Temel kerra ma 27

Temeya ge Bulus ne mbo Roma

1Swaga ge a ne ho̰ wak go i he fak ga̰l mbo suwal Italiya, a hon Bulus ma ne daŋgay ge may ma ge asagar ma ga̰l Juliyus tok go, na sḛ ka asagar ge ne ke temel hon gan ga̰l ma buwal zi. 2I ndé fak ga̰l ge ne mbo suwal Adramittinus, na ge ne mbo suwal Asiya ya. I har mam pul zum ya, Aristarkus ndu ge Makedoniya ge suwal Tesalonika ne ka poseya ne i. 3Dam ge kwap go, i det ya suwal Sidon go. Ne jo̰ Juliyus ka ke Bulus kwaɗa, hon na viya̰ na mbo na kondore ma ta, ne da pe nama ba ke na kaŋ ge na ne ɓyare. 4Swaga ge i ne ɗage ne suwal mbe go, i he til Chipre kiya̰r fo̰yya, ne da pe saam ka ya i ndwara zi. 5Swaga ge i ne há maŋgaɗam ga̰l yuwam ge Kilikiya ne, ma ne ge Pamfili ne, i det ya Mura go, na ge ne suwal Lukiya. 6Swaga mbe go, asagar ma ga̰l ɓol fak ga̰l ge suwal Alezandrewus, ka mbo suwal Italiya, é i na go. 7I ke dam ma gḛ mam pul go, ne jo̰ i ka fo̰y lalam, a yál ne yál i ɗage det ya suwal Nide go no. Ne jo̰ saam ka ya i ndwara zi, i be ɓol viya̰ ge her mam pul zum ya to, i he wakal zi no ɗiŋ det ya suwal Salmone, na ge ne til Krete zi. 8I her wakal zi jajyan, yál ne yál gale i ba ɗage det ya gobol pala ge a ne tol na «Swaga yabe fak ge siŋli» na ge ne suwal Lasaya ziyar go gwa go.

9Ne jo̰ dam ma kale ya gḛ, swaga mborra ne fak saŋge haŋle, ago saba asiyam#27:9 Saba asiyam: A dam vḛso ge poreya ne ge Yuda ma ne dḭl ne. Ndi Lev 16:29-34. A ka ke na saba twak pul ga̰l ma ne saba le ɗu somor buwal zi. kale ya, Bulus jan go: 10«Kondore ma, mbi dwat go fo̰yya ge nee ne mbe á tuli ma̰ to, a be ɗeŋgo ne fak ma ne kaŋ ge ne na pul go ma pe to, amma ne nee sḛ ma pe me.» 11Amma asagar ma ga̰l e na saareya bage ne njaŋge ne fak ga̰l ma ne bage fak pal, be e na saareya fare janna ge Bulus ne pal to. 12Ne jo̰ gobol pala swaga e fak mbe kwaɗa ge i kat swaga mbe go ɗiŋ swaga ge sone mbe kale ɓya to ɗe, naa ge ne fak go ma le gḛ a vin go i ɓya̰ fak pala zum mbo suwal Fenika ya, na ge na swaga e fak ma ka le ge mbii ge pe go, ne le kuu ge pe go, ne da pe i ba á somor pala swaga mbe go.

Saam labreya maŋgaɗam ga̰l yuwam pul go

13Saam ɗage la̰yya kwalla ne le mbii ya, a e bama pala zi dwatɗa go bama swaga mbo ma̰ kwaɗa. A zwal walam ge wan fak pala ya digi, a her wakal fo̰yya suwal Krete ziyar go. 14Amma go̰r go swak, saam labreya ge a ne tol «Saam ge ne le kuu ya» ɗage ne til zi ya, ka labre ge be to. 15Saam mbe zwal fak zum ya, ne jo̰ i ne pool ge mḛ saam mbe ndwara zi to ɗe, i ya̰ ta inna saam mbe pe ya. 16I kale til vya a̰me ge a ne tol na Koda ziyar ge mbii ge go. Ne yál yál i ba ɗage her fak vya ge jabso ge ne fak ga̰l ziyar go ma mbo wakal zi. 17Swaga ge i ne gwa̰ ya, naa ge fak ga̰l ma pwat nama ya digi, a vwal fak zi ne táál ma. Ne jo̰ a ka sya vo go saam ma̰ hat mbo hal fak mbe ge le wakal ge suwal Sirte ne ya ɗe, a dol uwara murguli ma vwalla mam se ya dimma ne gyaɗamal go, a ya̰ ta saam pe ya. 18Dam ge kwap ge go, ne jo̰ saam labreya ka pot i gḛ ge be to ɗe, i abe kaŋ ge ne fak go ma kan mam. 19Dam ge ataa go, naa ge ker fak ma ne bama tok zi a ɗage kan kaŋ ge fak ne ma mam. 20I ke dam ma gḛ be ge kwa gyala ma ne guwa̰r ma, ne da pe saam labreya mbe ka gwan labre gḛ ge be to. I gwan kat ne jobreya go i mbo má to bat.

21Swaga mbe go no, naa ge ne fak ga̰l go ma ke ya kaal be ge zam kaŋzam. Bulus ɗage digi mḛya naa buwal zi, jan go: «Kondore ma, aŋ te za̰ mbi ɗo, nee ɗage ne suwal Krete ya to ɗe, nee za̰ yál, ne ban kaŋ mbe ma no te to. 22Se no, wa̰ me aŋ dulwak, ago ndu a̰me ɗu ne nee buwal zi su ma̰ to, a fak ga̰l ban ne ɗeŋgo. 23Ago ɗaal mbe no zi, maleka ge Dok ne, na ge mbi ne ke na temel mo̰r dya̰ tene mbi ta, 24jya̰ mbi no go: Bulus, kaage mo sya vo to! A ŋgat mo mbo gan ga̰l ndwara se ya, ne mo pe, Dok ya̰ naa ge ne fak go ma pet da ne ndwara. 25Kondore ma, wa̰ me aŋ dulwak, mbi da ne hon fareba fare janna ge Dok pal, fare ge na sḛ ne jan ke ke ŋgat. 26Amma i te ya mbo halla ge til a̰me pal.»

27No a ɗaal ge wol para anda ne ge saam ne pot i ne maŋgaɗam ga̰l yuwam Adriya pul go ne. Ɗaal ga̰l zi, naa ge ke fak ma ka dwat go i mbo ne go wakal zi. 28A dol táál ŋgay ɗugul, a ɓol go mam mbe ɗugul mbo kaŋ ge meter tapolɗu para ɓyalar go. Ta zḛ ya nde, a gwan dol táál, a ɓol go na ɗugul mbo kaŋ ge meter wara azi para tiimal go. 29Ne vo ge go i fak mbo pel njal a̰me, a kan walam ge wan fak ga̰l se ma anda mam se, a gá da̰re swaga ko̰yya. 30Amma naa ge ker fak ma ka ɓyare viya̰ ge sya ya ne fak ga̰l go, a dol fak vya ge jyale mam se ne son go bama zwal walam ge ne wan fak ga̰l se zum ya. 31Bulus jan asagar ma ga̰l ma ne asagar ma go: «Kadɗa naa mbe ma kat fak ga̰l go to, aŋ má ma̰ to bat.» 32Swaga mbe go no, asagar ma vyan ge ne vwa fak vya mbe, a ya̰ sorra mam ya. 33Swaga ge swaga a ne ka da̰re swaga ko̰yya, Bulus kaɗe naa pet nama za kaŋzam, jan go: «Ma̰ no a dam ge wol para anda ne ge aŋ ne da̰re, be ge zam kaŋzam. 34Mbi kaɗe aŋ, za me kaŋzam, ago a kwaɗa ne máya ge aŋ ne pe, ago ko pala susu myalam ɗu ge ndu a̰me ne ban uzi to.» 35Swaga ge ne jya̰ fare mbe no, he katugum, gwan ne gugu hon Dok nama ndwara go pet, siɗi na se, ɗage zamma. 36Swaga mbe go naa pet a wan bama dulwak, a zam kaŋzam me. 37I ka fak ga̰l mbe go mwaɗak naa kikis azi ne para ware ɓyalar para myanaŋgal. 38Swaga ge a ne za kaŋzam huriya, a abe gḛme ma ne fak go kan mam ndwara foge fak digi.

39Swaga ge swaga ne ko̰y, naa ge fak ma kwa wakal to, amma a kwa gobol pala a̰me kaar pul go, a vin ta go, kadɗa na day day, bama wá ne fak ga̰l mbe na zi ya. 40A sot walam wan fak ma mam se ya, a saa firbo ge ga̰l ge pil fak ma táál ma digi, a vwal ba̰r ge fak ne ma digi fak pala zḛ, a ya̰ ta sorra mbo kaar pala ya. 41Amma a det ya mam pe ga̰a̰r go, fak pala mbo ya yabe kaar pal. Fak pala gá yagleya kaar zi, sḭḭl gá pot fak pe ɗiŋ ka hal na me. 42Asagar ma ɓyare go bama hun daŋgay ma uzi, ne da pe nama ma̰ hat on ɗo, nama má ta. 43Amma, ne jo̰ asagar ma ga̰l ka ɓyare go na má Bulus ɗe, tele nama be ge ke bama dwatɗa mbe pal, jan naa ge ne kwa mam onna ma go nama zó̰ mam, nama ó̰ mbo wakal zi ya, 44jan naa ge may ma go, nama dó ta uwara ma pal, ko ne fak uwara ma pal onna. A go mbe no, naa má mbo wakal zi ya no pet.

Currently Selected:

Temel kerra ma 27: FGN2013

Highlight

Copy