Kaŋ mballa ma 103
103
Uware me Bage ɗiŋnedin ne na kwaɗa kerra ma pe
1Ge Dawda ne.
Mbi uware Bage ɗiŋnedin,
kaŋ ge ne mbi zi ma mwaɗak nama uware na dḭl ge mbegeya uzi hini cat!
2Mbi uware Bage ɗiŋnedin,
mbi vyale ne na kwaɗa ge ne ke ma to bat!
3A na pore ya̰l ge mo ne ma ne pet,
a na zon mo moy ma ne pet me!
4A na zur mo ne taal siya se ne,
a na kulbi mo se ne na kwa a̰se ma ne na laar wanna ne!
5A na wi mo ne kwaɗa ge na ne sabar ge mo ne zi ne,
a na gwan ne mo jyale ne dimma ne gegelo go.
6Bage ɗiŋnedin kun fare buwal dosol pal,
ka ɗaŋge naa ge a ne ke nama yál ma pe pet.
7Ŋgay Musa na koo pul,
ŋgay Israyela vya ma na kaŋ kerra ma.
8Bage ɗiŋnedin laar wanna, a bage kwa naa a̰se ne,
dṵṵl pore kerra zi, zuliya ceɗed kwa a̰se zi.
9Ke ho̰l ne ndu tata to,
koy fare na zi ɗiŋnedin to.
10Mḛre nee ge sone ge nee ne ma pal tem to,
pot nee ge ya̰l ge nee ne ma pal tem to.
11Dimma ne pḭr ne suwar pala digi ya haal go,
kwa a̰se ge na ne ne naa ge ne sya na vo ma pe a haal go no me.
12Dimma ne le kuu ne abe tene uzi ya ne le mbii ta go,
na sḛ abe nee kaŋ kerra ge sone ma uzi ya go no me.
13Dimma ne bá laar ne wan na vya ma go,
Bage ɗiŋnedin laar wan naa ge ne sya na vo ma go no me.
14Ne da pe, na sḛ kwa kaŋ ge a ne ke nee ne na kwa,
kwa kwa go, a ke nee da ne suwar lugɗum.
15Ndu dasana, na dam ma da ne sugur go,
dimma ne sugur ne ɓoy na wak ne ful zi go,
16swaga ge saam ne kwal na ta, det uzi,
ndu gwan wan na swaga ge ne ka go pe to.
17Amma kwa a̰se ge Bage ɗiŋnedin ne a ɗiŋnedin mbo ɗiŋnedin ne naa ge ne sya na vo ma pe,
dosol ge na ne da ne nama vya ma pe ɗiŋ mbo nama vya kon ma ta,
18ne nama ge ne koy na wak tuli ma pe,
ne nama ge ne koy ke mborra na wak honna ma pal pe.
19Bage ɗiŋnedin ɗù na hool gan ya digi zi ya,
ka ke muluk kaŋ ma pal pet.
20Uware me Bage ɗiŋnedin, aŋ ge na maleka ma,
aŋ ge pateya ge pool ma ge ne ke temel na fare janna pal ma,
aŋ ge ne za̰ na wak ma!
21Uware me Bage ɗiŋnedin,
aŋ ge na naa ge mbal pore ma pet,
aŋ ge ne ke na temel mo̰r ma,
aŋ ge ne ke na laar ɓyareya ma!
22Uware me Bage ɗiŋnedin,
aŋ ge na kaŋ dolla ma,
ge swaga ge daage go pet ge na sḛ ne ke muluk ne go!
Mbi me, mbi uware Bage ɗiŋnedin.
Currently Selected:
Kaŋ mballa ma 103: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
