Temel kerra ma 28

Bulus ge til Malte zi

1Swaga ge i ne má ya mwaɗak ɗe, i za̰ go til mbe a tol na Malte. 2Naa ge ne ka ne til mbe go ma ame i kwaɗa ge be to, a mbar ol jijik, a e i katɗa na wak go, ne da pe mam swa swa, swaga ka iyalam. 3Swaga ge Bulus ne goole wara fiya̰l kan ol zi, bom zut ne zi ya ne ol hogeya pe, fiŋli tene na tok zi. 4Swaga ge naa ge suwal ma ne kwa kavaar mbe loogeya na tok go, a jan ta go: «Fareba, ndu mbe no a ndu ge hun siya ne, má da ne mam se ya, amma dosol ge dok ne ya̰ na katɗa ne ndwara to.» 5Amma cigi kavaar mbe ol zi ya, a̰me ke na to bat. 6A ka dwat go na ma̰ ɗage na, ko na ma̰ det suya. Swaga ge a ne da̰re kaal swak a ne kwa go a̰me be ke na to ɗe, a er fare, a jan go: «A dok a̰me ne#Tkm 14:11.!»

7Swaga mbe ziyar go gwa, ga̰l ge til mbe ne yàl ka go, na dḭl Publiyus. Ndu mbe ame i na diŋ, hon i swaga fiya, ke i gwasal diŋ dam ataa. 8Publiyus bá ka fiya se moy, ka da ne hare, njoo ka ŋgwate na me. Bulus wat na ta zi ya, ke kaɗeya, ne é na tok na pal, na sḛ zon. 9Swaga mbe go no, naa ge moy ge ne til mbe zi ma mbo ya na ta, a ɓol zonna. 10A hon i hormo gḛ ge be to, swaga mborra go, a hon i kaŋ ge daage pet ge i ne ɓyare ne viya̰ pe.

Detɗa ge Bulus ne ya Roma go

11Go̰r saba ataa go, i hé fak ga̰l a̰me ge suwal Alezandrewus ne, na ge ne á somor pala swaga mbe go. Fak mbe dḭl «Dyoskuroy#28:11 Dyoskuroy: Na sḭ go bumurma. Nama dḭl Kastor ma ne Polluz, a dok Zees vya ma ne. Ne maana ge Grek ma ne zi, a dok ge ne koy naa ge ne har ne fak ma ne ne.». 12I det ya til ga̰l Surakusay go, i ke dam ataa swaga mbe go. 13Ne swaga mbe go, i her til kiya̰r fo̰yya ɗiŋ i det ya Reggiyo go. Dam ge kwap ge go, saam ge mbii ge her kwalla ya, i her fak, i ke dam azi mam pul go i ba ɗage det ya Puzzol go. 14I ɓol ná vya ma swaga mbe go, a kaɗe i go i ka ne bama ɗiŋ dam ɓyalar. A go no, i dé suwal Roma ya no. 15Swaga ge ná vya ge ne suwal Roma ya ma ne za̰ go i mbo ya go ɗe, a mbo i ndwara zi ya, ɗiŋ suk ge Appiyus ne ya, ne zok gwasal ge ataa ma ya. Swaga ge Bulus ne kwa nama, gwan ne gugu hon Dok, na haŋgal e se. 16Swaga ge i ne dé ya Roma diŋ, a hon Bulus swaga dwamma hini, asagar a̰me ka koy na.

Bulus waage fare ge Dok ne suwal Roma go

17Dam ataa go̰r go, Bulus tol Yuda ma ga̰l ma ya na ta. Swaga ge a ne kote, jan nama go: «Ná vya ma, ne jo̰ mbi be ke fare a̰me nee ɓase ma ta to, ko eya ge nee bá ma ne ta to puy ɗe, a wa̰ mbi daŋgay no ne Ursalima ya day, a ɓya̰ mbi ya Roma ma tok go no. 18Swaga ge a ne hale mbi fare pe, a ɓyare go bama kan mbi digi, ne da pe a be ɓol fare a̰me ge ne mbya gene mbi siya zi to. 19Amma Yuda ma gage ta no, a go no mbi jya̰ no go a mbo ne mbi ya Kaysar ndwara se, ago mbi ne dwatɗa ge kaŋge mbi ɓase ma to. 20Da ne pe no, mbi ɓyare no go mbi ɓo aŋ mbi ba jan aŋ fare. Ago mbi ne zul ma ne mbi tok zi no da ne jobreya ge Israyela ne pe.» 21A jan na go: «I be ɓol maktub a̰me mo pal ne suwal Yahudiya ya to, ko ná vya ge a ne mbo ya i ta go ma, a be jan i mo fare, ko fare a̰me ge sone mo pal to. 22Amma i ɓyare go mo jya̰ i dwatɗa ge mo ne. I kwa kwa go, swaga ge daage go pet naa gage ta ne viya̰ ge mo ne he na mbe no.»

23A ne nama za̰ ta dam a̰me pal, a mbo ya ɓol na na swaga dwamma go gḛ waɗe ge zaŋgal. Swaga wan nama fare pe go, ka jan nama fare ge muluk ge Dok ne ne. Ne cya̰wak ɗiŋ mbo gasamal, ne eya ge Musa ne ma ne maktub ge anabi ma ne ta ka e nama kwarra go nama jan fare ge Jeso ne. 24Naa a̰me ma vin na fare ge ne jya̰, ge may ma hon fareba to. 25Swaga mborra go, ne jo̰ nama ka̰l be det ya ɓan dagre to, Bulus jan nama go: «Fare ge O̰yom ge Harcal ne jya̰ aŋ bá ma ne anabi Isaya wak zi da ne na viya̰ go. 26Jya̰ go:

‹Mbo ɓol naa mbe ma, mo jan nama go:

Aŋ mbo ka za̰ya, amma aŋ mbo wan na pe to,

aŋ mbo ka ndilla, amma aŋ mbo kwa na pe to.

27Ago ɓase mbe ma dulwak togreya,

a gisi bama togor ma ya digi,

a dame bama ndwara fa̰ ma ya digi,

ne da pe, na kaage bama ndwara fa̰ ma kwa swaga to,

bama togor ma za̰ fare to,

bama wá̰ fare pe to me,

na kaage bama saŋge ta ya se ɗo,

mbi ba zon bama to#Isa 6:9-10, Mat 13:14-15. .›

28Kwa me go, máya ge Dok ne mbe no a teme na ya mbo pehir ge ɗogle ma ta#Kmb 67:3, Luk 3:6., nama sḛ ma, a da ne pool ge za̰ na.» [29Swaga ge Bulus ne jya̰ fare mbe no, Yuda ma ɗage mborra, a ka ɗaŋgre ta gḛ ge be to.]#28:29 Swaga mbe no ne maktub ge zaŋgal a̰me ma zi to.

30Bulus gá katɗa zok ge na ne wa̰ mbe zi ɗiŋ del azi. Ka ame naa ge a ne mbo ya ɓol na ma pet. 31Ka waage muluk ge Dok ne naa ta, ka hate naa fare ge Bageyal Jeso Kris ne ndaar kaka be ge ɓol teleya.

Currently Selected:

Temel kerra ma 28: FGN2013

Highlight

Copy