Ezekel 24
24
Ursalima kaja̰le ge ne wa̰ dele ne
1Del lamaɗo go̰r ge paal ne go, na dam wol ge saba wol ne go, Bage ɗiŋnedin jan mbi go: 2«Mo ndu dasana, njaŋge dam mbe no ne mo sḛ pe. Ago a dam mbe no go tem, gan ge suwal Babilon ne ba ɗage ya det Ursalima. 3Ke fare sḭ mbe no ge naa ge be za̰ wak to mbe ma no ta, jya̰ nama go, Bageyal Bage ɗiŋnedin jan go:
E kaja̰le, ka̰ mam na zi wiya.
4Ka̰ duur ma na zi,
duur ge kwaɗa ma jyan,
koo wul ma, ne kaŋ biyal ma,
wi na wak ne kal ge siŋli ma,
5tá gii ge siŋli a̰me,
mo kote uwara#24:5 Ne wak ibriniya zi njaŋge go a kote kal ma na pe zi, amma na pe wanna kwaɗa a go a kote uwara kaja̰le pe zi ne sḭ duur pe. kaja̰le pe zi,
na zé digi kwaɗa,
ko kal ma puy nama sḭ.
6Ne no pe, Bageyal Bage ɗiŋnedin jan go:
Woo, suwal ge ne hun siya,
na ge na piibiya ne á to.
Abe duur ne kaja̰le zi ya uzi ɗu ne ɗu,
a be ne uusi baare ta to.
7Ago swama ge ne ka̰ na suwal diŋ gale ya go,
ka̰ na njal ge pala kwaya̰l pal,
be kan na suwar zi to,
suwar be kan na pal to#Pe 4:10, Ayu 16:18..
8Mbi ya̰ swama ge ne ka̰ njal ge pala kwaya̰l pal mbe
be ge kan suwar na pal,
ne da pe, na jage mbi pore digi,
mbi ba gele tene ne nama pe.
9Ne no pe, Bageyal Bage ɗiŋnedin jan go:
Woo, suwal ge ne hun siya,
mbi mbo sin swaga vyan kavaar ge ga̰l.
10Kote uwara ma ya,
dṵ ol digi,
swá duur mbe kwaɗa,
ka̰ kaŋ vit gii ma na pal,
tí kal ma uzi hohorom.
11E kaja̰le pul baŋ ol pal,
na zwamle ol kekeŋ, na zó kaal,
na pisil ge ne na pul zi na orbe uzi.
12A lwage ta ne baŋ, piibiya ge na ne mbe ol ndage na uzi to bat. 13Pisil ge ne mo ta hat mo ya seŋgre. Ne jo̰ mbi ɓyare go mbi hat mo yaɗat, amma mo be vin hat yaɗat to. Mo mbo gwan hat yaɗat to ɗiŋ mbi á mbi pore juliliya mo pal gale ɓya. 14A mbi Bage ɗiŋnedin, mbi jya̰ ne, mbi mbo ke na ŋgat. Mbi mbo ya̰ fare a̰me ɗu kale uzi to, mbi mbo kat ne kwa a̰se to, mbi mbo gwan’a se to me. A mbo kun mo sarya viya̰ mborra ge mo ne, ma ne kaŋ kerra ge mo ne ma pal, ka̰l ge Bageyal Bage ɗiŋnedin ne.»
Kḭḭmi ge anabi Ezekel ne
15Bage ɗiŋnedin jan mbi go: 16«Mo ndu dasana, ndi, mbi her mo ndu ge ne ke mo sḛ tuli. Mo mbo ke kḭḭmi ne na pe to, mo mbo sun tene to, mo mbo fyal na to me. 17Ka sṵ tene ɗimil zi, ke kḭḭmi to. Vwá mo kadmul mo pal, pá mo tyarko mo koo zi, kulbi mo duwa̰r pe ndwara ke kḭḭmi to, za kaŋzam ge swaga siya mbe ne to.»
18Mbi jan ɓase ma fare cya̰wak, gasamal mbi gwale su me. Dam ge kwap ge go cya̰wak, mbi ke tem dimma ne a ne ho̰ mbi wak go. 19Naa jan mbi go mbi wa̰ bama kaŋ ge mbi ne ke mbe pe. 20Mbi jan nama go: «Bage ɗiŋnedin jya̰ mbi go, 21mbi jya̰ Israyela vya ma go, Bageyal Bage ɗiŋnedin jan go: ‹Ndi, mbi mbo hat mbi gúr swaga ɓol ta seŋgre, na ge aŋ ne uware ta ne na, ge ne ke aŋ sḛ tuli, ge aŋ laar ne wa̰ na. Aŋ vya ge sonmo ma ne ge zaab ma ge aŋ ne ya̰ nama suwal diŋ ya ma pore mbo zam nama.› 22Aŋ mbo ke dimma ne mbi Ezekel mbi ne ke go. Aŋ mbo kulbi aŋ duwa̰r pe ndwara ke kḭḭmi to, aŋ mbo zam kaŋzam ge swaga siya mbe ma ne to me. 23Aŋ mbo vwal aŋ kadmul ma aŋ pala ma digi, aŋ par aŋ tyarko ma aŋ koo ma zi, aŋ mbo ke kḭḭmi to, aŋ mbo fyal to me. Amma aŋ mbo ka ɗwarra aŋ ya̰l ma zi, ndu ge daage mbo gá sun tene na kon ta. 24Ezekel mbo kat aŋ ta dimma ne kaŋ ŋgayya go. Kaŋ ge na sḛ ne ke ma pet, aŋ mbo ke go no me. Swaga ge kaŋ mbe ma ne mbo ɗage ya kerra, aŋ mbo kwa go, mbi Bageyal Bage ɗiŋnedin ne. 25Mo ndu dasana, za̰ gale, dam ma mbo ya go, mbi mbo ame nama kaŋ ge a ne uware ta ne na, ne nama laar saal, ne nama kaŋ pare ta, ne nama kaŋ ge a ne ke bama sḛ tuli ne na, ne nama kaŋ ge laar wanna, nama vya ge sonmo ma ne ge zaab ma. 26Dam mbe go, ndu a̰me ge ne gá ne ndwara mbo mbo ya waage mo fare, 27dam mbe go no, swaga ge ndu ge ne gá ne ndwara mbe ne mbo yan ja, mo wak mbo hage digi, mo jan fare, mo mbo gwan kat gisil to. Mo mbo kat kaŋ ŋgayya ne nama pe, go no, a mbo kwa go, mbi Bage ɗiŋnedin ne.»
Currently Selected:
Ezekel 24: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
