Kaŋ mballa ma 89
89
Wak tuli ge mo ne ke ne Dawda ya da ɗaa
1Fare saareya ge Etan ge ne hir ge Ezra ne zi ne.
2Mbi mbo ka siya̰le kwa a̰se ge Bage ɗiŋnedin ne ma ɗaɗak,
doŋ pe ma ne doŋ pe ma, mbi wak mbo ka uware fareba ge na ne.
3Mbi jan go: Kwa a̰se ge na ne pe ɗù ɗur ɗiŋnedin,
mo ɗù mo fareba pe ya digi zi ya.
4Mbi ke wak tuli ne ndu ge mbi ne tá na,
mbi guni tene ne mbi dore Dawda pe go:
5«Mbi mbo e mo hir ma mo hool gan pal ɗiŋnedin,
mbi mbo ɗur mo hool gan pe se doŋ pe ma ne doŋ pe ma.» Ɗigliya.
6O Bage ɗiŋnedin, maleka ma ne digi a uware mo ne mo kaŋ ajab ge mo ne ke ma pe,
ɓase ge nama ne a uware fareba ge mo ne.
7O Bage ɗiŋnedin, digi zi ya, a wuɗi mbya ne mo go ne ɗaa?
Dok a̰me ge mbyat ne Bage ɗiŋnedin go to!
8Ge koteya ge naa ge mbegeya ma ne zi, o Dok, mo mbya naa sya mo vo,
mo hon naa vo ge ɓaŋlaŋ waɗe kaŋ ge ne ve mo se ma mwaɗak.
9O Bage ɗiŋnedin, Dok ge naa ge mbal pore ma ne,
a wuɗi pool dimma ne mo go ne ɗaa?
O Bage ɗiŋnedin, fareba ve mo ver zi!
10A mo wan jegreya ge maŋgaɗam ga̰l yuwam ne wak se ne,
swaga ge ne ɗage ne sḭḭl digi, a mo iyal na se ne.
11A mo ró kavaar ga̰l Rahab#89:11 Rahab: Ne maana ma zi, kavaar ga̰l Rahab a maŋgaɗam ga̰l yuwam. Swaga a̰me ma go a suwal Masar me. Kmb 87:4. pala ne,
ne pool ge mo ne, a mo ɓarse mo naa ge ho̰l ma se ne.
12Pḭr a mo ne ne, suwar a mo ne ne me,
a mo dó suwar ma ne na kaŋ ge ne na zi ma ne mwaɗak.
13Kuu ma ne mbii, a mo ke nama ne,
njal Tabor ma ne Hermon suwa̰le ne laar saal dḭl ge mo ne zi.
14Mo pool ge be to,
mo tok ndaar ge be to,
mo tok matoson a eya digi.
15Mo hool gan pe ɗù ya dosol ma ne fare ge jwap pal,
kwa a̰se ma ne fareba mbo ya mo ndwara zḛ.
16Naa ge ne kwa komre mo ma da ne laar saal!
Bage ɗiŋnedin, a mbo kwaya̰l ge mo ne zi.
17A kat da ne laar saal dam ne dam dḭl ge mo ne zi,
a uware bama pala dosol ge mo ne zi.
18Ago mo bage ne jegre nama pool ne.
Da ne mo pe, i pala her digi no.
19I ɓiyaar mbo da ne Bage ɗiŋnedin ta ya,
i gan da ne Bage mbegeya uzi hini cat ge Israyela ne ta ya.
20Dam a̰me ɗu mo jya̰ fare hon mo naa ge dosol ma daalam zi go:
«Mbi sya ndu ge pateya a̰me ko̰r,
mbi he bool a̰me ne na pehir ma buwal zi pala digi.
21Mbi ɓo mbi dore Dawda,
mbi ka̰ mbi num na pal no ndwara mbege na.
22A na ge mbi ba mbyale na,
a na ge mbi ba hon na pool.
23Na kon ge ho̰l ne pool mbo ya tan na tukcuk to,
ndu ge sone ne pool ge gwan ne na pala se to.
24Mbi mbo burmi na naa ge ho̰l ma na ndwara zḛ uzi,
Mbi mbo hun naa ge ne kwane na ma uzi.
25Fareba ge mbi ne ma, ne kwa a̰se ge mbi ne, a mbo kat ne na,
mbi mbo her na pala digi.
26Mbi mbo hon na pool ge maŋgaɗam ga̰l yuwam pal
ne maŋgaɗam#89:26 Swaga no pe wanna go na muluk mbo ɗage ne maŋgaɗam ga̰l yuwam wak ya ɗiŋ mbo maŋgaɗam Efrat wak ya. ma pal me.
27Na sḛ mbo tol mbi go: ‹Báá, mo Dok ge mbi ne, njal máya ge mbi ne!›
28Mbi me, mbi mbo hat na mbi vya pul soy,
mbo kat digi ya vew waɗe gan ge ne suwar pal ma pet#Daa 1:5..
29Mbi mbo koy kwa a̰se ge mbi ne na ta ɗiŋnedin,
mbi mbo koy mbi wak tuli cemet ne na me.
30Mbi mbo ka er na hir ma na hool gan pal,
na hool gan pe mbo ɗur se tek ge dam ma gale ne kale ne suwar pal.
31Kadɗa na hir ma saŋge mbi eya ma ya bama go̰r,
a gwan mbo mbi fare janna ma pal to,
32kadɗa a ndil mbi eya ma ya senna,
a koy mbi wak honna ma to,
33mbi mbo mḛre nama ne calaŋ ne nama ne yele mbi fare ma pala pe,
mbi mbo iyal nama ne nama ya̰l ma pe.
34Amma, ne na pe, mbi mbo dol kwa a̰se ge mbi ne uzi to,
mbi mbo vḛne wak tuli ge mbi ne uzi to me.
35mbi mbo yele wak tuli ge mbi ne pala to,
mbi mbo er fare ge ne ndage ne mbi wak zi to me.
36Ndwara ɗu kikit, mbi guni tene ne mbegeya uzi hini cat ge mbi ne go:
Mbi kun Dawda hale to bat.
37Na hir ma mbo kat ɗiŋnedin,
na hool muluk mbo kat mbi ndwara se dimma ne gyala go.
38Dimma ne saba go, kaŋ sayda ge ne pḭr digi,
a ŋgat na muluk pe mbo ɗur se ɗiŋnedin.» Ɗigliya.
39Amma mo ɗe, mo saŋge ndu ge mo ne mbege na mo go̰r,
mo ndi na kaŋ senna, mo saŋge pore na pal!
40Mo twacwage wak tuli ge mo ne ke ne mo dore mo koo zi,
mo do na balme suwar zi, mo há na seŋgre no.
41Mo zú na gulum ge ne ve na se ndwala ma no,
mo gu na gulum ga̰l se no.
42Naa ge ne kale ne viya̰ go ma pá na,
na naa ge gulum pala ma có ta ne na.
43Mo ho̰ na naa ge huur ma pool na pal,
mo ke na naa ge ho̰l ma sḛ tuli.
44Mo gwa̰ ne na kasagar na pal,
mo be mḛ na pe go pore zi to.
45Mo ba̰ hormo ge na ne,
mo dó na hool gan suwar zi uzi.
46Mo kṵ nama bool ma dam ma pe digi,
mo ka̰ saaso nama pal.
47O Bage ɗiŋnedin, mo mbo woy tene dḛ ɗiŋ ma swaga go ga ɗaa?
Mo mbo kat ne pore juliliya ɗiŋ ma swaga go ga ɗaa?
48Dwa ne mbi, kat ne ndwara ge mbi ne dunya zi a a̰me pe to!
Mo dó ndu dasana na ke dunya zi helo baŋ.
49A wuɗi kat dunya zi be ge suya to ne ɗaa?
A wuɗi má tene ne siya tok go ne ɗaa?
50Bageyal, kwa a̰se ge mo ne ge dḛ zaŋgal ya da ɗaa?
Guniya ge mo ne guni tene ne Dawda pe fareba ge mo ne zi ya da ɗaa?
51Bageyal, dwa ne sáso ge mo dore ma ne,
dwa ne ɓase ge gḛ ge mbi ne in nama dṵṵl mbe ma no.
52Bage ɗiŋnedin, mo naa ge ho̰l ma sal ndu ge mo ne mbege na,
a sen waktwara na pe go.
53Uwareya ne Bage ɗiŋnedin pe ɗiŋnedin!
O̰, na ka mbe go, na ka mbe go!
Currently Selected:
Kaŋ mballa ma 89: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
