Ezekel 21

Mḛreya ge suwal Ursalima ne

1Bage ɗiŋnedin jan mbi go: 2«Mo ndu dasana, saŋge mo ndwara le mbii, gace fare ge suwal ge mbii ge pal, waage fare ge murum ge ne suwal ge mbii ge ne pal. 3Jya̰ murum ge ne suwal ge mbii ge ne go, na za̰ fare ge Bage ɗiŋnedin ne. Bageyal, Bage ɗiŋnedin jan go: Ndi, mbi mbo jage ol digi aŋ buwal zi, mbo ɗar uwara twagal ma ne uwara ge fiyal ma uzi kakaɗak. Ol mbe mbo piri to bat, mbo til naa pet, ne mbii ɗiŋ mbo kuu. 4Go no, ndu ge daage pet mbo kwa go, na mbi Bage ɗiŋnedin mbi dṵ́ ol mbe digi ne, mbo piri to bat.» 5Mbi jan go: «Ayay, Bageyal, Bage ɗiŋnedin, a jan ne mbi go, mbi te be bage ne jan fare sḭ ma ne to’a?»

6Bage ɗiŋnedin jan mbi go: 7«Mo ndu dasana, saŋge mo ndwara le Ursalima pal ya, gace fare swaga tuwaleya ma pal, waage fare suwal Israyela pal. 8Jya̰ suwal Israyela go, Bage ɗiŋnedin jan go: ‹Ndi, mbi mbo ya go mo pal, mbi mbo pwat mbi kasagar ne na vum zi ya zum, mbi mbo syal naa ge dosol ma ne naa ge sone ma ne mo go uzi. 9Ne mbi ne syal naa ge dosol ma ne naa ge sone ma ne mo go uzi pe, da ne pe, mbi pwat mbi kasagar ne na vum zi ya zum no naa pal pet, ne mbii ɗiŋ mbo kuu. 10Naa pet a mbo kwa go, na mbi Bage ɗiŋnedin, mbi pwá mbi kasagar ne na vum zi ya zum ne, mbi mbo gwan ne na zi to bat.›

11Mo ndu dasana, sṵ tene, yo̰re tene, ka sun tene nama ndwara go. 12Swaga ge a ma̰ ele mo ya go: ‹Mo te sun tene gyana ɗaa?› Gwa̰ ne nama janna go: ‹Ne fare ge ne mbo ya pe. Dulwak ma mbo kun ɓat, tok ma mbo iyal tiliŋ, pool mbo á, koo-rusu ma mbo hal ɓuɓuli. Ndi mbo ya go, a ŋgat mbo ke,› ka̰l ge Bageyal, Bage ɗiŋnedin ne.»

Kasagar ge Bage ɗiŋnedin ne

13Bage ɗiŋnedin jan mbi go: 14«Mo ndu dasana, waage fare mbe no, Bageyal jan go:

Ndi kasagar, kasagar fyarra,

gurgiya mbambal.

15Da ne purra pe, a fya na no,

da ne serra pe, a gurgi na no.

Nee da ne pool ke laar saal

ne Calaŋ plando ge mbi vya ne ɗaa?

Kasagar kun uwara pe gidmiso uzi#21:15 Varseya mbe pe ge seɗe na zwagreya haŋle, maktub ge may ma kun na uzi. Na sḭ go, ko gan puy kasagar mbo ya̰ na to..

16A ho̰ na go, a gurgi na

ne wanna tok go swala pe.

A fya kasagar, a gurgi na,

ne hon na bage hun siya tok go pe.

17Mo ndu dasana, fya digi, sṵ tene!

Ago a pwa kasagar mbi naa ma pal,

ge ga̰l ge Israyela ne ma pal pet.

A ka̰ ta kasagar wak zi ɓanna ne mbi naa ma.

Ne pe no, fó mo koo wul pe.

18Ago, a kugiya ne.

Kadɗa calaŋ plando ge gan ne

ge kasagar ne ndil na kaŋ senna burmi ya,

a ma kaŋ mbo ke ne ɗaa?

Ka̰l ge Bageyal, Bage ɗiŋnedin ne.

19Mo ndu dasana, waage fare,

fó mo tok,

kasagar dwage syalla ndwara azi, ko ataa,

no a kasagar ge hun siya ne.

A kasagar ge hun siya gḛ

ge ne syal naa pet ne.

20Ne pe no, dulwak ma kun ya ɓat,

naa ge detɗa ma zuli ya se ceɗed.

Ge nama viya̰ wak ma go pet,

mbi é kasagar ge pur naa pe ya go.

Ago, a gurgi na da ne serra pe,

a fya na da ne hun siya pe.

21Ɗage digi, mo ge wak zwama,

kace tok matoson pal, ne tok magul pal!

Saŋge mo ndwara swaga ma go pet.

22Mbi me, mbi fol mbi tok,

mbi mbo á mbi laar ol,

a mbi Bage ɗiŋnedin jya̰ ne.»

Kasagar ge gan Babilon ne suwal Ursalima pal

23Bage ɗiŋnedin jan mbi go: 24«Mo ndu dasana, ɓa viya̰ ma azi ne mborra ge kasagar ge gan ge Babilon ne ya pe. Viya̰ mbe ma jwak, nama ɗage da ne suwal ge ɗu ge ya. Ne viya̰ mbe ma pe ya, e kaŋ ŋgayya ge ne ŋgay viya̰ ge mbo suwal mbe ma ya. 25Ɓa viya̰ a̰me ɗu ge kasagar ba mbo ya suwal Rabba ge Ammon ma ne go, ge may ba dol mbo ya suwal Ursalima ge ne ve ne gulum ga̰l ge Yuda ne go me. 26Gan ge Babilon ne mḛ ya viya̰ ga̰a̰r ge viya̰ mbe ma ne ɗage ne ya go ndwara e waɗal, ka kucigi na kajamle ma digi, ka ele fare ne na kaŋ sḭḭm ma ta, ka ndil kavaar ma njeel me. 27Kajamle ge ne ŋgay go daŋ dé Ursalima ya na tok matoson zi. ‹Tyare gamla, pya̰ me digi ndwara pur naa pe uzi. Mbo e kaŋ ge mbal pore ma ge viya̰ wak ma go, mbo tor suwar digi ver suwal se, ne al tuul ma me.› 28Ge naa ge ne Ursalima go ma ndwara zi, daŋ ge ne dé Ursalima pal mbe baŋ yak, ne da pe, a ke nama wak tuli#21:28 Ursalima ke wak tuli ne suwal Masar go, na sya na ko̰r kadɗa Babilon ma mbo ja det bama. ndwara sya nama ko̰r. Amma gan ge Babilon ne dwat nama pala da ne sone ge nama ne ke ma, ke nama kwarra go nama mbo mbo mo̰r zi. 29Ne no pe, Bageyal Bage ɗiŋnedin jan go: Ne jo̰ aŋ dwat mbi pala ne aŋ ya̰l kerra, ne benna ge aŋ ne ben aŋ sone ma zum pe, ndwara e aŋ sone ma kwarra aŋ kaŋ kerra ma zi pet. Ne jo̰, aŋ dwat mbi pala ɗe, a ŋgat a mbo abe aŋ mbo mo̰r zi. 30Mo ga̰l ge Israyela ne, mo ndu ge hun siya, ne bage sone. Mo dam mbo ya go, swaga mbe go, mo sone ma pe mbo á. 31Bageyal Bage ɗiŋnedin jan go: A ndage na kadmul ya uzi, a fage na balme ya uzi. Kaŋ ma mbo er, ndu ge be a̰me pe to, pala mbo her digi, ndu ge pala digi, pala mbo gwan se. 32Burmiya, burmiya, mbi mbo burmi swaga. Kaŋ mbe mbo ke to, ɗiŋ bage ne mbo ya kun sarya, na ge mbi ne ho̰ suwal ne na tok go mbo ya ɓya.»

Detɗa ge Ammon ma ne

33Mo ndu dasana, waage fare, jya̰ Ammon ma ne cotɗa ge a ne cot swaga pe go, Bageyal, Bage ɗiŋnedin jan nama fare ne. Jya̰ nama go: «Kasagar ya go jejew, a pwat kasagar ya go ne purra pe, a gurgi na gurgi mbambal ne serra pe me#Irm 49:1.. 34Ge daalam ge aŋ ne ɓol ge hale ma ne aŋ waɗal ge vuuɗiya mbe ma no zi, kasagar mbo kun naa ge ya̰l ma ne naa ge sone ma ka̰l uzi. Dam ma mbo ya go, mo ya̰l ma pe mbo á. 35Se no, gwa̰ me ne aŋ kasagar ma nama vum ma zi. Ge aŋ suwal ge a ne dó aŋ go, aŋ suwal ge tolla go, mbi mbo kun sarya aŋ pal. 36Mbi mbo sot mbi laar ol ya aŋ pal, mbi mbo kan ol ge mbi pore juliliya ne ya aŋ pal, mbi mbo ɓyan aŋ ge naa ge dale ma tok go, ge naa ge ne ha̰le ne burmiya pe ma tok go. 37Ol mbo ɗaabe aŋ uzi, aŋ swama ma mbo gá sorra se vit ge suwal diŋ, ndu mbo gwan dwat ne aŋ fare dḛ to bat, a mbi Bage ɗiŋnedin jya̰ ne.»

Currently Selected:

Ezekel 21: FGN2013

Highlight

Copy

Compare