Kaŋ mballa ma 107
107
MAKTUB GE ANUWA̰Y
(Kmb 107—150)
Uware me Bage ɗiŋnedin, Bage máya
1Uware me Bage ɗiŋnedin,
ago na sḛ kwaɗa,
kwa a̰se ge na ne ɗiŋnedin!
2Naa ge Bage ɗiŋnedin ne zu nama,
ge na sḛ ne zu nama ne nama ndu ge ho̰l tok zi ya ma jya̰,
3ge na sḛ ne kote nama ne suwal ma ya pet,
ne ham ya, ne sya ya,
ne kuu ya, ne maŋgaɗam ga̰l yuwam wak ya ma!
4A ka gondoŋgeya ful pul ge fiya̰l ɗaŋraŋ go,
a be ɓol viya̰ ge mbo suwal ge naa ne kat ne go to.
5Kyamal ne mam njuwal ka ɓyare hun nama,
nama pool gwan gá to.
6Yál njotɗa ge nama ne zi, a tó Bage ɗiŋnedin,
na sḛ zu nama ne nama yál zi no.
7Ɗame nama viya̰ ge dosol go no,
gene nama suwal ge naa ne kat ne go ya no.
8Nama uware Bage ɗiŋnedin ne kwa a̰se ge na ne pe,
ne na kaŋ ajab ge ne ke ne naa dasana ma pe!
9Ago ho̰ ka̰l pe ge ne fya̰ mam njotɗa,
ho̰ bage kyamal kaŋzam ge kwaɗa mbyatɗa.
10Naa a̰me ma ka swaga tṵ ge ɗeɗek zi,
vwalla ne zúl, ge yál njotɗa zi.
11Ne da pe, a be gwan ne bama pala fare ge Dok ne pe se to,
a ndi yuwaleya ge Bage ne digi zi ya ne senna.
12Ne pe no, e nama njot yál,
a ka detɗa puy, ndu a̰me be sya nama ko̰r to.
13Yál njotɗa ge nama ne zi, a tó Bage ɗiŋnedin,
na sḛ zu nama ne nama yál zi no.
14Ndage nama ne nama swaga tṵ ge ɗeɗek zi ya zum no,
há nama zúl ma uzi no me.
15Nama uware Bage ɗiŋnedin ne kwa a̰se ge na ne pe,
ne na kaŋ ajab ge ne ke ne naa dasana ma pe!
16Ago há zok wak ge ne fool ŋgirma ma,
há zok wak ge walam ma#Isa 45:2..
17Naa ge daal ma ne bama kaŋ kerra ge ya̰l ma,
a ka mbo viya̰ ge sone go,
a pole ta mbo yál zi.
18Nama wak ge gwan ame kaŋzam to,
a dé ya siya wak go.
19Yál njotɗa ge nama ne zi, a tó Bage ɗiŋnedin,
na sḛ zu nama ne nama yál zi no.
20Teme na fare mbo zon nama,
ne mbo pwat nama ne taal siya se ya digi.
21Nama uware Bage ɗiŋnedin ne kwa a̰se ge na ne pe,
ne na kaŋ ajab ge ne ke ne naa dasana ma pe!
22Nama tyare tuwaleya ge gwan ne gugu ma,
suwa̰leya ne laar saal, nama waage na kaŋ ge ne ke ma.
23Naa ge ne an ne maŋgaɗam ga̰l yuwam pul go ne fak ga̰l ma,
ge a ne er bama tok ne maŋgaɗam ga̰l yuwam pul go ma,
24a kwa kaŋ kerra ge Bage ɗiŋnedin ne ma,
ne na kaŋ ajab ge ne ke ne mam ge ɗugul helek se ma.
25Fare janna ge na ne pal,
e saam labreya herra ya,
ka in sḭḭl mbo digi.
26Fak ga̰l ka in mbo digi,
ka gwan’a se,
nama sḛ ma su lelet,
27a iigi digi, a ka muliya dimma ne ndu ge fereya go,
nama fare kwarra á.
28Yál njotɗa ge nama ne zi, a tó Bage ɗiŋnedin,
na sḛ zu nama ne nama yál zi no.
29Wa̰ saam labreya,
sḭḭl iya se no halas.
30Nama sḛ ke tuli ne swaga ne iya se pe,
Dok ɗame nama mbo nama swaga kan koo
ge nama laar ne ɓyare go no me.
31Nama uware Bage ɗiŋnedin ne kwa a̰se ge na ne pe,
ne na kaŋ ajab ge ne ke ne naa dasana ma pe!
32Nama dore na koteya ge ɓase ma ne zi,
nama komre na ge koteya ge naa ga̰l ma ne go.
33Saŋge maŋgaɗam babur,
baal pul swaga fiya̰l me#1Sam 2:4-8, Isa 40:4, Amo 5:8, Luk 1:51-53..
34Saŋge suwar ge don kaŋ swaga yo̰l,
ne sone ge naa ge a ne ka ne na go ma pe.
35Saŋge babur pul baal ga̰l,
ne swaga ge fiya̰l swaga mam.
36Hon naa ge fa̰meya ma swaga katɗa,
a sin bama suwal digi.
37A gar gaaso ma, ne ɗḭ oyo̰r ma,
a ka tolla gḛ ge be to.
38Dok e na wak busu nama pal,
a tó ta se gḛ ceɗed,
be bwat nama kavaar ma pe to me.
39Naa a̰me ma pe ka bwatɗa,
a ka cwageya yál njotɗa ne a̰se zi.
40A na zwal yál ya naa ge pool ma pal ne,
ka e nama gondoŋgeya ful pul ge be viya̰ to go.
41Amma má a̰se ma ne yál zi ne,
ka ser pehir ma se ceɗed dimma ne gii ma go.
42Naa ge dosol ma kwa na,
a ka ke laar saal,
amma naa ge ya̰l ma pet a dibi bama wak digi.
43Ndu ge zwama na koy fare mbe ma no,
na wa̰ kwa a̰se ge Bage ɗiŋnedin ne ma pe.
Currently Selected:
Kaŋ mballa ma 107: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
