Fare sḭ ma 3
3
Sya Dok vo a zwama ne
1Mbi vya, vyale mbi eya ma to,
koy mbi wak honna ma mo dulwak zi.
2A mbo don mo dam ma zḛ twala,
a mbo hon mo swaga katɗa ge tuli ne halas me.
3Koy kwa naa a̰se ne fareba,
ka̰ nama mo ka̰l zi ne bayir go,
koy nama mo dulwak zi.
4Mo mbo ɓol kwa a̰se ne doreya ne Dok ta,
ne naa dasana ma ta me.
5Ka̰ mo saareya ma Bage ɗiŋnedin pal ne dulwak ɗu,
ya̰ tene mo kwarra pe go to.
6Mo kaŋ kerra ma zi pet, dwa na pal,
Na sḛ mbo ka ɗame mo.
7Ndi tene go mo zwama to,
amma sya Bage ɗiŋnedin vo, abe tene uzi ne sone ta#Rom 12:16..
8Go no, mbo kat tuli ge mo duur ne,
ne halas ge mo kal wak ma ne.
9Uware Bage ɗiŋnedin ne kaŋ kwaɗa ge mo ne ma,
ne kaŋ wak ge zḛ ge ge mo kaŋ kyarga ne ma,
10mo hal ma mbo wi ne kaŋ zam,
mo tool ma mbo wi ne oyo̰r jiya̰l me.
11Mbi vya, kuri yuwaleya ge Bage ɗiŋnedin ne ma to,
sḛ na fare janna ma to.
12Bage ɗiŋnedin mḛre ndu ge na laar ne wa̰ na,
dimma ne bá ne mḛre na vya ge laar wanna go#Ayu 5:17, 1Kor 11:32, Ibr 12:5-6..
Zwama siŋli waɗe dinar
13Ndu ge ne ɓó zwama,
ko ndu ge ne ɓó kwarra, da ne laar saal.
14Ago kaŋ ɓolla ge ne na zi
waɗe kaŋ ɓolla ge ne bware zi waɗe,
na mam waɗe ge dinar ne waɗe.
15Zwama waɗe kaŋ ge siŋli ma waɗe,
kaŋ ge mo laar ne wan na ge mbyat ne na to.
16Mbar ndu dasana katɗa kaal tata suwar pal,
hon na kaŋ ɓolla ma ne hormo.
17Na viya̰ pul ma a viya̰ pul ge kwaɗa ma ne,
na koo pul ma pet a halas.
18A uwara ge ndwara ne
ne nama ge ne ke mborra na pal ma pe,
nama ge ne mbarge ta ne na ma, a da ne laar saal.
19Bage ɗiŋnedin dó suwar pe da ne na zwama,
kulbi pḭr ne digi da ne na kwarra.
20da ne na kwarra ta maŋgaɗam ga̰l ma pul fyaɗe se no,
pḭr swar mam ne digi zi ya suwar pal no me.
Bage ɗiŋnedin koy ndu ge zwama koy
21Mbi vya, do mo pala ne zwama ma ne fare buwal varseya ma ta uzi to.
22A mbo hon mo swaga katɗa ge kwaɗa.
23Go no, mo mbo ka mbo mo swaga halas,
kaŋ a̰me ge syal mo koo mbo kat to bat.
24Mo mbo ka fi dam be vo,
dam fiya ge mo ne mbo kat tuli.
25Sya kaŋ ge ne tan mo tukcuk vo to,
sya yál ge naa ge sone ma ne zwal na ya mo pal vo to me.
26Ago Bage ɗiŋnedin mbo kat bage koy mo,
mbo iyan mo koo uzi ne faɗe ge daage go.
Ndu ge zwama laar wan na kon wan
27Kadɗa mo da ne pool,
tele tene be ge ke ndu ge woɗegeya kwaɗa to.
28Kadɗa mo da ne kaŋ ge honna,
kaage mo jan mo kon go, na gwa̰ ya kwap gale mo ba ɗage hon na na to.
29Dwa sone mo kon pal to,
ne jo̰ ka swaga halas ne mo ta.
30Kadɗa ndu be ke mo sone to,
ke gool ne na baŋ go ɗar to.
31Ke yil ne ndu ge birtiŋ pe to,
bole na kaŋ kerra ma to.
32Ago Bage ɗiŋnedin ndil naa ge sone ma kaŋ senna,
amma na laar wa̰ naa ge ɗeŋger ma wan.
33Wak vḛneya ge Bage ɗiŋnedin ne ya naa ge sone ma yàl pal,
amma na wak busu ya naa ge dosol ma yàl pal.
34Cot tene ne naa ge ne cot na ma cot,
amma naa ge suul ma kwa nama a̰se#Yak 4:6, 1Bit 5:5..
35Joo ge naa ge zwama ma ne a hormo,
amma joo ge naa ge dale ma ne a saaso.
Currently Selected:
Fare sḭ ma 3: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
