Ezekel 34
34
Fare waageya ga̰l ge Israyela ne ma pal
1Bage ɗiŋnedin jan mbi go: 2«Mo ndu dasana, waage fare ga̰l ge Israyela ne ma pal, waage nama go, Bageyal Bage ɗiŋnedin jan go: Woo naa ge koyya ge Israyela ne ma, ge ne ka ne koy ta pe ma! Naa ge koy gii ma te koy be gii ma to’a? 3Aŋ ɗe, aŋ njot gii ma pam, aŋ ka kan ba̰r ge gii mbe ma susu ma ne, aŋ ka vyan ge so̰o̰l ma zamma. Amma aŋ koy gii mbe ma to bat. 4Aŋ be biri ge taŋgay ma to, aŋ be zon ge moy ma to, aŋ be twar ge koo ne há ma koo ma digi to, ge ne ya̰me ma, aŋ be mbo gwan ne nama ya to, ge ne ba̰ ma, aŋ be mbo ɓyare nama pe to, amma aŋ ke muluk nama pal da ne pool. 5Ne bage koyya to pe, gii ma ɓarse ful zi sasar, a gá kavaar ma kaŋzam. 6Mbi gii ma gá ya ya̰meya njal ge haal ma, ne njal ge sore busur ma pala digi ya, a ɓarse ya se sasar ful ma pul zi ya, ndu a̰me ge mbo ɓyare nama pe ya to. 7Ne no pe, naa ge koyya ma, za̰ me fare ge Bage ɗiŋnedin ne. 8Ne jo̰ mbi da ne ndwara, ka̰l ge Bageyal Bage ɗiŋnedin ne. Ne jo̰ mbi gii ma gá ya kaŋ paal, ne bage koyya to pe, a gá ya kaŋzam ge kavaar ma ne. Mbi naa ge koyya ma ge mbo ɓyare gii ma to, a ka da ne koy ta pe, amma a koy mbi gii ma to.
9Ne no pe, naa ge koyya ma, za̰ me fare ge Bage ɗiŋnedin ne. 10Bageyal Bage ɗiŋnedin jan go: Ndi, mbi mbo saŋge mbi ndwara naa ge koyya mbe ma pal, mbi mbo ame mbi gii ma ne nama tok go, mbi mbo tele nama be ge koy gii ma. Go no, a mbo gwan kat ne koy ta pe to bat, mbi mbo harge mbi gii ma ne nama wak zi ya uzi, a mbo gwan gá nama kaŋzam to bat.
11Bageyal Bage ɗiŋnedin jan go: Ndi, mbi mbo ɓyare mbi gii ma pe, mbi mbo dol mbi ndwara nama pal. 12Dimma ne bage koy gii ma ne ɓyare na gii ma pe swaga ge a ne ɓarse se go go, go no me, mbi mbo ɓyare mbi gii ma pe, mbi mbo kote nama ya digi, ne swaga ge daage pet ge a ne ɓarse se dam pḭr sebeya go. 13Mbi mbo abe nama ne pehir ge ɗogle ma buwal zi ya zum, mbi mbo kote nama ne suwal ma ya digi, mbi mbo gene nama ya nama suwal go, mbi mbo koy nama njal ge Israyela ne ma pala digi, ne baal pul ma se, ge swaga ge ne mbya katɗa ge suwal ne ma go pet. 14Mbi mbo koy nama ge swaga zám ge kwaɗa go. Nama swaga zám mbo kat njal ge haal ge Israyela ne ma pala digi. A mbo ka fi sobre ge kwaɗa zi, a mbo zam zám ge kwaɗa ge njal ge Israyela ne ma pala digi. 15A mbi sḛ, mbi mbo ka koy mbi gii ma ne, mbi mbo ka e nama fiya se ne me, ka̰l ge Bageyal Bage ɗiŋnedin ne. 16Gii ge ne ba̰ ma, mbi mbo ɓyare nama pe, ge ne ya̰me ma, mbi mbo gwan ne nama ya, ge nama koo ne há ma, mbi mbo twar nama digi, ge moy ma, mbi mbo zon nama, ge so̰o̰l ma, ne ge pool ma, mbi mbo hun nama uzi, mbi mbo koy nama wak yuwaleya pal.»
Dok mbo sya na ɓase ma ko̰r
17Aŋ ge mbi gii ma ɗe, ka̰l ge Bageyal Bage ɗiŋnedin ne: Mbi mbo kat bage kun sarya gii vya ma, ne gamla ma, ne bemjere ma buwal zi. 18Zamma ge aŋ ne zam zám ge kwaɗa aŋ ndi na kaŋ ge be a̰me pe to ɗaa? Aŋ zam, pe ge ne gá se, aŋ ndal nama aŋ koo zi. Aŋ njot mam ge ɗermel, aŋ ka vuuɗi pe ge ne gá digi. 19A go no, mbi gii ma zam zám pe ge aŋ ne ndá nama aŋ koo zi no, a njot mam ge aŋ ne vuuɗi na digi no me. 20Da ne pe no, Bageyal Bage ɗiŋnedin jan aŋ no go, mbi mbo kat bage kun sarya gii ge so̰o̰l ma ne ge do̰yya ma buwal zi. 21Ne jo̰, aŋ ɓya̰ gii ge moy ma ne aŋ ziyar ma, ne aŋ ganwak pala ma, aŋ mbá nama ne aŋ kḭḭm ma no ɗiŋ aŋ ɓarse nama se no sasar ɗe, 22Mbi mbo má mbi gii ma, a mbo gwan gá kaŋ paal to, mbi mbo kat bage kun sarya gii vya ma buwal zi. 23Mbi mbo e bage koyya a̰me ɗu kikit mbi gii ma pal, mbo koy nama, bage koyya mbe mbo kat mbi dore Dawda. Na sḛ mbo koy nama, mbo kat nama bage koyya. 24Mbi Bage ɗiŋnedin, mbi mbo kat nama Dok, mbi dore Dawda mbo kat nama gan me. A mbi Bage ɗiŋnedin jya̰ ne. 25Mbi mbo ke wak tuli ne nama ndwara go, nama ka halas. Mbi mbo burmi kavaar ga̰l ma ne suwal diŋ uzi, a mbo gá katɗa be fare ful pul zi, a mbo gá dwamma murum ma zi. 26Mbi mbo hon nama mbi wak busu ge njal ziyar ma go pet, mbi mbo e mam swarra na swaga ma go tetem, mbo kat mam swarra ge kwaɗa. 27Uwara ma mbo tol, suwar mbo don kaŋ, a mbo kat halas bama suwal go. Swaga ge mbi mbo hál nama jug ya uzi, mbi zur nama ne naa ge ne e nama ke bama temel mo̰r ma tok go, a mbo kwa go mbi Bage ɗiŋnedin ne. 28A mbo gwan gá kaŋ paal ge pehir ge ɗogle ma ne to bat, kavaar ma mbo gwan wan nama to bat, a mbo gá katɗa halas, ndu a̰me ge gwan iigi nama mbo kat to bat. 29Mbi mbo hon swaga gaaso ge don kaŋ gḛ, kyamal mbo gwan ke nama suwal diŋ to bat, a mbo gwan ɓol wak sáso ge pehir ge ɗogle ma ne to bat. 30A mbo kwa go, mbi Bage ɗiŋnedin, mbi nama Dok ne, mbi dagre ne nama. Pehir ge Israyela ne, a mbi naa ma ne, ka̰l ge Bageyal Bage ɗiŋnedin ne.
31Aŋ naa dasana ma, aŋ mbi gii ma ne, gii ge mbi ne koy nama ma ne. Mbi aŋ Dok ne, ka̰l ge Bageyal Bage ɗiŋnedin ne.
Currently Selected:
Ezekel 34: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
