Kaŋ mballa ma 66
66
Uware me Dok, Bage zurra
1Ne naa ge mbal kaŋ ma ga̰l pe: Kaŋ mballa.
Naa ge ne suwar pal ma pet,
suwa̰le me digi ne Dok pe.
2Mbá me kaŋ uware na dḭl,
uware me na ne kaŋ mballa ma!
3Jya̰ me Dok go: Mo kaŋ kerra ma hon naa vo!
Ge pool ge mo ne ge ɓaŋlaŋ ndwara zḛ,
mo naa ge ho̰l ma gá bwaɗe ta bwaɗe mo pe go.
4Suwar pet na gū mo ndwara se,
na siya̰le mo, na siya̰le mo dḭl. Ɗigliya
5Mbo me ya ndil kaŋ kerra ge Dok ne ma!
Na kaŋ ge ne ke ne naa dasana ma pe hon naa vo.
6Fyá̰ maŋgaɗam ga̰l yuwam pul,
naa kale na go fiya̰l baŋ.
Swaga mbe go, i ke laar saal.
7Ké muluk pool ge na ne zi ɗiŋnedin,
na ndwara dó ya pehir ge ɗogle ma pal.
Naa ge za̰ wak to ma gwan uware ta to! Ɗigliya
8Ɓase ma, uware me nee Dok,
ndage me aŋ ka̰l digi uware na!
9A Bage ne é nee kat ne ndwara ne,
cagre nee koo ma uzi ne me.
10O Dok, mo hale i dulwak ma,
mo ɗyage i dimma ne naa ne ɗyage fool kaal go.
11Mo é i det faɗe zi,
mo é yál ma i pal.
12Mo é naa ndé i pala digi,
mo ká̰ i ol zi, mo ká̰ i mam se,
amma mo zwa i ya zum ndwara hon i kaŋ ma bindik.
13Mbi mbo zok ge mo ne zi da ne tuwaleya ge tilla uzi ma,
mbi wi wak tuli ge mbi ne ke mo ndwara se,
14fare ge ne ndage ne mbi wak zi
swaga yál ge mbi ne zi ma.
15Mbi mbo tyare mo kavaar ge sḛ so̰o̰l ma,
gamla ma ne dukan ma.
Mbi mbo tyare nday ma ne bemjere ma. Ɗigliya
16Mbo me ya, aŋ pet ge ne sya Dok vo ma,
mbi mbo wan aŋ kaŋ ge na sḛ ne ke ne mbi pe.
17Swaga ge mbi ne ndage mbi ka̰l digi tol na,
mbi wak ka dore na.
18Te go mbi ka ne dwatɗa ge sone mbi zi,
Bageyal te ya za̰ mbi to.
19A fareba, Dok za̰,
só na togor za̰ mbi kaɗeya.
20Dok mbya uwareya, ne na sḛ ne dó na pala ne mbi kaɗeya ta uzi to pe,
ne na ne kuri mbi ne na kwa a̰se to pe!
Currently Selected:
Kaŋ mballa ma 66: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
