Kaŋ mballa ma 68
68
Uwareya ge Dok ge pateya ne
1Ne naa ge mbal kaŋ ma ga̰l pe: Kaŋ mballa ge Dawda ne. Kaŋ mballa.
2Dok ɗage digi, na naa ge ho̰l ma ɓarse se,
na naa ge huur ma syat bama pe so na ndwara zḛ.
3Dimma ne ol swama ne besere uzi go,
mo besere nama uzi go no me,
dimma ne daaram fegem ne ɗese ol zi go,
naa ge sone ma burmi uzi Dok ndwara se go no me.
4Amma naa ge dosol ma ke laar saal,
ne suwa̰leya Dok ndwara se,
laar saal zi, nama puwale digi.
5Mbá me kaŋ ne Dok pe,
siya̰le me na dḭl,
ɗaɗe me viya̰ ge bage ne ndwa ne pḭr pal ndwara zḛ.
Na dḭl Bage ɗiŋnedin.
Suwa̰le me na ndwara zḛ.
6Ge na zok ge mbegeya zi,
Dok a kya̰le ma bá ne,
a bage ne ɗaŋge kumur ma pe ne me.
7A Dok hon naa ge baŋneya ma swaga katɗa ne,
a na kan daŋgay ma digi suli ne laar saal ne.
Amma naa ge za̰ wak to ma gá babur go war.
8O Dok, swaga ge mo ne dó tene mo naa ma ndwara zḛ wat zum go,
swaga ge mo ne ka mborra ful pul zi go. Ɗigliya
9suwar ndá,
pḭr kusi mam ya se Dok ndwara se, Dok ge Sinay ne ndwara se,
Dok ndwara se, Dok ge Israyela ne ndwara se.
10O Dok, mo swa mam ya se ceɗed,
mo gwa̰ ne mo joo ya kat ne ndwara.
11O Dok, mo ɓase ma ka ya suwal
ge kwaɗa ge mo ne zi, mo ne nṵsi na
ne naa ge a̰se ma pe katɗa go.
12Bageyal hon na wak,
naa zaab ma ɓase gḛ a ka waage fare ge kwaɗa.
13Gan ma ne naa ge mbal pore ma syat bama pe so,
naa zaab ge ne gá yadiŋ ma ga var ta kaŋ paal ma.
14Aŋ kat fiya aŋ swaga katɗa go baba ɗaa?
Ndi maale ma ganwak so̰y ya se ne fool kaal,
nama saam abe ya serra ne dinar ge gorom go.
15Swaga ge Bage pool pet ne ɓarse gan ma se,
ne dasare gan ma se go ɗe,
neige ka swarra njal Salmon pal.
16Njal ge Basan ne, a njal ge ne waɗe njal ma,
njal ge Basan ne, a njal ge ne pala njeel ma gḛ.
17Njal ge ne pala njeel ma gḛ,
mo te ke yil gyana ne njal ge Dok tá na go na kat na go ɗaa?
Bage ɗiŋnedin mbo ka kat na go ɗiŋnedin.
18Dok da ne pus pore ma dubu ma, ne dudubu ma wol.
Bageyal ya nama buwal zi,
ge njal Sinay go, ge zok ge mbegeya zi.
19Mo ndé digi zi ya, mo pá naa ya,
mo ame bobo ma ne naa dasana ma tok go,
ko ne naa ge za̰ wak to ma tok go.
Bage ɗiŋnedin Dok, mo swaga katɗa ya Siyona go#Efe 4:8..
20Uwareya hon Bageyal dam ne dam,
a na in i dṵṵl ma ne.
Dok a i bage máya ne. Ɗigliya
21Dok ge i ne, a Dok ge máya ne,
viya̰ wak ge siya ma ne ya Bageyal Bage ɗiŋnedin tok go.
22Ago Dok mbo rot na naa ge ho̰l ma pala,
naa ge sone ge pala susu twala ma.
23Bageyal jan ne:
«Mbi mbo gwan ne nama ne Basan ya,
mbi mbo gwan ne nama ne maŋgaɗam ga̰l yuwam pul se ya,
24ne da pe, mo ka mborra swama pal,
mo gú ma ɓó naa ge ho̰l ma duur ge bama ne ndwara zamma me.»
25O Dok, a kwa gwanna ge mo ne ya,
gwanna ge Dok ge mbi ne, gan ge mbi ne ya zok ge mbegeya zi.
26Naa ge mbal kaŋ ma ndwara zḛ
naa ge hale kaŋ ma nama go̰r go,
naa zaab vya ge hale gaŋga ma nama tuŋsi zi me.
27Uware me Dok ɓase ma buwal zi,
uware me Bage ɗiŋnedin, aŋ pehir ge Israyela ne ma.
28Ge zḛ ge Bayami na ge jyale ge ne ɗame nama,
ge karepe ga̰l ge Yuda ne ma, ne ba̰r ge bware ma kanna bama ta,
ge karepe ga̰l ge Zabulon ne ma, ne ga̰l ge Neftali ne ma.
29Mo Dok ho̰ wak ne go, mo ka pool.
O Dok, ŋgay pool ge mo ne,
na ge mo ne ke kaŋ ma ne i pe.
30Ne mo zok ge ne Ursalima pala digi zi ya,
gan ma mbo ka gene mo bobo ma ya.
31Mḛre kavaar ge ne teer zi ma,
ne vog ge nday pool ma ne poseya ne vog ge day vya ma ne,
nama ge a ne mbo ya tyare mo bware ma.
Ɓarse naa ge nama laar ne wa̰ pore mballa ma se.
32Naa ge pool ma yan ja ne suwal Masar ya,
kuch ma, ne tok ma abeya digi, a sya mbo Dok ta ya.
33Muluk ge ne suwar pal ma pet, siya̰le me Dok,
siya̰le me Bageyal, Ɗigliya
34na ge ne dḛ zaŋgal ya day, ne an ne pḭr pal ne na pus pore.
Ndi ndage na ka̰l ba̰yya, ba̰yya ge ndaar.
35Kwa me go, Dok pool,
na muluk ya Israyela pal.
Na pool dyan ya pḭr zi.
36O Dok, ne mo swaga katɗa ge mbegeya zi ya,
mo mbya naa sya mo vo.
A Dok ge Israyela ne hon ɓase ma pool ne ndaar ne.
Uwareya hon Dok!
Currently Selected:
Kaŋ mballa ma 68: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
