Fare sḭ ma 4
4
Ndu dasana mbya kat zwama
1Vya ma, za̰ me yuwaleya ge bá ne,
e me aŋ haŋgal, go no aŋ ba ɓol ɗalla.
2Ago mbi hon aŋ yuwaleya ge kwaɗa,
kuri me mbi eya ma to.
3Mbi me, mbi ka vya ge kwaɗa ge mbi bá ne,
mbi ná laar wa̰ mbi dimma ne mbi ne ɗu kikit go.
4Mbi bá hate mbi go:
«E mbi fare ma mo dulwak zi kwaɗa,
koy mbi wak honna ma, mo mbo kat ne ndwara.
5Ame zwama, ame fare kwarra, vyale nama to,
abe tene uzi ne fare janna ge mbi ne ma ta to.
6Sḛ́ zwama to, mbo koy mo,
mo laar wa̰ na, mbo mbar mo.
7Ge mo dé ya kat zwama, e pe ame zwama,
ba̰ mo kaŋ ma uzi pet, ɓyare ɗalla pe.
8Mo laar wa̰ na, mbo her mo pala digi,
kadɗa mo abe na ya mo ta zi, mbo e mo ɓol hormo.
9Mbo e balme ge siŋli mo pal,
mbo hon mo jum ge hormo.»
Abe tene uzi ne sone ta, a zwama ne
10Mbi vya, za̰ mbi, koy mbi fare ma,
mo mbo ke kaal ta ta.
11Mbi hate mo viya̰ ge zwama ne,
mbi ŋgay mo viya̰ ge kat dosol.
12Go no, swaga mborra go, mo mbo vwal digi mokɗok to,
swaga soya go, mo koo mbo syal to me.
13Mḛ mo koo yuwaleya ge mo ne ɓó pal diŋ, ka̰ mo tok digi to,
koy na, a na mbo e mo katɗa ne ndwara ne.
14Bole naa ge sone ma kaŋ kerra ma to,
kare naa ge ya̰l ma pe to.
15Cagre tene uzi, he nama koo pul to,
abe tene uzi ne nama ta, he mo viya̰ mborra.
16Ago, kadɗa a be ke kaŋ ge sone to, nama ndwara wan dam to
dam abe ne nama ndwara zi uzi, kadɗa a be hun siya to.
17A zam kaŋ ge bama ne ɓo na ne sone kerra zi,
a njot oyo̰r jiya̰l ge bama kaŋ maŋgeya ma ne.
18Kaŋ kerra ge naa ge dosol ma ne a dimma ne kwaya̰l ge swaga ɓaya ne go,
ben ya ɗiŋ swaga abe ya uzi kwaya̰l karaŋ.
19Naa ge sone ma viya̰ pul sebeya pisil ɗeɗek
a kwa kaŋ ge ne mbo syal bama koo to.
20Mbi vya, ke haŋgal ne mbi fare janna ma,
so mo togor za̰ mbi fare janna ma.
21Vyale nama uzi to,
koy nama mo dulwak zi.
22Hon naa ge ne ɓol na ma ndwara,
hon naa ge ne koy na ma duur halas.
23Koy mo dulwak waɗe kaŋ ma pet,
ago kat ne ndwara ge mo ne mbo da ne na zi.
24Ndage fare janna ge hale ne mo wak zi uzi,
ya̰ or naa uzi.
25He mo fare mo ndwara zḛ,
e mo ndwara zḛ temel kiɗid
26Dwa ge viya̰ ge mo ne ɓyare her na pal kwaɗa,
mo ba ɗage dol tene na go mborra ne dulwak ɗu gale#Ibr 12:13..
27Sele tok magul pal, ko tok matoson pal to,
abe tene uzi ne sone ta.
Currently Selected:
Fare sḭ ma 4: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
