo ɖɔ nú yě káká jɛ ahwangɔnu tɔn ɖésú jí ɖɔ yě ni se tónú n'i ɖi émí wɛ ɖɔhun. 44Énɛ́ gúdo ɔ́, é ɖɔ nú Jonatáan ɖɔ: “Étɛ́wú wɛ a dó ya nú ahwangɔnu élɔ́ sɔ mɔ̌? Ahwanxó ɖé kan mǐ ǎ. 45Bo nyi sɔ́ja towe lɛ́ɛ sɛ́ dó to yětɔn mɛ. Ba gbɛtɔ́ kwín we ɖé nú yě ni nɔ kpɔ́ xá we, lobo nú a ni xwedó mì, nú mǐ ná yi Putolemayísi. Un na sɔ́ toxo nɛ́ ɔ́ kpó zungbó ɖé lɛ́ɛ káká jɛ ahwangɔnu lɛ́ɛ kpó axɔ́súzɔ́watɔ́ e kpo ɖo fínɛ́ lɛ́ɛ é bǐ kpó dó alɔ mɛ nú we. Nǔ e wú un wá Bɛtisani e nɛ́. Énɛ́ gúdo ɔ́, un na yi to ce mɛ.”
46Jonatáan ɖeji dó Tlifɔ́ɔn wú, lobo bló lě e é ɖɔ gbɔn é. É nyi ahwangɔnu tɔn lɛ́ɛ sɛ́ dó Judáa. 47É ɖó alɔ sɔ́ja afɔwó-afatɔ́n (3.000) jí. É zé afɔwó (2.000) ɖó Galilée, bɔ afatɔ́n (1.000) e kpo ɔ́ cí é ɖésúnɔ gɔ́n. 48Jonatáan ná byɔ́ Putolemayísi lě kɛ́ɖɛ́ ɔ́, hɔn jɛ́n toxo ɔ́ mɛ nu lɛ́ɛ sú dó e. Yě wlí i, bo hu mɛ e byɔ́ to ɔ́ mɛ xá ɛ lɛ́ɛ bǐ ɖó jǐví wú. 49Tlifɔ́ɔn sɛ́ sɔ́ja afɔzɔntɔ́ lɛ́ɛ kpó sɔ́xátɔ́ lɛ́ɛ kpó dó Galilée kpó tɔgbado ɖaxó ɔ́ mɛ kpó bó ná hu sɔ́ja tɔn lɛ́ɛ bǐ. 50Mɛ élɔ́ lɛ́ɛ mɔ jɛ mɛ ɖɔ alɔ jɛ vɔ̌sánú-xwlémawutɔ́ ɖaxó ɔ́ wú, bɔ è hu é kpódó mɛ tɔn lɛ́ɛ bǐ kpó. Nǔ ká ɖo mɔ̌ có, yě nɔ́ ná akɔ́nkpinkpan yěɖée. Yě zɔn kpɔ́ bó ɖo yiyi wɛ mɛɖé bɔdó ɖě wú; yě sɔgbe nú ahwanfunfun. 51Mɛ e ɖo yě nya wɛ lɛ́ɛ mɔ ɖɔ yě ɖo gbesisɔ mɛ bó ná fun ahwan dó hwlɛ́n gbɛ yětɔn gán. Bɔ yě sɔ́ ali bó wá yi. 52Sɔ́ja Jwifu lɛ́ɛ tɔn lɛ́ kɔ wá Judée yíkúngban jí wǔɖíɖí aji ɖɔhun. Yě dó gbɛvíhan, bó ya avǐ dó Jonatáan kpódó mɛ tɔn lɛ́ɛ kpó tamɛ, xɛsi ɖi yě tawun. Togun Izlayɛ́li tɔn ɔ́ bǐ nɔ aluwɛ ɖaxó ɖé mɛ. 53Mɛ e ɖo awa yětɔn jí lɛ́ɛ é ba ná sú Jwifu lɛ́ɛ sín kún dó. Mɛ nɛ́ lɛ́ɛ ɖɔ: “Jwifu lɛ́ɛ sɔ́ ɖó gǎn ɖěbǔ ǎ, yě ká sɔ́ lɛ́ ɖó mɛɖé bɔ é ná dó alɔ yě ǎ. Mi nú mǐ ná yi tɔ́n ahwan yě lobo hu yě. Énɛ́ ɔ́, mɛ ɖěbǔ sɔ́ ná flín yě ɖo ayǐkúngban jí ǎ.”
Currently Selected:
1 Makabée 12: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.