Roma ma 9
9
Talla ne sone kerra ge Israyela vya ma ne
(Gal 4:22-31)
1Mbi jan fare ge fareba Kris zi, mbi kun hale to, kwarra ge mbi ne zi, O̰yom ge mbegeya ŋgay mbi go mbi jan fare ge fareba. 2Mbi da ne iigiya ge be to, ne ŋgiɗim ge be aya ne mbi dulwak zi. 3Ɓyareya ge mbi ne, ago Dok vḛne na wak mbi pal, mbi varse ne Kris ne mbi ná vya ma pe, ne mbi hir ma le sḛ duur go, 4nama ge Israyela ma, nama ge Dok ne saŋge nama na vya ma, ne ho̰ nama hormo, ne wak tuli ma, ne eya, ne temel mo̰r kerra hon na, ne wak honna ma, 5ne bá ma, na ge Kris ne wá ne nama zi le duur go, na ge ne kaŋ ma pala digi pet, Dok ɓó uwareya ɗiŋnedin. A go!
6A be go fare ge Dok ne ba̰ na hamba ban to, ago nama ge ne wá ne hir ge Israyela ne zi ya ma pet, a be Israyela ma ne to. 7Uwale, Abraham hir ma pet, a be na vya ma ne to. A tó hir ge Isaku ne go na na hir ma ne ɗeŋgo. 8Na sḭ go: A be vya ma le duur go a kat Dok vya ma ne to, amma a vya ge ne tó wak tuli ge Dok ne zi ma, a isi nama go nama hir ma ne. 9Ndi fare ge wak tuli mbe ne no: «Swaga mbe go no tem, mbi mbo gwanna, Sara mbo tol vya#Pe 18:10..» 10A be no ɗeŋgo to, ke ne Rebeka go no me, na ge ne ɓo emel ne nee bá Isaku ta go, 11amma a gale ne be tolla to, a gale ne be ge ke kwaɗa ko sone to, ge go laar ɓyareya ge Dok ne ke talla go ɗe, 12na ge ne mbo ne temel kerra ta to, amma ne tolla ge na ne ta, jya̰ Rebeka go: «Ge ga̰l mbo ke ge jyale temel mo̰r.»#Pe 25:23. 13Dimma ne njaŋge go: «Mbi laar wa̰ Yakub, mbi kwane Isawu kwane#Mal 1:2-3..»
14Nee jya̰ gyana ɗaa? Dok dosol to ɗaa? A go to bat. 15Jya̰ Musa go: «Mbi ke kwaɗa ndu ge mbi ne ɓyare ke na kwaɗa, mbi kwa a̰se ndu ge mbi ne ɓyare kwa na a̰se#Wat 33:19..» 16No da ne laar ɓyareya, ko ne pool ge ndu ne ta to, amma ne kwaɗa kerra ge Dok ne ta. 17Ago njaŋgeya ma zi, Dok jya̰ Faraon go: «Mbi sḛ, mbi é mo ne go, mbi ŋgay pool ge mbi ne ne mo ta, mbi dḭl tó suwar pal pet me#Wat 9:16. .» 18Go no, kwa a̰se ndu ge na ne ɓyare kwa na a̰se, ka togre ndu ge na ne ɓyare togre na dulwak me.
Laar ol ne kwa a̰se ge Dok ne
19Mo da ne pool jan mbi go: «Dok gwan mḛre nee da ne ma fare pe ɗaa? A wuɗi pili tene ne na laar ɓyareya ne ɗaa?» 20Mo ndu dasana, mo wuɗi ne ge mo ba gage tene ne Dok ɗaa? Kaŋ ge a ne sḭ na sin da ne pool jan bage ne sḭ na go: «Mo te sḭ́ mbi go gyana ɗaa#Isa 29:16, 45:9.?» 21Bage sin il da ne pool na njiyal pal, ndwara go ne njiyal ge ɗu mbe, da ne pool sin kaŋ ne temel ge hormo pe, ko sin kaŋ may ne temel ge be hamba to pe me to’a#Irm 18:6.?
22Kadɗa Dok ɓyare ŋgay na pore, ne ŋgay pool ge na ne me, wa̰ tene kaal tata ge il ge na pore ne mbya det nama pal, ndwara burmi nama uzi ma ta. 23Amma ne ŋgay hormo ge na ne ge ɓaŋlaŋ ge il ge ne mbya ɓol kwa a̰se, nama ge ne nṵsi nama ne zḛ ya day ne hormo ge na ne pe ma, 24ndwara go, nee ge ne tó nee ya ma, a be ne Yuda ma buwal zi ya ɗeŋgo to, amma ne pehir ge ɗogle ma buwal zi ya me. 25Dimma ne jya̰ ne maktub ge Hosiya ne zi go:
«Nama ge ne ka mbi naa ma to,
mbi mbo tol nama mbi naa ma.
na ge mbi laar ne wa̰ na to,
mbi mbo tol na mbi ndu ge laar wanna#Hos 2:25, 2:1..
26Ge swaga ge a ne ka jan nama go:
‹aŋ be mbi naa ma ne to›,
swaga mbe go a mbo gá tol nama go
Dok ge ndwara vya ma.»
27Isaya me oy ne ka̰l ndaar Israyela pal go: «Ko Israyela vya ma isiya ka dimma ne kafeɗem ne maŋgaɗam ga̰l yuwam wak go go puy ɗe, a naa ge ne mbo gá ya ma mbut a mbo má ne baŋ#Isa 10:22-23.. 28Ago Bageyal mbo wi fare ge na ne jya̰ suwar pal wak ŋgat, avun cap.» 29Uwale, dimma ne Isaya ne waage dḛ zaŋgal go:
«Te go Bageyal, Bage naa ge mbal pore ma ne
ba ya̰ hir a̰me ma mbut to,
nee te ya kat dimma ne suwal Sodom go,
ko dimma ne suwal Gomor go.»#Isa 1:9.
Máya da ne hon fareba ta
(Rom 3:19-29, Gal 3:8-14,21-29)
30Nee jya̰ gyana ɗaa? Pehir ge ɗogle ma, nama ge a ne ka ɓyare kat dosol to ma, a ɓó dosol, na ge ne mbo ne hon fareba ta ya. 31Amma Israyela vya, nama ge ne ka ɓyare kat dosol ne eya ta ma, a be ɓol na ne eya ta to. 32Kyaɗa ɗaa? Ne da pe, a be ɓyare na da ne hon fareba ta to, amma ne temel kerra ma ta. A go no, a sya bama koo ne njal ge ne dol naa no, 33dimma ne a ne njaŋge go:
«Ndi, mbi é njal ge syal naa koo Siyona go,
njal ge dol naa.
Ndu ge ne hon fareba ya na ta,
saaso mbo ke na to bat#Isa 28:16..»
Currently Selected:
Roma ma 9: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
