Kaŋ mballa ma 90
90
MAKTUB GE ANDA
(Kmb 90—106)
Ndu dasana kale kale, Dok kale to
1Kaɗeya ge Musa, ndu ge Dok ne ne.
Bageyal, doŋ pe ma ne doŋ pe ma,
mo swaga woy ta ge i ne ne.
2Zḛ ge go njal ma pe dó,
ge go mo dó suwar ma ne dunya pe,
ne dḛ ya day mbo ɗiŋnedin mo Dok ne.
3A mo jan naa dasana ma ne go:
«Gwa̰ me suwar lugɗum zi!»
A gwan suwar zi no#Pe 3:19..
4Ago del ma dubu ne mo ta,
a dimma ne dam ge dana go,
kaleya ge na zi,
a dimma ne ɗaal ge ɗu baŋ go#2Bit 3:8..
5Mo kun ndu dasana dam ma pe digi dimma ne koreya digi ge cya̰wak baŋ go,
a dimma ne sugur baŋ go.
6Cya̰wak, ɓoy na wak, don digi,
gasamal, looɗe, fya̰ uzi.
7Ago laar ol ge mo ne pur i pe uzi,
pore juliliya ge mo ne hon i vo.
8Mo é i ya̰l ma ya mo ndwara se,
i fare ge ɗimil ma bḛ ben kwaya̰l go mo ndwara se.
9Ago pore juliliya ge mo ne zi, i dam ma pe kun digi baŋ,
i del ma kale dimma ne ndu ne ndar o̰yom baŋ go.
10I ke del ma wara ɓyalar,
naa ge pool ma ke del wara tiimal.
Ke del ma gḛ a yál njotɗa ne tiiɗiya ne baŋ.
dam ma kale avun cap, ka gene i mbo siya zi.
11A wuɗi wan laar ol ge mo ne pe ne ɗaa?
Ndu ge ne sya mo vo, wan pore juliliya ge mo pe ne.
12Hate i isi i dam ma,
go no i ba kat ne zwama.
13Gwa̰ ya, Bage ɗiŋnedin!
Ɗiŋ ma swaga go ga ɗaa?
Kwa i ge mo dore ma a̰se.
14Cya̰wak, wi i ne mo kwa a̰se,
go no dam ma ge i ne ma zi mwaɗak
i sḛ ba ka ke tuli, i ba ka ke laar saal.
15Del ma gḛ mo e i njot yál,
gwa̰ ne i dam ge yál mbe ma potɗa ne laar saal.
16E mo dore ma kwa mo kaŋ kerra ma,
ŋgay nama vya ma hormo ge mo ne!
17Ya̰ kwaɗa ge i Bageyal, Dok ge i ne na ka i pal.
Ɗù kaŋ kerra ge i ne ma pe se,
o̰ ɗù kaŋ kerra ge i ne ma pe se.
Currently Selected:
Kaŋ mballa ma 90: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
