1 Makabée 11
11
Ejípu xɔ́sú Putolemɛ́ɛ ayizɛ́ngɔ́ ɔ́ ɖu ɖo Alɛsándlu Balasi jí
1Putolemɛ́ɛ, Ejípu xɔ́sú ɔ́, xo tɔjíhún gěgé kpódó sɔ́ja gěgé kpán kplé wɔɖɔɖɔ kɔ́kwín e ɖo xuta é ɖɔhun. É ɖo biba wɛ kpó ayi sísɛ́ kpán ná yí Alɛsándlu to ɔ́ dó étɔn jí. 2É yi Silíi tomɛ kpódó gbe fífá kpán. To ɔ́ mɛ nu lɛ́ɛ hun to ɔ́ sín hɔn nyi wɛn n'i, bó wá kpé e. Nǔgbó ɔ́, axɔ́sú Alɛsándlu ɔ́ ɖe gbe ɖɔ è ni yi i, ɖó Putolemɛ́ɛ ɔ́, asi tɔn tɔ́ wɛ. 3Ée éyɛ́ byɔ́ to ɔ́ mɛ lě tlóló é ɔ́, é fɔ agbǒcɔ́tɔ́ tɔn lɛ́ɛ ɖ'ayǐ. 4Asidɔ́di to ɔ́ mɛ byɔ̌byɔ́ tɔn lě ɔ́, mɛ lɛ́ɛ xlɛ́ ɛ ɖɛxɔ Dagɔ́ni tɔn e è dǒ zo é, to ɔ́ kpódó nǔ e lɛ́ dó é bɔ é hɛn gblé lɛ́ɛ kpó; cyɔ e é sɔ́ nyi gbě gbɔn fí bǐ lɛ́ɛ kpódó wǔjɔnú mɛ e é dó zo ɖo ahwan hwenu lɛ́ɛ é tɔn kpó: nǔgbó ɔ́, è bɛ̌ ɖě dó ɖě jí ɖo fí e axɔ́sú ɔ́ ɖó ná gbɔn é. 5Yě wlí nǔ e Jonatáan wa lɛ́ɛ e ɖɔ nú Putolemɛ́ɛ, nú é ná kɛ nu d'é wú n'i, lo ɔ́, axɔ́sú ɔ́ ka kɛ nu ɖěbǔ d'é wú ǎ. 6Jonatáan yi kpé axɔ́sú ɔ́ kpódó susu ɖaxó kpán ɖo Jopée. Yě dó doo nú yěɖée lobo ka dɔ́ toxo nɛ́ ɔ́ mɛ. 7Jonatáan kpódó axɔ́sú ɔ́ kpán hun káká yi tɔsisa e gbo Libáan kpódó Silíi e kpán ɖo totaligbé é kɔn. Énɛ́ gúdo ɔ́, é lɛ́ kɔ wá Jeluzalɛ́mu. 8Putolemɛ́ɛ ɔ́, éyɛ́ klá jɛ toxo lɛ́ɛ bǐ nu káká yi Selesíi tɔ jí ɖo xutó. É gbɛ́ kpo ɖo nǔ nyanya lin dó Alɛsándlu wú wɛ.
9É sɛ́ wɛnsagun dó axɔ́sú Dɛmɛtliwúsi. Xó e é ɖɔ ɔ́ ka ɖíe: “Wǎ fí. Mǐ na ɖɔ xó gbe kplí gbe kplí. Un na sɔ́ vǐ ce Kleopatlu e húzú Alɛsándlu sín asi é ná we, bɔ a na nɔ axɔ́súɖuto tɔ́ towe tɔn nu. 10Vǐ ce e un sɔ́ da nú nya nɛ́ ɔ́ wá vɛ́ nú mì, ɖó é ɖo biba ná hu mì wɛ.” 11Putolemɛ́ɛ dó hwɛ Alɛsándlu mɔ̌, ɖó é jló ná yí axɔ́súɖuto tɔn sín así tɔn. 12É yí vǐ tɔn sín así tɔn, bó sɔ́ da nú Dɛmɛtliwúsi. É sɔ́ ba ná ɖó xó ɖé xá Alɛsándlu ǎ, bɔ yě jɛ kɛn. 13Putolemɛ́ɛ wá yi Antiyɔ́ci, é sɔ́ éɖée axɔ́sú Silíi ɖaxó ɔ́ tɔn. É cyɔ́n gǎngbákún we, Ejípu kpó Silíi ɖaxó ɔ́ tɔn kpán.
Kú Alɛsándlu kpó Putolemɛ́ɛ tɔn kpán
14Hwenɛ́nu ɔ́, axɔ́sú Alɛsándlu ɖo Silisíi, ɖó mɛ e ɖo awa nɛ́ ɔ́ jí lɛ́ɛ fɔ́n gǔ. 15É se nǔ e Putolemɛ́ɛ wa é. Hwenɛ́nu ɔ́, é wá kpé e bó ná fun ahwan xá ɛ. Lo ɔ́, ahwangɔnu syɛ́nsyɛ́n ɖé wɛ Putolemɛ́ɛ hɛn wá, lobo xo e. 16Alɛsándlu hɔn yi Alabíi, lobo hɔn hwlá cí fínɛ́, bɔ axɔ́sú Putolemɛ́ɛ ɖu ɖo ahwan ɔ́ jí. 17Alabu e è nɔ ylɔ́ ɖɔ Zabudiyɛ́li ɔ́ gbo ta Alɛsándlu, lobo sɛ́ dó Putolemɛ́ɛ. 18Lo ɔ́, é lɔmɔ̌ ka yá wǔ kú. Hwenɛ́nu ɔ́, to e ɖó gǎnjɛwú ganjí e mɛ nu lɛ́ɛ hu sɔ́ja Ejípunu e Putolemɛ́ɛ fɔ ɖó to nɛ́ ɔ́ mɛ lɛ́ɛ bǐ. 19Lě e Dɛmɛtliwúsi ɖu axɔ́sú gbɔn ɖo xwe kɛnnɛ tɛ́nwegɔ́ (167) ɔ́ mɛ gbɔn ɔ́ nɛ́.
Dɛmɛtliwúsi wegɔ́ ɔ́ dó alɔ wěma ɖé mɛ xá Jwifu lɛ́ɛ
20Hwenɛ́nu ɔ́, Jonatáan xo súnnu glegbenu Judée tɔn lɛ́ɛ kplé, bó ná yí Jeluzalɛ́mu to ɔ́. É zɔ́n bɔ è blǒ ahwanlyánnú gěgé, bó ná mɔ tɛn dó tɔ́n ahwan ɛ. 21Jwifu e ma sɔ́ ɖo sɛ́n gbejí ǎ, lobo gbɛ́ wǎn nú togun yětɔn lɛ́ɛ ɖé lɛ́ɛ wá mɔ Dɛmɛtliwúsi. Yě ɖɔ n'i ɖɔ Jonatáan ba ná tɔ́n ahwan to ɔ́. 22Ée Dɛmɛtliwúsi se mɔ̌ ɔ́, xomɛsin i. Tlóló ɔ́, é sɔ́ Putolemayísi nú. É sɛ́ wěma dó Jonatáan, lobo byɔ́ ɛ ɖɔ é ní ɖó ahwan ɔ́ te, lobo yá wǔ wá mɔ émí ɖo Putolemayísi, nú yě ná ɖɔ xó ɖó kpɔ́. 23Ée Jonatáan yí wěma e ɔ́, é ɖe gbe ɖɔ è ni vlɔ́n kan dó zalili ɔ́ nu. É sɔ́ ta nyi gbě bó cyán Izlayɛ́li ví ɖé lɛ́ɛ kpódó vɔ̌sánú-xwlémawutɔ́ ɖé lɛ́ɛ kpán gɔ́ nú éɖée, lobo jɛ ali. 24É hɛn kpatágan, siká, avɔ kpódó agbankan gěgé kpán dó éɖée jí. É yi mɔ axɔ́sú ɔ́ ɖo Putolemayísi, é ka nyɔ́ xomɛ dó wǔ tɔn. 25Izlayɛ́li ví gbejímánɔtɔ́ lɛ́ɛ jɛ hwɛ dó é jí. 26Lo ɔ́, axɔ́sú ɔ́ nɔ xá ɛ lě e axɔ́sú ɖě lɛ́ɛ nɔ xá ɛ gbɔn é ɖɔhun, bɔ axɔ́sú ɔ́ ɖó wi ta n'i ɖo xɔ́ntɔn tɔn lɛ́ɛ bǐ nukún mɛ. 27É hɛn ɛ dó vɔ̌sánú-xwlémawutɔ́ ɖaxózɔ́ e é nɔ́ wa é mɛ; lobo lɛ́ ná ɛ acɛ e é ko ɖó ɖ'ayǐ lɛ́ɛ bǐ. É lɛ́ sɔ́ kɛ́n tɔn dó axɔ́sú ɔ́ sín xɔ́ntɔn nukɔntɔn lɛ́ɛ mɛ.
28Jonatáan byɔ́ axɔ́sú ɔ́ ɖɔ Judée kpódó tota atɔn Samalíi tɔn lɛ́ɛ kpó kún sɔ́ ná nɔ sú takwɛ́ hwɛhwɛ ó. É dó kpatágan děgba we kanwe ko (8.100) jɛjí sín akpá n'i ɖo tɛn tɔn mɛ. 29Axɔ́sú ɔ́ yí gbe ná, lobo wlán wěma ɖokpó nú Jonatáan dó nǔ énɛ́ lɛ́ɛ bǐ jí. Nǔ e é ɖɔ é ɖíe: 30“Axɔ́sú Dɛmɛtliwúsi dó gbe nɔví tɔn Jonatáan kpódó akɔta Jwifu lɛ́ɛ tɔn kpó. 31Mǐ sɛ́ wěma e mǐ wlán dó mi wú é dó Lasitɛ́ni e nyí mɛ ɖokpó ɖo axɔ́sú ɔ́ sín mɛ lɛ́ɛ mɛ é. Mi hɛn ɔ́ mi ná xa.” 32Axɔ́sú Dɛmɛtliwúsi dó gbe sɛ́ dó tɔ́ tɔn Lasitɛ́ni lɔ. 33Un jló ná wa ɖagbe nú akɔta Jwifu lɛ́ɛ tɔn, ɖó gbejí e yě nɔ́ nú mì é wú. Jwifu lɛ́ɛ ɔ́, xɔ́ntɔn mǐtɔn wɛ yě nyí lobɔ yě nɔ́ wa azɔ̌ e yě ɖó ná nɔ́ wa nú mì lɛ́ɛ bǐ. 34 Hǔn, un ɖǒ acɛ e yě ɖó dó Jwifu to kpódó tota atɔn, Afelema, Lida kpódó Hlamatayímu kpán sín to jí e ɖó te. Tota nɛ́ lɛ́ɛ kpódó nǔ e kan yě bǐ kpó wɛ è yí sín Samalíi sí. È bɛ̌ bǐ d'é jí nú Judée, ɖó mɛ e ná wá sá vɔ̌ ɖo Jeluzalɛ́mu lɛ́ɛ é wú. Bɛ́ sín din ɔ́, Jwifu lɛ́ɛ sɔ́ ná nɔ sú axɔ́ nú nǔ e nɔ tɔ́n sín ayǐkúngban lanmɛ lɛ́ɛ kpódó atínsínsɛ́n e un nɔ yí ɖo yě sí xwewú xwewú é kpó ɖě ǎ. 35Un lɛ́ ɖe ɖɛ yě sín takwɛ́ ɖě lɛ́ɛ e yě ɖu dó mǐ é ɔ́ bǐ sésé mɛ, ɖi mǎɖówǒ dɔkun yětɔn lɛ́ɛ tɔn, takwɛ́ kpaa lɛ́ɛ, akwɛ́ e yě ná dó jɛ wú é kpódó tokwɛ́ e nyí ce lɛ́ɛ é kpó ɖɔhun. 36Bɛ́ sín din ɔ́, ɖokpó gbetakɛ́n nɛ́ lɛ́ɛ tɔn sixú súnsún ǎ, lobɔ yě ká ɖó acɛ yětɔn káká yi tɛgbɛ gbe.
37Mi bo wlíbo nú wěma élɔ́ bó vɔ́ wlán bó sɔ́ jó nú Jonatáan. É ɖó ná sɔ́ ɖó jǐ agbawungba, ɖo Sinsɛnxɔ ɔ́ ta.
Jonatáan ná yi dó alɔ Dɛmɛtliwúsi wegɔ́ ɔ́ ɖo Antiyɔ́ci
38Axɔ́sú Dɛmɛtliwúsi mɔ ɖɔ to ɔ́ ɖo fífá mɛ ɖo alɔ émítɔn mɛ, lobɔ mɛ bǐ se tónú nú émí. É nya sɔ́ja tɔn lɛ́ɛ bǐ, bɔ mɛ ɖokpó ɖokpó yi xwé tɔn gbe. Nǔ ɖo mɔ̌ có sɔ́ja jǒnɔ e é yí ɖo tɔtɛ́ntinto mɛ lɛ́ɛ é ɔ́, é hɛn yědɛɛ lɛ́ɛ. Nǔ e wú wɛ ahwangɔnu e wa azɔ̌ ɖo axɔ́sú ɖě lɛ́ɛ glɔ́ cóbɔ éyɛ́ wá wá lɛ́ɛ é bǐ jɛ wǎn gbɛ́ n'i jí é nɛ́.
39Tlifɔ́ɔn e ɖo Alɛsándlu jí ɖ'ayǐ é mɔ ɖɔ ahwangɔnu lɛ́ɛ bǐ ɖo Dɛmɛtliwúsi sín nǔ ɖɔ wɛ. É wá yi mɔ Lamlikɔsu, Alabu e sín alɔ mɛ Antiyokúsi, vǐ kpɛví Alɛsándlu tɔn ɖe é. 40É byɔ́ ɛ ɖɔ é ní sɔ́ nyaví nɛ́ ɔ́ nú émí nú é ná ɖu axɔ́sú ɖo tɔ́ ɔ́ tɛnmɛ. Tlifɔ́ɔn ɖɔ gbetakɛ́n e Dɛmɛtliwúsi ɖe tɔ́n ɔ́ n'i. É lɛ́ ɖɔ ahwangɔnu tɔn lɛ́ɛ bǐ wɛ gbɛ́ wǎn nú axɔ́sú ɔ́. É nɔ Lamlikɔsu gɔ́n zaan.
41Jonatáan ɔ́ wa sɛ́ wɛn dó axɔ́sú Dɛmɛtliwúsi. É byɔ́ ɛ ɖɔ é ní ɖe sɔ́ja tɔn lɛ́ɛ sín Jeluzalɛ́mu toxo ɔ́ kpódó ahohó Judée tɔn lɛ́ɛ kpó mɛ, ɖó é ɖo ahwan fun xá Izlayɛ́li togun ɔ́ wɛ tɛgbɛ. 42Gbe e Dɛmɛtliwúsi yi nú Jonatáan e ɖíe: “Éeǒ, nǔ e a byɔ́ nú akɔta towe kpó hwi ɖésú kpó é kɛ́ɖɛ́ wɛ un na wa ǎ, lo ɔ́, un ná lɛ́ ɖó wi ta nú mi hwenu e un na kpé wú dó é. 43Din hwɛ ɔ́, nú a sigǎn sɛ́ sɔ́ja dó mì bɔ é ná wá jɛ ahwan jǐ ce ɔ́, é ná nyɔ́ káká, ɖó ahwangɔnu ce lɛ́ɛ bǐ wɛ fɔ́n gǔ dó jǐ ce.”
44Jonatáan kpɔ́n ahwanfuntɔ́ tɔn téwúngbéjú lɛ́ɛ mɛ, bó sɛ́ gbɛtɔ́ afɔwó-afatɔ́n (3.000) dó Antiyɔ́ci. Ée yě wǎ é ɔ́, é víví nú Dɛmɛtliwúsi káká. 45Toví adɔ̌kpo ayizɛ́n (120.000) wá kplé ɖo toxo ɔ́ tɛ́ntin. Yě jló ná hu axɔ́sú ɔ́. 46Dɛmɛtliwúsi hɔn hwlá dó hɔn ɔ́ mɛ, hwenu e mɛ lɛ́ɛ gba kpé ali lɛ́ɛ jí, bɔ zalili bɛ́ é. 47Axɔ́sú ɔ́ byɔ́ alɔgɔ́ Jwifu lɛ́ɛ bɔ yě ká wá tlóló. Yě má yěɖée gbɔn toxo ɔ́ bǐ mɛ. Gbɛtɔ́ e yě hu gbe nɛ́ gbe é ɔ́, é hwe byɔ́, é yi adɔ̌kpo atɔ́ɔ́n (100.000) mɔ̌. 48Yě dó toxo ɔ́ zo, yě bɛ́ dɔkun gěgé yi, lobɔ axɔ́sú ɔ́ gán.
49Ée Antiyɔ́cinu lɛ́ɛ mɔ ɖɔ Jwifu lɛ́ɛ yí toxo ɔ́ lě e ba gbɔn wɛ yě ɖe é ɔ́, awakanmɛ kú yě. Yě yi dó kɛnklɛ́n nú axɔ́sú ɔ́ kpódó xósúsú ɖaxó kpó, bó ɖɔ: 50“Fá xomɛ dó mǐ wú. Ɖɔ nú Jwifu lɛ́ɛ nú yě ni ɖó za e li xá mǐ kpó toxo mǐtɔn kpó wɛ yě ɖe ɔ́ te.”
51Yě fɔ alyánnú yětɔn lɛ́ɛ kɔn nyi ayǐ, bó fá xomɛ dó axɔ́sú ɔ́ wú. Jwifu lɛ́ɛ xɔ susu taala ɖo axɔ́sú Dɛmɛtliwúsi sín nukún mɛ, lobɔ mɛ bǐ mɔ yě dó mɔ mɛjɔmɛ ɖo axɔ́súɖuto tɔn bǐ mɛ. Nǔ gěgé wɛ yě mɔ bó bɛ́ ɖo ahwan ɔ́ mɛ, bó bɛ́ yi Jeluzalɛ́mu. 52Acɛkpikpa axɔ́sú ɔ́ tɔn lɛ́ lí dǒ d'é jí, lobɔ to ɔ́ mɔ fífá ɖo hwetɔnnu. 53Amɔ̌, Dɛmɛtliwúsi ka ɖe akpá e é dó lɛ́ɛ é ɖěbǔ ǎ, lobo húzú Jonatáan sín kɛntɔ́. Nǔ e é wá n'i lɛ́ɛ é ɔ́ é sɔ́ tunwun n'i ɖěbǔ ǎ, lobɔ é lɛ́ hɛn ɛ gángán.
Jonatáan tɔ́n ahwan Dɛmɛtliwúsi lobo yi jɛ Antiyokúsi ayizɛ́ngɔ́ ɔ́ jí
54Ée nǔ nɛ́ lɛ́ɛ jɛ wá yi gǔdo é ɔ́, Tlifɔ́ɔn wá lɛ́ kɔ wá kpó Antiyokúsi kpó, yɔkpɔ́vú wɛ é ká nyí. É ɖo mɔ̌ có, é ɖu axɔ́sú lobo xwe gǎngbákún. 55Ahwangɔnu e Dɛmɛtliwúsi nya lɛ́ɛ é bǐ wá sɛ ta kplé lɛ́ dó Antiyokúsi. Yě lílɛ́ kpan ta Dɛmɛtliwúsi, bó ɖu ɖo jǐ tɔn, lobɔ é hɔn. 56Tlifɔ́ɔn fɔ ajinakú gelí e è nɔ dó fun ahwan ná lɛ́ɛ, lobo klá jɛ Antiyɔ́ci toxo ɔ́ nu.
57Dɔ̌nkpɛvú Antiyokúsi wlán wěma élɔ́ sɛ́ dó Jonatáan: “Un hɛn we ɖó vɔ̌sánú-xwlémawutɔ́ ɖaxózɔ́ towe mɛ. Un sɔ́ we ɖó tota ɛnɛ lɛ́ɛ nu; lobɔ un sɔ́ kɛ́n towe dó Axɔ́sú xɔ́ntɔn lɛ́ɛ mɛ.” 58É bɛ́ sikákɔ́gbɛ́n lɛ́ɛ kpódó nǔɖugbán lɛ́ɛ kpó sɛ́ dó é. É ná ɛ acɛ bɔ é ná nɔ nu sin ɖo sikákɔ́fu mɛ, bó ná nɔ dó nǔwamɛvɔ vɔvɔ kpódó sikáwuntun ɖokpó kpó. 59É sɔ́ Sinmɔ́ɔ, Jonatáan sín nɔví ɔ́, ahwangán ɖó ayǐ e ɖo só e è nɔ ylɔ́ ɖɔ sóklɛ́nmɛli é kpódó to e kpé dogbó xá Ejípu lɛ́ɛ tɛ́ntin é nu.
60Jonatáan jɛ ali lobo xo Silíi ɖaxó ɔ́ zlɛ́. É gosín toxo ɖě mɛ ɔ́ é nɔ yi ɖěvo mɛ. Ahwangɔnu Silíi tɔn lɛ́ɛ bǐ wá kplé lɛ́ lɛ̌ dó é, bó fun ahwan xá ɛ. Hwenu e é jɛ Asikalɔ́ɔn e ɔ́, toví lɛ́ɛ bǐ sésé wɛ tɔ́n, bó wá kpé e kpódó susu ɖaxó kpán. 61Ée é gosín fínɛ́ é ɔ́, é jɛ Gaza, to ɔ́ mɛ nu lɛ́ɛ ka sú agbǒ ɔ́ dó e. Hwenɛ́nu ɔ́, é tɔ́n ahwan ɛ, bó bɛ́ dɔkun tɔn lɛ́ɛ lobo dó fí e kó lɛ́ dó e lɛ́ɛ bǐ zo. 62Gazanu lɛ́ɛ wá sa vo nú Jonatáan, bɔ é gbɔ bó wá nyɔ́ xomɛ dó yě wú. É wlí gǎn yětɔn lɛ́ɛ sín vǐ ɖě lɛ́ɛ kannumɔ ɖɔhun sɛ́ dó Jeluzalɛ́mu. Énɛ́ gúdo ɔ́, é xo to ɔ́ zlɛ́ káká yi Damási.
63Jonatáan se ɖɔ ahwangán Dɛmɛtliwúsi tɔn lɛ́ɛ wá Kadɛ́si ɖo Galilée yíkúngban jí kpódó ahwangɔnu wɔ̌buwɔ́bú ɖé kpó bó ná dó flí azinkpo n'i. 64É yi kpé yě, lo ɔ́, é ka jó Sinmɔ́ɔ, nɔví tɔn ɔ́, nyi Judée. 65Sinmɔ́ɔ jɛ agban ɖó Bɛti-Súu nukɔn. É lɛ́ dó e, lobo li za xá ɛ titewungbe. 66To ɔ́ mɛ nu lɛ́ɛ wá mɔ ɛ, bó byɔ́ ɛ ɖɔ é ní nyɔ́ xomɛ dó émí wú, bɔ é yí gbe. Lo ɔ́, é nya yě sín toxo ɔ́ mɛ. É klá jɛ toxo ɔ́ nu, bɔ agbǒcɔ́tɔ́ lɛ́ɛ gbɔn toxo ɔ́ mɛ bǐ.
67Jonatáan kpó ahwangɔnu tɔn kpó jɛ agban dó Jenɛzalɛ́ti tɔ tó. Ayǐhɔ́ngbe tɔn ɔ́, yě fɔ́n zǎn, bó ɖó kɔ tɔgbado Asɔ́ɔ tɔn mɛ. 68Ahwangɔnu e ma mɔ yě gbɔ ǎ é wá kpé yě ɖo tɔgbado nɛ́ ɔ́ mɛ. Lo ɔ́, yě ɖó sɔ́ja sókan mɛ, nú yě ná mɔ tɛn dó zɔn Jonatáan jí ɖo ajijimɛ. Ahwangɔnu nɛ́ ɔ́ wá yí xwetɔ́n ɖo nukɔn tɔn. 69Hwenɛ́nu ɔ́, sɔ́ja e ɖo hwlǎhwlá lɛ́ɛ e tɔ́n, bó bɛ́ ahwanfunfun. 70Jonatáan sín sɔ́ja lɛ́ɛ bǐ hɔn yi. É sɔ́ kpo mɛ ɖokpó zɛ ahwangán tɔn we wú ǎ: Matatiyási, Abusalɔ́mu ví ɔ́, kpódó Judási, Kalufíi ví ɔ́ kpó. 71Hwenɛ́nu ɔ́, Jonatáan vún awu dó kɔ nú éɖée, é lɛ kɔ́ gbɔn ta bǐ, lobo jɛ vo sa jí. 72Énɛ́ gúdo ɔ́, é lɛ́ kɔ yi sozonu. É xo kɛntɔ́ lɛ́ɛ, bɔ yě bǐ hɔn. 73Ée sɔ́ja e hɔn lɛ́ɛ mɔ mɔ̌ e ɔ́, yě lɛ́ kɔ wá gɔ̌n tɔn, bɔ yě bǐ zun dó kɛntɔ́ lɛ́ɛ jí káká yi Kadɛ́si fí e yě jɛ agban ɖó é. Yě ɖésú jɛ fínɛ́. 74Kɛntɔ́ lɛ́ɛ sín mɛ afɔwó-afatɔ́n (3.000) mɔ̌ cí ahwan gbe nɛ́ gbe. Énɛ́ gúdo ɔ́, Jonatáan wá lɛ́ kɔ yi Jeluzalɛ́mu.
Currently Selected:
1 Makabée 11: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.