Fare sḭ ma 6
6
Her dṵṵl ge mo kon ne
1Mbi vya, katɗa mo her mo kon wul dṵṵl ya mo pal potɗa#20:16, 22:26-27.,
2Kadɗa mo ho̰ mo wak pot na,
ko mo ke wak tuli pot na,
3Kadɗa a go ɗe, mbi vya:
Ne jo̰ mo vwa tene vwal ne ndu ge mo ne ame wul ne na tok go,
saa tene digi,
Mbo gwarge tene na ta kaɗeya.
4Fí dam to,
ɗigli tene to.
5Má tene ne na tok go
dimma ne maaɗe ne má tene ne ndu ge ke duwa̰ tok go go
ko dimma ne njoole ne má tene ne bage ne hu faɗe tok go go.
Yuwaleya ne naa ge uwal ma pe
6Uwal’o, mbo naŋgurum ma ta gale,
ndi nama kaŋ kerra ma, há zwama.
7Nama ga̰l to, nama ndu ge ndil nama temel to,
nama ndu ge ɗame nama to me.
8Somor, abe na kaŋzam koyya digi,
swaga siyal go, kote na kaŋzam digi.
9Uwal’o, mo kat mo swaga fiya se ɗiŋ ma swaga go ga ɗaa?
Mo ɗage ne mo swaga dam se digi ma del ɗaa?
10Fí dam ta ŋgeɗo, só̰ dam ta ŋgeɗo, kage mo tok fiya ta ŋgeɗo#24:33-34.,
11a̰se mbo tan mo dimma ne ndu ge syala go,
kyamal mbo det mo dimma ne ndu ge ne harge naa kaŋ ma go.
Dir ge ndu ge on son ne
12Ndu ge ne kar fare ma se yayak,
a ndu ge bernde ne, a ndu ge ya̰l ne.
13A bar ta ndwara, a ndal ta koo, a zat ta.
14Ne dulwak sone ge bama ne, a dwat sone kerra ɗaɗak,
a ka e naa ke gool.
15Ne pe no, burmiya ge nama ne mbo kat tukcuk,
baŋ helo, nama pe mbo pur uzi, a̰me mbo gwan kat ne nama pe to.
Kaŋ ma ge Bage ɗiŋnedin ne kwane nama
16Kaŋ ma ya go myanaŋgal ge Bage ɗiŋnedin ne kwane nama,
ko ɓyalar ge na dulwak ne sḛ́ nama sen ma:
17ndu ge jegreya, ne wak ge ne kun hale,
ndu ge ne hun siya baŋ ɗaɗar,
18dulwak ge ne dwat ke ya̰l,
koo ge ne har tene mbo ke ya̰l,
19ndu ge ne ke sayda ge hale,
ndu ge ne tol gool ná vya ma buwal zi me.
Yuwaleya ne voɗom pe
20Mbi vya, za̰ yuwaleya ge mo bá ne,
dó hateya ge mo ná ne uzi to.
21Koy nama mo dulwak zi,
kage nama mo ka̰l zi.
22A mbo ka ɗame mo mo swaga mborra ma go,
a mbo koy mo mo swaga fiya go,
swaga ge mo ne kore digi, a mbo ka yuwale mo.
23Ago wak honna ma dimma ne ɗuli go,
eya ma dimma ne kwaya̰l go.
Yuwaleya ma ne mḛreya ma koy naa viya̰ ge ndwara go.
24A mbo koy mo ne gwale ge sone tok go,
ne wak tuli ge gwale ge ɗogle ne go.
25Mo laar wa̰ na ne na doŋ kale pe to,
Ya̰ tene laseya ne na ndwara ge ne ndil swaga ta to.
26Mbo gwale kaya ta,
mo ban bware ge ndwara yat kaŋzam baŋ,
Amma mbo gwale ge ndu ne ta, mo ban mo o̰yom.
27Ndu da ne pool abe ol na ba̰r zi
be ge na ba̰r til to ɗaa?
28Ndu da ne pool mbo ol wak yeŋgel pal,
be ge na koo til to ɗaa?
29A go no ne ndu ge ne ɓan ne na kon gwale.
Ndu ge ne tat na, mbo woɗege be ɓol mḛreya to to.
30Ndu ge ne sel kaŋ zamma ne hun na kyamal pe,
a sen na to.
31Kadɗa a wan na ya, mbo pot kaŋ mbe pal ndwara ɓyalar,
mbo hon na kaŋ ge ne na yadiŋ ma pet.
32Ndu ge ne fí ne na kon gwale, na pala ne zi to,
a ndu ge ne ɓyare ban tene, ke go mbe ne.
33Ndu mbe ɓol jwaŋ ma ne saaso,
na saaso mbe vyale ne na pala zi to.
34Yil é ndu son julili pore,
na dam gele tene go, kwa ndu a̰se to.
35Vin ame kaŋ potɗa to,
ko a ho̰ na bobo ma zuliya bindik puy, gwan ame nama to.
Currently Selected:
Fare sḭ ma 6: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
