Kaŋ mballa ma 104
104
Uware me Dok, bage dolla pe
1Mbi uware Bage ɗiŋnedin!
Bage ɗiŋnedin, Dok ge mbi ne mo ɓaŋlaŋ ge be to,
mo ka̰ hormo ma ne serra cicim ya mo ta dimma ne ba̰r go.
2Mo ka̰ kwaya̰l ya mo ta dimma ne ba̰r ga̰l go,
mo kulbi pḭr ne digi ya se dimma ne zok pala faŋ go.
3Mo e mo swaga katɗa ya digi digi zi ya,
mo ke ne pḭr mo pus pore,
mo mbo swaga ma ya saam ganwak ma pal.
4Mo ke ne saam mo naa ge temeya ma,
ol ɗaabeya, mo naa ga̰l ge temel ma#Ibr 1:7..
5Mo ɗù suwar ne na pe dolla ma pal ne,
na sḛ ne pool ge ndatɗa to bat.
6Mo kulbi maŋgaɗam ga̰l yuwam na pal no dimma ne ba̰r go,
mam eme ɗiŋ mbo njal ma pala njeel digi.
7Amma swaga ge mo ne mḛre na, syat na pe so,
ne ka̰l ba̰yya ge mo ne, garge na pe so.
8Ka say njal ma pala, ka det ya baal pul ma se,
ɗiŋ det ge swaga ge mo ne e na mḛya go.
9Mo e na warbe ma ge na sḛ ne pool ge yele nama pal to ya go,
ne da pe, na gwan mbo ya ame suwar to.
10Yá̰ mam ɓulla det ya mam so̰o̰l ma se,
a ka ɓul ya njal ma buwal zi.
11Kavaar ge ne ful zi ma pet a ka mbo ya njot na,
kwara ge ful zi ge ga mbo ya hun na mam njuwal ne na me.
12Njoole ma ka mbo ya kat na wak go,
a ka fyalla na uwara ma digi.
13Ne na swaga katɗa digi ya,
ka swa mam ya njal ma pal,
suwar ka huri ne na kaŋ kwaɗa ge na sḛ ne ke ne na tok zi ma.
14Mo e sugur pyarra digi ne kavaar ma pe,
ne kaŋ ge naa dasana ma ne gar ma,
ndwara ɓol kaŋzam ne suwar zi ma,
15ne oyo̰r jiya̰l ge ne ke nama sḛ tuli ma,
ne num ge ne ser nama ndwara ma,
ne kaŋzam ge ne hon nama pool ma me.
16Uwara ge Bage ɗiŋnedin ne ma ɓol mam mbyatɗa,
uwara sedre ge Liban ne ma ge mo ne ɗḭ nama.
17Njoole ma ka mbo ya e bama vum ma nama digi,
karway ma ka e bama vum ma uwara Sipres ma digi me.
18Njal ge haal ma da ne bagɗe ma pe,
njal ge busur ma a swaga woy ta ge mbii ma ne ne.
19Mo ke saba da ne ŋgay dam vḛso ma pe,
gyala kwa na swaga ge dimma kwa.
20Mo zwal tṵ ya, no a ɗaal ya̰ ya ne,
go no kavaar ge ne ful zi ma pet a ɗage anna digi.
21Sonne bool pyan ɓyare kaŋ wanna,
a ɓyare bama kaŋzam da ne mo tok go.
22Swaga ge gyala ne ndwar, a ŋgwate,
a mbo fí bama swaga fiya ma zi ya.
23Ndu dasana wat ne na diŋ ya zum mbo ke na temel,
gá ke na temel ɗiŋ gasamal.
24O Bage ɗiŋnedin, kaŋ kerra ge mo ne ma gḛ ge be to!
Mo ke nama pet da ne zwama gḛ ge be to,
Suwar wi da ne mo kaŋ dolla ma.
25Ndi maŋgaɗam ga̰l yuwam, na ga̰l ne na fiyal,
kavaar ge ga̰l ma ne ge jabso ma on ya na se gḛ ge be to.
26fak ga̰l ma giwli harra ya na pul go,
kavaar ga̰l ge maŋgaɗam ga̰l yuwam se ma ke vḛso ya na se me.
27Kaŋ mbe ma no pet a kan bama saareya ma ya mo pal,
ndwara ɓol bama kaŋzam bama swaga ma go.
28Swaga ge mo ne hon nama, a ka ameya,
mo hage mo tok zum, a ɓol kaŋzam huriya.
29Swaga ge mo ne saŋge nama mo go̰r, vo wan nama,
mo ndage o̰yom ne nama zi uzi, a saare,
a gwan suwar lugɗum zi.
30Mo gwan ne mo o̰yom ya nama zi, a gwan tan digi,
mo gwan ne suwar giya̰l.
31Ya̰ hormo ge Bage ɗiŋnedin ne na ka ɗiŋnedin!
Ya̰ Bage ɗiŋnedin sḛ ke tuli ne na kaŋ kerra ma pe!
32Mo saŋge mo ndwara ndil suwar,
ndi suwar sḛ wan vo,
mo tyare mo tok dabe njal ma,
nama sḛ ma abe ɗusi ol-swama digi.
33Tek ge mbi gale ne ndwara,
mbi mbo ka mbal kaŋ uware Bage ɗiŋnedin.
Mbi mbo ka siya̰le Dok ge mbi ne dam ge mbi ne ma zi mwaɗak.
34Ya̰ mbi fare janna na dé na ndwara zi kwaɗa,
mbi za̰ tuli Bage ɗiŋnedin zi!
35Ya̰ naa ge ke sone ma burmi ne suwar pal uzi,
naa ge ke ya̰l ma gá to bat.
Mbi uware Bage ɗiŋnedin!
Halleluya!
Currently Selected:
Kaŋ mballa ma 104: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
