Kaŋ mballa ma 80
80
O Dok, so mo togor, za̰ i kaɗeya
1Ne naa ge mbal kaŋ ma ga̰l pe: kaŋ mballa ge Asaf ne. A ka mbal na biliŋ wak go.
2O Bage koyya ge Israyela ne, so mo togor,
mo ge ne pole Yusuf vya ma dimma ne gii ma go!
Mo ge ne ka ne kavaar ge digi zi ya ma pal, serra cicim!
3Dya̰ pool ge mo ne ya zum, má i,
ge pehir ge Efrayim ne ma, ne ge Bayami ne ma, ne ge Manasa ne ma ndwara go.
4O Dok, gwa̰ ne i ya,
dó mo ndwara ya i pal, go no i mbo má.
5O Bage ɗiŋnedin, Bage naa ge mbal pore ma ne,
mo mbo ka julili pore kaɗeya ge mo ɓase ma ne pal ɗiŋ ma del ga ɗaa?
6Mo wal nama da ne kaŋzam ge kḭḭmi,
mo hon nama mḭḭm sorra vit njotɗa.
7I gá ya kaŋ gool ne i naa ge gulum pala ma pe,
i naa ge ho̰l ma gá cot ta da ne i.
8Dok ge naa ge mbal pore ma ne, gwa̰ ne i ya,
dó mo ndwara ya i pal, go no i mbo má.
9Mo mbugi oyo̰r ne suwal Masar ya,
mo ya̰ pehir ge ɗogle ma uzi, mo ɗḭ na no.
10Mo bare swaga uzi na ndwara zḛ,
ka̰ na too ma se, ame suwal no mwaɗak.
11Na soŋgoy kulbi njal ma pala se,
na tok ma ka dimma ne uwara sedre ge ɓaŋlaŋ go.
12Dó na tok ma ɗiŋ mbo maŋgaɗam ga̰l yuwam wak se ya,
na pe ɗufiya ma ɗiŋ mbo maŋgaɗam Efrat wak ya.
13Mo te ndage kaŋ ma ge a ne kole na zi uzi kyaɗa ɗo,
mo ba ya̰ naa ge ne kale ma mbo pel na ɗaa?
14Gūr ma mbo ne murum ma zi ya gar na digi,
kavaar ge ne ful zi ma mbo zam zám na zi.
15Dok ge naa ge mbal pore ma ne, gwa̰ ya nde,
dó mo ndwara ne digi zi ya, ndi kaŋ ge ne ke.
Kwa oyo̰r mbe a̰se,
16na ge mo sḛ ne ɗḭ na,
vya ge mo sḛ ne ho̰ na pool.
17Ndi a ne é na ol ya no, a syal na ya se.
Mḛreya ge mo ne zi, ndi ne burmi ya no.
18Dó mo ndwara ge ndu ge ne ka ne mo tok matoson pal pal,
ge ndu ge mo ne ho̰ na pool pal.
19I ne pool gwan saŋge mo i go̰r to,
gwa̰ ne i ya kat ne ndwara, go no i mbo uware mo.
20O Bage ɗiŋnedin, Dok ge naa ge mbal pore ma ne, gwa̰ ne i ya
dó mo ndwara ya i pal, go no i mbo má!
Currently Selected:
Kaŋ mballa ma 80: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
