Roma ma 8

Sarya ge wan ndu ge ne Jeso Kris zi to

(Gal 3:13-14, 5:16-25)

1Ne se no ɗe, sarya a̰me ge wan nama ge ne Kris Jeso zi ma to bat. 2Ago eya ge O̰yom ne ge ne hon ndwara Kris Jeso zi zur mbi ya ne eya ge sone ne ma ne ge siya ne go. 3Kaŋ ge eya ne mbya ker na to bat, ago duur saŋge na taŋgay, Dok ke na: ne sone pe, teme na vya ya ge duur ge dimma ne duur ge naa ge sone ma ne zi ndwara zur nama ne sone go, go no kṵ sarya ge sone ge ne ke temel ne ndu dasana zi pal. 4Ne da pe wak honna ge eya ne wak wi ge nee ge ne ke mborra ne duur pal to, amma ge O̰yom zi ma pal.

5Ago nama ge a ne ke mborra duur pal ma, a é bama haŋgal kaŋ ge duur ne ma pal, amma nama ge a ne ke mborra O̰yom zi ma, a é bama haŋgal kaŋ ge O̰yom ne ma pal. 6Haŋgal eya kaŋ kerra ge duur ne ma pal, gene naa siya zi, amma haŋgal eya kaŋ kerra ge O̰yom ne ma pal, gene naa ndwara zi ne kat halas zi. 7Ago kaŋ kerra ge duur ne ma a ho̰l ne Dok, ne da pe duur gwan ne na pala eya ge Dok ne pe se to, na sḛ day to. 8Nama ge ne duur zi ma a ne pool ke Dok sḛ tuli to bat.

9Amma aŋ ɗe, aŋ ke mborra duur pal to, amma O̰yom zi, ne jo̰ O̰yom ge Dok ne ya aŋ zi. Kadɗa ndu ne O̰yom ge Kris ne to, na sḛ be na ne ne to. 10Kadɗa Kris ya aŋ zi, a fareba, aŋ sḛ duur mbo su ne sone pe. Amma ne jo̰ a hat aŋ ya dosol, O̰yom mbo e aŋ kat ne ndwara. 11Kadɗa O̰yom ge Bage ne tá̰ Jeso ne naa ge siya ma buwal zi digi ya aŋ zi, Bage ne tá̰ Kris Jeso ne naa ge siya ma buwal zi digi mbo hon aŋ sḛ duur ge suya ma ndwara ne na O̰yom ge aŋ zi ta.

12Go no, ná vya ma, nee da ne wul ne nee pal, amma a be wul ge duur ne ɗo, nee ba ga ke mborra duur pal to. 13Ago kadɗa aŋ ke mborra duur pal, aŋ mbo su. Amma kadɗa O̰yom zi, aŋ hun kaŋ kerra ge sḛ duur ne ma ya, aŋ mbo kat ne ndwara. 14Ago nama ge O̰yom ge Dok ne ne ɗame nama ma pet, a Dok vya ma ne. 15Aŋ be ame o̰yom ge saŋge aŋ mo̰r ɗo, aŋ ba ka sya vo to, amma aŋ ame O̰yom ge ne saŋge aŋ Dok vya ma, na ge ne e nee oyya go: «Abba, Báá!#Mar 14:36.» 16O̰yom mbe sḛ ke nee o̰yom kwarra go nee Dok vya ma ne. 17Kadɗa nee na vya ma ne, nee naa ge zam na joo ma ne. Nee naa ge zam Dok joo ma ne poseya dagre ne Kris. Kadɗa nee njot yál poseya ne na, nee mbo kat poseya ne na hormo ge na ne zi me#2Kor 4:17, 1Bit 4:13..

Hormo ge ne mbo mbo ya

(Yoh 10:27-30)

18Mbi dwat go yál njot ge nee ne ge zaman mbe no zi mbyat ne hormo ge Dok ne mbo dyan nee na ja to. 19Ago kaŋ dolla ma pet a da ne jobreya go dam ge Dok ne é na go ba dyan hormo ge na vya ma ne na mbo ya avun. 20Ago kaŋ dolla ma gwa̰ ne bama pala kaŋ ge baŋ yak ma pe se, a be laar ɓyareya ge nama ne zi to, amma a Dok sḛ gwa̰ ne nama pala nama pe se ne. Go no puy ɗe, jobreya ya go: 21Kaŋ dolla ma sḛ mbo ɓol zurra ne mo̰r ge kaŋ hubiya ne zi, ndwara wat suli ge hormo ge Dok vya ma ne zi. 22Nee da ne kwarra go, ne se no, kaŋ dolla ma pet a sun ta, a ka njot yál dimma ne gwale ge ne ke twala go. 23A be nama ɗeŋgo to, amma nee ge ne ame O̰yom ya ma dimma ne kaŋ wak ge zḛ ge ge Dok ne ke wak tuli go ma, nee sun ta me, swaga da̰re go Dok saŋge nee na vya ma go, na ho̰ nee zurra ge nee sḛ duur ma go me. 24Ago nee má ya go, amma a jobreya ne gale baŋ. Kaŋ ge ndu ne kwa na ne na ndwara, be gwan gá jobreya to. Kaŋ ge mo ne kwa na ne mo ndwara mo gwan jobre na jobre iya ɗaa? 25Amma kadɗa nee jobre kaŋ ge nee ne kwa na ne ndwara to, nee wan ta wan da̰re na.

26Uwale, O̰yom mbo ya mbar taŋgay ge nee ne, ago nee kwa ke kaɗeya ne na viya̰ go to, amma a O̰yom sḛ ke kaɗeya ne nee pe ne, ne fare ma ge nee ne mbya jan nama to. 27Na ge ne hale dulwak ma kwa kaŋ ge O̰yom ne kaɗe na kwa. Na sḛ kaɗe ne naa ge mbegeya ma pe laar ɓyareya ge Dok ne pal.

28Nee kwa kwa go kaŋ ma pet a det ya ke kwaɗa ne naa ge nama laar ne wa̰ Dok ma pe, ne nama ge na ne tó nama ya laar ɓyareya ge na ne zi ma pe. 29Ago nama ge ne tá nama zḛ tek ma, na sḛ vḭ tene ne pe eya ya day go nama ka dimma ca ne na Vya go, ne da pe na ka vya pul soy ge na ná vya ma ɓase ma ne. 30Nama ge na sḛ ne vḭ tene ne nama pe ne pe eya ya day ma, tó nama me, nama ge na sḛ ne tó nama ma me, há nama dosol, nama ge na sḛ ne há nama dosol ma, ho̰ nama hormo ge na ne.

Laar wanna ge Dok ne

31Nee gwan jan gyana ɗaa? Kadɗa Dok da ne nee ɗe, a wuɗi ke ho̰l ne nee ne ɗaa? 32Na ge ne mbege na vya ge na ne sḛ to, amma ya̰ na suya ne nee pe no pet, ke ma̰ pe gyana ba hon nee kaŋ ma pet ne na to ɗaa? 33A wuɗi mbo é fare naa ge Dok ne tá nama ma pal ne ɗaa? Dok sḛ bḛ nama ne. 34A wuɗi mbo wan nama ne fare ne ɗaa? A Jeso Kris ge ne su, a no ɗeŋgo to, tá̰ digi, ka ya Dok tok matoson pal, kaɗe ya go ne nee pe. 35A wuɗi mbo varse nee ne laar wanna ge Kris ne go ne ɗaa? A wak nonna, ko iigiya, ko yál kerra, ko kyamal, ko swala, ko banna wak, ko pore ɗaa? 36Dimma ne a ne njaŋge go:

«Ne mo pe, a gá ya hun i hun dam ne dam,

a gá ndil i dimma ne tame ge a ne vyan na go.»#Kmb 44:23.

37Amma kaŋ mbe ma no zi pet puy ɗe, nee naa ge ne há hal ma ne ne bage na laar ne wa̰ nee ta. 38Ago mbi da ne kwarra tyatyat go, ko siya, ko kat ne ndwara, ko maleka ma, ko gan ma, ko kaŋ ge ma̰ ma, ko kaŋ ge ne mbo mbo ya ma, ko pool ma, 39ko kaŋ ge ne digi ya ma, ko kaŋ ge ne suwar pe se ma, ko kaŋ dolla a̰me, ne pool ge varse nee ne laar wanna ge Dok ne, nee Bageyal Kris Jeso ne zi to bat.

Currently Selected:

Roma ma 8: FGN2013

Highlight

Copy

Compare