Kaŋ mballa ma 81
81
Ɓase ma be za̰ Dok wak to
1Ne naa ge mbal kaŋ ma ga̰l pe: Kaŋ mballa ge Asaf ne. A ka mbal na da ne Biliŋ.
2Suwa̰le me digi tetege ne nee Dok, nee bage pool pe,
puwale me digi ne Dok ge Yakub ne pe.
3Mbá me kaŋ, hale me gaŋga ma,
ne biliŋ ma digi!
4Sṵ me tṵ digi saba wak ma go,
saba saal ma go, ne nee dam vḛso ma go!
5Ago a eya ne ne Israyela ma pe,
a wak yuwaleya ge Dok ge Yakub ne ne.
6Eya ge ne ho̰ pehir ge Yusuf ne,
swaga ge ne ɗage ho̰l digi suwal Masar pal go.
Mbi za̰ wak ge mbi ne wan na pe to, janna go:
7«Mbi her kaŋ dṵṵl ya ne mo ka̰l pal uzi,
mo ya̰ guwal ga̰l ya det se.
8Swaga wak nonna ge mo ne zi, mo tó mbi, mbi zu mo.
Mbi gwa̰ ne mo vinna ne mam tunna zi ya,
mbi kugi mo ge mam Meriba wak go. Ɗigliya.
9Mbi ɓase ma, za̰ me mbi, mbi mḛre aŋ!
Israyela, te go aŋ za̰ mbi wak ɗe,
10dok a̰me ge ɗogle te ya kat aŋ buwal zi to!
Aŋ te ya uware dok ge ɗogle ma to#Wat 20:2-3, Dwa 5:5-6.!
11A mbi Bage ɗiŋnedin Dok ge aŋ ne,
mbi abe aŋ ne suwal Masar diŋ ya zum ne.
A̰le me aŋ wak ma digi, mbi ma̰ wi nama.»
12Amma mbi ɓase ma be za̰ mbi to,
Israyela vya ma laar be wan mbi to.
13Mbi só nama laar ɓyareya ge nama ne pe go,
nama ke kaŋ ge nama laar ne ɓyare!
14O̰, te go mbi ɓase ma za̰ mbi ɗe,
te go Israyela bí mbi koo pul ɗe,
15mbi te ya gwan ne nama naa ge ho̰l ma pala se,
mbi te ya saŋge mbi ndwara nama naa ge huur ma pal.
16Naa ge ne kwane Bage ɗiŋnedin ma mbo komre na,
Israyela vya ma mbo ɓol tuli ɗiŋnedin.
17Bage ɗiŋnedin mbo wal nama ne pam ge tuli,
mbo huri nama ne daaram ge ful zi ge.
Currently Selected:
Kaŋ mballa ma 81: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
