Kaŋ mballa ma 69
69
O Dok, sya mbi ko̰r
1Ne naa ge mbal kaŋ ma ga̰l pe: Kaŋ mballa ge Dawda ne, haleya ne biliŋ.
2O Dok, má mbi,
ago mam wan mbi ya mbi ka̰l zi cal.
3Mbi dyat ne go njiyal zi, swaga ge mbi koo mḛya to.
Mbi ɗigli ya mam pe se ya, so̰o̰l her mbi ya ya.
4Mbi tyane ya swaga oyya go,
mbi ka̰l pe fya̰ ya go,
mbi ndwara ma ga ya piibi mbi piibi,
swaga da̰re mbi Dok go.
5Naa ge ne kwane mbi baŋ ɗar ma,
nama ɓase waɗe mbi pala susu waɗe.
Nama ge ne ɓyare ban mbi uzi baŋ ɗar ma, a pool gḛ.
A e mbi pot kaŋ ge mbi ne hé na to#69:5 Kwaneya ge baŋ ɗar a jya̰ na ya Yoh 15:25 zi..
6O Dok, mo kwa dale ge mbi ne kwa,
ya̰l ge mbi ne ma, a be woy ne mo ndwara se to.
7Bageyal, Bage ɗiŋnedin, Bage naa ge mbal pore ma ne,
ya̰ naa ge a ne é bama jobreya ne mo pal ma,
saaso ká̰ nama pal ne mbi pe to!
O Dok ge Israyela ne, ya̰ naa ge a ne ɓyare mo pe ma
nama gá cwageya cugum ne mbi pe to.
8Ago da ne mo pe, mbi ame sáso ma mbi pal no,
mbi gá katɗa saaso zi no.
9Mbi gá ya gwasal mbi ná vya ma ta,
mbi gá ya ndu ge pe baŋ ge naa ge i ne nama ne tó ne ná ge ɗu laar zi ma ta.
10Ago yil ge ne mbi zi ne mo zok pe zam mbi sḛ,
mbi gá ame sáso ge naa ne sal mo ma mbi pal#Yoh 2:17, Rom 15:3..
11Swaga ge mbi ne fyal, ne wan asiyam,
no puy a ka gwan sal mbi.
12Swaga ge mbi ne kan kasigir mbi ta puy,
mbi ka gá nama kaŋ cotɗa.
13Naa gá kat uwara pe da ne mbi,
naa ge fereya ma gá mbal kaŋ da ne mbi dḭl.
14O Bage ɗiŋnedin, kaɗeya ge mbi ne mo ta no,
a swaga ge mo za̰ mbi mbya ne,
o Dok, kwa a̰se ge mo ne ge ɓaŋlaŋ zi,
gwa̰ ne mbi vinna, a fareba mo mbi bage máya ne.
15Zwá mbi ne gwagwabal zi ya uzi,
na kaage mbi tḭ́ se ya to!
Zu mbi ne naa ge ne kwane mbi ma tok go,
ne mam ge ɗugul helek se ya digi.
16Na kaage so̰o̰l zwa mbi to,
mbi ɗigli mam pe se ya to,
tuul dibi na wak mbi pal se ya to!
17O Bage ɗiŋnedin, gwa̰ ne mbi vinna,
ago kwa a̰se ge mo ne kwaɗa!
Laar wanna ge mo ne ge ɓaŋlaŋ zi,
saŋge tene ya mbi ta.
18Cigi mo ndwara uzi ne mo dore ta to,
ago mbi ya yál zi, gwa̰ ne mbi vinna avun cap
19Nda tene ya mbi ta, zú mbi,
ne mbi naa ge ho̰l ma pe, má mbi.
20Mo, mo kwa sáso ge mbi ne, ne mbi saaso,
ne cwageya ge mbi pala ne cwage ne se kwa,
mbi naa ge ho̰l ma pet a ya mo ndwara se.
21Nama sáso salla vḛne mbi dulwak go,
mbi duur njoy ya go.
Mbi jobre ndwara sunna puy ɗe, fare a̰me pe to,
mbi ɓyare naa ge iyal mbi laar ma, mbi be ɓol ndu a̰me to.
22A kan jam mbi kaŋzam pal,
swaga ge mam njuwal ne ke mbi,
a hon mbi mam ka̰mul njotɗa#Mat 27:48, Mar 15:36, Yoh 19:28-29..
23Nama kaŋzam ka faɗe ne nama pe,
ne nama naa ge a ne tó nama ya ma pe me#Rom 11:9-10..
24Nama ndwara ma dame,
nama gwan kwa swaga to,
e nama goŋ ma ka halla ɗaɗak.
25Á mo laar ol nama ta,
ya̰ mo pore juliliya ya nama pal.
26Nama yàl ma burmi uzi,
nama gur ma gá pṵṵl#Tkm 1:20..
27Ago ndu ge mo ne mḛre na, a gwan ke na yál,
a gwan hon naa ge mo ne ho̰ nama jwaŋ ma yál pal ta.
28Gwa̰ ne nama ya̰l potɗa nama ya̰l pal,
pore nama to bat.
29Gu nama dḭl ne maktub ge naa ge ndwara ma ne zi uzi,
isi nama dḭl naa ge dosol ma buwal zi to.
30Mbi a̰se, mbi njot yál,
O Dok, máya ge mo ne her mbi pala digi ne.
31Mbi mbo ka siya̰le dḭl ge Dok ne,
mbi mbo uware na ne gugu kerra.
32No a kaŋ ge ne ke Bage ɗiŋnedin sḛ tuli ne
waɗe nday pool, ne nday dalu ne na kḭḭm ma ne na koo gwap ma.
33Swaga ge naa ge a̰se ma ne kwa no ya, a mbo ke laar saal.
Aŋ ge ne ɓyare Dok pe ma, aŋ ke kaal tata!
34Ago Bage ɗiŋnedin za̰ naa ge woɗegeya ma za̰,
ndil na naa ge ne daŋgay zi ma solom to.
35Pḭr ma ne suwar, ne maŋgaɗam ga̰l yuwam ma
ne kaŋ ge ne na pul se ma mwaɗak,
uware me na!
36Ago Dok mbo zur Siyona,
mbo sin suwal ge Yuda ne ma digi,
naa mbo gwan kat na go, mbo gá nama joo.
37Na dore ma hir ma a mbo ame na joo,
naa ge nama laar ne wa̰ na dḭl ma mbo gá kat na go.
Currently Selected:
Kaŋ mballa ma 69: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
