Kaŋ mballa ma 105
105
Dok a bage ne koy wak tuli ne
1Ho̰ me Bage ɗiŋnedin hormo,
tó me na dḭl digi,
waage me pehir ge ɗogle ma na kaŋ ajab ge ne ke ma#105:1 Ne 1-15 ndi 1Maa 16:8-22..
2Uware me na, siya̰le me na ne kaŋ mballa ma.
Dwa me na kaŋ ajab ge ne ke ma pal pet.
3Uware me ta na dḭl ge mbegeya uzi hini cat zi,
aŋ ge ne ɓyare Bage ɗiŋnedin pe ma,
ke me laar saal.
4Ɓyare me Bage ɗiŋnedin ma ne na pool pe.
Ɓyare me na pe ɗaɗak.
5Dwa me na kaŋ ajab ge ne ke ma pal,
Dwa me na kaŋ ŋgayya ma,
ne na sarya kunna ma pal.
6Aŋ ge na dore Abraham hir ma,
aŋ ge Yakub vya ma,
aŋ ge na naa ge talla ma!
7Bage ɗiŋnedin a nee Dok ne,
a na kun sarya suwar pal ne pet.
8Dwat na wak tuli pal dwat ɗaɗak,
na ge na sḛ ne ho̰ na ne doŋ pe ma dubu pe#Dwa 7:9..
9A wak tuli ge na sḛ ne ke ne Abraham,
ne guniya ge na sḛ ne guni tene ne Isaku.
10A na eya ge na sḛ ne ya̰ na ne Yakub pe,
ne wak tuli ge ɗiŋnedin ge ne ke ne Israyela pe#Pe 12:3, 13:15, 15:18, 17:8, 26:3, 35:12, 48:4, Dwa 1:8, 34:4, Tkm 7:5..
11Jya̰ na go: «Mbi mbo hon mo suwal Kanan,
suwal mbe mbo gá mo joo!»
12Nama sḛ ma ka dḛ woɗege gwa baŋ,
tok zi tuk baŋ, swaga ge a ne mbyare ya go#Pe 34:30, Dwa 7:7, 26:5..
13A ka ŋgondoŋgeya pehir ma buwal zi yago ne go go.
14Amma Dok be ya̰ ndu a̰me ke aŋ yál to,
ka mḛre gan ma ne aŋ pe#Pe 20:3-7..
15Ka jan go: «Tá me aŋ tok ge mbi naa ge naŋgeya ma ta to,
ke me mbi anabi ma yál to.»
16Teme kyamal ya suwar pal,
ɓá sagar ma uzi mwaɗak.
17Teme ndu a̰me nama ndwara zḛ ya,
ndwara go Yusuf ge a ne yá na uzi dimma ne mo̰r go#Pe 37:28, 45:5..
18A ka̰ zul ma na koo ma zi,
a ka̰ bayir ge walam na ka̰l zi#Pe 39:20..
19ɗiŋ dam ge na fare ge ne jya̰ ma wak wi,
go no, Bage ɗiŋnedin ŋgay go, a dé na tamay.
20Gan ka̰ naa mbo dol na ya digi,
bage ne suwal pal saa na ya digi#Pe 41:14..
21E na katɗa na yàl pal,
e na ke muluk na kaŋ ma pal pet#Pe 41:39-41.,
22ndwara gwan ne naa ga̰l ge temel ma ya na pe se,
ne hate naa ga̰l ma zwama me.
23A go no, Israyela mbo ya suwal Masar go no,
Yakub mbo ya kat mbay suwal Cham go no#Pe 46:6, 47:11..
24Dok zuli na naa ma se ceɗed,
há nama pool waɗe nama naa ge ho̰l ma#Wat 1:7-14..
25Dok è masar ma dulwak, a gá kwane na naa ma no,
a ɗage ke na dore ma yál no.
26Teme na dore Musa,
ne Aaron ge na ne tá na#Wat 3:1—4:17..
27Ge Suwal Masar go,
Dok fare janna pal, a ke kaŋ ŋgayya ma,
ge suwal Cham go, a ke kaŋ ajab ma.
28Teme tṵ ya se, tṵ dibi swaga no,
a be pili ta ne na fare janna ma to.
29Saŋge nama mam ma swama,
hṵ sii ge nama ne ma uzi no mwaɗak#Wat 7:14-25..
30Móy ma ŋguy nama suwal,
ɗiŋ a wat nama gan zok pul zi#Wat 7:26—8:11..
31Dok jya̰ fare, far ma mbo ya no,
susu-ɗaal ma ka̰ ya suwal pal no mwaɗak#Wat 8:12-28..
32Ge na swa nama mam ɗe,
swa nama tuwar ndaar,
ka̰ ya ol ɗaabeya nama suwal pal#Wat 9:13-35..
33Hase nama oyo̰r ma ne nama fere ma se,
kṵ uwara ge ne nama suwal go ma uzi pet.
34Dok jya̰ fare, tere ma mbo ya,
tere baktar ma ŋguy swaga ya#Wat 10:1-20.,
35a ɗa sugur ge ne nama suwal go uzi pet,
a za nama kaŋ kyarga ma uzi pet.
36Uwale, hṵ vya pul soy ge ne nama suwal go ma uzi pet,
vya ge zḛ ge, ge a ne tó na pool ge bama ne zi ma#Wat 12:29-30..
37Abe na naa ma ya zum ne fool kaal ma ne dinar ma bama tok go,
ndu a̰me ɗu ne nama buwal zi koo be gá go̰r go to#Wat 12:35-36..
38Wat zum ge nama ne ke masar ma laar saal,
ne da pe, a ka̰ vo nama zi ge be to#Wat 12:33, 15:16..
39Dok ka kulbi pḭr nama pal gyala,
ɗaal me, ka zen ol nama pal#Wat 13:21-22, 14:19-20..
40Ɓyareya ge nama ne pal,
Dok teme nama ɓyale ma ya,
ka̰ nama kaŋzam ge digi ge no me#Wat 16:13-18..
41Hage njal ma, e mam ɓulla ne nama zi ya no,
gá sorra no vit ge babur ge fiya̰l ɗaŋraŋ pul go#Wat 17:1-7, Isi 20:2-13..
42Ago dwa da ne na wak tuli ge mbegeya
ge na ne ke na ne na dore Abraham#Pe 15:13-14, Wat 2:24, Luk 1:54-55..
43Abe na naa ma ya zum laar saal zi,
abe na naa ge talla ma ya zum suwa̰leya zi.
44Ho̰ nama suwal ge pehir ge ɗogle ma ne,
a gá katɗa ya naa ge ɗogle ma temel wak ma go#Jus 11:16-23..
45Ne da pe, nama koy na eya ma,
nama ke mborra na wak honna ma pal.
Halleluya!
Currently Selected:
Kaŋ mballa ma 105: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.