Kaŋ mballa ma 106
106
Dok dosol, a naa dasana ma dosol to ne
1Halleluya!
Uware me Bage ɗiŋnedin,
ago na sḛ kwaɗa,
kwa a̰se ge na ne ɗiŋnedin#106:1 Ne 1,47-48 ndi 1Maa 16:34-36.!
2A wuɗi day wan pateya ge Bage ɗiŋnedin ne pe ne ɗaa?
A wuɗi day uware na uwareya ge ne mbya ne ɗaa?
3Nama ge ne koy na wak yuwaleya ma,
ne nama ge ne ke mborra ɗaɗak dosol zi ma da ne laar saal!
4O Bage ɗiŋnedin, dwa ne mbi,
ge kwaɗa kerra ge mo ne ke mo ɓase ma zi,
sya mbi ko̰r, ne jo̰ mo bage máya ne!
5Ne da pe, mbi ɓó tuli ge naa ge mo ne tá nama ne,
mbi ɓó laar saal ge mo ɓase ma ne,
mbi dé ya uware tene ɓanna ne mo joo ma.
6I ke sone dimma ne i bá ma go,
i ke ya̰l, i ke kaŋ ge sone.
7Swaga ge i bá ma ne ka suwal Masar ya,
a be wan mo kaŋ ajab ge mo ne ke ma pe to,
a be dwat kwa a̰se ge mo ne ge gḛ ceɗed ma pal to,
a ɗage ne gool digi maŋgaɗam ga̰l yuwam ge teer wak#Wat 14:10-12..
8Amma Bage ɗiŋnedin má nama ne na dḭl pe,
ne ŋgay pool ge na ne pe.
9Mḛre maŋgaɗam ga̰l yuwam ge teer, fya̰ digi no,
a kale na pul se fiya̰l dimma ne babur pul go#Wat 14:21-29..
10Má nama ne naa ge a ne kwane nama ma tok go,
zu nama ne nama naa ge ho̰l ma tok go.
11Mam somɗe nama naa ge ho̰l ma se ya,
ndu a̰me ɗu kikit be ɓur uzi to.
12A ho̰ fareba na fare janna pal,
a mbá kaŋ uware na#Wat 14:31, 15:1-21..
13Avun tetek, a vyale na kaŋ ge ne ke,
a be da̰re go na wi na fare ma wak to.
14A ka ne ene gḛ ful pul zi,
ful pul ge fiya̰l ɗaŋraŋ go, a kugi Dok#Isi 11:4-34..
15Ho̰ nama kaŋ ge nama laar ne ɓyare,
ho̰ nama ɗiŋ a hur ŋgaŋgas.
16Ge nama swaga katɗa go, a ke yil ne Musa,
ne Aaron mbegeya ge Bage ɗiŋnedin ne.
17Suwar hage na wak, uɗi Datan no,
dibi na wak ge naa ge Abiram ne ma pal no mwaɗak.
18Ol tí naa ge ne nama pe go ma,
ol za naa ge sone ma.
19Ge njal Horeb pe go, a ɗeere nday vya,
a mbo gur bama koo ge kaŋ ɗeereya ndwara se.
20A è Dok, na ge ne ka hormo ge nama ne,
ne nday, kaŋ ge ne zam sugur baŋ.
21A vyale Dok, bama bage máya,
na ge ne ke kaŋ ge ɓaŋlaŋ ma suwal Masar ya,
22kaŋ ajab ma suwal Cham ya,
kaŋ ge ke naa vo ma ge maŋgaɗam ga̰l yuwam ge teer go.
23Jya̰ go na burmi nama pe uzi,
na yá̰ ɗeŋgo Musa ge na ne tá na.
Musa mḛ Dok ndwara se kaɗeya,
na cigi na pore ne Israyela vya ma pal uzi,
na burmi nama to.
24A ndi suwal ge siŋli senna,
a be hon fareba na fare janna pal to#Isi 14:1-35..
25A ka sun ta bama gur ma zi,
a be za̰ Bage ɗiŋnedin wak to.
26Hé na tok digi,
guni tene no na pur nama pe uzi babur pul go,
27na ɓarse nama pehir ma se pehir ge ɗogle ma buwal zi,
na hun nama uzi nama suwal go#Lev 26:33..
28A vwa bama pe ne dok Baal Pehor,
a za duur ge tuwaleya ge a ne ke hon dok ge suya ma ne.
29Ne bama kaŋ kerra ma, a e Dok saŋge pore,
ká̰ mbogom ya nama ta no.
30Swaga mbe go, Pineyas ɗage digi, kṵ fare buwal no,
mbogom mbe á no.
31Go no, Dok ndi na no go, na ndu ge dosol ne,
doŋ pe ma ne doŋ pe ma, mbo ɗiŋnedin#Isi 25:1-13..
32A e Dok laar hotɗa ge mam Meriba wak go,
ne nama fare pe, yál dé Musa pal no#Wat 17:1-7, Isi 20:1-13..
33A e na laar hotɗa ɗiŋ,
Musa gá kar fare se be wan pe no.
34A be burmi naa ge Bage ɗiŋnedin ne jya̰ nama go
nama burmi nama uzi ma pe to#Dwa 7:1-6, 20:17-18..
35A ɓa̰ ta ne pehir ge ɗogle ma,
a hate nama kaŋ kerra ma#Nks 2:1-3, 3:5-6..
36A uware nama kaŋ sḭḭm ma,
kaŋ mbe ma saŋge nama kaŋ syal koo.
37A tyare bama vya ge sonmo ma
ne bama vya ge gwale ma hon kaŋ sḭḭm ma#Lev 18:21, Dwa 12:31, 2Gan 17:17, Irm 7:31, 19:5..
38A ka̰ naa ge fare ne nama pal to ma swama se baŋ ɗar,
ndwara go, bama vya ge sonmo ma ne ge zaab ma,
ge a ne tyare nama hon dok ge Kanan ma ne ma,
nama swama ma há suwal seŋgre#Isi 35:33..
39A há ta seŋgre ne bama kaŋ kerra ma,
a mbo dok ge ɗogle ma pe go dimma ne ndu ge kaya go.
40Ne no pe, Bage ɗiŋnedin saŋge pore na ɓase ma pal,
kwane na joo.
41Ɓyá̰ nama pehir ge ɗogle ma tok go no,
nama naa ge huur ma gá ke muluk nama pal no,
42nama naa ge ho̰l ma gá ke nama yál no,
a gwa̰ ne nama pala bama pe se no.
43Ndwara wowol, Bage ɗiŋnedin ka zur nama,
go no puy ɗe, a ka kat bama pala ga̰l mbe zi,
a ka zam zḛ bama ya̰l kerra zi.
44Swaga ge Bage ɗiŋnedin ne kwa nama yál njotɗa,
ne za̰ nama fyaso ma ɗe,
45ka dwat ne wak tuli ge na ne ke ne nama,
ka gwan’a se kwa a̰se ge na ne ge ɓaŋlaŋ zi,
46ka e naa ge a ne pá nama ma pet kwa nama a̰se#1Gan 8:50, Irm 42:12, Nks 2:14-18, Esd 9:9..
47O Bage ɗiŋnedin, Dok ge i ne, má i,
kote i ne pehir ge ɗogle ma buwal zi ya digi,
ne da pe i ba uware mo dḭl ge mbegeya uzi hini cat,
i ba uware ta mo zi me#1Maa 16:35-36..
48Uwareya hon Bage ɗiŋnedin Dok ge Israyela ne,
zaman ma ne zaman ma!
Pehir ma pet nama jya̰ go: A go! Halleluya!
Currently Selected:
Kaŋ mballa ma 106: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
