Fare sḭ ma 7
7
Bool, abe tene uzi ne gwale ge voɗom ta
1Mbi vya, koy mbi fare janna ma,
koy mbi wak honna ma kwaɗa.
2Koy mbi wak honna ma, mo mbo kat ne ndwara,
koy mbi eya ma dimma ne mo ndwara pul mbuɗi go.
3vwa nama mo tok ta cemet,
njaŋge nama mo dulwak zi.
4Ndi zwama dimma ne mo ná vya ge gwale go,
ndi fare kwarra dimma ne mo kondore go.
5A mbo koy mo ne gwale ge ndu ne ta,
ne gwale ge ɗogle ge wak tuli ta.
6Dam a̰me ɗu, mbi ka ndil swaga ya zum mbi fenetre go.
7Mbi ndi naa ge be kwa fare jwap to ma,
mbi kwa bool ge pala kwa fare to, naa jabso mbe ma buwal zi.
8Her viya̰ ge ne mbo swaga ge gwale mbe ne mḛ ne go ya,
sele viya̰ mbo na diŋ ya.
9Ka gasamal, le ndwara pisil, swaga ge ɗaal ne wan se go.
10Ndi gwale a̰me mbo ya na ndwara zi,
ka̰ ba̰r dimma ne gwale kaya go, ka da ne son ne na zi.
11Gwale mbe zet zet baba, saaso ne na zi to,
kat na pe na diŋ to.
12Wat zum, kat buwal pe zum,
kat huli naa swaga ma go pet.
13Gwale mbe wan vya mbe se, abe na na sḛ zi,
jan na fare ne ka̰l ge tuli go:
14«Mbi ke wak tuli tyare bobo ge gwan ne gugu hon Dok,
ma̰ no mbi wi mbi wak tuli wak.
15Da ne pe, mbi mbo ya mḛ viya̰ go da̰re mo no,
se no, mbi ɓol mo go.
16mbi la ba̰r ndabcar mbitimbiti ya mbi saŋgal pul ya,
a ba̰r ɓoso lin ge suwal Masar ne ne.
17Mbi ka̰ idir ge mir ne, ne ge alowes ne, ne ge Sinnamom ne ya mbi saŋgal pul ya.
18Mbo ya nee lase ta ɗiŋ mbo cya̰wak,
nee cya̰me ta sḛ digi.
19Ago mbi obe ne yadiŋ to,
mbo gwasal ya swaga kaal.
20Abe na bware na galam zi ya,
gwan dḛ ya saba saal.»
21Ne na wak zwama ta, e na gwanna ya se,
ne na wak tuli ta, ka zwal na ya na pe go.
22Har tene avun cap kare na pe
dimma ne nday ne mbo swaga vyan kavaar ma ya go.
ko dimma ne ndu ge daal ge a ne vwal na mbo iyalla go.
23Ɗiŋ a mbo pyaɗe na ya ne walam mbḛ.
A dimma ne njoole ne har tene wat faɗe zi go,
kwa go na mbo siya zi to.
24Se no, mbi vya ma, za̰ me mbi,
só me aŋ togor za̰ mbi fare janna ma.
25He me aŋ dulwak digi gwale hir ge go mbe no pe go to,
he me na koo-pul to.
26Ago na sḛ e naa gḛ ɓol jwaŋ, a̰me ma su me,
ko naa ge pool ma puy, a su ne na pe.
27Na yàl a viya̰ ge ne mbo ne naa taal ge siya ma ne ya ne,
gene naa mbo siya zi.
Currently Selected:
Fare sḭ ma 7: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
