Ezekel 23
23
Kaya kerra ge Samariya ma ne Ursalima ne
1Bage ɗiŋnedin jan mbi go: 2«Mo ndu dasana, ndi, naa zaab ma azi, ná ge ɗu vya ma, 3swaga ge a ne ka kale, a mbo ke kaya suwal Masar ya. Yago, a wa̰ nama pam ma, a tage nama pam ma tek a gale ne kale. 4Ge ga̰l dḭl Ohola#23:4 Ohola: Na sḭ go, na gúr., ge jyale dḭl Oholiba#23:4 Oholiba: Na sḭ go, mbi gúr ya na diŋ. me. A ka mbi ne ma, a tó vya ge sonmo ma ne ge zaab ma. Ohola a Samariya, Oholiba a Ursalima me. 5Amma Ohola mbo ke kaya, ne jo̰ na sḛ mbi ne ne puy ɗe, na laar wa̰ na kondore ma, ndwara go, na naa ge gulum pala, Asiriya ma. 6A ka̰ ba̰r ge káál sasaw, a naa ge ne dol bama ndwara ne suwal pal ma ne, ne naa ga̰l ma ne me. Nama sḛ ma pet, a ka bool ge dore ma, naa ge ne kwa tisi njaŋgeya ma. 7Ohola ho̰ tene ke kaya ne ga̰l ge Asiriya ma ne ma pet, ka olbeya nama pe go. Há tene seŋgre swaga ke nama kaŋ sḭḭm ma mo̰r go. 8Be ya̰ na kaya kerra ge na ne é pe ke na ne suwal Masar ya day uzi to. Ge kale ge na ne zi, a ka fi ne na, a ka wan na pam, a ka ke bama kaya ne na. 9Da ne pe, mbi ɓya̰ na na kondore ma tok go no, ge Asiriya ge na laar ne wa̰ nama ma tok go no. 10A ya̰ na swala, a pá na vya ge sonmo ma ne ge zaab ma no, a hṵ na uzi ne kasagar no. Gá kaŋ ŋgayya a̰me ne naa zaab ma pe, a go no, a kṵ sarya na pal no.
11Na ná vya ge gwale Oholiba kwa na, amma ene ge na ne zi, na sone gwan waɗe ge na ná vya ne waɗe, na kaya kerra gwan waɗe na waɗe. 12Na sḛ uwale, ke ene ne Asiriya ma pe, ndwara go, naa ge ne dol bama ndwara ne suwal pal ma, ne naa ga̰l ma, na naa ge gulum pala ma, nama ge ne kan ba̰r ge siŋli ma, ge a ne kwa tisi njaŋgeya ma, bool ge dore gḛ ma. 13Mbi kwa go, na sḛ puy há tene seŋgre. Nama sḛ ma jwak, a hé viya̰ ge ɗu ge. 14Amma Oholiba gwan ke kaya waɗeya. Dam a̰me ɗu, kwa Kaldeya ma naa sonmo ma kḭḭm kḭḭriya gulum ma ta, vinna kaal, 15ne bit bama pul go, ne kadmul ma bama pala digi, nama sḛ ma pet, a ka dimma ne naa ge njaŋge tisi ma go, dimma ne Babilon ma ne bama suwal ge tolla go go. 16Swaga ge na sḛ ne kwa nama ne na ndwara, na laar hé nama no gaw, dó temel nama pal Kaldeya ya no. 17Babilon ma mbo ya fí ne na no, a há na seŋgre ne bama kaya kerra no. Swaga ge na sḛ ne há tene seŋgre ne nama go, saŋge kwane nama no. 18Na sḛ bḛ kaya kerra ge na ne zum waŋ, ya̰ swala ge na ne naa ndwara go waŋ. A go no mbi sḛ, mbi kwane na no dimma ne mbi ne kwane na ná vya go. 19Go no puy ɗe, na sḛ ka gwan ke kaya waɗeya, dimma ne na ne ka kerra kale ge na ne zi suwal Masar ya go. 20Na laar hé naa ge voɗom ma gḛ ge be to, nama ge nama vuwal dimma ne kwara vwal go, ge a ne kan suwam dimma ne tisi ma go.»
Mḛreya ge Ursalima ne
21«Mo gwan ja ke kaŋ ge seŋgre ge mo ne ka ke na ne mo kale ya day mbe, na ge masar ma ne ka wan mo pam ma ne tage mo pam ge mo gale ne kale jyan mbe. 22Ne no pe, Oholiba, Bageyal Bage ɗiŋnedin jan go: Mbi mbo saŋge mo kondore mbe ma ndwara ya mo pal, nama ge mo ne kwane nama mbe ma. A mbo mbo ne swaga ma ya pet mo pal. 23Babilon ma, ne Kaldeya ma pet, ne Pekod ma, ne Chowa ma, ne kowa ma, ne asiriya ma pet poseya ne nama, bool ge dore gḛ ma, pet naa ge ne dol bama ndwara ne suwal ma pal ma, ne naa ga̰l ma, ne naa ge pateya ma, ne naa ge a ne kwa tisi njaŋgeya ma pet. 24Ɓase ma mbo mwale ya mo pal ne pus pore ma pe hini hini, ne ɓiyaar ge ga̰l ma ne ge jabso ma, ne jum walam ma, a mbo ver mo ya zi, mbi mbo ben mo pe zum nama ta, nama sḛ ma mbo kun mo sarya bama eya pal. 25Mbi mbo ɗage ne mbi yil digi mo pal, mbi mbo ya̰ nama ke mo yál laar ol ge bama ne zi. A mbo kun mo vo̰r ma ne mo togor. Naa ge ne gá ya ma, a mbo hun nama ne kasagar, a mbo pál mo vya ge sonmo ma ne ge zaab ma, ge ne mbo gá ya ma, ol mbo ɗaabe nama. 26A mbo fage mo ba̰r ma ne mo ta, a mbo abe mo kaŋ ge pare tene ma. 27Mbi mbo tele mo be ge ke mo kaŋ ge seŋgre mbe, ne mo kaya kerra ge mo ne é ke na ne suwal Masar ya day mbe. Mo mbo gwan dol mo ndwara ɗwal nama pe go to, mo mbo gwan dwat ne suwal Masar to bat.
28Ago Bageyal, Bage ɗiŋnedin jan go: Ndi, mbi mbo ɓyan mo naa ge mo ne kwane nama ma tok go, ge naa ge mo o̰yom ne ɓyare nama to ma tok go. 29A mbo ke mo bama laar pal, a mbo abe mo kaŋ ge mo ne á tene ɓol nama ma mwaɗak. A mbo ya̰ mo pe swala, mo suli mbo gá naa ndwara go dimma ne gwale kaya go. A mo kaŋ kerra ge seŋgre ma, ne mo kaya kerra ma, 30ke mo kaŋ mbe ma ne. Mo mbo ke kaya pehir ge ɗogle ma pe ya, mo há tene seŋgre ne nama kaŋ sḭḭm ge yak ma no. 31Mo hé mo ná vya ge gwale koo pul, mbi mbo hon mo kop pore ge na sḛ ne njó na mo tok#23:31 Ago Ursalima mbo ɓol mḛreya ge Samariya ne ɓó na, ndwara go, a mbo pál na me dimma ne a ne pá Samariya go.#Isa 51:17,22, Irm 25:15-17,28, 49:12.. 32Bageyal, Bage ɗiŋnedin jan go:
Mo mbo njot kop pore ge mo ná vya ne njó na,
mbo kat ɗugul helek, ne fiyal dedet,
naa mbo man mo, a mbo cot mo,
ago kop mbe wiya tap.
33Mbo fere mo ne yál njotɗa,
a kop ge iigiya ne burmiya ne,
na ge mo ná Samariya ne mbe.
34Amma mo mbo njot na, mo á na,
mo mbo sul na mo kiya̰r zi,
na ɓaar ma mo vyan mo pam ma.
No a mbi sḛ jya̰ ne,
ka̰l ge Bageyal Bage ɗiŋnedin ne.
35Ne no pe, Bageyal Bage ɗiŋnedin jan go: Ne jo̰ aŋ vyale mbi ya uzi, aŋ saŋge mbi aŋ go̰r no ɗe, mo me, mo mbo in dṵṵl ge mo kaŋ kerra ge seŋgre ma ne mo zina ne.»
Mḛreya ge Samariya ma ne Ursalima ne
36Bage ɗiŋnedin jan mbi go: «Mo ndu dasana, kṵ sarya Ohola ma ne Oholiba pal, bḛ nama kaŋ kerra ge seŋgre kakatak ma pe zum! 37Ago a ka fí ne ta, a ka kan naa swama se. A ka mbo ɓan ne nama kaŋ sḭḭm ma, uwale, ko nama vya ma ge a ne tó nama ne mbi pe ma puy ɗe, a ka mbo tyare nama hon nama. 38Ndi, nama kaŋ ge a ne gwan ke mbi no uwale, dam mbe go, a há mbi zok ge mbegeya seŋgre, a ndi mbi dam ɗigliya kaŋ senna no me. 39Swaga ge a ne tyare bama vya ma hon kaŋ sḭḭm ɗe, dam mbe go, a wá mbi zok ge mbegeya zi, a há na seŋgre no. Ndi me nama kaŋ ge a ne ke mbi zok pul zi gale.
40Uwale, a dó temel mbo tol naa sonmo ne swaga ge kaal ma ya. Swaga ge a ne za̰ tolla, a mbo ya nama ta. Nama sḛ ma so̰ ta uzi, a ka̰ aliŋ ma bama ndwara ma zi no, a pare ta ne bama kaŋ ke kale ma no ne nama pe. 41Mo gá katɗa kaŋ fiya ge siŋli ma go, mo syare dukan ma ne idir ge ne mbi pe ma tabul pal no me. 42Naa gḛ a mbo ya, naa ge a ne iigi ta ne fare a̰me pe to ma ka̰l ka ndageya digi ne, naa ge ne babur pul go ma pehir ma hini hini a dé ya swaga mbe go me. Naa mbe ma pá fool ge nama tok ma zi, a é balme ge siŋli ma nama pala ma digi no me. 43Mbi jya̰ tene go: ‹Ko na ge ne lwage ya na kaya kerra zi puy, gwan gwan fí tene ne iya! 44Naa sonmo gwan mbo na ta dimma ne gwale kaya go iya! Naa mbo Ohola ma ne Oholiba, naa zaab ge kaya mbe ma ta go mbe no.› 45Amma naa ge dosol ma mbo kun nama sarya, sarya kunna ge naa ge ne fí ta ma, ne naa ge ne hun siya ma ne. Ago nama sḛ ma naa ge ne fí ta ma, ne naa ge ne kan swama se ma ne.»
46Ago Bageyal Bage ɗiŋnedin jan go: «Mwale me ɓase ma ya nama pal, a ho̰ nama vo, a pá nama me. 47Ɓase ma mbá nama ne njal, a kace nama se ne kasagar, a hṵ nama vya ge sonmo ma ne ge zaab ma, a e ol nama zok ma ta tilla uzi me. 48Mbi mbo tele kaŋ ge seŋgre be ge kerra suwal diŋ, naa zaab ma pet a mbo kwa, go no, a mbo bole nama kaŋ kerra ge seŋgre mbe to bat. 49A mbo e dṵṵl ge aŋ kaŋ kerra ge seŋgre mbe ma ne aŋ pal, aŋ mbo in dṵṵl ge sone ge aŋ sḭḭm ma ne, go no, aŋ mbo kwa go, mbi Bageyal Bage ɗiŋnedin ne.»
Currently Selected:
Ezekel 23: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
