Fare sḭ ma 8
8
Tolla ge zwama ne
1Te be zwama tol swaga ne to’a?
Te be ɗalla oy swaga ne to’a?
2Mḛ ya swaga haal digi viya̰ kiya̰r go,
ge viya̰ ga̰a̰r go.
3ge viya̰ ga̰l ge suwal ne go,
ge viya̰ wak pal, ka ndage na ka̰l oyya:
4Mbi tol aŋ ge pateya ma,
mbi oy naa pet.
5Ge be kwa fare jwap to ma, hate me fare kwarra,
ge dale ma, hate me ɗalla.
6Za̰ me, mbi jan fare ge kwaɗa,
mbi jan fare ge ɗeŋger.
7Ago mbi wak jan fare ge fareba,
fare ge seŋgre ndage ne mbi wak zi to.
8Fare ge dosol ma ndage ne mbi wak zi ne,
fare ge hale, ko ge boge naa ne zi to.
9Ndu ge ɗalla ɓol go mbi fare ma jwap,
ndu ge ne kwarra ɓol go mbi fare ma dosol.
10Ame me mbi hateya ma golgo, ge aŋ ɓol bware,
Ɓyare me kwarra pe golgo, ge aŋ ɓyare dinar ge siŋli.
11Zwama waɗe kaŋ ge siŋli ma waɗe,
kaŋ ge mo laar ne wan na ma pet ge mbyat ne na to.
12Mbi zwama, mbi swaga katɗa ya fare kwarra zi,
mbi ɓol kwarra ya kwa fare buwal varseya zi.
13Sya Bage ɗiŋnedin vo, a sen sone,
Pala ga̰l, ne jegreya, ne viya̰ ge ke sone,
ne wak ge kun hale, mbi kwane nama kwane.
14Yuwaleya ma ne zwama a mbi ne ma ne,
mbi fare kwarra ne, pool mbi ne ne me.
15Da ne mbi ta gan ma ke muluk no,
naa ge kun sarya ma kun sarya ne na viya̰ go no me.
16Da ne mbi ta naa ga̰l ma ke muluk no,
naa ge pool ma, ɓanna ne naa ge ne kun sarya ge dosol ma pet me.
17Mbi laar wan nama ge nama laar ne wa̰ mbi ma,
nama ge ne ɓyare mbi ma ɓol mbi ɓol.
18Kaŋ ɓolla ma ne hormo,
poseya ne kaŋ kwaɗa ma ne dosol ya mbi tok go.
19Kaŋ ma ge mbi ne hon waɗe dinar ge siŋli ma waɗe,
kaŋ ge mbi ne hon waɗe fool kaal ge siŋli waɗe.
20Mbi mbo ya viya̰ ge dosol go,
ge viya̰ pul ge ɗeŋger go.
21ndwara hon naa ge nama laar ne wa̰ mbi ma joo,
ndwara wi nama yàl ma ne kaŋ kwaɗa ma.
22Bage ɗiŋnedin dó mbi na kaŋ dolla ma ndwara zḛ,
na kaŋ ge na ne ke ge zaŋgal ma ndwara zḛ pet.
23E mbi da ne pe dolla cecew ya day,
tek ge gale ne be ge ke dunya.
24Swaga ge mbi ne tó, maŋgaɗam ga̰l yuwam gale ne go to,
mam ma gale ne maŋgaɗam ma pul go to.
25Mbi tó njal ge ga̰l germem ma
ne njal ge sore busur ma ndwara zḛ.
26Bage ɗiŋnedin gale ne be ge dol suwar, ko swaga a̰me,
gale ne be ge ke kuci ndwara ɗu to pet.
27Swaga ge ne dó pḭr, mbi ne go,
ko swaga ge ne kḭri ɓanna ge pḭr ma ne suwar wak.
28swaga ge ne kote pḭr ma digi,
ko swaga ge ne ho̰ mam ge ne digi ma pool go,
29swaga ge ne kḭri maŋgaɗam ga̰l yuwam warbe,
swaga ge ne ho̰ mam ma wak go nama kale na pala to,
swaga ge ne dó suwar pe go,
30mbi ka na ziyar go dimma ne bage ne kwa kaŋ sinna go,
mbi ka ke na sḛ tuli dam ne dam.
31Swaga ke vḛso suwar ge na sḛ ne dó na pal,
mbi za̰ tuli ya naa dasana ma buwal zi.
32Mbi vya ma, se no, za̰ me mbi,
Wak busu ya nama ge ne koy eya ma pal.
33Za̰ me yuwaleya, há me zwama,
ndi me na solom to.
34Wak busu ya nama ge ne za̰ mbi ma pal,
ge nama ge ne mḛ mbi viya̰ wak pal ɗaɗak ma pal,
ne nama ge ne koy mbi zok wak ma pal.
35Ago ndu ge ne ɓol mbi, ɓol ndwara.
Ɓol kwa a̰se ge Bage ɗiŋnedin ne.
36Ndu ge ne saŋge mbi na go̰r, ke tene yál,
ndu ge na laar ne wa̰ mbi to, hun tene.
Currently Selected:
Fare sḭ ma 8: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
