Fare sḭ ma 5
5
Abe tene uzi ne gwale ge voɗom ta
1Mbi vya ke haŋgal ne zwama ge mbi ne hon mo,
só mo togor ame yuwaleya ge mbi ne hon mo.
2Go no, mo ba koy mbi yuwaleya ma,
mo ba kwa fare janna me.
3Ago gwale ge ndu ne wak jan fare tuli da ne daaram go,
na wak hal duur se dimma ne num go#2:16, 7:6-27, Bag 7:26..
4Amma pe aya ge na ne a caŋgay ne,
a dimma ne kasagar ge ɗel azi go.
5Na kaŋ kerra ma gene naa mbo siya zi,
mbo ne naa taal ge siya ma ne se.
6Her viya̰ ge ne gene naa mbo ndwara zi to,
sele ne viya̰ go uzi be ge wan pe to.
7Se no, mbi vya ma za̰ me mbi,
dó me aŋ pala uzi ne fare ge mbi ne jan aŋ ma ta to.
8Abe tene uzi ne gwale hir ge go mbe no ta,
Mbo ya na viya̰ wak pal to.
9Na kaage na ɓya̰ hormo ge mo ne naa ge ɗogle ma tok go to,
mo del ma á ndu ge dulwak sone tok go to me.
10Na kaage naa ge ɗogle ma huri ta ne mo kaŋ ma to,
mo kaŋ ɓolla ma dé ndu ge mo ne kwar na to tok go to.
11Na kaage ne go̰r go, mo á mo pool tandaŋ ɗo,
mo gá sun tene baŋ to.
12na kaage mo jya̰ tene go: «Mbi te sḛ́ yuwaleya kyaɗa ɗaa?
Mbi te kuri mḛreya kyaɗa ɗaa?
13Mbi te za̰ mbi naa ge hateya ma wak to kyaɗa ɗaa?
Mbi te so mbi togor ame mbi naa ge hateya ma fare to kyaɗa ɗaa?
14Ndi mbi ne det ja yál ge ɓaŋlaŋ zi,
ge mbi naa ma buwal zi no.»
Mo laar wa̰ mo gwale ɗeŋgo
15Njó mam ge mo tub ne ɗeŋgo
na ge ne só ne mo tub se.
16Ya̰ mo mam só zum ya,
ko ɓul buwal pe zum ya to.
17Na ka ne mo pe ɗu kikit,
be ɓanna ne ndu ge ɗogle to.
18Wak busu ka mo mam pal
Za̰ tuli ne mo gwale ge pul soy.
19Ŋgay mo bagɗe laar wanna,
jya̰ mo gomol fare ge abe na sḛ ma,
za̰ tuli na ko̰o̰l zi ɗaɗak,
ho̰ tene na ɗeŋgo.
20Mbi vya, mo te ya̰ tene gwale voɗom tok go kyaɗa ɗaa?
Mo te abe gwale ge ɗogle mo sḛ zi kyaɗa ɗaa?
21Ago Bage ɗiŋnedin kwa kaŋ kerra ge naa dasana ma ne kwa,
kaŋ kerra ge nama ne ma pet, a ya na ndwara go.
22Ya̰l ge ndu ge sone ne wan na wan,
na sone ma fan na digi dimma ne faɗe ne wan kaŋ go.
23Ndu mbe mbo su ne na ne ɓó mḛreya to pe,
dale ge na ne ge gḛ mbo ban na.
Currently Selected:
Fare sḭ ma 5: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
