Ezekel 33
33
Ezekel bage huli swaga ne
(3:16-21)
1Bage ɗiŋnedin jan mbi go: 2«Mo ndu dasana, jya̰ mo ɓase ma go: Kadɗa mbi gene pore ja suwal a̰me pal, naa ge ne suwal mbe go ma, tal ndu a̰me ne bama buwal zi, ndwara e na bage huli swaga. 3Kadɗa ndu mbe kwa naa ge ho̰l ma ja mbo ya det suwal, sṵ tṵ digi, ndwara waage ɓase ma. 4Kadɗa ndu a̰me za̰ tṵ sunna ya, ndil na solom. Kadɗa pore zam na ya, na siya mbo kat na pal. 5Ago za̰ tṵ sunna, ndi na solom. Na siya mbo kat na pal. Amma ndu ge ne ame fare mbe ya na dulwak zi mbo má tene. 6Amma kadɗa bage ne huli swaga kwa naa ge ho̰l ma ja mborra ya, sun tṵ digi to, naa kat ne kwara to. Kadɗa pore zam ndu a̰me ya ne nama buwal zi, ago da ne ya̰l ge bage huli swaga ne ta, a hṵ ndu mbe no. Mbi mbo ele na siya pe ne ndu mbe tok go.
7Mo ndu dasana, mbi e mo bage huli swaga ge Israyela vya ma ne. Mo mbo ka za̰ fare ge ne ndage ne mbi wak zi, mo ba ka waage nama na. 8Kadɗa mbi jan ndu ge sone ya go, a ŋgat na mbo su. Amma kadɗa mo waage ndu ge sone mbe go, na ya̰ na kaŋ kerra ge sone mbe ma uzi to ɗo, su na sone zi, mbi mbo ele na siya pe ge mo tok go. 9Amma kadɗa mo waage ndu ge sone mbe ya go, na abe tene uzi ne na kaŋ kerra ge sone ma go, kuri be ge saŋge ya se ne na kaŋ kerra ge sone mbe ma go, mbo su na ya̰l zi, amma mo mbo má tene.»
Ndu ge sone ge ne gwan’a Dok ta mbo má
10«Mo ndu dasana, jya̰ Israyela vya ma go, aŋ jan go: ‹I sone ma ne i ya̰l ma ya i pal. I hat ya seŋgre, i ke dḛ gyana ɗo, i ba kat ne ndwara ɗaa?› 11Jya̰ nama go: Ne jo̰ mbi da ne ndwara, ka̰l ge Bageyal Bage ɗiŋnedin ne. Siya ge ndu ge sone ne ke mbi sḛ tuli ɗaa? Mbi te ɓyare go, na saŋge ya se ne na kaŋ kerra ma go, na ka ne ndwara to’a? Saŋge me ya se, saŋge me ya se ne aŋ kaŋ kerra ge sone ma go. Israyela vya ma, aŋ te ɓyare siya gyana ɗaa?»
12Mo ndu dasana, jya̰ mo ɓase ma go: «Swaga ge ndu ge dosol ne ke sone ya, dosol ge na ne ge zaŋgal mbo má na to. Amma swaga ge ndu ge sone ne ya̰ na sone ya be kerra, na sone ge zaŋgal mbo ban na to bat. Swaga ge ndu ge dosol ne ke sone, na dosol mbe mbo e na kat ne ndwara to bat. 13Kadɗa mbi jan ndu ge dosol ya go, a ŋgat na mbo má. Amma kadɗa na vyale tene ya na dosol pe, gá ke ya̰l, na dosol mbe ma pet a mbo vyale nama. Mbo su ne ya̰l ge na ne ke pe. 14Kadɗa mbi jan ndu ge sone ya go, a ŋgat na mbo su. Kadɗa na saŋge tene ja se ne na sone zi ya, gá ke mborra wak yuwaleya pal ne dosol pal, 15gwan ne kaŋ ge a ne dusi na tok go digi, pot kaŋ ge na ne maŋge digi, gá ke mborra eya pal, katɗa na mbo mborra ge eya ma pal, gwan ke ya̰l to bat, a ŋgat mbo kat ne ndwara, mbo su to bat. 16Sone ge na sḛ ne ke ma mwaɗak a mbo vyala nama uzi, ne jo̰ gá ke mborra wak yuwaleya pal, ne dosol pal, na sḛ mbo kat ne ndwara.
17Mo ɓase ma jan go: ‹Kaŋ kerra ge Bageyal ne ma ne na viya̰ go to!› Te be aŋ kaŋ kerra ma ne bama viya̰ go to ne to’a? 18Swaga ge ndu ge dosol ne ya̰ dosol ge na ne ya be kerra, gá ke ya̰l, mbo su na zi. 19Swaga ge ndu ge sone ne ya̰ na sone kerra, gá ke mborra wak yuwaleya pal ne dosol pal, ne nama pe, mbo kat ne ndwara. 20Aŋ jan go: ‹Kaŋ kerra ge Bageyal ne ma ne na viya̰ go to!› Israyela vya ma, mbi mbo kun ndu ge daage sarya na kaŋ kerra ma pal.»
Suwal Israyela mbo burmi uzi
21Del wol para azi#33:21 Ne swaga ge ɗogle ma zi, njaŋge go del ge wol para ɗu go. Ndi Irm 39:2. go̰r ge i paal ne go, dam anuwa̰y ge saba ge wol ne go, ndu a̰me ge ne ɓu zum ne Ursalima ya, mbo ya mbi ta, waage go: «Suwal detɗa ya!» 22Dam ɗu zḛ ge ndu mbe ne mbo ya ɓol mbi, na gasamal go, Bage ɗiŋnedin ŋgay pool ge na ne mbi ta, hage mbi wak digi no. Swaga ge ndu mbe ne mbo ya ɓol mbi na kwap cya̰wak go, mbi wak hage ya digi, mbi ne ŋgeleya to.
23Bage ɗiŋnedin jan mbi go: 24«Mo ndu dasana, naa ge ne gá ne suwal ge ne burmi uzi, ge Israyela ya ma jan go: ‹Abraham ka ɗu kikit ame suwal mbe joo no mwaɗak. Se no, i gḛ ceɗed, a ho̰ suwal mbe joo i.› 25Ne no pe, jya̰ nama go, Bageyal Bage ɗiŋnedin jan go: Aŋ zam duur ma da ne bama swama ma jyan, aŋ ka hé aŋ ndwara ma digi uware aŋ kaŋ sḭḭm ma, aŋ ka hun siya ma. Aŋ ame suwal mbe joo ma̰ gyana ɗaa? 26Aŋ e aŋ saareya ma ya aŋ kaŋ pore ma pal, naa zaab ma ke kaŋ ge seŋgre kakatak ma, naa sonmo ma ka fi ne bama kaam ma gwale ma. Aŋ ame suwal mbe joo ma̰ gyana ɗaa? 27Jya̰ nama go, Bageyal Bage ɗiŋnedin jan go: Ne jo̰ mbi da ne ndwara, naa ge ne suwal ge burmiya ya ma mbo su pore zi, naa ge ne ful zi ma mbi mbo hon nama kavaar ma, a mbo zam nama, naa ge ne gulum ga̰l zi ma, ne njal pṵṵl zi ma, mbogom mbo hun nama. 28Mbi mbo saŋge suwal mbe babur viŋ, mbi mbo á pool ge ne ka hon nama pala ga̰l uzi. Njal ge Israyela ne ma mbo gá joo pala baŋ, ndu a̰me mbo gwan kale nama go to. 29Swaga ge mbi ne mbo saŋge suwal ya babur viŋ ne nama kaŋ kerra ge seŋgre kakatak ma pe pet ɗe, a mbo kwa go mbi Bage ɗiŋnedin ne.
30Mo ndu dasana, mo naa ma far ne mo bama gulum kiya̰r ma go, ne bama viya̰ wak pala ma go, ta buwal zi janna go: ‹Mbo me nee mbo za̰ fare ge ne ndage ne Bage ɗiŋnedin wak zi ya!› 31Mbi ɓase ma mbo kote ya, a mbo kat mo ndwara se, a mbo za̰ mo fare ma, amma a ke temel nama pal to bat, ago a jan fare ge ke ta sḛ tuli ma, a yan kaŋ ge bama dulwak ne e ne na pal ma pe. 32Mo ne nama ta dimma ne kaŋ mballa ge ne ke naa sḛ tuli go, ko ne ka̰l ge ne mbal kaŋ tuli go. A za̰ mo fare ma, amma a ke temel nama pal to. 33Swaga ge mo fare ge mo ne waage nama wak ne mbo wi ya, ndi nama wak ne wi no, a mbo kwa go anabi a̰me ka bama buwal zi.»
Currently Selected:
Ezekel 33: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
