Kaŋ mballa ma 102
102
Kaɗeya ge ndu ge a̰se ge ne njot yál ne
1Kaɗeya ge ndu ge a̰se ge ne njot yál ne, wan yál njotɗa ge na ne pe hon Bage ɗiŋnedin.
2O Bage ɗiŋnedin, za̰ mbi kaɗeya,
ya̰ fyaso ge mbi ne na dé mo ndwara se ya!
3Dó mo pala uzi ne mbi ta dam yál ge mbi ne zi to.
Swaga ge mbi ne tol mo, só mo togor za̰ mbi,
há tene gwan ne mbi vinna!
4Mbi dam ma kwal uzi dimma ne ol-swama go,
Mbi kal ma abe ya yo̰re mbi dimma ne ol ne ka̰ ne mbi zi ne go.
5Mbi dulwak petere go dimma ne sugur fiya̰l go,
mbi vyale vyale be ge zam kaŋzam mbi wak zi.
6Sun tene ge mbi ne zi,
mbi bol ma gá kanna ne mbi kal ma pal ne baŋ.
7Mbi gá ya dimma ne tukturi ge ne ful pul zi go,
mbi gá ya dimma ne tukturi ge ne swaga ge ne burmi se go go.
8Mbi gá dwam da ne mbi ndwara
dimma ne njoole ge ne kat ne zok pala digi hini go.
9Dam ne dam, mbi naa ge ho̰l ma sal mbi sal,
a gá cot ta da ne mbi, a gá vḛne wak naa pal da ne mbi dḭl.
10Mbi kaŋzam gá sḭḭm,
mbi mam njotɗa gá kirgi da ne mbi mḭḭm.
11Laar ol ge mo ne zi, pore juliliya ge mo ne zi,
mo wa̰ mbi, mo cigi mbi uzi ya no.
12Dimma ne kḭḭm ne tit uzi ya go,
mbi dam ma tit da ne go̰r,
mbi gá ya dimma ne sugur fiya̰l go.
13Amma mo Bage ɗiŋnedin, mo ya go ɗiŋnedin,
doŋ pe ma ne doŋ pe ma, naa mbo ka dwat ne mo.
14Mo mbo ɗage ya digi, mo sḛ mbo tiiɗi mo ne Siyona pe,
swaga ge mo sya na ko̰r yá̰ ya ne,
ago, na dam mbyat ja.
15Ago i mo dore ma, i laar wa̰ na njal ma wan,
i dulwak ya na swaga joo pal.
16Pehir ge ɗogle ma mbo sya Bage ɗiŋnedin dḭl vo,
gan ge ne suwar pal ma pet a mbo uware mo,
17swaga ge mo ne mbo gwan sin Siyona ya digi go,
swaga ge mo ne mbo dyan ja hormo ge mo ne zi go.
18Mo mbo so mo togor za̰ naa ge woɗegeya ma kaɗeya,
mo mbo sen nama kaɗeya ma to bat.
19A njaŋge fare mbe no ne doŋ pe ge ne mbo ne go̰r ya ma pe,
ne da pe, o Bage ɗiŋnedin,
pehir ge ne mbo gwan ɗage ya digi ma uware mo.
20Ne na swaga katɗa ge mbegeya digi ya,
Bage ɗiŋnedin ka ndil swaga ya se,
ne pḭr digi ya, ka ndil suwar ya se,
21ndwara za̰ naa ge a ne pá nama ma fyaso,
ne zur nama ge a ne wa̰ nama mbo siya zi ma digi.
22Go no, naa mbo uware Bage ɗiŋnedin Siyona go,
naa mbo siya̰le na Ursalima go,
23swaga ge pehir ma ne suwal ma
ne mbo kote ja ke Bage ɗiŋnedin temel mo̰r go.
24Bage ɗiŋnedin á mbi pool ya viya̰ ma tuŋsi zi,
kun mbi dam ma pe ya digi.
25Mbi jan go: «O Dok ge mbi ne,
kṵ mbi dam ma pe viya̰ zi to,
mo ya go katɗa doŋ pe ma ne doŋ pe ma.»
26A mo dó suwar dḛ ne,
a mo sḛ mo ke pḭr ne mo tok zi ne#Ibr 1:10-12..
27A mbo vḛne uzi, amma mo ya go katɗa.
A mbo hat kamal dimma ne ba̰r go,
mo mbo er nama dimma ne naa ne er ba̰r go, a mbo ya̰ swaga.
28Amma mo, mo go mbe no tà,
mo del ma pe aya to.
29Mo dore ma vya ma mbo ɓol swaga katɗa,
nama hir ma mbo gá katɗa mo ndwara se.
Currently Selected:
Kaŋ mballa ma 102: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
