Ezekel 22
22
Kaŋ kerra ge seŋgre ge Ursalima ne ma
1Bage ɗiŋnedin jan mbi go: 2«Mo ndu dasana, kṵ sarya suwal ge ne hun siya mbe no pal. Ŋgay na na kaŋ kerra ge seŋgre kakatak ma pet. 3Jya̰ na go: Bageyal, Bage ɗiŋnedin jan go: Mo suwal ge mo naa ne hun siya ne mo diŋ ne, go mbe no, a zwal ya dam ge yál bama pal. A ke kaŋ sḭḭm ma, a go no, a hat suwal seŋgre no. 4Ne swama ge mo ne ka̰ na se pe, mo há tene sone, ne kaŋ sḭḭm ge mo ne ke nama ma pe, mo há tene seŋgre. Ne pe no, mo zwal mo dam ma ja zi, mo det ja mo del ma wak aya go. Go no, mbi mbo saŋge mo kaŋ cotɗa ge pehir ge ɗogle ma ne, suwal ma pet a mbo gá ke mo kalam. 5Naa ge gwa ma, ne ge kaal ma mbo gá ndil mo kaŋ senna, ago mo há tene seŋgre, mo ya bataraŋ ge ɓaŋlaŋ zi.
6Ge mo diŋ, ga̰l ge Israyela ne ma, ndu ge daage hun siya pool ge na ne pal#1Gan 21:8, 2Gan 21:16, 24:4.. 7Ge mo ɗiŋ, naa ndil bá ma ne ná ma kaŋ senna, a ka ke naa ge gwasal ge ne aŋ buwal zi ma yál, a ka e kya̰le ma ne kumur ma njot yál me#22:7 Ne eya ge Dok ne zi, Dok tele kaŋ kerra hir mbe no tele. Ndi Wat 20:12, 22:20-23.. 8A ndil mbi zok ge mbegeya kaŋ senna, a ka sen mbi dam ɗigliya ma me. 9Ge mo diŋ, naa a̰me ma syal bama kaam koo, a ba ka e nama hun siya. Ge mo diŋ uwale, naa mbo zam kaŋ sḭḭm ma ge njal ma pala digi, a ke kaŋ ge bataraŋ ma mo diŋ#18:6,11,15.. 10Ge mo diŋ, a fí da ne bama bá ma gwale ma, a ka ɓan ne naa zaab ge ne swama bama ta ma. 11A̰me ma fí da ne bama kaam ma gwale ma, a ka ke kaŋ ge seŋgre kakatak, a̰me ma ka ɓan ne bama tisi ma, ndwara go bama vya ma gwale ma, ne bama bá vya ge gwale ma me, mo ɗiŋ. 12Ge mo diŋ uwale, naa a̰me ma ame bware a ba ka mbo hun siya, a̰me ma ka hon gobso ndwara ɓol mam pal, a ka ke bama kaam yál ndwara maŋge nama kaŋ ma, amma aŋ ka vyale ne mbi, ka̰l ge Bageyal Bage ɗiŋnedin ne.
13Ndi, mbi mbo fol mbi tok ne aŋ kaŋ ɓolla ge ne na viya̰ go to ma pe, ne siya ge aŋ ne hun ne aŋ buwal zi ma pe me. 14Swaga ge mbi ne mbo ɗage ho̰l ja aŋ pal, aŋ mbo kat ne pool ge wanna ta ko’a? Swaga ge mbi ne jan fare, mbi ke na ke ŋgat. 15Mbi mbo ɓarse aŋ se pehir ge ɗogle ma buwal zi, mbi mbo dasare aŋ se suwal ma go. Aŋ kaŋ kerra ge seŋgre ma, mbi mbo tele nama be kerra dedet aŋ buwal zi. 16Aŋ há ta seŋgre pehir ge ɗogle ma buwal zi, amma aŋ mbo kwa go, mbi Bage ɗiŋnedin ne.»
17Bage ɗiŋnedin jan mbi go: 18«Mo ndu dasana, Israyela vya ma gá ne mbi ndwara zi dimma ne suwa suwam go. A dimma ne fool ŋgirma, ko ne fool kaal, ko ne walam, ko ne byaŋlar kirgiya kanna ge suwa zi ɗeseya go#Irm 6:28-29, Mal 3:2-3.. 19Ne no pe, mbi Bageyal Bage ɗiŋnedin, mbi jan go, ne jo̰ aŋ pet aŋ saŋge ya dimma ne suwa suwam go ɗe, ndi mbi mbo kote aŋ mwaɗak ge Ursalima diŋ. 20Dimma ne naa ne kote fool kaal ma, ne fool ŋgirma ma, ne walam ma, ne byaŋlar ma kanna suwa zi ndwara jage ol na pe zi ɗeseya go, go no me, mbi mbo kote aŋ ya mbi pore juliliya zi, mbi mbo goole aŋ ya zi, mbi mbo ɗese aŋ se. 21Mbi mbo kote aŋ pala ya digi, mbi mbo jage ol ge mbi pore juliliya ne aŋ pal, mbi mbo ɗese aŋ se Ursalima diŋ. 22Dimma ne fool kaal ne ɗese se suwa zi go, go no me, aŋ mbo ɗese se ge Ursalima diŋ. Go no, aŋ mbo kwa go, na mbi Bage ɗiŋnedin mbi ka̰ pore juliliya ge mbi ne ya aŋ pal ne.»
23Bage ɗiŋnedin jan mbi go: 24«Mo ndu dasana, jya̰ suwal Ursalima go, na suwal ge yaɗat to ne, dam pore juliliya zi, be ɓol mam swarra to. 25Na anabi ma naa ge ne vwal wak dagre vḛne fare suwal diŋ ma ne. Dimma ne sonne ɗaŋgeya ne kacage na kaŋ ge na ne wan go, a hun naa, a ka maŋge kaŋ gan ma ne kaŋ kwaɗa ma, a ka zuli kumur ma se suwal diŋ. 26Na naa ge tuwaleya ma yele mbi eya ma pala, a ndil mbi kaŋ ge mbegeya ma senna. A varse kaŋ ge mbegeya ma ne kaŋ ge be mbegeya to ma buwal to. A hate naa kwa varse kaŋ ge harcal ma ne kaŋ ge be harcal to ma buwal to, a ndil mbi dam ɗigliya solom, mbi gá ya kaŋ senna nama buwal zi. 27Na ga̰l ma gá ne na diŋ dimma ne bagomso ne kacage na kaŋ ge na ne wan na ma go, a hun siya, a ba ka harge kaŋ ma. 28Na anabi ma lar fare pala, a ka ɓol daalam ge hale ma, ne waage fare ge ne na viya̰ go to ma. A ka jan go: ‹Bageyal, Bage ɗiŋnedin jan go›, e no ɗe, Bage ɗiŋnedin be jan fare to#13:10-16.. 29Naa ge ne suwal diŋ ma ka da ne fare kerra ge pool ma pe, ne syala kerra pe, a ke a̰se ma ne naa ge woɗegeya ma yál, a ka ke naa ge gwasal ge ne ka mbay ma yál be ge a kun nama sarya ne na viya̰ go to. 30Mbi ɓyare ndu a̰me ne nama buwal zi ge na ba sin gulum ge ne gū se digi, ge na mḛ gulum pala digi ne suwal pe, ne da pe na kaage mbi burmi na uzi to. Amma mbi be ɓol ndu ɗu to. 31A go no, mbi ka̰ laar ol ge mbi ne nama pal no. Mbi burmi nama uzi ne ol ge mbi pore juliliya ne no. No mbi pot nama nama kaŋ kerra ma. Ka̰l ge Bageyal Bage ɗiŋnedin ne.»
Currently Selected:
Ezekel 22: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
