Kaŋ mballa ma 88
88
Kaɗeya ge ndu ge ne siya wak go ne
1Kaŋ mballa. Kaŋ mballa ge Kore vya ma ne. Ne naa ge mbal kaŋ ma ga̰l pe: A ka sun gal na wak go. Fare saareya ge Heman ge ne hir ge Ezra ne zi ne.
2Bage ɗiŋnedin, Dok ge mbi ne, mbi bage máya,
Gyala, mbi tol mo,
ɗaal, mbi mbo ya mo ndwara se.
3Ya̰ mbi kaɗeya dé mo ndwara se ya!
Só mo togor, za̰ mbi fyaso!
4Yál mbyat mbi sḛ ya go!
Mbi det ja siya wak go!
5Mbi ya naa ge ne mbo taal zi ma buwal zi,
Mbi pool á ya kakaɗak.
6Mbi swaga fiya ya siya ma buwal zi,
dimma ne naa ge siya ma ne taal siya se go.
Mo gwan dwat nama pal to,
mo gwan ke a̰me ne nama pe to.
7Mo do mbi tuul se ya,
ge tṵ zi ya, tuul ge ɗugul helek se ya.
8Pore juliliya ge mo ne dé mbi pal,
mo sḭḭl somɗe mbi se ya. Ɗigliya.
9Mo caɗe mbi sele ma ne mbi ta uzi,
mbi saŋge kaŋ senna nama ndwara zi,
mbi gá ya teleya zi, mbi pool ge wat zum to.
10Mbi ndwara hubi ya ne fyaso.
Bage ɗiŋnedin, mbi tol mo dam ne dam,
mbi tyare mbi tok ma mo pe digi.
11Mo ke kaŋ ge ajab ma hon siya ma ɗaa?
Kḭḭm ma da ne pool tan digi uware mo ɗaa? Ɗigliya.
12Ndu da ne pool mbo wan kwa a̰se ge mo ne pe taal ge siya ma ne se ya ɗaa?
Ko mbo wan fareba ge mo ne pe tuul ge siya ma ne se ya ɗaa?
13Tṵ ge ɗeɗek zi, ndu da ne pool kwa kaŋ ajab ge mo ne ɗaa?
Ge swaga ge naa ne kwa fare to go, ndu da ne pool kwa dosol ge mo ne ɗaa?
14Bage ɗiŋnedin, mbi tol mo, mo sya mbi ko̰r,
ne cya̰wak tek, mbi kaɗeya det mo ndwara se ya.
15Bage ɗiŋnedin, mo te dol mbi uzi kyaɗa ɗaa?
Mo te dol mo pala uzi ne mbi ta kyaɗa ɗaa?
16Mbi a̰se, mbi ya siya wak go ne bool ge mbi ne ya day,
mo ka̰ mo vo mbi zi, mbi sḛ lwage go.
17Pore juliliya ge mo ne kale ya mbi pal,
vo ge mo ne ka̰ mbi zi dibi mbi wak go.
18Dam ne dam, a ver mbi ya zi dimma ne mam ne ver ndu go,
a kole mbi ja zi.
19Mo caɗe mbi kondore ma ne mbi kaam ma ya uzi ne mbi ta,
Tṵ gá ya mbi sele ne.
Currently Selected:
Kaŋ mballa ma 88: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
